Ayub 1 - Allah Iak 'Belak Naduk A'ge emin Pobuk A'ge Emin Wusogo Wogenebegei Wene

Iblis en e, “At Ayub ede Allah pam he’berik oruak ai demat a? Erlak a,” oluk ede ’gagalise laga wene

¹ O Us eba ap mesik onuk Ayub ai welaga. At ai ebe Allah ogorloksogo welat, emin hwedik modok welaga. Asogo welat, wene ebam modok erlak a’geat welat wiak wei nak logon ogo tu erlakma en, ebabut modok hegit welaga.

² At eiyagai ap enebe sabiren, ye, hwami enebe henagan welegesa.

³ Ye, at eragam a’ge enebe modok a’bik welegesa. Ye, uam e, domba 7.000, ye, unta 3.000, ye, sapi 1.000, ye, keledai 500 welaga. Asogo welaga ai en, aphwami o mo yegelogo orlu ago eba hegit welegesa a’ge ena’ge weiyat a’geat de, at Ayub ai nak e, modok ’gain ilmu oruak a’ge at welaga.

⁴ Asogo welat, Ayub eiyagai ap enebe sabiren eriano onowi lo’gwe lo’bok seni at mesik oruakma en sorogulat, at mesik oruakma en sorogulat togumu re, seni asogo sorugulat, onogulani enebe henagan eriano yo’go onoboluk enemin onso’boru emin, enegeik emin, no’gu legesa.

⁵ Asogo togumu, ap Ayub ede en e, “An neiyagai asogo togulat, enepenen en, togwi erlak a’geat de, mesik wiak tigisarigat de, Allah onuk wiagap pegesa hwi a,” oluk ede epasu laga ai en e, eiyagai seni sorogu legesa ai a’ge seni ebe lo’bok, arat togwiam, Ayub ebe hubet sialogo, is wiak tigisa a’ge ai Nenaik ’gain Onuk Logo a’ge en erlagapsogo ukpou wagoluk, enebe lo’bok enebaget wam di a’ge yu a’ge Allah paget wusogo narlise laga.

⁶ Asogo togukhwe, is Allah en walentesimu ’bogorl pam yogo perak enebasukhwe welagai a’ge Nenaik ’gain Onuk Logo a’ge e’bek odoktigisema, at Iblis aphwami enede ’gagalil denago a’ge ano is ai ene’bek ’gwegeirik welaga.

⁷ Asogo oruakma, at Nenaik ’gain Onuk Logo a’ge en, at aphwami enede ’gagalil denago a’ge ano disogo mo’gulesi, “Hat hebe o ’geba en wegen?” oluk hin wokhesimu, at Iblis en e, “An e, o ’gwiangma di owi yu owi nil ’gogolil da ’gwil, ya ’gwil denaga legirik wegi o,” oluk mo’gulesi.

⁸ Asogo mo’gulesimu, at Nenaik ’gain Onuk Logo a’ge en e, “Aphwami o ’gwiangma di owi yu owi welagai a’ge logon enebabut e, an neragam a’ge Ayub ebe an ogorloksogo an nemin hwedik welat, wene ebam modok erlak welat wiak weisogo logon tu modok erlakma en ebabut modok hegit degelak welago ai ’gela’ge mesik modok erlak o. We, at ematek nagat ebabut asogo welago ano re, hil opsogo hegen a? Erlak a,” oluk hin wokhesi.

⁹ Asogo hin wokhesimu, at en e, “Hat en at Ayub obap po erlakma de, at en hat ogorloksogo hemin hwedik wolom no?

¹⁰ Asogo hemin hwedik oruakma, hat en at ebe emin, eiyagai emin, a’ge di a’ge yu a’ge emin, ’gwelagentarok modok welegen ai o. Asogo welat, at en di yabuk yu yabuk tagokhwe obap pasulat, uam a’bik wogeselat, tagokhweat uam o eba da ya ’berlegat a’bik ago ai o.

¹¹ Hat en asogo tisokhwe op oruak a’geat de, at a’ge di a’ge yu a’ge eba ’berlegat hat horloma nak e, at en, Allah wiak. Ebe nebit, oluk demat ’goboksogo ukhobo a’ge oruak o,” oluk mo’gulesi.

