Markus 15 - Allah Iak 'Belak Naduk A'ge emin Pobuk A'ge Emin Wusogo Wogenebegei Wene

At Yesus e’gik herle wusogo Pilatus e’bek woluk legesa wene

¹ Asogo togu legesarik e, o dakha egeimu re, ap wene Allah paget edip ’belo’gogwi a’ge enebe ’berlegat, is ap Allah eiye a’ge onuelak ’gain ebano emin, enarluedek ebano emin, Allah iak pelal wogo eiye a’ge ebano emin, ado pema eneminat, “Disogo tuok o,” oluk egesarik e, Yesus e’gik herle wusogo Pilatus wogosu egesa.

² Wogosu egesema, at en e, hin Yesus ebam wasulat e, disogo mo’gulesi, “Aphwami Yahudi a’ge onue ’gain onuk logo a’ge ano, harat a?” oluk mo’gulesimu, at en e, “Hat e’gen aiat o,” oluk mo’gulesi.

³ Asogo mo’gulesimu re, is ap Allah eiye a’ge onuelak ’gaindek ebano en e, di wene yu wene ebam pegesa.

⁴ Wene asogo ebam pegesema, at Pilatus en Yesus ebam pobuk hin wasulat e, disogo mo’gulesi, “Di wene yu wene a’bik hebam pogwi yema re, hat en wene o’go mo’gulentagun erlak a?” oluk mo’gulesi.

⁵ Asogo mo’gulesimu re, at Yesus iak o’go u erlagat mo egeimu re, at Pilatus en e, “Nogorlok o,” oluk erliktegei.

Yesus ebe modok woruagoluk wene ebam pegesa wene

⁶ Is aphwami Yahudi a’ge seni Paskah logat sogo no’gulat e, is en e, “Is aphwami ene’gik herle werak a’ge ebano, mesigat at ai ’gela’ge hebilogo woknentemen o,” oluk ’gonu egesema, at Pilatus en mesik nak anoat hebilogo wogentasu laga.

⁷ Asogo wogentasumu no oluk e, ai erlige ap mesik onuk Barabas, ap logon emin en, “Nonuelak ’gain pemerintah a’ge, nenebit o,” oluk ena’gul pebisogo waronobuogoluk, enemin obogulat, ap pema warenebegisema re, ene’gik herle warenebegisema,

⁸ oruakma, is aphwami esan ebano Pilatus e’bek wegesarik e, disogo mo’gulegisa, “Pilatus nue. Hat en aphwami ene’gik herle werak a’ge herle hebilogo woknentasu legen ano ’gela’ge, yogodak mesik hebilogo woknentagun en wege o,” oluk ’gonu mo’gulegisa.

^9-10 Mo’gulegisema, at Pilatus ogola en e, “Is ap Allah eiye a’ge onuelak ’gaindek yu Yesus ebam ’bousogo ebe woknosu wegesa epegi,” oluk pobi tegeitigat de, disogo mo’gulentesi, “His Yahudi a’ge honue ’gain onuk logo a’ge yu e’gik herle hebilogo wokhontouwagoluk wegep a?” oluk mo’gulentesi.

¹¹ Asogo mo’gulentesi a’geat de, is ap Allah eiye a’ge onuelak ’gaindek ebano en e, aphwami esan ebano enede ’gagalugulat, “Barabas aiat e’gik herle hebilogo woknentagun ani o. Yesus ai erlak o, oluk mo’gulomup,” oluk enede ’gagaligisa.

¹² Asogo enede ’gagaligisema, is en asogoat mo’gulegisema, at Pilatus en e, disogo mo’gulentesi, “Holuk e, his aphwami Yahudi a’ge en e, Nonue ’gain onuk logo a’ge, oluk ogu legep a’ge yu, no’gosogo tik,” oluk mo’gulentesimu,

¹³ is en e, disogo mo’gulegisa, “E pam edikpoluk werip o!” oluk eniak ningsogoat mo’gulegisa.

¹⁴ Asogo mo’gulegisa a’geat de, at Pilatus en e, disogo mo’gulentesi, “At no wiak tegeimu en,” oluk mo’gulentasuam is en e, “E pam edikpoluk werip o!” oluk pobuk eniak ebenagaikmu ning-nangsogoat mo’gulegisa.

¹⁵ Asogo mo’gulegisema, at Pilatus ede en e, disogo epesi, “Holuk e, aphwami esan yema enede opsogo disogo tik,” oluk epesirik e, Barabas ano e’gik herle hebilogo wogentasulat e, at osi tentara a’ge ebano en Yesus lagal’bisok ’go’bu wusogo e pam edikpoluk woruagoluk wogentesi.

