Obaja 1 - Allah Iak 'Belak Naduk A'ge emin Pobuk A'ge Emin Wusogo Wogenebegei Wene

O Edom eba Allah en wiak o’go tagonobouwa wene Ap Obaja en Allah iak mo’gulentasu laga wene

¹ Ap Obaja en abi ’gela’ge hesi ano re yuat o. At ’gain Onuk Logo a’ge en o Edom takpo egei ano re, yu at o. At ’gain Onuk Logo a’ge en wene egei a’ge nenesa’go hwelige ano re, ap mesik en, “Nis inagalomultik o Edom a’ge enemin weim ebi louwok o,” oluk, di aphwami yu aphwami mo’gulentil louwak oluk, perakpesi ai o.

² “An en demat di aphwami yu aphwami ene’gerlakma o Edom anni erlagap paikmu re, aphwami ena’gul onuk lo’bok en at mi-miarak pogu lema o.

³ Is onowi dom yat a’ge pam helep gagalak elema werik poluk welat, ’Ap sa en nis sebelak nonoboluk ’gwiangma ’belebak nonobouwom epegep, erlagat o, oluk, enede en logo pogwi ano ’pam ono’borl pam ligagai o.

⁴ Tue pedi-pedi en yaro’gwe darak noso ai ’gela’ge no’gulat, hwesagal e’gerlakma onowi ’balogo hwerik pagat oruakhweat de, eba enat an en enebe oboksogo? ’Belebak onobou weik o,” oluk, Allah enat oso hegirikmu re, mo’gulhentigis ai o.

⁵ O huba’go ap yogot wogwi a’ge ene’bek wagalat, is ap o ’goduk husogo wogwi a’ge en o ’goduk hutholuk onowi pam ’gwi lagalat, togwi holuk e, modok elalin a’ge takpogulat, is en wul oluk onogola opogwi a’ge ebano nak wouwa ano erlak? Anggur e’gen ’balogwi a’ge en eniabuk anggur yogoma e’gen egeik a’ge ’balil lagalat, pema pogulat ’balua ano erlak?

⁶ Asogoat togwi a’geat de, aphwami en is Esau a’ge heri-herasogo takpoluk wiak holuk e, ukpogulat, enede hwedik a’ge holuk hisogo a’ge ebano wogulat, tua ano re, modok perlengsogoat wouwa o.

⁷ Is Edom a’ge enemin otluk til lagai ano enat, ono’gwiang hwerli oruakhweat de, mukho lebik onobogulat, enarilak enemin hwedik a’ge en lalonobogulat, sebelogo onobogulat, enemin so’boru mesikmu no’gwi ano en hweim onobouwagoluk, herle ’gela’ge pil lagalat, togwi a’geat de, is en enak a’ge pobirak pouwa erlagat o, oluk, osoma hegirikmu re, mo’gulhentigis ai o.

⁸ At Allah en eselat, o agauwa eria hegit e, aphwami enede oruak a’ge o Edom a’ge An en erlagapsogo enebasulat, is di wene yu wene enagat pobirak pogwi a’ge is ap Esau a’ge welagaimu dom petne welagai a’ge ebano wiagap enebiselat, tik ano erlak?

⁹ Is aphwami o Teman a’ge onosi weim, togwi a’ge ai re, onogorlok modok hogulat, ye, is aphwami Esau a’ge welagaimu dom petne welagai a’ge ebano ’berlegat wusogo onobogwi holuk e, enebe waragalat, tua ani o, oluk, osoma hegi o.

“Edip e, ai paget o,” oluk is Edom a’ge tagonobo a’ge paget mo’gulesi wene

¹⁰ Is Edom a’ge onolot het en onosilak Yakub a’ge tagenebil laga legesa ano pam is ap yu re, disogo tigisa o, oluk ene’gerli werak onobogulat, ena’guluak erlagap onobogulat, is Edom a’ge ebano asogo nak togwi modogat welema ani o.

¹¹ Aphwami mu a’ge en is Yakub akhit a’ge ena’ge di a’ge yu a’ge horloluk lagaihwe onuelak Edom a’ge ai re, geksogo enil nak welat, is aphwami mu a’ge en is Israel a’ge onowi kota Yerusalem ’goduk ’gwi lagai o’gwe ’gu otluk, o ’Yerusalem ta en eiye agoma hul?’ oluk helep e’gen walhogukhwe, is Edom a’ge en is enemin otluk, tugulat, tigisa o.

¹² Onosilak Yakub a’ge wiagap onobogwi eria hegit e, is Edom a’ge en, “Hweinat o,” oluk. Onopogukhwe is Yehuda a’ge enebe erlagap onobogwi ai erlige onogola enagai hogulat, e’gin enebam ago ai erlige, nis taknonobogwi erlakma re, nis elit o, oluk, enede logo pogulat, tugwi ai re mia o.

