Nehemia 1 - Allah Iak 'Belak Naduk A'ge emin Pobuk A'ge Emin Wusogo Wogenebegei Wene

Ap Nehemia en aphwami Israel a’ge enebaget se’ban eselat Allah yo’go pesi wene

¹ Ap Hakhalya omlogo Nehemia en, “An disogo taga legirik o,” oluk ’beli’gogo odo ’balegei re, disogo. Ap ’gain onuk logo a’ge Artahsasta ebe aphwami Persia a’ge onue ’gain welat senentarok 19 tahun welagarik tahun mesik 20 a’ge pam senentarok oruakhwe, dugwi nis en wenarogwi a’ge hegitsogo onuk Kislew a’ge pam, an o at Artahsasta en senentarok welagama o kota onuk Susan welegi.

² Eria hegit e, an nare Hanani o Yehuda en ap logon enebe ’biren, henagan enemin legesa. Asogo legesema, an en e, “Aphwami Yahudi a’ge ap o Babel a’ge en o Babel wogonoboluk wegesa a’ge pobuk togolik legesa a’ge ebano o Yerusalem welat no’gosogo togwi,” oluk hin wogentegis o.

³ Hin asogo wogentegismu, is en an mo’gulnogulat, “Aphwami nis Yahudi a’ge o Babel yema woknonoboluk wegesa a’ge pobuk togolik nonowi edip nenebe dagegema lege ebano re, yogodak aphwami ena’gul onuk mu a’ge nis neneragam o’gwe esa’go-esa’go welagai a’ge en di obotut yu obotut taknonobogulat, onogola en mi-miarak nonobogulat, togukhwe wiak modok welege ani o. Ye, nadugat o kota Yerusalem leget pakleget wogo welaga a’ge moluk-melaksogo ’bo pogulat, ’goduk pakleget emde ’belak a’ge odouk narlogulat, tigisa a’ge ebano pobuk agauwak hwalogo ebelu erlakma en modogat moluk-melaksogo oruak o, nue,” oluk mo’gulnegisa o nue.

⁴ Asogo mo’gulnegisema nesa’go hwelegistik e, nebe huregirik, nge tagalat. Asogo nge tegistik, o agauwa ’biren henagan ’gela’ge nede modok wiak welat, so’boru modok no erlakma en se’ban Allah gonu oso modok welegi o.

⁵ Se’ban asogo Allah yo’go pasulat, disogo mo’guleselegi, “Naik Allah ’gain Honuk Logo ’bogorl pam a’ge naik. Hat hebe modok ’gainatma re, nis hat nonogorloksogo heragam ’gogu lege ai o. Hat nenedesogo welat wene nenesa’go werigen wene hologo togu lege a’ge holuk nak, hat en, His an neiyagai o, oluk wene wusogo woknenebigen a’ge ai hedeap nonoboluk nenemin lo’boktak modok welegen ai o, naik.

⁶ An en heiyagai Israel a’ge enebaget o erlige en modok, hup en modok, niak hebam porlu aga legi ai, hil nioluk e, niak hesa’go hwelip o, naik. Nis aphwami Israel a’ge wiak tige ai. An nebe emin, ne’balak emin, wiagat tige ai o, naik.

⁷ Wene hat en nenesa’go wusogo, Disogo tip asogo tip, oluk heragam a’ge Musa en mo’gulnontuagoluk mo’guligenma mo’gulnentesi wene ai hegitsogo tu erlakma en hiak sagalogo modok wiak tige ai o, naik.

^8-9 Hat en wene disogo oluk Musa mo’guligenma mo’gulnentesi ai hede eberin o, naik. Hat en e, His an neiyagai Israel a’ge en wene an en henesa’go weregis wene ai hwelakpoluk nemin lo’boktak erlak wolorogup holuk, aphwami ena’gul onuk mu a’ge onowi lo’gwe eba ’bogulogo perakhenebaik o. Asogo a’geat de, pobuk henebabut heberloroguptik togolik ne’bek wotluk nemin lo’boktak welat, niak hologo togupmu re, his henebe ’bogulogo o ’bogorl edip-edip perakhonoboluk pobuk odoksogo o an nebaget togulomma nu’gwarek en pulogo pagathwerlegimu eba pagathwerlau weik o, oluk egen a’ge ai hede eberip o, naik.

¹⁰ Naik. Nis yu re, hu’gwarek heiyagai, heragam a’ge welemagoluk hanni a’bik modok onogorlok a’ge pam delnenebigen a’ge o, naik.

¹¹ An en emin, heragam a’ge pema ’berlek en emin, enemin en hat erlebesogo hau wathobogu lomogoluk se’ban yo’go hobogu lege a’ge ai, neniak hesa’go hwelin o, naik. O yogodak e, an heragam a’ge ap onuk logo a’ge e’bek laik ai re, edeap nobuagoluk ede ’gagalip o, naik,” oluk Allah yo’go pasulat se’ban eselegi. Eria hegit e, an nebe ap onuk logo a’ge egeik ne’gak no a’ge paget wene le’geliselat en asogo Allah yo’go pasu legi o.