Ester 3 - Allah Iak 'Belak Naduk A'ge emin Pobuk A'ge Emin Wusogo Wogenebegei Wene

At Haman en Is Yahudi a’ge erlagapsogo onobo ebele paget le’gelegei wene

¹ Asogo toluk pobuk, ap onuk logo a’ge Ahasyweros ano en ap mesik a’gul onuk Agag a’ge Hamedata omlogo Haman ano is ap ononuk oruak ’gain-’gain pema ononuk logo ’gela’ge oruakhweat de, at onuk nage modogat logo ’gela’geat welemagoluk, eragam welat emin taga lemagoluk ede aganhan ebam poluk, edikpesi.

² Edikpesirik, at ebaget togwi a’ge owi o lok op a’ge ebelogo werikmu de ’goduk ’gwi lagaimu welagai a’ge ebano mo’gulentasulat, “Ap Haman ’bagalat ’gulagalat, tago holuk honodogorlu pam hurotluk hondogun ’gonusogo welat, erliktogu lomup o,” oluk mo’gulentasuam is ’berlek asogo nak togu legesa a’geat de, at Mordekhai omu nak e, odogorlu sisogo welat erliktu erlak.

³ Erliktu erlakma re, is ap onuk logo a’ge ebaget togwi a’ge at owi o lok ’bogun wiak werik a’ge ’goduk ’gwi lagaimu welagai a’ge ebano en at Mordekhai ano mo’gulogulat, “Hat no oluk ap ’gain onuk logo a’ge en wene egei a’ge sagalogo pasu legen?” oluk,

⁴ wene loruk hopmu asogo nak mo’gulogukhweat de, at Mordekhai en, “An ap Yahudi a’geat o,” oluk, “Erliktago erlak en e, at Haman en Mordekhai no tisoma hul?” oluk, Haman mo’gulegisa.

⁵ At ap Mordekhai ano odogorlu pam yakutsogo odogun ’gonu sogo welat hat erlikhobu erlakma enat oruak o, “mo’gulogwiam at Haman en, ai demat hegi,” oluk epesirik, olot het modok mia agalat,

⁶ ye, at Mordekhai ano, ap Yahudi a’ge at aluk a’galat, tegeitik, at omu nak ebe wusogo po a’ge mia opoluk, at ue ari is aphwami Yahudi ap onuk logo Ahasyweros eragam welagai a’ge ebano ’berlegat, ena’guluak erlagapsogo paik, epesi.

⁷ Asogo epesimu, ap Ahasyweros ano onuk logo a’ge oruakhwe, tahun 11 takpoluk, mesik tak a’ge dogwi naduk Nisan pelelak a’ge pam at Haman en wiagap-onobo a’ge ede eberegei a’ge ano dogwi emin, tanggal emin, o ologun pam en enak a’ge houwagoluk, pelal wokho poluk, wogogwi ai ’gela’ge, is dugwi togwi a’ge ano togulat at Haman il pam dugwi 12 pelelak ai onuk Adar arat pelelak ai a’ge pam tu a’ge ’belak a’ge anoat wegesa.

⁸ Wegesema, at Haman en ap onuk logo a’ge Ahasyweros ano mo’guleselat, “Naik o. Di owi yu owi hat heragam enebasu legenma di aphwami yu aphwami nene’gerlakma aphwami mu a’ge nak egesarik oruak a’ge ebano en, is di aphwami yu aphwami en togwi ’gela’ge tu erlakma en is muat togulat, hat en wene wusogo lebikpasu a’ge ano opsogo togwi erlakma re, ukpagun holuk honuk wiagap pouwa o.

⁹ Asogoatma re, is aphwami ai, erlagapsogo onobo wene-wene wusogo lebikpo op epasulat holuk, is ap wene wusogo lebik pegenhoma til louwa a’ge o’go an en uang perak e’gin 340.000 kilo hat ho uang odoktak pasu legenma ebano ’gwelebak paik o,” oluk mo’gulesi.

¹⁰ Mo’gulesimu, ap ’gain onuk logo a’ge Ahasyweros ano en cincin emas ene’gik segerlet pam pogwi a’ge ano pam a’bosu cap togulat e’gik ’burl wantak a’ge ano no’gorlogo ap Agag en a’ge Hamedata omlogo is Yahudi ebirap enebiso a’ge Haman ano wogesi.

¹¹ “Aphwami enebe re arat wokhegis a’geat de, uang wokheik oluk obok, mo’gulnigen a’ge ai re hat en no’gosogo togun? Uang tenak welagaimu a’ge ebano pagun a?” oluk mo’gulesi. Asogo mo’gulesirik, pobuk ’gain onuk logo a’ge en Haman disogo mo’gulesi.

^12-14 Asogo toluk, dugwi naduk pelelak tanggal 13 lau wago ano pam at Haman en is ap nonuk logo a’ge ano paget pelal wogwi a’ge ebano worlentasuam wegesema, is ebano mo’gulentasulat, “Dugwi 12 arat pelelak tanggal 13 pam is aphwami Yahudi a’ge ap enarlue emin souwe emin, hwami emin, hwelani malik emin, ’berlegat agauwa mesigat ai pam mesik erligeat warenebit lagalat, ena’guluak modok erlagapsogo poluk, ena’gea’ge ’berlegat hogul wogu lomup o. Ye, agauwa tul ege ai pam di aphwami yu aphwami ’berlegat tu a’ge di degel takpoluk welemagoluk, wene tu a’ge le’gelak yuat o, oluk, at onuk logo a’ge eragam enebasumu di owi yu owi ’berlegat edik enebil laga lemis o, oluk, pelal wik-wok perleneat lit o,” oluk mo’gulentesimu, en mo’gulentesi ano hegitsogo, is aphwami ena’gul onuk lo’bok di owi yu owi oruak a’ge ano is eniak pam lo’bok pelal wogwi ’gela’ge pelal wokho pegesarik, “Ap onuk logo a’ge Ahasyweros en at egei,” opou wagoluk, at e’gik segerlet pam a’ge tegine ano pam a’bosu cap takpoluk, ap onuk logo a’ge osi at eragam welagai a’ge emin, at osi di owi yu owi eiye welagai a’ge emin, di aphwami yu aphwami onuelak ’gain-gain emin, ap onuk logo a’ge eragam enebasumu di owi yu owi ’berlegat perakpil louwagoluk, ’balogo pegesa.

¹⁵ ’Balogo pogwiam, is ap wene werak pelal wogo a’ge woluk louwagoluk, mo’gulentesi a’ge ano en, “Ap ’gain onuk logo a’ge en peraknonobou waga o,” oluk, perleneat di owi yu owi so’burentil lagalat, ye, ap onuk logo a’ge owi o lok ’bogun wiak werik o Susan ebano mo’gulontogulat, til lagaihwe, ap onuk logo a’ge Haman emin hurotluk, anggur a’bosu no’gulat yogunat togukhweat de, is aphwami o-kota Susan welagai a’ge ebano nak e, wene ai holak poluk, enede yarluk egei.