¹² Asogo mo’gulesimu, at Nenaik ’gain Onuk Logo a’ge en Iblis aphwami enede ’gagalil denago a’ge ano disogo mo’gulesi, “Op o. Hat enat. Hat hede epegen a’ge hegitsogo tip o, oluk, at Ayub a’ge di a’ge yu a’ge ’berlegat he’gikmu pegi o. Asogo a’geat de, at ebe nak e, he’gik tenhagun modok erlak o,” oluk mo’gulesi. Asogo mo’gulesimu, at aphwami enede ’gagalil denago a’ge ano Nenaik ’gain Onuk Logo a’ge oruakma en liplau wagarik waga.

At Ayub eiyagai enebe warenebiselat, a’ge di a’ge yu a’ge erlagap pasulat tegei wene

¹³ Asogo wagarikmu en, agauwa mesik pam at Ayub eiyagai ebano naduk dogo a’ge owi pam seni sorogulat, onoso’boru no’gulat, anggur e’gen a’bosu no’gulat, togu legesa.

^14-15 Asogo togwi oruakma, erianoat, ap Ayub eragam a’ge mesik wene wik-wok yo’go Ayub owi pam wagarik e, disogo mo’gulesi, “Naik, ap Syeba a’ge watnonobuogoluk wegesarik, wam sapi en yabuk woruagoluk woluk nosoma re, wam keledai sapi eragam horoksogo e’gela dak-dak nil nosoma wegesarik e, wam horlogulat e, heragam a’ge ebano enebe modok perlengsogo warenebigisema, an heragam a’ge nematek nak nelaluk lebegirik wene ebe aga a’ge mo’gulhosu egi o, Naik,” oluk mo’gulesi.

¹⁶ ’Gerat asogo mo’gulosoma, Ayub eragam a’ge mesik wagarik e, disogo mo’gulesi, “Naik, obinal odouk ’gela’ge ’bogorl pam en pe’geksogo ’bu agarik wam domba emin, kambing emin, heragam a’ge wam o’gonogulat welagai a’ge enebe emin, perlengsogo modok warenebegeimu an heragam a’ge nematek nak nelaluk lebegirik wene aga a’ge ai mo’gulhosu egi o, nue,” oluk mo’gulesi.

¹⁷ ’Gerat asogo mo’gulosoma Ayub eragam a’ge mesik wagarik e, disogo mo’gulesi, “Naik. Ap Kasdim a’ge logon yogorlia wogwi a’ge esan henagan pam yenal wegesarik, huam unta horlogulat, heragam a’ge huam o’gonogulat welagai a’ge enebe modok warenebegisema an nematek nak nelaluk ’boloksogo lebegirik, wene aga a’ge ai mo’gulhosu egi o, Naik,” oluk mo’gulesi.

¹⁸ Asogo owan mo’gulosoma, Ayub eragam a’ge mesik wagarik e, disogo mo’gulesi, “Naik, hat heiyagai ebano onue naduk a’ge owi pam seni sorogulat, onso’boru no’gulat, anggur e’gen a’bosu no’gulat, togwi oruakma,

¹⁹ yasobu o lei aphwami erlak o’gwe en yasobu o ogut-ogut ’berlegat en annisogo punhau wagalat, o ano orlo’buktak pasulat, heiyagai enebe modok perlengsogo sebelenebegeimu, an heragam a’ge nematek nak nelaluk lebegirik, wene aga a’ge ai hat mo’gulhosu egi o, Naik,” oluk mo’gulesi.

²⁰ Asogo mo’gulegisema, at Ayub ede wiak agarik tegei o, oluk enede we’gerlemagoluk, o’bogoyum ’buktak a’ge derlep-derlap hasulat, asu ’baliselat, tegeirik e, Allah erliktigoluk ’gwiangma odogorlu pam huragalat disogo egei,

²¹ “An nia ogola en di a’ge yu a’ge logon woluk dagegi erlak ai ’gela’ge, nebe warotluk di a’ge yu a’ge logon woluk laik erlagat o, Naik. Naik ’gain Honuk Logo a’ge en an woknigen a’ge pobuk togolik hwerlegen ai re, obat o. Holuk e, harat honuk logo modok welemak o, naik,” oluk erliktegei.

²² Wene at Ayub ebam asogo takpesi a’geat de, at en wene, “Hat Allah en wiak taknebegen, nebit o,” oluk ebam poluk wiak tu erlak epe mosogoat morak pesi.