Mikha 1 - Allah Iak 'Belak Naduk A'ge emin Pobuk A'ge Emin Wusogo Wogenebegei Wene

Allah en wene Mikha ebam pesi wene

¹ Aphwami Yehuda a’ge onuelak ononuk logo re, naduk Yotam, e’berlik Ahas, e’berlik Hizkia en tenentarok welegesa eria pam, Nenaik ’gain Onuk Logo a’ge en iak aphwami Samaria a’ge emin, aphwami Yerusalem a’ge emin, enebam ema a’ge paget mo’gulontouagoluk ap Mikha owi pam kota wei a’ge onuk Moresyet a’ge ai, ebam pesi.

Aphwami Samaria a’ge wene enebam pouwa a’ge paget hoso’bi mo’gulentesi wene

² His aphwami hena’gul onuk lo’bok an wene ik a’ge ai henesa’go opsogo hwelip o. His aphwami o di owi yu owi welegep a’ge an wene ik a’ge ai opsogo pobi tip o. Allah ’gain Onuk Logo a’ge en his wiak togu legep a’ge aluk a’ge en ’baksogo hene’gerli werigoluk u’gwarek owi pam en iak oso ai, henesa’go hwelip o.

³ At Nenaik ’gain Onuk Logo a’ge owi ebe welagoma en liplau wagarik o ’gwiangma ’bu agarik di owi yu owi duk petne oyuk pil noso yo.

⁴ Asogo ’bu agoam e, hwedali odouk magale en erlebe ago ai ’gela’ge, duk dom a’gul at oyukmu en erlebe eselat, ik dom pam en elaruk ’gulogo ’bu ago ai ’gela’ge, mesak do’go’gwe ’bu agalat, tua o.

⁵ Aphwami Israel a’ge enebe Allah pam lo’boksogo wolom enebit welat, at iak sagalogo wiak togwi ai en, wene egi a’ge ai ’berlegat lai louwayat ani o. Edip sa wiak pam aphwami Israel a’ge wiak togwi no? Edip is aphwami o kota lok Samaria welagai a’ge onu’gwarek enat o. Ye, edip sa wiak pam aphwami Yehuda a’ge dogwi asua erliktogwi no? Edip aphwami Yerusalem a’ge onu’gwarek wiak enat o.

⁶ Ai enat Nenaik ’gain Onuk Logo a’ge en disogo egei, “An en aphwami Samaria a’ge onowi pam eba o moluktak helep ’gaboktak leimu aphwami anggur owi yorogu lemagoluk ’bo pasulat, o moluktak helep ai, o do’goma eba ’belakpasulat, o wa’gi delak a’ge modok selakmasogo ’bo pasulat, tik ani o.

⁷ Asogo ’bo poluk, onodogwi enasua o’go a’bik a’ge ai modok wiagapsogo poluk, hwami dogwi asua owi werikmu en at ebaget togumu, tenontogwiam ene’gikmu a’ge op ago oluk tenontoluk, o’go wogontogwi a’ge ai, ’berlegat odouk narlogulat, dogwi asua aphwami ogut helo’gogwi a’ge ai ’berlegat erlagap tagalat, tik o. Hwami ai tenontogwiam ene’gikmu a’ge op ago oluk, tenontoluk o’go di a’ge yu a’ge pogwi a’ge ai, pobuk is eneselei a’ge en horloluk loluk, is onodogwi enasua paget poluk asogoat togu lema ani o,” oluk egei.

^8-9 Asogo ema egei ai en e, an Mikha nogola modok wiak otluk nge tik o. Aphwami Samaria a’ge emin, Yehuda a’ge emin, eniebil modok wiak a’ge enebam agarik, aphwami o kota ’guogoluk ’goduk emde ’belak o’gwe en ’gwi lagai ’gela’ge, wiak a’ge ai aphwami asu an a’ge o Yerusalem welagai a’ge enebam ema oluk wagarik oruak ai, enebe op om a’ge modok erlak ai en e, disogo egi, “An pobuk nogola wiak aga ai enagat emagoluk sum ’buktak erlagat, ye, noyuk owi’ga sum ’buktu erlagat ebela denagalat, mene nge tiso ’gela’ge emin, tue hogobi iak oso ai ’gela’ge emin, il-il denaga lema ani o,” oluk egi.

“Aphwami Israel a’ge eneselei a’ge o Yerusalem wom a’ge ano horok lau waga,” oluk egei wene

¹⁰ Nis yema modok wiak a’ge nenebam aga ai paget neneselei a’ge o Gat a’ge mo’gulentagup no yo. His nge togu legep ai is enil hontouwagoluk nge telakma togup no yo. His aphwami o Bet-Le-Afra a’ge yu. His en e, “Eige, modok mia omul o,” oluk opogu legep ai enagat emagoluk, henebe ul petne erle’bik ogu lemis o.

¹¹ His aphwami o Safir welegep a’ge yu. Herle wusogo wokhonoboluk louwama eba honosum no’gorlak hene’gerli erlagat hwerlai lu o. Ye, aphwami o kota onuk Zaanan a’ge onogorlok erlaksogo liplauma modok erlak o. Ye, aphwami o kota Bet-Haezel a’ge eba en, nge togwi ai, his en henesa’go holholuk e, honogola en e, “Is en erlele wokho tenakho welema erlak hegi,” oluk epagup ani o.

¹² Allah ’gain Onuk Logo a’ge en modok wiak a’ge perakpou wagama, o Yerusalem leget pakleget emde ’belakma arat lau waga ai en, aphwami o kota Marot welagai a’ge en e, Nis op wolomul modok erlak o, oluk opouwa ani o.

¹³ His aphwami o kota Lakhis welegep a’ge yu. ’Gwiangso ’gela’ge pam ligotluk hweiye loborogup en e, honuam kuda erlilogo poluk wolomup o. His en naduk aphwami Israel a’ge wiak togwi a’ge ai enebabut wokho asogoat togu legep ai en e, aphwami o Yerusalem welagai a’ge his henebabut wokho wiak togwi ai o.

¹⁴ Yogodak his aphwami Yehuda a’ge yu. Aphwami walekma louwogoluk togukhwe hau wusogo peragonobogwi ai ’gela’ge, aphwami kota Moresyet-Gat a’ge wogonoboluk momu louwa ai en, hau warenebip o. Ye, is aphwami Israel a’ge onuelak ’gain ononuk logo a’ge aphwami o kota Akhzib en le ontouwa modok erlak o.

¹⁵ His aphwami Maresya a’ge yu. His henebe Nenaik ’gain Onuk Logo a’ge en heneselei a’ge honowi kota sebelogulat tenentarok welema a’ge ene’gik pam henebaik o. Asogo henebasuam, aphwami Israel a’ge onuelak enanni a’bik a’ge ai o Adulam owik o’gwe eba hisak ema o.

¹⁶ His aphwami Yehuda a’ge yu. Heneiyagai henede hwedik a’ge ene’gik herle wusogo wokhonoboluk louwa ai en e, pong woru ’gela’ge, henasu hena’gul pam a’ge perlengsogo ’balip o.