Lukas 1 - Allah Iak 'Belak Naduk A'ge emin Pobuk A'ge Emin Wusogo Wogenebegei Wene

Lukas enat Teofilus hau weregei wene

^1-2 Teofilus nue o. Wene nis nene’gerlakma en aga ano, is wene ebe edip pam en til wagoma enil hegesarik mo’gulentil denaga legesa a’ge en mo’gulnentigisa hegitsogo, is aphwami pema enebe modok a’bik enat wene ebe pelal wouwogoluk walhil wegesa.

^3-4 Asogo walhil wegesa a’geat de, an ogo re, wene ai edip pam en dokhumsogo mo’gulise legirikmu oluk e, hat e, wene mo’gulhegisa a’ge ai demat oluk epagun en e, wene ebe ’beli’gogo pelal wokho he’bek perakpou weigoluk epasu legirik wasu legi ai o. Nue.

Allah en Yohanes ik olomu ’belabenebise laga a’ge ano dagema o, oluk obok mo’gulentesi wene

⁵ Ap ’gain mesik Herodes ai o Yudea do’go onuk logo oruakma, ap mesik onuk Zakharia, ebe ap Abia en dogoma a’ge emin enebe Allah eiye welat at ebaget togu legesa a’ge welaga. Ye, at ugwe re, ap Harun en dogo’gwe a’ge onuk Elisabet ai welaga.

⁶ Is ugwe e’birek eria re, Nenaik ’gain Onuk Logo a’ge en, “Disogo tip, asogo tip,” oluk, mo’gulnentasulat, nenesa’go weriselat, egei a’ge ano, modok hegitsogoat togu legesema re, at Allah en e, “Is ai enebabut op modok o,” oluk, enak a’ge il entasu laga.

⁷ A’geat de, at hwe Elisabet ai, ebe abeli en emalik mesik doru erlak welat ogun e’biregat arat sebal egesarik welegesa.

^8-9 Asogo sebal otluk welat, agauwa mesik erlige, at Zakharia ebe emin, ap logon enebe mesigat a’ge ’gela’ge emin, Allah eiye a’ge welat, is en at Allah owi werikmu ’goluk is yabuk tu a’ge elit aga. Elit agama ’gwigisarik e, e’ben op a’ge Allah ilem ap sa ’gela’ge en narlik po ’gua, oluk helep e’gen hwikhai lagalat, hwikhau wagalat, hegitsogo, at Zakharia hwikhai lasumu ebam hegit agama narlik oluk ’gwegei.

¹⁰ Asogo ’gwegeitik narlisokhwe re, aphwami a’bik o selimu odoktigisarik se’ban ogulat welegesa.

¹¹ E’ben op a’ge ano e narlisokhwe re, Nenaik ’gain Onuk Logo a’ge malaikat ’bogorl pam Allah en yo’go ’belagonobou ago a’ge mesik ’bu agarik e’ben op a’ge narlogu legesema ebano ene’gik ’bekhit akhit Zakharia ologotma inagama il hesi.

¹² Il holuk e, yuk egeitik ogorlok agama re,

¹³ at malaikat ano en e, “Zakharia! Hogorlok hagun o. Hat se’ban ese legen ano, Allah arat esa’go hwelegei o. Hugwe Elisabet ai emalik abat dagema ani o. Dagago holuk e, onuk Yohanes tualip o.

^14-16 At ai ia ogola enat, Allah Arogun modok ’betesogo dagemarik e, Nenaik ’gain Onuk Logo a’ge ilem ebe ’gainat welat, anggur e’gen a’bosu emin, ik honuk-honuk togwi a’ge pema emin, no erlak modok welat, aphwami Israel a’ge enebe a’bik enede Nenaik ’gain Onuk Logo a’ge Allah pam he’berik welemagoluk, at en enebabut heberlonobua ai o. At dagemma ai aphwami enebe a’bik onogola enagai a’bik hogukhwe, hat ogo re, hogola hagai a’bik hasulat, ebe hebam liok eselat, tua ani o.

¹⁷ Allah Arogun ap Elia ai ogola welat annisogo nak til denaga laga a’ge ai, at Yohanes ano ebam louk uarik, malik enaiklak enemin, la’buksogo enebasulat, wene enesa’go holu puk a’ge is pema wene holugulat hegitsogo togwi a’ge enebabut wouwagoluk tagenebasulat, enebe Nenaik ’gain Onuk Logo a’ge paget welemagoluk degelogo enebasulat, tigoluk, at naduk dagemarik asogo til denaga lema o,” oluk mo’gulesi.

