Ester 1 - Allah Iak 'Belak Naduk A'ge emin Pobuk A'ge Emin Wusogo Wogenebegei Wene

Ap ’gain onuk logo a’ge ugwe Wasti en ogun mo’gulesi a’ge ano iak sagalegei wene

¹ Ap ’gain onuk logo a’ge Ahasyweros ano o India en ’bekhit, Etiopia hwerli o lok 127 sebelil lagarik eiye welat, wene mo’gulentasukhwe, wene aga a’ge ebe yuat o.

² Ap onuk logo a’ge Ahasyweros ano at eragam poluk, wene mo’gulosoma owi o lok modok ebelogo werik o Susan welat, wene mo’gulese laga.

³ Wene mo’gulosokhwe, tahun ’biren takpoluk mesik etil wago ano pam is o Persia o Media a’ge enesegen oruak a’ge onuelak enemin, is ap ononuk oruak a’ge ’gain-’gain emin, eragam o eiye welagai a’ge emin, enebaget seni lok serisoma, agauwa ai erlige odoktu egesa.

⁴ Odoktu agaiam e, enebaget seriselat, at eragamma di a’ge, yu a’ge modok miasogo ene’gik e’gerlu mia a’ge odoktak a’ge ebano wagentasulat, ye, at onuk modok lok en aphwami en, nogorlok o, ogukhwe, mu ebelesogo taga laga a’ge ano mo’gulentasulat, tago hwe, dogwi 6 pollegei.

⁵ Ai arat takpoluk, ap Ahasyweros en is aphwami at owi o lok ebelogo werik a’ge o Susan welagai a’ge ononuk oruak erlak ’berlegat enakhit en, at owi dipmu modok ebelak ma, ebano seni seriselat modok oruakhwe nogo 7 hwerliat nogogisa.

⁶ Ap ’gain ano owi dipmu hobun pe’gen tak a’ge welaga ai re, sum ’bogun ebelak ya’gwi ’gut ’gela’ge, ano tenak welat herle sum ebelak modok ’borlu ’belak ano pam en, helep erik ebe a’ge pan daintak poluk ologun perak a’ge pam tegine ikho ’beterak a’ge ano pam ’gennerak poluk, sepnogo ’belebak welat, ye helep erik a’ge il sing emin, moli emin, ’borlu werak emin, helep o’go lok mu a’ge emin, tak a’ge ano pam ebetne dape’gek yape’gektak a’ge demak ma, emas perak a’ge pam huragalat modok ebil-ebel sogo ’boguntakma hweriogo poluk welat tak welaga.

⁷ Ye, anggur a’bosu ano re, sogoluak emas a’ge ebelogo il mu-mu a’ge ano pam is ap ’gain ononuk logo a’ge enede ya’gosogo welat so’but ontogwi ’gela’ge anggur a’bosu il hegitsogo nak na’gogo pil lagalat,

⁸ Ye, anggur a’bosu no ano re, ap ’gain onuk logo a’ge ano en at eragam a’ge a’bosu nang entasu eiye a’ge ano en mo’gulentasulat, “Enede en enagai opogwi a’ge hegit-hegit nak no’gulemak o,” oluk mo’gulentesimu re, hegitsogo nak wogontogwiam no’gulat, togu legesa.

⁹ Agauwa ai tegisa ai erlige nak ap ’gain onuk logo a’ge ugwe Wasti ano en is hwami at ’gain onuk logo a’ge Ahasyweros owi o lok ebelogo werikmu welagai a’ge ano enebaget ogo asogoat seni seregei.

^10-11 Serisokhwe, nogo 6 nogoluk hubet lau wagoam, ap ’gain onuk logo a’ge Ahasyweros ano a’bosu ne’gak negeitik ede aganhan hasulat, at ugwe hwe lok Wasti ano modok op a’geatma-re, aphwami ’berlegat emin, ap ’gain-’gain emin, orogole op a’ge ap ’gain onuk logo a’ge onugwami ’gare-’gare ’buksogo welagai a’ge at hwe Wasti ’buktakhwe woluk wemak oluk, ap at ebaget togwi a’ge onouwarli wogo a’ge enebe 7 eria re, Mehuman, Bizta, Harbona, Bigta, Abagta, Zetar, Karkas eriano mo’gulentesi,

¹² mo’gulentesimu, is ebano en ap ’gain onuk logo a’ge en egeimu Wasti mo’gulesi legesa a’ge re, wom a’ge ebit aga lagama, at ’gain onuk logo a’ge modok olot het agarik, ebam haro a’bik aga.

