Ezra 1 - Allah Iak 'Belak Naduk A'ge emin Pobuk A'ge Emin Wusogo Wogenebegei Wene

Ap ’gain Koresh en e, “Aphwami Yahudi a’ge togolik onowi pam louwak o,” oluk wene edip lebegei wene

¹ Aphwami o Persia a’ge onue ’gain onuk Koresh ai inagama, mo il naduk welegesa ai pam, at Nenaik ’gain Onuk Logo a’ge Allah en, wene ap at iak mo’gulentasu laga a’ge Yeremia ano mo’gulesimu egei a’ge ano demat emagoluk, ap Koresh ai ede ’gagalegei. Ede ’gagalegeimu, at en o da ya senentarok welago’gwe lo’bok, onuk mo’golilouwagoluk wene disogo lebegei:

² “An his aphwami o Persia a’ge honue ’gain Koresh en wene mesik mo’gulhentaik o, Allah ’gain Onuk Logo a’ge ’bogorl pam welat, di a’ge yu a’ge e’gik pam welago a’ge en, an arat ’gwiangma yema di owi yu owi ’gain welemagoluk ediknebesirik, at ebe owi werikmu en erliktogulomma, o Yerusalem aphwami Yehuda a’ge onowi pam eba woruagoluk yo’go nebesimu welegi o.

³ Holuk e, at Nenaik Allah Onuk Logo a’ge eiyagai hene’gerlak o’gwe welagai a’ge ai, enaik Allah enat senentarok welemak o. Is at eiyagai ai, enaik Allah Onuk Logo a’ge o Yerusalem welago a’ge ai, owi woruagoluk, togolik o Yerusalem louwak o.

⁴ Louwak oluk e, his logon sa en, Allah ’gain Onuk Logo a’ge eiyagai o yema wogonoboluk wegesema o di owi yu owi eba henemin welegep a’ge lo’bok, enelaluk oruak a’ge ai, is di a’ge yu a’ge erlak a’ge ai, uang perak a’ge emin, emas a’ge emin, onso’boru ebela pam no a’ge emin, wam wogonoboluk louwa a’ge emin, logon wogentil lu o. Asogo wogontogulat, mesik e, wam di a’ge yu a’ge Allah owi o Yerusalem eba woruagoluk eneminat henede pam enat weat pomup o,” oluk wene lebikpesi.

⁵ Wene asogo lebikpesimu, is aphwami ena’gul onuk Yehuda a’ge, Benyamin a’ge, onuelak ’gaindek emin, ap Allah eiye a’ge emin, ap Lewi a’ge Allah owi werik lerontogwi a’ge ebano emin, enebe lo’bok Allah en enede ’gagalegei a’ge ’berlegat Allah owi o Yerusalem wosumogoluk onosum a’ge degelogo pegesa.

⁶ Asogo degelogumu, is aphwami is enemin welegesa a’ge en di a’ge yu a’ge ebe emas, perak, a’ge hele’gik a’ge emin, onso’boru ebela pam no a’ge emin, wam woluk wema a’ge emin, di a’ge yu a’ge o’go a’bik a’ge logon emin, wogentigisarik, ebam louksogo Allah owi wosuom a’ge paget logon enede enat weat wogentigisa.

^7-8 Asogo wogentigisema, at Koresh en e, “Di a’ge yu a’ge pageat ’gain Onuk Logo a’ge owi werikmu Yerusalem eba Allah paget tuogoluk wogu legesa a’ge, ap ’gain Nebukadnezar ano en woluk o Babel lagarik e, at odogwi asua erliktaga laga a’ge owi pam pesirik welaga a’ge ebano lebik poumagoluk,” aphwami o Persia a’ge onue Koresh ano en ot Mitredat ano en ’gwelabogo welago a’ge ano mo’guleselat, “Di a’ge yu a’ge Allah owi werikmu en woluk wagarik o Babel pesi a’ge ebano lebikpou wotluk wenakho pasuam e, Yehuda a’ge onue Sesbazar e’bek poumagoluk mo’gulemin o.”

^9-11 Allah paget tagalat ik na’gogo no’gwi a’ge ige’be emas a’ge logon 30 pam, perak a’ge logon 1.000 pam, ige’be logon 29 pam, ige’be wei a’ge emas a’ge logon 30 pam, perak a’ge logon 410 pam, di a’ge yu a’ge pema logon 1.000 pam, onuk ’balogo-’balogo pesi. Di a’ge yu a’ge ebano ige’be emas a’ge emin, perak a’ge emin, di a’ge yu a’ge pema mu a’ge logon ’berlegat la’bulogo re, 5.400 wenakho onuk ’balegei ai o. Di a’ge yu a’ge ebano ’berlek e, aphwami o Yehuda a’ge onue ’gain Sesbazar ano wogesimu, at en aphwami Israel a’ge o Babel wogonoboluk legesa a’ge ebano wogonoboluk wagalat Yerusalem woluk waga o.