Amsal 1 - Allah Iak 'Belak Naduk A'ge emin Pobuk A'ge Emin Wusogo Wogenebegei Wene

Di paget yu paget enesa’go worogwi wene at Salomo en, “Ebe disogo paget egi o,” oluk egei wene

¹ Di paget yu paget enesa’go weriso wene ai, at Daud omlogo Salomo aphwami Israel a’ge, onue ’gain logo a’ge ano en ese laga a’ge yu.

² Wene ebe disogo oluk, enede ’gagalak welagai ai emin, enebabut hegitsogo togwi ai emin, di wene yu wene paget eniak lagaksogo ogwiam, ogola wene hisogo a’ge pobi togwi ai paget emin, opsogo pobi togu lemagoluk egi o.

³ Wene asogo togulom a’ge paget egi ai re, aphwami enede ’gagalak welagai ai emin, hegitsogo togwi ai emin, wene hegitsogo enebam pogulat, no’gorlogulat, togwi ai emin, eniak demat ogwi ai emin, opsogo mo’guluagoluk egi o.

⁴ Aphwami logon enede ’gagalak erlak ebis a’ge ai, enesa’go worogwiam opsogo pobitak poluk, enede ’gagal agalat, ap souwe a’ge ai emin, hwelani salesik a’ge ai emin, enesa’go worogwiam, di wene yu wene enaluk modok agalat, enarlue enebabut mo’gulogulat, tuagoluk egi ai o.

⁵ An en wene enesa’go worogwi a’ge paget egi ai, is aphwami logon enede ’gagalak a’ge ogo re, pobuk enede modok ’gagal agalat, di wene yu wene modok enaluk agalat, is logon di a’ge yu a’ge mo’guligisa a’ge ai, pobuk enede ’gagal agalat, tuayat o.

⁶ Asogo mo’gulua holuk e, is logon en eniak lagaksogo enesa’go worogumu emin, is aphwami enede ’gagalak a’ge en wene ebe ogumu emin, wene o’go no’gosogo u ebeletak a’ge, hin wogumu emin, elit pobi togu lema o.

Is ap souwe a’ge enesa’go weregei wene

⁷ His di wene yu wene modok obat henaluk emagoluk, naduk-nadugat Nenaik ’gain Onuk Logo a’ge Allah, hau wusogo honogorloksogo togulom o. Is aphwami enede ’gagalak erlak a’ge ai, enede ’gagalak wolom enebirat, ye, enesa’go worogwiam ogo pobitu enebirat, welagai ai o.

^8-9 Nomlogo yo. Henialak, henaiklak en henesa’go worua a’ge ai, henalli a’ge hena’gul pam ’buktak poluk, eile hono’gorlopma wantogulat, togwiam enagap ’get ago ’gela’ge, enede modok ’gagal ema ai en e, henielak henaiklak en henesa’go worogwiam, honogola en mi-miarak poluk ukpo erlakma en, hologoat togu lomup o.

¹⁰ Nomlogo yo. Aphwami wiak togwi a’ge en e, “Disogo tuok,” oluk henede ’gagalogwi holuk e, eniak hologo togup no yo.

¹¹ Is ai en e, disogoat mo’gulhontouwa ani o, “Nis nenebe hisakho loluk, is aphwami wiak logon togwi erlak a’ge ai, warenebi louwogoluk manis o.

¹² Yogodak is ai obat enelaluk oruak a’geat de, aphwami enebe werak ebesigat, ’gwiangma salonobogwi ’gela’ge, wiagap onobuok o.

¹³ Nis nonowi pam is ena’ge delul a’ge ai, ’betesogo tenak pouwok en e, is ena’ge o’go a’bik a’ge ai nis deluok o.

¹⁴ Nis en di a’ge yu a’ge delul a’ge ai emin, hegitsogo so’busogo horloluk en e, deli lul en suk o,” oluk mo’gulhontouwa o.

¹⁵ Nomlogo yo. Aphwami enebabut asogo togwi a’ge ai, eniak hologo lo erlakma en, onogoiyesogo laga lomup o.

