Ester 9 - Allah Iak 'Belak Naduk A'ge emin Pobuk A'ge Emin Wusogo Wogenebegei Wene

Is aphwami Yahudi a’ge enanni egesa wene

¹ Ap onuk logo a’ge en is Yahudi a’ge tagonobo wene werak lebikpesi a’ge ano a’ge hegit lau wagokhwe, is Yahudi enebirabonobogwi a’ge ebano en, dugwi 12 arat pelelak tanggal 13 pam is Yahudi a’ge sebelak onobouwok, “oluk epegesa a’geat de, dagan eselat, is Yahudi a’ge ebano en is enebirap onobogwi a’ge ebano sebelak onobo a’ge agoam,

² is aphwami Yahudi wiagap onobo opogwi a’ge ebano waronobuogoluk, is Yahudi a’ge di owi yu owi ap onuk logo a’ge Ahasyweros eiye welagoma onowi di kota yu kota ’berlegat odoktogu legesema, is aphwami ena’gul onuk mu a’ge-mu a’ge ebano ’berlegen is Yahudi a’ge enebe onogorlok agama ugenebegesa.

^3-4 Ye, at Mordekhai ano ap onuk logo a’ge owi o lok ebelogo werik a’ge ano onuk lok agalat, at onuk di owi yu owi o dogo lok sebelegei a’ge ano ’berlegat weiyal il lasulat, tegeimu, ebano welat-welat at anni modok a’bik aga ano pam is ap o di owi-yu owi onuelak ’gain-’gain emin, ap onuk logo eragam welagai a’ge emin, at osi di owi yu owi eiye welagai a’ge emin, ap onuk logo a’ge emin togwi a’ge emin, ’berlegat ap Mordekhai ebe onogorlok en is Yahudi a’ge enemin egesema, is logon en Yahudi a’ge enemin weim tu a’ge mia at aga.

⁵ Is Yahudi a’ge en, is aphwami enebirap onobogwi ebano, enede en tagonobo epegesa a’ge ano tagenebil lagalat, ’bouwa’gun pam wat enebi lagalat, enebe erlagapsogo onobogulat, til legesa.

⁶ Asogo til lagalat, ap onuk logo a’ge owi o lok ebelogo werikmu o Susan ebano enebe 500 wusogo onobogulat,

^7-10 Is aphwami Yahudi waronobu wene ’balegei ano ap Hamedata omlogo Haman ano at eiyagai Parsandata, Dalfon, Aspata, Porata, Adalya, Aridata, Parmasta, Arisai, Aridai, Waizata enebe lo aiat waronobogulat, legesa a’geat de, ena’ge-a’ge nage hogul mesik nak ogo modogat wo erlak o.

¹¹ Agauwa ai erlige ap onuk logo owi o lok ebelogo werikmu o Susan ebano, ap enebe ya hwerliat warenebegisa o,” oluk, ap onuk logo a’ge ano ’beli’gogo mo’gulosu egesema,

¹² ap onuk logo a’ge ano en hwe lok Ester ano mo’guleselat, “Nis nonowi o lok ebelogo werik a’ge o Susan yema is aphwami Yahudi a’ge en enebe 500 waronobogulat, ap Haman eiyagai enebe lo ano eminat warenebegisa o. O Susan yema enebe 500 warenebegisa holuk, di owi yu owi an neragam enebasumu eba re, ebenagaikmu warenebegisema re, niak u mia o. Asogoma re, haren, di a’ge takhebak oluk, ’gonu mo’gulnigen ano, takhebasulat, ye, hede en nagai epasu legen a’ge ano, woknemin, oluk mo’gulnoso holuk, wokheselat, tikmu re, in o.”

¹³ Mo’gulesimu, hwe Ester en mo’guleselat, “Naik o. Hat ap honuk logo a’geatma re, wene werak yogodak til legesa ano hubet asogoat til lagalat, ye, at Haman eiyagai enebe lo werak ano ono’gorlop herle erlilogo e pam urlok tagonobogulat, tu op epegen holuk, is aphwami Yahudi a’ge o Susan yema welagai a’ge ebano mo’gulentemin o,” oluk, mo’gulesi.

¹⁴ Mo’gulesimu, ap onuk logo a’ge Ahasyweros en Ester mo’gulesi ano hegitsogo tuagoluk, wene wusogo o Susan eba lebikpesimu, ap Haman eiyagai enebe lo werak a’ge ebano e pam sepnogo urlok tagonobogulat,

¹⁵ ye, dugwi arat pelelak a’ge tanggal 14 ai pam aphwami Yahudi a’ge o Susan welagai a’ge ebano mesik emin odoktegisarik, ap enebe 300 wusogo onobogulat, tegisa a’geat de, ena’ge-a’ge nak e, hogul mesik wo erlagat o.

¹⁶ Ye, o Susan eba togukhwe, is aphwami Yahudi a’ge pema di owi yu owi ap onuk logo eragam enebasumu welagai a’ge ebano onowi o’borlogouk erlagapsogo pogulat, eneli wokho pogulat, tuogoluk, odoktegisarik, is ap enebirap onobogwi a’ge enebe 75.000 at wusogo enebegesa a’geat de, ena’ge-a’ge nak e, Hogul mesik wo erlak o.

¹⁷ Asogo tegisa ai re, dugwi onuk Adar arat pelelak a’ge bulan 12 tanggal ye 13 pam togu legesarik, tanggal 14 pam set hwalhorlogulat, enagai en seni lok sorogulat,

¹⁸ Ye, is aphwami Yahudi a’ge pema o Susan welagai a’ge nak e, tanggal 13 pam emin, 14 pam emin, odoktak poluk enemin hwerlitak a’ge ebano warenebil legesa, tagenebil laga legesarik, tanggal 15 pam set hwalhorlogulat, enagai en seni lok sorogulat, tegisa.

