Ester 4 - Allah Iak 'Belak Naduk A'ge emin Pobuk A'ge Emin Wusogo Wogenebegei Wene

Ap Mordekhai ano hwe Ester en lethouwagoluk, mo’gulesi wene

¹ Wene il lagai a’ge ano at Mordekhai esa’go holegeitik, ede wiak otluk, osum derlelogo poluk, sum wiak belagwi a’ge ’bukhwerlasulat, ul a’gul pam pasulat, takpoluk, iak loksogo lo’gu mattil o kota ebano ’gwi lagarik,

² ap ’gain onuk logo a’ge owi pam ’goduk ’gwi lagaimu lagarik, is ap onosum belagwi wiak a’ge ’buktak en ap ’gain a’ge welagoma ebano ’gwilo miama re, owi ogola ’gwi lo erlak ’godukmu eriano mo egei.

³ Ye, ap ’gain onuk logo a’ge en wene wusogo lebikpesi a’ge ano di owi yu owi mo’gulentil lagai en, is aphwami Yahudi a’ge ’berlegat enesa’go holigisarik, enede e’gin orlonu oluk, so’boru no erlakma en enemde hweyang ’gela’ge welat, nge togulat, lo’gu marogulat, is pema enebe esan en onosum derleptak a’ge demak poluk ul pam e’gin-e’gan ogulat, tegisa.

⁴ Ye, is Ester lak degel onobogu legesa a’ge hwami dogum ebano emin, ap onouwarli wogo, a’ge emin, ebano en ap Mordekhai taga’ge ano, hwe lok Ester mo’gulesi lagaiam, ede wiak agarik, at Mordekhai osum wiak a’ge ano ukpoluk, ’get a’ge ’buk horlouwagoluk, sum perak-pesi a’geat de, at Mordekhai ano wo erlakma-en ukpesi

⁵ ukpesimu, at Ester en at ebaget taga lemagoluk, ’gain onuk logo a’ge en ap ouwarli wogo a’ge Hatah edikpesi a’ge ano, worlhesimu wagoam, mo’guleselat ap Mordekhai ai wene no a’ge holak poluk, “Tegeitik oruak a’ge ai aluk emagoluk, mo’gulesi lak o,” oluk, mo’gulesi.

⁶ Mo’gulosoam lagama, ap Mordekhai ano ap onuk logo a’ge owi o lok ’bogun wiak werik a’ge ’goduk ’gogumu ena’goma odipmu ebano oruakma, at Hatah ano e’bek lagama,

⁷ Mordekhai en wene edip dedilogo mo’guleselat, “Ap Haman en nis aphwami Yahudi a’ge ’berlegat nena’guluak erlagapsogo po a’ge eberiselat, ye, is ap erlagapsogo nonobogwi-holuk ap Haman en eselat e, o’go wogonto a’ge uang perak e’gin 34.000 kilo ap onuk logo a’ge uang odoksogo pogumu ’gwelebak paik o,” oluk, dedilogo mo’gulesirik,

⁸ is ap Yahudi a’ge erlagapsogo onobo a’ge wene le’gelak pelal wokho o Susan lebikpesi a’ge ano mesik at Mordekhai en ap Hatah wogeselat, hat en pelal wogo a’ge yu, Ester wogeselat, wene emin dedilogo opsogo mo’gulorogun mu, ap onuk logo a’ge en at Ester en a’ge nis ede nontoluk, neneli uagoluk, at Ester en mo’guloso’gu a’ge paget hiak sakhosogo mo’gulomup o, oluk mo’gulesi.

⁹ Mo’gulesimu at Hatah en Mordekhai wene egei a’ge ano wolukhwe Ester ano ’beli’gogo mo’gulosu aga.

¹⁰ Mo’gulosu agama, at Ester en ap Mordekhai mo’gulesi louwagoluk, Hatah mo’guleselat,

¹¹ “Is ap a, hwami a, worlonto erlakhwe ap onuk logo a’ge owi werik ogorlitakma wene lok a’ge ’balogumu ogola eba at eragam ’gwi lagai-am e, waromat o, oluk, wene mesigat ai at ’belak oruakma, is ap onuk logo a’ge emin togwi a’ge emin, is aphwami at eragam enebasumu di owi yu owi welagai a’ge emin, ’berlegat enalugat o. Asogo a’geat de, ap onuk logo a’ge ano en ua’gun emas a’ge ebelak ano a’ge pam onuk entasu holuk nak de, warom erlakma en enelaluk welema o. Asogoatma re, at onuk logo a’ge eragam lo a’ge paget worlnio erlakma en agauwa 30 hari aga o, no’gosogo oluk o?” oluk mo’gulesi.

¹² Mo’gulesimu hwe Ester en egei a’ge ano at Hatah en Mordekhai mo’gulesi lagama,

¹³ at Mordekhai en wene wusogo Ester oruakma perakpou wagalat, “Is aphwami Yahudi a’ge tagonobogukhwe, an nak e, ap onuk logo a’ge emin welegirikmu re o op werikmu yema nebe obat weleik, epagun o.

¹⁴ Hat mo’gulesi lo erlakma en mosogo wolorogun holuk, nis aphwami Yahudi a’ge nenagap deluagoluk ap mu a’ge en letnentauwagaihwe, hat emin, horokhwi emin, honorogole erlak orogup ani o. Asogoatma re, wene ago a’ge yu, hat enat hwalogun en, ap onuk logo a’ge ugwe, hwe lok e’gen ai o!”

¹⁵ Perakpou waga a’ge Ester mo’gulesimu, o’gosogo ap Mordekhai oruakma perak-pasulat,

¹⁶ “Is aphwami Yahudi a’ge o Susan welagai a’ge ebano ’berlegat odoktagenebil laguntik, loruk-hopmu ik emin, so’boru emin, no erlakma en henemde hweyang ’gela’ge welat, an nakhit se’ban ogukhwe, nogo henagan ogup ani o. Hi ogukhwe, an ogo is an degel nobogwi a’ge hwami dogum ogo, asogo hegitsogoat togu lema o. Asogo togu lemarik, wene tak a’ge ano sagalogo poluk, ap onuk logo a’ge eragam ’gwi laikmu re, waremak o, mo’gulnogwi holuk ai re, an warom e, obat o,” oluk, wene wusogo perakpesi.

¹⁷ Ye, hwe Ester wene wusogo perakpesi ano at Mordekhai mo’gulesimu, at Mordekhai en hegitsogoat til laga.