Is ap tentara a’ge en Yesus eniak esegen yagegisa wene

¹⁶ At Pilatus en asogo wogentesimu re, is ap tentara a’ge ebano en Yesus woluk ap ’gain gubernur owi selimu ’gwigisarik e, is enarilak enemin esan mesigat pologu legesa a’ge ’berlegat worlentigisa.

¹⁷ Worlentigisema wegesarik e, Yesus sum orogole wibe’gen werak ’gela’ge ap ’gaindek a’ge ’buktogwi a’ge ’gela’ge ’buktak pogulat, ap ’gain a’ge ene’gare-’gare ’buktak onobogwi ai ’gela’ge, orlok wiak a’ge hwanesogo a’gul pam ’buktak pogulat, tigisa.

¹⁸ Asogo ’buktak poluk e, disogo mo’gulegisa, “O huk! Aphwami Yahudi a’ge onue ’gain onuk logo a’ge ano harat hegi o, eige!” oluk hau worogu lege oluk eniak heret hogulat mo’gulegisa.

¹⁹ Asogo mo’gulegisarik e, ’bon ’go’bu pam a’gul ’baksogo worugulat, was ebam topuk hogulat, eniak lalogo hau woruogoluk ondogorlu pam eragam hutla ’gugulat, tigisa.

²⁰ Asogo arat tigisarik, sum yat orogole wibe’gen werak a’ge ’gela’ge ano no’gorlogo poluk e, u’gwarek osum a’ge ano togolik ’buktak pegesarik e, e pam edikpoluk woruogoluk leget o’borl akhit woluk liplau wegesa.

At Yesus e pam edikpoluk werigisa wene

²¹ Asogo woluk ebela pam wagaimu re, ap mesik onuk e, Simon, owi o Kirene a’ge, ap Aleksander o, Rufus o, enaik ai, o eba esa’goma en o kota ma ’gwigoluk lasumu emin sarlok tigisa. Emin sarlok tigisarik e, disogo mo’gulegisa, “Yesus ebe e pam edikpoluk worul a’ge e yu, hat en wemen o!” oluk eniak ningsogo mo’gulegisema wesi.

²² Wesimu re, Yesus ebe woluk e, dom a’gul onuk nis neniak pam, Ena’guluak ’Belak duk pam u ’gela’ge re, is eniak pam e, Golgota duk pam woluk orlu egesa.

²³ Orlu egesarik e, anggur e’gen a’bosu emin, hwedali al ’gela’ge esik wiak a’ge emin, emin ne’gerlak-he’gerlak takpoluk wogegisa a’ge re, ukpesi.

²⁴ Yesus ebe arat e pam edikpegesarik e, osum no’gorlak ebano enebe lo’bok, Sa ’gela’ge horlouwa, oluk, helebe’gen ’gela’ge hwikhai lagalat, hwikhau wagalat, tigisarik, helep enebam laga a’ge nak so’busogo hwerlegesa.

²⁵ Yesus ebe werigisa ai re, hubet jam 9 e pam edikpegesa.

²⁶ Asogo edikpegesarik, “Ap yu wene edip yu pam pegerik en werige o,” oluk u ’gela’ge, “APHWAMI YAHUDI A’GE ONUE ’GAIN ONUK LOGO A’GE,” oluk pelal wokho pegesa.

²⁷ At Yesus ebe ’burlmu e pam edikpegesarik e, is ap enebe ’biren aphwami ena’ge yogorlia wogu legesa a’ge, mesik e’gik ’bekhit akhit, mesik e’gik hware akhit, emin edigonoboluk warenebegisayat. [

²⁸ Asogo tigisa ai re, pageat Allah iak pelal wokho pasulat e, disogo egesa, “Aphwami en e, at ai ebe re, aphwami enebabut wiak togwi a’ge ’gela’ge enemin mesikmu wenagonobua ani o,” oluk egesa a’ge ano, at Yesus is ap ai enemin asogoat edigenebegesa ai pam demat aga ai o,]

^29-30 Asogo edigonoboluk oruakma, aphwami ebela’gwe ai lak-wak togulat e, Yesus disogo mo’gulentil laga legesa, “Ihi! Hat en e, disogo e’gen ebano re, Allah owi werik a’ge yu moluksogo poluk e, agauwa ’birenam nak werise leiktik e, henaganak a’ge en e, arat daksogo werik o, oluk e’gen ebano re, hu’gwarek hebe e ai pam en hagap delogo ’bi suk da!” oluk ena’gul ’gwani hogulat eniak esegen yagogu legesa.

³¹ Asogo tugukhwe re, is ap Allah eiye a’ge onuelak ’gaindek ebano emin, Allah iak pelal wogo eiye a’ge ebano emin, enemin is-is eniak esegen yagogulat e, “At en e, is aphwami mu a’ge elirat delenebise laga ano a’geat de, u’gwarek en nak e, delhorlo mia epegi.