¹⁸ Asogo mo’gulesimu, at Zakharia en e, malaikat disogo mo’gulesi, “An nugwe ne’birek arat sebal egerikmu re, wene e’gen ai no’gosogo ema o. Demat ema oluk no’gosogo naluk ema epegen,” oluk egeimu,

¹⁹ at malaikat ano en e, “An Allah ilem edik welago a’ge nonuk Gabriel, ai nebe anat o. Op wene yu mo’gulhemagoluk, at Allah en yo’go peraknobou wagama wegi o.

²⁰ Asogo wegirik wene mo’gulhegis a’geat de, demat opo erlak ai en, om a’ge hegitsogo ema ai owan om erlak oruakhwe, hiak ’balogo mo oguntik hiak u erlak woloroguntik e, pobuk wene ai ’berlegat agoam en de, hiak hurema ani o,” oluk mo’gulesi.

²¹ Asogo mo’gulosokhwe re, is aphwami odipmu se’ban ogulat welegesa a’ge ebano en e, “Zakharia ano odipmu modok liplau wago erlakma en Allah owi werikmu ogola modok oruak ai nonogorlok e!” oluk asogo ogwiam e,

²² Zakharia ebe liplau wagarik e, wene mesik modok mo’gulonto erlakma en, mo egeimu, is ebano en e, “Ap yu Allah owi werikmu en abi ’gela’ge mesik hesimu hegi,” oluk pobi tigisa. Asogo ogukhwe re, at ano iak logon u erlak, we e’gik walok pam nak ese laga.

²³ Allah paget tuagoluk is ebano en Zakharia mo’gulegisa ano, arat tegeitik e, owi pam laga.

^24-25 Owi pam lagarik agauwa wei nak welegesarik en, ugwe Elisabet ano emalik ogola aga. Ogola agama re, “Nenaik ’gain Onuk Logo a’ge ai, an ede en aphwami enemin ne’gerli ’gela’ge hasu legi ano erlak emagoluk taknebesi hegi o,” oluk, odipmu libom erlakma en, o ogola hisogo modok oruakhwe, dugwi huaben pollegei.

At Allah en, “Yesus dagema,” oluk obok mo’gulentesi wene

^26-27 Hwe Elisabet ano emalik ogola oruakhwe, dugwi hebarligen pollegeimu re, Allah en malaikat ’bogorl pam yo’go ’belagonobou wago a’ge mesik Gabriel ano Galilea do’go, o onuk Nazaret, eba hwele mesik onuk Maria, ap Yusuf Daud en dogo’gwe a’ge ai e’birek iak tago oruakma e’bek perakpou waga.

²⁸ Perakpou wagama re, at malaikat hwele ano e’bek wagarik e, disogo mo’gulesi, “Maria nerei o! Allah en op modok a’ge wokheriogoluk hemin welegep o,” oluk mo’gulesimu re,

²⁹ at hwele Maria ano esa’go hwelegeitik, ogorlok en uak erlik-erlik eselat e, “Hau wusogo mo’gulnesi ai no oluk mo’gulnesi,” oluk ede eberegei.

³⁰ Asogo eberegeimu, at malaikat ano en e, “Maria, nerei yo. Hogorlok hagun o. At Allah en edeaphebegeitik e, hebe ebam liok egei o.

³¹ Yethemen, hat hemalik hogola oroguntik abat dorogun. Doroguntik e, onuk Yesus tualip o.

³² Ye, malik ai arlue emarik ’gain agoam e, aphwami en e, Allah ’gain Onuk Logo a’ge welago ano omlogo hegi o, oluk ogu lema. At eba Daud ai onuk logo a’ge welat, aphwami at en tenentarok welaga ano ebalema re, Nenaik ’gain Onuk Logo a’ge en, at aiat edikpouwa o.

³³ Holuk e, Yakub en dogo’gwe a’ge ebano onue ’gain Onuk Logo a’ge at aiat eragam iak modok hologo welema o. Asogo tenentarok welat ebe hurom erlakma en ’gain Onuk Logo a’ge modok welema o,” oluk asogo mo’gulesimu,

³⁴ at hwele Maria en e, “An ap emin nogou erlakma, hat mo’gulnigen ai no’gosogo ema o,” oluk asogo egeimu,

³⁵ at malaikat ano en e, “Allah Arogun hebam louk emarik e, ’gunmu onobogwi ’gela’ge, nenaik ’gain Allah Onuk Logo a’ge anni a’bik a’ge ai eragam hobouwa o. Hobouema re, hemalik Allah ematek omlogo dorumu re, aphwami en, At ai Allah omlogo, oluk ogu lema ani o.

