Nahum 1 - Allah Iak 'Belak Naduk A'ge emin Pobuk A'ge Emin Wusogo Wogenebegei Wene

¹ At Allah en o Niniwe takpo a’ge paget, ap Nahum owi Elkos a’ge abi pam mo’gulesi a’ge pelal wogo ano re, yuat o.

Allah olot het enebam po wene

² At ’gain Onuk Logo a’ge en e, nomuat erliknobu a’ge de logwe, is ado erlik onobogwi yu re, nebit e, oluk, epasulat, at ukpogwi holuk e, o’go tagenebasulat, ’gain Onuk Logo a’ge Allah ukpoluk we yogunat togwi holuk, o’go tagenebasulat, olot het nak agalat wiagap enebasulat, At ’gain Onuk Logo a’ge Allah emin il ’belak, a’ge ebano olot het enebam pasulat, at emin weim ’belak a’ge holuk tagonobo epasu a’ge ebano, wene enebam pasulat, tago yo.

³ At ’gain Onuk Logo a’ge Allah ai re, ede sebelak poluk welat, At anni modok logat welat, tago a’geat de, is ap wiak togwi a’ge onowiak o’go tagonobouwaat o. O sogwei yasobu o’borlogouk logat pu hau wagalat, tagokhwe at e’gerlakma wagalat, Ap, ’gebela pam lasulat, oyuk pam sip-sip daksogo pil lasu ’gela’ge, At o hena a’gurlok pam lasulat, asogo at takpil lasu o.

⁴ At en ik lok ye’gelak laut ano deng uak? oluk, wene yageselat, Ik ’berlek deng-deng louwagoluk, takpasulat, tago yo. At wagokhwe, o Basan emin, Karmel emin, ’gwiang ’buk etil lasulat, o Libanon e e’gela emin owil modok tawet otluk lol-lol ’bi lasulat, tago yo.

⁵ At wagokhwe dom-dom ’berlegat erlik-erlak eselat, duk sebelak a’ge ebano ’berlegat a’bosu bo poluk erlak agalat, at wagokhwe o’gwiang emin, di a’ge yu a’ge ’gwiang pam oruak a’ge ebano ’berlegat emin, ogorlok en Nonouk tagokhwe,

⁶ Allah olot het en takpasu a’ge ano, ap sa en pang tuarik welema epegep? At olot het odouk ’gela’ge tagokhwe, ap sa en epe mosogo welema epegep? erlagat o. At olot het odouk nasu ’gela’ge pelogo po’bu agarik, il oruakhwe dom-dom ’berlegat ’goluk gelaksogo ’bu agokhwe hegi o.

⁷ At Nenaik ’gain Onuk Logo a’ge Allah ai re, op modok welat, e’gin enebam ago holuk e, enebe op wolom a’ge paget obap enebiso a’ge arat welat, enede at ebam he’berik welagai a’ge ebano opsogo ’gwelagentarok welat, tago a’geat de,

⁸ Ik ebe wagalat, di a’ge yu a’ge wiagatil lasu ai ’gela’ge at emin il ’belak a’ge ena’guluak erlagapsogo enebasulat, at emin iak sagalogo ukpogwi a’ge ebano mukho makho waragaimu o hiktakma peragenebasulat, tua o.

Allah en o Yehuda emin, o Niniwe emin, takpouwa wene

⁹ Is Niniwe a’ge en at ’gain Onuk Logo a’ge tagobo a’ge paget enede eberogwi a’ge ebano, at en erlagapsogo pasulat, agauwa ’biren sogo wolom erlakma en, agauwa mesik erligeat erlagapsogo enebasulat, tua o.

¹⁰ Is ai re, orlok sellem tak a’ge sobo-bobo a’ge wolomtik bugotluk erlik-erlik osolomtik ’goluk ’gelaksogo biselat erlak ago ai ’gela’ge welat, tugwi o. E’gela herle’gerla ’buk agoam odoksogo odouk narlik pogwiam erlak ago ai ’gela’ge welat, tugwi o.

¹¹ Ap mesik o Niniwe eba inotluk, ’gain Onuk Logo a’ge Allah ebe wiagapsogo po a’ge ede eberiselat, wiak disogoat togulom a’ge oluk ede eberak poluk, mo’gulentasulat, tago en, egi o.

¹² ’Gain Onuk Logo a’ge en eselat, is aphwami Asyur a’ge o Niniwe welagai a’ge ebano ebesik degelak welat enanni a’bigat welagai a’geat de, warenebil loma ena’guluak erlagat ema o. Is an neiyagai ai, e’gin-pe’gin hogu lemagoluk tagenebegi a’geat de, mesik eminsogo tagenebaik erlak o.

¹³ E, e’gin a’ge sapi odogun pam pogwi ’gela’ge, is Asyur a’ge en e’gin an neiyagai enebam pegesa a’ge ano an en porloksogo hwikhasulat, ene’gik onoyuk herle werak ’gela’ge welagai a’ge ebano an en hebilogo enebasulat, tik o, oluk, osoma hegi o.

¹⁴ At ’gain Onuk Logo a’ge Allah en his Asyur a’ge de o Niniwe welagai a’ge ebano en tugulom a’ge mo’gulhentasumu hegi ano re yuat o. “Is ononuk gerap taga lemagoluk, ene’balak dagaga lema modok erlagat o. Enasua owi werikmu enasua ogut hele’gik oruak a’ge emin, ’besi pam enasua hele’gik a’ge ano emin, erlagapsogo pasulat, is Asyur a’ge ai enebabut modok wiagatma re, ’gwiang ’balogo sebel onobumu enebaget leik-louksogo pasulat, tik,” egei o.

¹⁵ “Ap wene yo’go woluk dom-dom petne oyuk pil wagalat, honogorlok erlak henede we yamuksogo welemis o,” oluk, il wago ai, henil yethemit o. Is aphwami henemin il ’belak a’ge ano modok erlagapsogo onobou wak oluk, tagenebaikmu re, pobuk nin sebelogo onobou wak oluk, wema erlak o. Asogoatma re, his Yehuda a’ge yu logwe. Seni sorogulom a’ge wene werak a’ge ano honogola henagai pam sorogulat, An disogo togolik o, oluk, ho’buk ’balogwi ano ’gela’geat tugulat, tugu lemis o.