Mazmur 1 - Allah Iak 'Belak Naduk A'ge emin Pobuk A'ge Emin Wusogo Wogenebegei Wene

Aphwami enebabut opsogo togwi a’ge paget emin, wiak togwi a’ge paget emin, weni werigisa wene

^1-2 Aphwami logon enebabut e, is logon wiak togwi a’ge en, enesa’go worogwiam eniak hologwi erlak welat, is wiak togwi a’ge enebabut wo erlakma en welat, is onogola en Allah mi-miarak pogwi a’ge, enemin hwedik tu erlakma en welat, ugonoboluk Nenaik ’gain Onuk Logo a’ge Allah en, “Disogo togu lomup, asogo togu lomup,” oluk enesa’go weregei wene ai, onogola enagaisogoat welat hegitsogo togwi ai o. Asogo togulat hup hwedik erlige hwedik, wene ai onuk mo’gulogo, ebam eberogwi modok welagai a’ge ai, pobuk Allah en obap enebisokhwe onogola re, enagai houwa o.

³ Is ai enebe re, ik esa’goma, e daintak a’ge e’gela sawet ago erlak. Un modok welat, e’gen oso erlige, oso ai ’gela’geatma re, is en e, di paget yu paget togumu re, asogo elit nak ago yo.

⁴ Asogo a’geat de, is aphwami logon enebabut wiak togwi a’ge ai nak e, asogo togwi erlak o. Is enebe re, di a’ge yu a’ge ollong a’ge, sogwei en pusogo lasu ’gela’ge oruak o.

⁵ Allah en wene aphwami enebam pasulat, no’gorliselat tagalat e, is enebabut wiak togwi a’ge ai, enebam poluk wiagap enebiselat, “An neiyagai enemin, wolorogup erlak o,” oluk degelogo momu peragenebasulat, tua o.

⁶ Nenaik ’gain Onuk Logo a’ge Allah en, aphwami at iak hologo togwi a’ge, eragam onoboluk ’gwelagentarok welago yo. Asogo a’geat de, is enebabut wiak togwi a’ge ai nak e, alemat omma ebano louwogoluk togwi o.