¹⁹ Asogo tegisa ano pam is aphwami Yahudi a’ge onowi welagai o’gwe lo’bok welat, o seli lo’bok esa’go-esa’go welagai o’gwe ogo dugwi Arat onuk Adar pelelak tanggal 14 lau wago holuk, enede aganhan en seni lok sorogulat, onoso’boru so’borik poluk no’gu legesa.

Seni onuk, Purim, sorogulom a’ge paget pulogo pegesa wene

^20-22 Asogo til wegesa ano ’berlegat at Mordekhai en pelal wokho pesirik, pobuk, is aphwami Yahudi a’ge en togulom a’ge pelal wasulat, dugwi onuk arat Adar tanggal 14 pam emin, 15 pam emin, nis Yahudi a’ge nonowi o’borlogouk erlak welemagoluk, is enebirap onobogwi a’ge ebano sebelogo pogulat, dugwi ai pam nenede hwerli agalat welege a’ge ano ebalema nenede aganhan lok at agalat, nenedemu en lo’gu maru ’gela’ge welege a’ge ano ebalema nonogola nenagai agalat, tigerikmu re, tahun mesik togulat, “Dugwi onuk arat Adar pelelak tanggal 14, 15 lau wago holuk, nonogola nenagai en seni sorogulat, nonso’boru balu-balu no’gulat, ye, is ap ene’gik erlak holuk, nena’ge-a’ge we wogontogulat, togu lomok o,” oluk, is aphwami Yahudi a’ge di owi yu owi at onuk logo Ahasyweros eragam enebasumu horoksogo oruak a’ge emin, waleksogo oruak a’ge emin, ’berlegat enebaget pelal wogo a’ge ano perakpil laga.

²³ Balogo perakpil laga ano is Yahudi a’ge en mo’guligisarik, “Enede aganhan en seni sorogwi a’ge ano modok-modogat togu lomok o,” oluk, egesa.

Ologun pam labulogo egesa wene

²⁴ Ap Agag a’ge onuk Hamedata omlogo is Yahudi a’ge modogat ebit modok epasu laga a’ge Haman ano en is Yahudi a’ge warenebil lasulat, ena’guluak erlagapsogo pasulat, tu a’ge eberiselat, agauwa ai pam tu a’ge, “Onuk e, a’goma houwok oluk, pelal wokho poluk, mesik wogwi gela’ge, is dugwi togu legesa ano a’ge, tegeitik, aluk aga a’geat de,

²⁵ ’balogo pesi a’ge ano hwe Ester en ap onuk logo a’ge mo’gulesimu, ap Haman en is Yahudi a’ge tagonobo a’ge modok wiak a’ge ’balogo pesi a’ge ano, at onuk logo a’ge en lagaksogo at ebam emagoluk, wene le’gelak pelal wokho lebikpasulat, at eiyagai enemin ono’gorlop herle erlilogo urlok tagenebasulat, tegei.

²⁶ Ye, is aphwami Yahudi a’ge agauwa ai pam tagonobo,” oluk aluk agalat onuk Purim egei ai pam aluk agama re, agauwa ai onuk Purim at aga. Ye, wene werak pelal wokho perakpesi a’ge emin, enil hegesa a’ge emin, aphwami en is tagonobo-gukhwe hegesa a’ge emin, ano pam en

²⁷ is Yahudi a’ge en ogulat, “Nis emin, neneiyagai nene’balak emin, is aphwami a’bik nenemin togulom opogwi a’ge emin, en tahun mesik togulat agauwa ’biren eria, memesogo pul erlak, agauwa eria pam disogo togulom, oluk pulogo pesi ano re, nis nenebageratma re, togu lomulat ani o,” oluk, ogulat,

²⁸ Ye, Purim lau wago holuk, “Nis Yahudi a’ge di owi yu owi enemin, di kota yu kota emin, welagai a’ge ebano nonogola nenagai en seni serige a’ge yu, erlagapsogo pogulat, neneiyagai nene’balak en memerak pogulat, tua erlak hegitsogo nagat dogo’gwe a’ge lo’bok en agauwa yu ebesogo nonogola nenagai en seni sorogwi modok wolomulat o,” oluk, egesa.

²⁹ Agauwa Purim togulom wene pelal wokho naduk perakpil laga a’ge ano, modok-modok togu lemagoluk, ap Abihail agalogo hwe lok Ester ano emin, ap Yahudi a’ge Mordekhai emin, en annisogo pelal mesik emin ’balogo poluk,

^30-31 ap Yahudi a’ge Mordekhai emin, hwe lok Ester emin, “Agauwa Purim a’ge tanggal ai pam togulom,” oluk, pelal wokho pogulat, ye, is Yahudi a’ge onomuat enede eberogulat, “Nis emin, nene’balak neneiyagai emin, agauwa ai pam nenemde asogo tu mia o, oluk ’garelak ’gela’ge welat, lo’gu marogu lomul o,” oluk, pogulat, tegisa ano pam agauwa Purim ai, modok-modok togu lemagoluk, is Yahudi a’ge ap onuk logo Ahasyweros eragam onoboluk welagoma ebano o 127 ebano pelal wogo a’ge ano perakpil lasulat, henede lebe u erlakma en, “Henede we a’ge sogo wolorogup en, henebaget se’ban eselegi ani o,” oluk, emin pelal wokho perakpesi.

³² Agauwa Purim togulom wene oruak a’ge ano at Ester en wene wusogo pelal wokho lebikpesi ai pam anni agama, til laga legesa a’ge paget pelal wogo oruak a’ge ano, wene ai emin pelal wokho pegesa.