RUT Hwe Rut En Tise Laga Wene 1 - Allah Iak 'Belak Naduk A'ge emin Pobuk A'ge Emin Wusogo Wogenebegei Wene

Ap Elimelekh eiyagai emin o poluk o Moab legesa wene

^1-2 O pageat e, aphwami Israel a’ge onue ’gain onuk logo a’ge mesik ’gain om erlak oruakma re, onuelak ’gain en tenentarok welegesa. Asogo tenentarok oruakhwe re, aphwami Israel a’ge onowi Kanaan di owi yu owi ebano ’berlegat so’boru obouk modok a’bik aga. Eria hegit e, ap mesik a’gul onuk Efrata a’ge onuk Elimelekh owi o Yehuda o kota Betlehem eba welaga. Asogo oruakma, so’boru obouk aga ai en, at ebe emin, ugwe Naomi emin, eiyagai enebe ’biren, Mahlon, Kilyon emin, enemin o poluk aphwami Moab a’ge onowi pam legesa. Legesarik eba oruakma,

³ at Elimelekh ebe waraga. Asogo waragama, at hwe Naomi eiyagai enebe ’biren eriano nak emin welegesa.

⁴ Asogo welat, is ap ’biren eriano hwami o Moab a’ge ononuk Orpa emin, Rut emin, wogenebigisarik, 10 tahun oruakma en,

⁵ hwe Naomi eiyagai ap enebe ’biren eriano arat waregesayat. Asogo waregesema, at hwe Naomi eiyagai emin, ogun emin, erlakma emategat welaga.

Hwe Rut emin Naomi emin o Betlehem wegesa wene

⁶ Asogo welat, agauwa logon emin oruakma en aphwami logon en e, “Aphwami Israel a’ge enaik ’gain Onuk Logo a’ge en, is di a’ge yu a’ge owi yerigisa a’ge ebe a’bik wogentesimu, elirat no’gwi o,” oluk egesema esa’go hwelegei. Asogo hwelegeirik, ogulani eiyagai onugwami eriano enemin o Moab ukpoluk womogoluk onosum degelogo pegesa.

⁷ Asogo tigisarik, ogulani enemin o Yehuda womogoluk wegesa. Asogo wagalat,

⁸ at Naomi en eiyagai onugwami enebe ’biren eriano disogo mo’gulentesi, “His he’birek e, henielak lo’bok onowi pam togolik lit o. His henebabut op welat an neiyagai waregesa a’ge eriano, nenemin welat opsogoat letnontogu legeptik yogodak ogo an letniogu legep ai ’gela’ge, Nenaik ’gain Onuk Logo a’ge ebabut op en lethentasu lemagat o.

⁹ Nenaik ’gain Onuk Logo a’ge en, his honogunlak welemagoluk, ap logon wokhontuagat o, nogulani,” oluk hau emde motok warenebegei. Asogo mo’gulentesi a’geat de, at Orpa emin, Rut emin, eniak loksogoat nge togulat e,

¹⁰ Naomi disogo mo’guligisa, “Nia. Asogo ogun o. Nis hat hemin aphwami hat a’ge ene’bek louwok o,” oluk mo’guligisa.

¹¹ Asogo mo’gulegisema, at Naomi en e, “Togolik lit o, nogulani. Nopaget an nemin lul epegep. An nemalik logon dagonobumu, his honogunlak wogonobu re, modok mia ai hegep a?

¹² An ap pobuk wogonobu re, modok mia o. Nebe arat sebal egi ai en e, his togolik honowi pam lit o. An nede en e, o yogo hup an ap mesik waiktik neiyagai abat dagenebik holuk,

¹³ his en is enebe enarlue agaihwe elit yerentarok wolom no? Modok mia o. His ap mu a’ge mesik wogonobu erlakma en wolom e, mia o, nogulani. Nenaik ’gain Onuk Logo a’ge en o’borl woknesimu wiagat welegi ai en e, his henebe nede o,” oluk mo’gulentesi.

¹⁴ Asogo mo’gulentesimu, is Rut emin, Orpa emin, e’birek en nge tigisarik, at hwe, Orpa en e, “An togolik nowi pam laik o,” oluk iemalhwe ano hau emde motok wit-wat laga. Asogo a’geat de, at Rut nak e, iemalhwe ano ematek ukpoluk lo ebit en mo egei.

¹⁵ Asogo mo egeimu, at Naomi en e, at disogo mo’gulesi, “Rut nagalogo yo. Yethemin, hagaru ano aphwami at a’ge emin, ye, is en mu a’ge paget de, Nenaik ebe yuat o, oluk enede ebam he’berik poluk erliktogwi a’ge emin, ene’bek togolik laga o. Holuk e, hat ogo re, at e’berlik lak o, nagalogo,” oluk mo’gulesi.

¹⁶ Asogo mo’gulesi a’geat de, at Rut en e, disogo mo’gulesi, “Nia o. Hat en e, an hat ukhoboluk louwagoluk mo’gulnorogun o. An hat hemin lo nagai o. Hat ’geba lagun holuk, an heminat ebayat laga lomul o. Hat ’geba wolorogun holuk, an hemin ebayat wolomul o. Aphwami hat en a’ge holuk, an en a’geat emak o. Ye, hat hede haik Allah pam he’berik poluk erliktaga legen a’ge ai, an naigat agoam nede at ebam he’berik poluk erligat taga leik o.

¹⁷ ’Geba en hat hebe warorogun holuk, an nebe ebayat waragoam ’gwiang ’balogo salnobu nagai o. Nenebe waromultik en nak de, nenematek-nenematek omul o. Holuk e, an niemalhwe ukhoboluk momu laikmu re, Nenaik ’gain Onuk Logo a’ge en wene modok e’ginsogo nebam pouwak o,” oluk mo’gulesi.

¹⁸ Asogo mo’gulesimu, at Naomi ede en e, “Nemin lo a’ge paget agai en oso yo,” oluk ebabut enak a’ge ’balegeirik e, wene mesik mo’gulum erlakma en mo egei.

¹⁹ Is e’birek ’bekhit waga legesarik o Betlehem wegesa. Asogo wegesema, aphwami o kota eba a’ge ’berlegat eniak aligwiak loksogoat ogulat e, is hwami en e, disogo egesa, “Yu Naomi demat a? Eige, nogorlok e!” oluk egesa.

²⁰ Asogo egesema, at Naomi en e, “Ogola agaisogo nak welago a’ge oluk u ’gela’ge, an nonuk Naomi oluk mo’gulnogu lorogup no yo. At e, nenaik Allah di a’ge yu a’ge tu nak a’ge ano en e, modok wik-wiak taknebesimu wegi ai en e, nede heselisokhwe welago a’ge u ’gela’ge, nonuk Mara oluk mo’gulnogu lomup o.

²¹ An nebe o yema en ligegi re, ne’gikmu modok elirat woluk ligegi a’ge anoat de, yogodak nenaik ’gain Onuk Logo di a’ge yu a’ge tu a’ge nak ano en wene nebam pesirik, di obotut yu obotut logat taknebesirik, nebe nak togolik woknoboluk waga ai en e, nonuk Naomi oluk ogulom modok mia o,” oluk mo’gulentesi.

²² At hwe Naomi iemalhwe Rut owi o Moab a’ge ano emin wegesa ’gal e, is aphwami Betlehem a’ge jelai e’gen ebe he’bak ’gela’ge ano ’baluogoluk naduk-naduk ene’gik tenhegesa ’gal wegesa ai o.