Ester 6 - Allah Iak 'Belak Naduk A'ge emin Pobuk A'ge Emin Wusogo Wogenebegei Wene

Ap onuk logo a’ge en Mordekhai logo pesi wene

¹ At ap onuk logo a’ge ano o hup ai erlige nogo u a’ge modok mia agama, at eragam poluk welat til lasu laga a’ge buku pam pelal wogo oruak a’ge ano at il pam mo’goluak oluk woluk manis o, oluk. Mo’gulentesimu,

² pelal wogo a’ge ano woluk wotluk, mo’gulogulat, is ap onuk logo a’ge owi ’godukmu erliktogumu is ap onouwarli wogo a’ge Bigtan Teres emin en ap onuk logo a’ge Ahasyweros woru a’ge obok ’balegisa a’ge ano, at Mordekhai en wene hoso’bi mo’gulosu agama pelal wogo oruak a’ge ano enil hegesa.

³ Hegesarik, ap onuk logo a’ge en eragam a’ge ebano mo’gulentasulat, “At ap Mordekhai wene ai egei pam en alik worogulat, onuk logo pogulat, tegisa ya, erlak a?” oluk mo’gulentesimu, “At emin ebaget togwi a’ge ano en at mo’gulogulat, mesik takpo erlagat o, nenaik,” oluk, mo’gulegisa.

⁴ Ai erlige at Haman en ap Mordekhai o’gorlop herle erlilogo e pam sepnik po a’ge ap onuk logo a’ge mo’guleik oluk wagarik at owi edipmu welaga a’ge ap onuk logo a’ge ano en hesirik, ap an nowi dipmu ’gu agarik oruak ai sa o?

⁵ Mo’gulesimu, at ebaget togwi a’ge ebano en at mo’gulogula, “Ap howi edipmu wagarik oruak ai, Haman at o mo’gulegisema, ap onuk logo a’ge ano en, ’gumagoluk mo’gulemis o,” oluk mo’gulentesi.

⁶ At Haman ano ap onuk logo a’ge oruakma ’gu agama, Ap onuk logo a’ge ano en at mo’guleselat, “Ap onuk logo a’ge en ap mesik ede hwediktak poluk logo po epasu holuk, at no’gorak po epegen?” Mo’gulesimu at Haman en ede epasulat, “Ap onuk logo a’ge logo po epasu ano re, mu a’ge mesik erlak ano at hegi,” oluk, ede epesirik, ap onuk logo a’ge ano mo’gulesi,

⁷ “Hat naik honuk logo a’ge en ap mesik hede hwediktak poluk, logo po epasu legen ano re,

⁸ ap ononuk logo a’ge ano sum ’bukhorlogwi a’ge emin hat ’buktaga legen a’ge ano epasulat ye, hat hurotluk nese legen a’ge ’gare-’gare honogo a’ge ano kuda a’gul pam, ’buksogo woluk wagalat, taga loroguntik,

⁹ sum ano emin, kuda ano emin, is hosi ononuk oruak a’ge ’gain-gain onue mesik wogosoam, at ano en ap hat en logo po hede hwedik takpasu legen a’ge holuk sum ano ’buktak pasulat, kuda ano o’borl pam hweriogo pasulat, takpoluk, o kota ’burl eba woluk neselat ap onuk logo a’ge en ap mesik logo po a’ge ede epasulat holuk e, disogoat takpasu o, oluk, ap mesik naduk otluk, iak loksogoat il-il louwak o,” oluk, mo’gulesi.

¹⁰ Mo’gulesimu, ap onuk logo a’ge en Haman mo’guleselat, “An nosum ’buktaga legi a’ge emin, no kuda emin, perleneat wa’guntik, ap Yahudi a’ge nowi edipmu ’goduk ’gwi lagaimu oruak a’ge Mordekhai ano, hat yogodak hegitsogoat ’buktak pei lak o. Ye, ’buk tagenebasulat, wene hat e’gen a’ge ano mesigat nak ogo mesik ukpo mia ’berleksogoat tin o,” oluk, mo’gulesi.

¹¹ Mo’gulesimu, at Haman en sum ano wasulat, kuda ano wasulat, tegeitik, woluk sum ano ap Mordekhai ’buktak pesirik, ap onuk logo a’ge o kuda pam hweriogo poluk woluk o kota ede ’burl selimu ebano lasulat, “Ap onuk logo a’ge en ap logo po ede epasulat holuk, disogo tagenebasu o,” oluk iak loksogoat il-il laga.

¹² Lasu lagarik, at Mordekhai ano pobuk togolik ap onuk logo a’ge owi edipmu ’goduk ’gwi lagaimu eriano wagokhwe at Haman ano orogolema eriano en sialogo e’gerli pam perleneat owi pam laga.

¹³ Lagarik, at tu a’ge ebam aga a’ge ano ugwe Zeresy emin, arilak emin, ’beli’gogo mo’gulentesi mo’gulentasuam, at emin wene ’bele’giso a’ge ano emin, ugwe Zeres emin, en Haman mo’gulogulat, “At Mordekhai logo pasukhwe, hat ’bise legen ano re, at ap Yahudi a’ge atma, sebelogo paigoluk tagokhwe, hat horogap hobo a’ge mesik erlakma re, sebelak pagathwerlagunat o,” oluk, mo’gulegisa.

¹⁴ Ye, wene ano owan mo’gulogumu, is ap onuk logo a’ge paget togwi a’ge onouwarli wogo a’ge ebano, wegesarik, ap Haman ano hwe Ester seni serisoma perleneat woluk legesa.