¹⁶ Is aphwami enebabut asogo a’ge ai, wiak togwi erlak holuk, enalo’gwe yamuksogo welagai modok erlak o. Is onoyuk enlalue wiagat loluk warenebi lagai o.

¹⁷ At tue a’ge ogo re, il oruakhweat herle poma re, ogoiyesogo ’gu erlakma en mo umu re, almasogoat herle hol po ai o.

¹⁸ A’ge re, is aphwami enebabut atnik a’ge ai re, tue hol elema ’gotnok oso ’gela’ge, enebabut asogo togwi ai pamat onu’gwarek enebe yukmu re, onu’gwarek en almathorlouwa ai o.

¹⁹ Aphwami enebabut yogorlia di a’ge yu a’ge horlogwi ai, onu’gwarek enebeat o’go ’bal horlogwi ai o.

Aphwami en is muon enesa’go woru ’gela’ge, enede ’gagalak welagai a’ge ai en enesa’go weriso oluk egei wene

^20-21 Aphwami en eniak loksogo is logon enesa’go woru ’gela’ge, aphwami enede ’gagalak welagai a’ge ai, ebe ebela lak-wak togwi o’gwe eba emin, o seli’gwe emin, ebela ’goduk pakleget emde ’belak o’gwe emin, aphwami a’goluk wiak enebe a’bik welagai o’gwe emin welat, iak loksogo disogo mo’gulentasu ai, iak opsogo henesa’go hwelip o. At en e,

²² His aphwami henede modok erlak a’ge yu logwe! O metnerlige en henede erlak a’ge ’gela’ge, togu legep a’ge ai ukpagup no. O metnerlige en enede ’gagalak a’ge, heniak muk yagontogu legep ai ukpogu lorogup no. O metnerlige en, Wene mo’golu nenebit, oluk ogu legep a’ge ai ukpogu lorogup no.

²³ An en hene’gerli wusogo henesa’go weregis holuk e, henebabut heberloroguptik niak hologu lomup o. Hologupmu re, an nogola wene hisogo wene ai mo’gulhentasulat, wene naluk a’ge ’bele’giselat, tik o.

²⁴ Mo’gologup en e, an en niak pam worlhentasulat, ne’gik map pam worlhentasulat, tago a’geat de, Nenebit, oluk ukpogu legep ai o.

²⁵ An en hene’gerli wusogo henesa’go weriso a’ge ai, ’berlegat honogola en mi-miarak poluk ukpogu legep ai o.

²⁶ Ai en e, his pobuk modok wiak a’ge, henebam ago holuk, an en eida henebik o. His honogorlok modok orogup holuk, niak muk modok yakhentaik o.

²⁷ O yasobu ou edip onogorlok a’ge woluk wago ’gela’ge, his henede honogorlok oruak a’ge takhenebasulat, wiak a’ge logon henebam agalat, tiso holuk eida henebik o.

²⁸ “Asogo henebam ema eria hegit e, his en an yo’go nebagup a’ge re, an en his heniak holu erlakma en ukhonoboma, an horo nebil a’bik togup a’ge de, an nebe modok niagup erlak ani o.

²⁹ His e, wene henaluk wolom a’ge henapseri welat, Allah honogorloksogo iak hologo wolom modok henebit welat, togu legep ai o.

³⁰ His e, an en hene’gerli wusogo henesa’go werisoam, henesa’go holu henebit modok tigep ai.

³¹ His henebabut asogo togu legep ai pam emin, wiak a’ge tuogoluk henede wiak a’ge, eberogu legep ai pam emin, henebabut pam e, wiak a’ge henebam ema ai o.

³² Is aphwami enede ebesik a’ge ai en, an uknoboluk libema a’ge ai pobuk enebe waragalat, aphwami enede erlak a’ge ’gela’ge an niak onogola en, mi-miarak nobouwa a’ge ai, pobuk enebe almaragalat, tua o.

³³ Asogo a’geat de, is aphwami logon, an niak osokhwe enesa’go hologo togwi a’ge ai, pobuk enebe op degelak welema o. Asogo welat, pobuk enebe op welat, onogorlok erlak welat, togu lema o,” oluk mo’gulentasu.