³⁶ Ye, yethemen, hat hebap Elisabet ano ebe sebal aga a’geat de, emalik abat ogola agama o. Is aphwami pema en, Hwe ai ebe abeli o, oluk, obok ogwi a’ge ano emalik ogola agarik dugwi hebarligen pollegeimu mo’gulhegis ai o.

³⁷ At Allah en di a’ge yu a’ge tumu re, mia erlak o. Elirat tu nak o,” oluk mo’gulesimu re,

³⁸ at Maria en e, “I o. An Nenaik ’gain Onuk Logo a’ge eragam a’geat o. Hat en e’gen ai hegitsogoat taknobouwak o,” oluk egeimu re, at malaikat yo’go waga a’ge ano Maria ukpoluk laga.

At Maria ano en Elisabet hai laga wene

³⁹ Malaikat ano lagama, at hwele Maria agauwa wei nak welagarik o Yudea ’begeitik dom akhit eba ligagarik e,

⁴⁰ at Zakharia ano owi pam ’gwi lagarik e, hwe Elisabet ano hau weregei.

⁴¹ Maria en hau werisoma Elisabet esa’go hwelisokhwe erianoat, emalik ogola a’ge ano hogolo’bok hesi. Asogo tisokhwe, Allah Arogun, hwe Elisabet ogola ’bete la ’gwegei.

⁴² ’Gwegeimu, at hwe Elisabet ano iak loksogo re, disogo egei, “Hwami enebe a’bik oruakhweat de, Allah en, Op a’ge harat wokheselat, hemalik hogola ai obap pasulat, tegei yo.

⁴³ Ye, hat hebe an nue ’gain Onuk Logo a’ge ia en niau wegen yu nogorlok o!

⁴⁴ Hat en hau watnebisoam e, nesa’go hwelisokhweat, malik nogola a’ge ogola agai hasulat hogolo’bok hesi o.

⁴⁵ Naik ’gain Onuk Logo a’ge en obok mo’gulhesi a’ge, demat ema o, oluk, hede Allah pam he’berik pegen ai, hogola hagai a’bik hagun ani o,” oluk mo’gulesi.

Maria en Allah erliktegei wene

⁴⁶ Asogo mo’gulesimu, at hwele Maria en e, “Naik ’gain Onuk Logo a’ge ai an nogola en erliktaga legi o.

⁴⁷ Allah en delnebegei a’ge ano en disogo taknebesimu nogola nagai a’bik hasu legi o.

⁴⁸ An at eragam a’ge ai, eneragam ’gela’ge oruakma il niesi o. Ye, hwerli yogodak en e, aphwami ’berlek en, Allah en op a’ge wogesimu o, oluk ogu lema o.

⁴⁹ At anni a’bik a’ge enat, lok a’ge taknebesi o. At u’gwarek omuat onuk logo welemak o.

⁵⁰ Aphwami ’berlek, pageat dagegesa a’ge emin, ’get dagegesa a’ge emin, pobuk dagema a’ge emin, 2 at ebe onogorlok oruakma ede en obabenebise lema o.

⁵¹ At e’gik anni a’bik ai pam, aphwami onogola en onu’gwarek erlikhorlogwi a’ge ai modok ’bulogo mugentesi o.

⁵² Aphwami ’gaindek ononuk logo welagai a’ge ai sebelak enebasulat e, is ononuk erlak a’ge ai logo enebasulat,

⁵³ aphwami onogola nele welagai a’ge op a’ge seik-’beiksogo wogentasulat e, is enilmu oruak a’ge ai, logon wogentasu erlak weat peragenebasulat, tegei.

^54-55 Pageat nene’ba Abraham emin, at en dogo’gwe a’ge emin, enemin modogat obabenebigoluk obok mo’gulentesi ano hegitsogoat, at osi aphwami Israel a’ge enebam eberak poluk ede en lerentau waga yu o,” oluk egei.

⁵⁶ Asogo egeitik e, at hwele Maria ano dugwi henagan ’gela’ge, at Elisabet emin welagarik e, pobuk owi pam waga.

Yohanes ik olomu ’belabenebise laga a’ge ano dagaga wene

⁵⁷ At Maria wagama en e, hwe Elisabet ano emalik dakhorlo hegit agarik e, emalik abat deregei.

⁵⁸ Emalik abat deregeimu re, is aphwami emin welegesa a’ge pema emin, at ue ari emin, “Nenaik ’gain Onuk Logo a’ge en modok edeaptegei hegi o,” oluk egesarik e, at u’gwarek emin onogola enagai hegesa.

⁵⁹ Onogola enagai hegesarik e, agauwa sabiren welegesarik loruk o’gwe re, malik ano agap e’gerlimu a’ge ’baluagoluk woluk wegesa. Wegesarik e, Malik yu aik onuk hegitsogoat onuk Zakharia tualuok o, oluk egesa a’ge re,

⁶⁰ ia en e, “Erlak o. Onuk Yohanes tualul o,” oluk mo’gulentesi.

