Ester 5 - Allah Iak 'Belak Naduk A'ge emin Pobuk A'ge Emin Wusogo Wogenebegei Wene

Hwe Ester en ap onuk logo a’ge emin Haman emin seni sogo nouwogoluk worlentesi wene

¹ Hup ’biren nogoluk, hubet at ap onuk logo a’ge ano at wene wusogo mo’gulentasumu ebano hurotluk, ’goduk ’gwi lagaimu olukhwe edenogo oruakma, Ester ano hwami lok a’ge onosum ’buktogwi a’ge ’buktak poluk, ap onuk logo a’ge wene ’balo’gumu o ogorli lok ogo la ano at welat, olukhwe edenogo oruakhwe at hwe Ester ano odip edik welaga tagoma,

² ap onuk logo a’ge ano en at ugwe hwe lok Ester o ogorli lok werikmu ebano edik oruakma il hesirik, agai en ua’gun emas a’ge pam hele’gik a’ge e’gikmu oruak a’ge ano Ester e’gikmu pasuam, at Ester en eragam wagarik, wa’gun ebe ano tenak pesi.

³ Asogo tenak pesimu, ap ’gain onuk logo a’ge en, hwe Ester ano mo’guleselat, “Ester. Hat hwe hebe logatma, no hagai en wegen o? Hat hai en wegen a’ge ai an mo’gulnorogunmu, an ukhebaik erlak ’berlegat wokheselat, o an eiye welagoma yema ogo me’gisogo wokheigatma re, mo’gulnemin o.”

⁴ Mo’gulesimu, hwe Ester ano en wene o’go mo’guleselat, “Naik o. An en hat hebaget seni serisoma yogodak ap Haman hemin nai lo op epasulat holuk, nai lu o,” oluk laga.

⁵ Lagama, ap onuk logo a’ge ano en, “Hwe Ester en yo’go nenebesimu re, ap Haman wemagoluk, perleneat mo’gulesi lit o.” Oluk mo’gulentesimu, mo’gulesi legesema wagoam, ap onuk logo a’ge ano emin at Ester seni lik-luk tegeimu ebano legesa.

⁶ Legesarik, anggur a’bosu no’gulat, ap onuk logo a’ge en hwe Ester ano agauwa mesik emin mo’guleselat, “Hat ’gonu mo’gulnorogun holuk wokheselat, ye, mo’gulnik epegen a’ge holuk mo’gulneselat togunmu an ukhobo erlakma en ’berlegat wokheselat, tagalat, o an eiye welegimu yu ogo re me’gisogo wokheigatma re, yogodak in o,” oluk, mo’gulesi.

⁷ Mo’gulesimu, at Ester en wene o’go at mo’guleselat, “An nagai epasu a’ge emin ’gonu mo’gulheik epasu a’ge emin, yuatma re, mo’gulheik o.

⁸ Hat naik honuk logo a’ge en hedeap nebiselat, ye, an nagai epasu a’ge emin ’gonu mo’gulheik epasu a’ge emin, hegitsogo tak paik epasulat holuk, hubet seni henebaget mesik emin serikmu re, hat Haman hemin nau manup o. Nau wagaiam, wene in o, oluk mo’gulnigen ano re, mo’gulheik ani o,” oluk, mo’gulesi.

At Haman en Mordekhai woru a’ge paget ede eberegei wene

⁹ At Haman ano hwe Ester seni seregei a’ge noluk ede aganhan mu ebelesogo tegeimu libagalat, at Mordekhai ano ap onuk logo owi o lok ’bogun wiak werik a’ge owi ’godukmu hweriogo oruakma il hesirik hau weriselat, tu erlak ai en e, at Mordekhai ebe ebam olot het mu ebelesogo pesi.

¹⁰ Olot het mu ebelesogo tegei a’ge anoat de, ede op agarik, owi pam lagarik, at arilak enemin, ugwe Zeres emin, wemagoluk worlentesimu wagaiam,

¹¹ enede logo pogulat, e’gik modok oruak a’ge agalat, emalik ’bullak a’bigat dagenebiselat, ap onuk logo a’ge en ede aganhan ebam pasulat, is ap ’gain-gain emin, is ap di owi yu owi eiye welagai a’ge emin, oruakhwe ap onuk logo a’ge emin taga lemagoluk erlikhwerlasulat, tegei a’ge ano pam erlikhorloluk mo’gulentasulat e,

¹² Ano re, ai nak erlak o. “Are, ap onuk logo a’ge u’gwe hwe lok Ester en seni seregei a’ge nouwogoluk, ap onuk logo a’ge nemin nak yogo nenebesi o. Ye, loruk hubet ogo, mesik emin nouwogoluk, ap mu a’ge mesik worlonto erlak. Are, ap onuk logo a’ge emin nak worlnentesi o.

¹³ Di a’ge yu a’ge taknobogwi yu pam nagai ho a’ge, at ap Yahudi a’ge Mordekhai ano ap onuk logo a’ge owi werik a’ge ’godukmu nak oruak hasumu re, nede aganhan erlagap nebasu o.”

¹⁴ Mo’gulesimu, at ugwe Zeres emin, arilak ’berlegat emin, en hwelegisarik, at mo’gulogulat, “Ai holuk, is ap ono’gorlop herle erlilogo urlok tagonobo a’ge e yat meter 23 ’gela’ge ’gogolip o. ’Gogologuptik, e ai pam ap Mordekhai o’gorlop herle erlilogo e pam ’belebak po’bumagoluk, ap asogo takpoluk tono hubetsogo re ’gain onuk logo mo’gulesi loma at en oso holuk,” hogola hagaisogo ap onuk logo a’ge hemin, “So’boru nal lagup ani o,” oluk mo’gulentesi. Mo’gulentegisa ano at Haman en obat hegi, “oluk epesirik, e ’gogoluagoluk,” osilak mo’gulentesi.