^13-14 Ebam haro a’bik agarik, Is ap ononuk logo a’ge en togulom a’ge wene taga’ge emin, wene le’gelak emin, ap enaluk a’ge holugat mo’gulontogumu re, at Ahasyweros en is ap o Persia, o Media a’ge at eragam welagai a’ge ononuk oruak ede hwedik a’ge emin, wene ’balogwi a’ge enebe re, Karsena, Setar, Admata, Tarsis, Meres, Marsena, Memukan enebe 7 ano togulom a’ge wene enalukmu, mo’gulentasulat e,

¹⁵ “Hwe lok Wasti ai, wemak oluk, is ap an nebaget togwi a’ge en mo’gulesi louwagoluk, yo’go perakpegi a’geat de, wom a’ge ebit agama re, wene togulom a’ge taga’ge ano pam takpoma re, an-mo’gulnemis o,” oluk, mo’gulentesi.

¹⁶ Mo’gulentesimu, at ap Memukan en ap onuk logo a’ge emin, is ap ononuk oruak ’gain-’gain enemin, ’berlegat enil pam at ’gain onuk logo a’ge mo’guleselat, “Hwe lok Wasti ai, hat nonue, ’gain honuk logo a’ge nak wiagapsogo hebasu ai erlak o. At e, nis ’gain-’gain emin, ye hat nue ’gain honuk logo wene mo’gulentasukhwe di aphwami-yu aphwami ena’gul onuk lo’bok welagai a’ge ebano emin, ’berlegat wiagapsogo nenebasu o.

¹⁷ Hwe lok ai ebabut wiak en egei ai o, is hwami ’berlegat enesa’go hologu lemarik, onogunlak mi-miarak onoboluk mo’gulontogulat, ap onuk logo a’ge Ahasyweros en ugwe hwe lok Wasti woluk wom a’ge oluk mo’gulentesi a’geat de, wom ebit epesi ano oso a, oluk, ua ano erlak?

¹⁸ Nis ap o Persia o Media ’gain-’gain nonugwami hat honuk logo a’ge hugwe hwe lok a’ge en egei a’ge yogodak ogo enesa’go hologwi a’ge ebano en, nis hosi ’gain-’gain ogo asogoat mo’gulnontogu lomma re, onogunlak nis ebano mi-miarak nonobogulat, eniak muk yaknontogulat, togu lema o.

¹⁹ Asogo til laga lomma re, hat nenaik ’gain honuk logo a’ge en, o yogodak hwerli hwe Wasti ai, an nonuk logo a’ge Ahasyweros ne’bek wema modok erlak o, oluk, wene werak pasulat, is ap Persia a’ge onuelak ’gain emin, is ap Media a’ge onuelak ’gain ononuk logo a’ge emin, en, togulom a’ge wene werak mo’gulontogwi a’ge pelal wogo a’ge erlagapsogo po mia a’ge ano emin ’balogo pasulat, ye, hugwe hwe lok onuk logo welago a’ge ano ebalema hwe mu ebabut op a’ge holuk edikpasulat, tu obat epasulat holuk e, tin o.

²⁰ Asogo togunmu, di owi yu owi eiye welegen a’ge lok ebano wene wusogo lebikpagun a’ge ano, is hwami ’berlegat holuarik, ononuk erlak oruak ’berlegat onogunlak onogorlok hogu lema o,” oluk, mo’gulesi.

²¹ At ap Memukan en wene egei a’ge ano ap ’gain onuk logo a’ge emin, at osi ’gain-’gain emin, en obat egei o, oluk opogwiam, at ’gain onuk logo a’ge en wene egei a’ge ano hegitsogoat tagalat,

²² “Ap mesik ugwe emalik oruak holuk, ’gwelagentarok wolom atma re, at u’gwarek iak pam mo’gulentasukhwe hologu lemak o,” Oluk at eragam pasukhwe di owi yu owi eniak hundomok-handomok oruakma re, is eniak pam hundomok pelal wokho perakpil laga.