Matius 1 - Allah Iak 'Belak Naduk A'ge emin Pobuk A'ge Emin Wusogo Wogenebegei Wene

Yesus Kristus ebpalak aiklak dagatil 12 wegesa wene

¹ At Yesus Kristus Abraham Daud onomlogo ano e’balak aiklak edip pam en dagatil wegesa a’ge ononuk yu o.

² At Abraham en Ishak deriselat, Ishak en Yakub deriselat, Yakub en Yehuda osi enemin dagenebiselat, tegei.

³ At Yehuda en hwe Tamar wesirik e, Peres o, Zerah o, e’birek dagenebiselat, at Peres en Hezron deriselat, Hezron en Ram deriselat, tegei.

⁴ Ram en Aminadab deriselat, Aminadab en Nahason deriselat, Nahason en Salmon deriselat, tegei.

⁵ Salmon en e, hwe Rahab wesirik e, Boas deriselat, Boas en hwe Rut wesirik e, Obed deriselat, Obed en Isai deriselat,

⁶ Isai en e, ap Daud ’gain onuk logo a’ge ano deriselat, asogo dagatil wegesa. Ye, ai en e, Daud en Uria ugwe lisogo woluk libagarik e, Salomo deriselat,

⁷ Salomo en e, Rehabeam deriselat, Rehabeam en Abia deriselat, Abia en Asa deriselat, tegei.

⁸ Asa en Yosafat deriselat, Yosafat en Yoram deriselat, Yoram en Uzia deriselat, tegei.

⁹ Uzia en Yotam deriselat, Yotam en Ahas deriselat, Ahas en Hizkia deriselat, tegei.

¹⁰ Hizkia en Manasye deriselat, Manasye en Amon deriselat, Amon en Yosia deriselat, tegei.

¹¹ Yosia en ap Yahudi a’ge o Babel wogonoboluk legesa eria hegit, at Yekhonya arilak emin dagenebegei.

¹² Ap Yahudi a’ge o Babel wogonoboluk legesema welat e, pobuk at Yekhonya en e, Sealtiel deriselat, Sealtiel en Zerubabel deriselat, tegei.

¹³ Zerubabel en Abihud deriselat, Abihud en Elyakim deriselat, Elyakim en Azur deriselat, tegei.

¹⁴ Azur en Zadok deriselat, Zadok en Akhim deriselat, Akhim en Eliud deriselat, tegei.

¹⁵ Eliud en Eleazor deriselat, Eleazor en Matan deriselat, Matan en Yakub deriselat, tegei.

¹⁶ Yakub en Yusuf, hwe Maria ogun ano, deriselat, hwe Maria en e, Yesus nis en Kristus ogu lege a’ge ano deriselat, edipmu en dagatil wegesa.

¹⁷ Asogo dagatil wegesarik ap Abraham dagaga hwerli en, ap Daud dagaga ai hwerli pam enebpalak enaiklak enebe 14 hwerli en dagatil wegesa. Daud dagaga hwerli pam en e, ap Yahudi a’ge wogonoboluk o Babel legesa ai hwerli pam en ene’balak enaiklak 14 hwerli en e, pobuk dagatil wegesa. Ap Yahudi a’ge o Babel wogonoboluk legesa hwerli en e, Kristus dagaga ai pam, enebe 14 hwerli en pobuk dagatil wegesa.

Yesus Kristus dagaga wene

¹⁸ At Yesus Kristus dagaga ai ebe disogo dagaga. Ia Maria ai, ap Yusuf ebe wo erlak owan la’bulu erlak oruakhwe, Allah Arogun en emalik ogola pesi o.

¹⁹ Ogola pesimu re, at Yusuf ebabut op ano pam e, ogola en, “An hwele ai aphwami enilem ukpoma re e’gerli emano, oluk e, hisakho ukpaik o,” oluk ede epesi.

²⁰ Asogo epasulat, huba’go nogo osoma, at malaikat Allah en ’bogorl pam yo’go noso a’ge mesik e’bek wagarik e, wene disogo mo’gulesi, “Yusuf, Daud omlogo yu o. Hat e, hwele Maria ai wo nebit oluk hogola epagun o. Emalik ai Allah Arogun enat ogola pesimu oruak o. Holuk e, wemen o.

²¹ Emalik ai ebe abat dorua o. Doruema re, ue ari wiak togwi a’ge at en onowiak no’gorlogo wouwarik delonobua o, oluk onuk Yesus tualino,” oluk mo’gulesi.

²² Asogo tua oluk e, Nenaik ’gain Onuk Logo a’ge en, ap agaikhe pageat yo’go pesimu wene mog’ulentasulat pelal wokho pesi ano hegitsogoat emak oluk egei ai o.

²³ At en e, “Hwele mesik emalik ogola emarik e, abat dorua ani o. Dagago holuk e, nis neniak pam, Allah nenemin oruakma, u ’gela’ge, onuk Imanuel ogu lema o,” oluk pelal wokho pesi a’ge hegitsogoat aga ai o.

²⁴ Ai re, Yusuf elaluk agarik e, at malaikat Nenaik ’gain Onuk Logo a’ge en perakpou wagama, abi pam mo’gulesi a’ge ano hegitsogoat hwe Maria ano wesi.

²⁵ Wesi a’geat de, ugwe ano e’birek nogo u erlak welegesarik en, emalik abat deregeimu onuk Yesus tualegei.