⁶¹ Asogo mo’gulentesimu, is ebano en e, “Hue hari ononuk asogo erlakmayat de, onuk Yohanes tualigen ai nopaget tualigen,” oluk, asogo egesarik

⁶² emalik ano aik Zakharia ano ene’gik walok pam mo’gulogulat e, “Onuk sa tualul o,” oluk

⁶³ asogo egesema, at Zakharia en e, “Helep a’ge pelal wogwi a’ge mesik woknemis o,” oluk e’gik walok pam ’belinghesimu wogegisema re, “At onuk Yohanes o,” oluk, pelal wesi. Asogo pelal wesimu aphwami a’bik ebano en e, “Nonogorlok e!” oluk erliktigisa.

⁶⁴ Erliktugukhwe erianoat, Zakharia ano iak modok huragarik e, iak eselat Allah hau werise laga.

⁶⁵ Asogo tegeimu, is aphwami enemin welegesa a’ge ebano onogorlok a’bik aga. Onogorlok agarik, wene aga a’ge ano obok o Yudea dom o’gwe a’ge eba modok ’beling-’belangsogo mo’gulentil legesema wene ano sak-’bak egei.

⁶⁶ Asogo ogu legesema enesa’go hweligisarik e, “Allah en annisogo tenak pesimu hegi o,” oluk, onogola eberugulat e, “Malik wei a’ge oruak yu, arlue emarik e, no’gosogo tua,” oluk ogu legesa.

Zakharia en Allah erliktegei wene

⁶⁷ At Yohanes aik Zakharia ano Allah Arogun ogola ’betesogo ’gwegeimu Allah wene eselat e, disogo egei,

⁶⁸ “Nis aphwami Israel a’ge ai Nenaik ’gain Onuk Logo a’ge Allah en il nentau wagarik delnenebegei ai en e, at erliktogu lomok o.

⁶⁹ Delnonobuagoluk e, at eragam a’ge Daud en dogo’gwe a’ge anni oruak a’ge edikpesimu oruak ai o.

⁷⁰ Asogo tegei ai re, is ap naduk a’ge Allah enat u’gwarek paget pagathwerlesimu wene mo’gulontogu legesa a’ge en mo’gulontogulat e,

⁷¹ Is aphwami logon nenemin il ’belak a’ge ene’gikmu en delnenebiselat, is aphwami ’berlegat enebirapsogo nonobogwi a’ge ene’gikmu en ’goboksogo nenebasulat, tua o, oluk, ogu legesa ano hegitsogoat aga o.

^72-73 At en nene’balak ai ede en obabenebigoluk obok egei ano ebe tagenebasulat, Disogo takhenebaigoluk, wene u’gwarek en obok mo’gulentesi a’ge ano ebe tagalat, tua o, oluk e, nede eberak weleik o, oluk mo’gulentesi. Disogo tik o, oluk ho’buk ’balogo nenaik Abraham mo’gulesi ’gela’geat tu waga yu.

^74-75 Is aphwami pema nenemin il ’belak a’ge ene’gikmu en delogo re, nonogorlok om erlak nenelaluk welat, Allah il oruakhwe nis wiak mesik tu erlakma en, at ebaget nak hegitsogo tugulat, togu lemagoluk tu waga yu o.

^76-77 Ye, hat nomlogo yu en, nonue ’gain Onuk Logo a’ge wema’gwe ebela yerise lemagoluk, hat naduk yo’go lasulat, aphwami di wiak yu wiak togwi a’ge Allah en wene enebam a’ge erlagapsogo ukpasulat delonobua ai wene hat en mo’gulontoma enaluk ema ai pam en, hat hobok ogulat e, Logo welago a’ge iak mo’gulentil denago ano ebe yu o, oluk ogu lema o.

⁷⁸ Ye, nenaik Allah ai nenebe edeapnenebiselat e, o hubet mo yosu ago ’gela’ge, mo erabu en nenebam perakpou wagalat,

⁷⁹ O hiktakma welat warom ai nonogorlok o, oluk opogwi ano o dakharak enebasulat, nis wongsogo yogunat oruakma, Ebela ’go yu lagupmu re, henede ha’buk ua ani o, oluk, mo’gulnentasulat, tua o,” oluk, Zakharia en egei.

⁸⁰ Ye, at Zakharia omlogo ano ebe arlue otluk ede modok hurle agarik e, aphwami Israel a’ge owan il yerentai lo erlak welat e, o leimu aphwami modok erlakma ebano welaga.