³² Kristus nis aphwami Yahudi a’ge nonue ’gain onuk logo a’ge yu re, nis demat opul en e, nenilem e ai pam en ’bumak da,” oluk eniak esegen yagogu legesa. Ye, is ap pema e pam Yesus emin edigenebegesa a’ge eriano en, Yesus eniak esegen asogoat yagegisayat.

At Yesus ebe waraga wene

³³ O erlige ede ’burl jam 12 pam o hup agarik e, o ebano ’berlegat hwerli jam 3 pam hiktak modok welaga.

³⁴ Hiktak oruakhwe jam 3 arat lai lagama re, at Yesus en Allah disogo mo’gulesi. Nis neniak pam e, “Naik Allah! Naik Allah! An nopaget uknebegen a?” oluk u ’gela’ge, is eniak pam, “Eloi! Eloi! Lama sabakhtani!” oluk iak ’beraksogoat mo’gulesi.

³⁵ Asogo mo’gulosokhwe re, is aphwami pema akhit ebano welegesa a’ge enesa’go hweligisarik e, “Elia worlhasu hegi,” oluk egesema,

³⁶ ap mesik pungtak lagarik e, hwali sabus ’gela’ge anggur e’gen a’bosu esik wiak a’ge udalogo nouwagoluk e paiyo pam dongsogo wogeselat e, is pema en e, disogo mo’gulegisa, “A! Elia en e, at yu delogo ’belakpouma hwi a? Erlak hwi a. Nenil wolomok,” oluk mo’gulentesi.

³⁷ Asogo mo’gulentesimu, at Yesus iak mesik erlige loksogo egeitik e, arat lebeksogoat waraga.

³⁸ Waragoam e, Allah owi werikmu sum kain a’ge o ogorlirak dit akhit ’gwe ’belak welaga a’ge ano erabu en ’burl heisogoat ’baktil ’bu aga.

³⁹ Yesus asogo waragoam e, is ap tentara a’ge onue ’gain a’ge Yesus orogolema hegitsogo welat, asogo waragokhwe il hesirik e, disogo mo’gulentesi, “Ap yu demat Allah omlogo hegi o,” oluk mo’gulentesi.

⁴⁰ Asogo tugukhwe, is hwami pema re, hwe Maria owi Magdala a’ge, mesik e, hwe Maria at ap Yakobus ebe souwe a’ge o, Yoses o, enia, mesik e, hwe Salome, hwami logon eneminat enebe walek en enil yerentarok welegesa.

⁴¹ Is hwami eria naduk e, Yesus e’berlik o Galilea do’go denagalat e, lethogu legesa a’ge. Ye, hwami ado a’bigat Yesus emin o Yerusalem ’bi legesarik emin eba welat enilat welegesa.

At Yesus ebe werak a’ge owikmu pegesa wene

^42-43 At Yesus waraga ai re, is aphwami Yahudi a’ge loruk o’gwe agauwa sabit pam Allah paget weat wolomogoluk, di a’ge yu a’ge degelogo pogukhwe waraga. Waragoam e, o arat hup agama re, ap mesik Yahudi onue ’gain wene ’bele’guogoluk emin odoktugu legesa a’ge onuk Yusuf. Owi o Arimatea a’ge. Ebabut op en, aphwami en e, “At op o,” oluk obok ogu legesa. Yusuf asogo tagalat, ogola en e, “Allah en eragam nonobouwa ai re, metnerlige nonobouwa,” oluk yetharok welaga a’ge ano, Pilatus ogorlok erlagat lagarik e, Yesus werak ano ’gonu ’gwegei.

⁴⁴ Werak ’gonu ’gwegeimu, at Pilatus en e, “’Ga pam ’gela’ge waraga hweat, yu nogorlok e,” oluk erliktegeitik e, ap tentara a’ge onue ’gain ano wemagoluk yo’go perakpou wagoam lagama re, disogo mo’gulesi, “Ebe pageat waraga ya? Yogodagat waraga ya,” oluk hin wokhesi.

⁴⁵ Hin wokhesimu, at en e, “Pageat waraga o,” oluk mo’gulesimu, at Pilatus en e, Yusuf disogo mo’gulesi, “Holuk e, ebe werak a’ge ai wai lak o,” oluk mo’gulesi.

⁴⁶ Asogo mo’gulesimu wagarik e, sum kain lenan op a’ge o’go ’balogo Yesus werak a’ge ano e pam en ’belakpobu agarik e, sum ano pam e’girlogo re, o wik aphwami werak onobouwogoluk aphwami en ebale hele’gigisema ebano pegesa. Poluk e, helep lok a’ge erlebilogo woluk wegesarik e, dopnosogo lerak pesi.

⁴⁷ Dopnorak pasuam e, is hwe Maria owi o Magdala a’ge ano o, hwe Maria Yoses ia ano o, wegesarik e, “Eria pesi,” oluk enil dokhumsogo hegesa.