¹³ Is an neiyagai wiagap onobogwi eria pam e no a’ge houwa. Oluk, an neiyagai onowi kota ’goduk ’gu agai o’gwe ano ’guagalat, e’gin enebam ema ai erlige, eria re, lok a’ge mesik takpesi erlak o, oluk onopogulat, is wiagap onobogwi ai erlige ena’ge di a’ge yu a’ge horloluk lagalat,

¹⁴ Is pema ’bogolil lagai holuk e, waronobuogoluk ebela babut o’gwe hou salil lagalat. E’gin enebam ago eria hegit e, is pema ’bullak. A’ge ebano wogonoboluk eneselei a’ge ene’gikmu onobogulat, tugu legesa ebano tu miahweat de, tugu legesema o.

¹⁵ “Asogo tugu legesema re, di aphwami yu aphwami e’gin enebam payogoluk. An ’Gain Nonuk Logo a’ge Allah wom a’ge agauwa ano arat horok lau wagarikmu re, is Edom a’ge en takpil no’gu laga legesa ebano ’gela’ge an en ogo is asogoat tagenebasulat, is en til laga legesa a’ge o’go agamsogo is enebam pasulat, tik ani o.

¹⁶ Ye e’gin aphwami enebam po ano re, ik no’gwi ’gela’geatma re, nebabut omu degelakma re is en ik ai a’ge no’gu legesa ’gela’ge di aphwami yu aphwami ’berlek en ik ai a’ge mo u erlakma en no’gwi modok welat, arat nonogum aga oluk opo erlakma en hwedik hwadik no’gwi nak welat, enebe dogo a’ge yerontogwi erlak ai ’gela’ge erlagat ema ani o,” oluk, egei ai o.

“Enagap delak welema ai re, o Sion en nagat o,” oluk, egei, wene

¹⁷ “Asogo tua a’geat de, is dom Sion pam oruak a’ge ebano nak e, enagap delak welat, dom Sion ai An nu’gwarek nebaget arat polik pagathwerlegi o, asogo welat, ye, is Yakub pam en weigalak a’ge en enemining a’ge ’gela’ge ono’gwiang ano eiyerak pagathorloluk welat, tugu lema o.

¹⁸ Is Yakub pam en weigelak a’ge ebano ebabut e odouk ’gela’ge agalat, is Yusuf pam en weigelak a’ge ebano ebabut e odouk magale ’gela’ge agalat, tugu lemarik, is Esau pam en weigelak a’ge ebano ebabut re, gandum uak daktak a’ge ’gela’ge emma re, is en odouk magalesogo pogwiam odouk en perlengsogoat nil louwa ai o. Asogo nil lasulat, is Esau pam en weigelak a’ge ai re, ap mesigat a’ge nak ogo mesik hweiye libom erlakma en modok perlengsogoat odouk nil louwa o,” oluk. At ’gain Onuk Logo a’ge Allah en oso hegirikmu re, mo’gulhentegis ai o.

¹⁹ Asogoat tuama re, is an neiyagai o lei lok legenakma, eba o abel sogweik akhit welagai a’ge en is Esau a’ge welagaimu dom petne ebano onowi eiye agalat, welat is dom o’gwe welagai a’ge en aphwami Filistin a’ge ono’gwiang eiyetak pagathorlogulat, tua o. Is ebano en o Efraim emin, o Samaria emin, eiyerak pagathorloluk welat. Is Benyamin a’ge ebano en e, o Gilead eba onowirak otluk welat, tugu lema ani o.

²⁰ Is aphwami Israel a’ge wogonoboluk lebik enebegesa a’ge aphwami Kanaan a’ge ono’gwiang pam welagai a’ge ebano, o Fenisia horlok lau wegesarik en ’bekhit legesa-legesa o Sarfat hwerliat mik horlogulat, is aphwami o Yerusalem a’ge wogonoboluk lebik enebegesema o Sefarad welagai a’ge ebano, wotluk, o lei lok legenakma o abel sogweik akhit kota-kota eba eiyerak pagathorloluk welat, togu lema ani o.

²¹ Is ap Esau pam en weigelak a’ge ebano o dom petne welagai a’ge ebano wene e’gin enebam pouwa a’geat de, is ap enagap deliso a’ge ebano nak e, dom Sion pam ligemarik welat, is wene le’gelogo mo’gulontogukhwe ’gwelagentarok welat, Enaik ’Gain Nonuk Logo a’ge ai re An Allah at weleik o.