Filemon 1 - ALLAH IAK WENE ʼGET AʼGE WUSOGO WOGENEBEGEI WENE

Hau warenebegei wene

^1-2 Filemon nare o. Nare nemin Kristus paget togu lege aʼge hebe nede o. An Paulus, Kristus Yesus paget neʼgik herle wusogo nebegesema welegi aʼge ano, nonot Timotius neʼbirek en, hat hebe emin, Allah eiyagai ogo hat howi pam odoktogwi aʼge emin, nenerei Apfia emin, nonot Arkhipus, weim obogwi ʼgelaʼge, Allah paget nenemin nenannisogo togu lege aʼge ano emin, wene yu pelal wokho heneʼbek perakpou wege ai o.

³ Narilak norokhwi. Nenaik Allah emin, nonue ʼgain Onuk Logo aʼge Yesus Kristus emin, eʼbirek enebabut op ano en op aʼge wokhontogulat, henede haʼbugaphonobogulat, togu lemak o.

Filemon ebabut taga laga aʼge paget, Allah hau weregei wene

^4-5 Hat hede nonue ʼgain Onuk Logo aʼge Yesus ebam heʼberik poluk, Allah eiyagai logon ʼberlegat hedeabenebise legen ai hobok nesaʼgo hwelegitik e, seʼban hwedik-hwedigat eselat, hat honuk il il naik Allah hau werise legi o.

⁶ Nis nenede Allah pam heʼberik poluk, nenarilak nonorokhwi Allah eiyagai logon enemin, Kristus emin hwedik oruakma, at en di aʼge yu aʼge op aʼge woknentasuam pobi togu lege ai, pobuk loksogo pobi tuogoluk Allah yoʼgo pasu legi o.

⁷ Filemon nare o. Hat en aphwami Allah eiyagai ʼberlegat hedeabenebasulat e, onogola obabenebise legen ai en, an Allah paget taga lemagoluk nede ago weraknebasu legenma nogola nagai aʼbik hasu legi o.

At Onesimus Filemon en ebe wouwagoluk moʼgulesi wene

⁸ Hat asogo taga legen ai en, neʼbirek Kristus emin hwedik welat e, at ebaget togu legerikmu re, an en e, “At nare nemin,” oluk, neʼgerli erlagat, “Disogo tip o,” oluk, niak uareksogo moʼgulhom elit aʼgeat de,

⁹ an Paulus yogodak nebe arat sebal egirik oruakma, Kristus Yesus paget neʼgik herle wusogo nebegesema welegi o. Asogo welat, hat nedesogo welegi ai en, niak sakhosogo hebam mesik ʼgonu moʼgulheik.

¹⁰ Ai re, an neʼgik herle werak welat, at Onesimus ede Krsitus ebam heʼberik pesi ai en, ebe nomlogo ʼgelaʼge agalat, an nebe at aik ʼgelaʼge agalat, egerik en, at ebe wanogoluk moʼgulhegis o.

¹¹ At naduk e, hat hebaget opsogo tu mia ʼgelaʼge welaga aʼgeat de, yogodak hat hebaget nak puk. An neminat nenebaget opsogo taknebasu lema aʼge elirat oruak o.

¹² Ai en, at ebe an nede hwedik aʼge togolik heʼbek perakpou wegi ai o.

¹³ An op wene moʼgulentil nese legi ai paget neʼgik herle wusogo nebegesema oruakhwe, hat en letniasulom ʼgelaʼge, hebalema at en letniasu lemagoluk ebe tenak po aʼgeat de,

¹⁴ hat en, “I o, op. Hemin wolomup o,” oluk moʼgulnom erlakma en, an nabusak wene mesik u mia o. We, an nogola nagai ye, hat at ebe eiye aʼge hede enat tinogoluk perakpou wegi ai o. Aʼge re, hat hogola en e, “Nebit,” epasukhweat, an en niak ningsogo moʼgulhom e, nebit o.

¹⁵ At Onesimus hat ukhoboluk libaga ai re, we, agauwa lodu paget welemarik en, pobuk heʼbirek modok wolomogoluk wagunmu, at Allah ede epesi pam tago epegi.

¹⁶ At pobuk hat hemin wolorogup ai, ebe heragam aʼge welat, hat hebaget taga lema aʼgeat de, ai nak puk. At e, at ebe Allah eiyagai aʼge agarik nenare nenede aʼgeat welema ai o. At en e, an nede aʼgeat welat, an nebaget op modok tago ai, weiyat o. Hat hebaget nak e, at ebe ʼgwiangma heragam aʼge welat, hare heʼbirek nonue ʼgain Onuk logo aʼge emin hwedik wolorogup ai en, ebenagaik loksogo hede hwedik takpoluk welema o.

¹⁷ Ai en e, hat en, “Paulus ebe an nare neʼbirek hwedik welege aʼge,” oluk, epasu legen ai, Onesimus togolik heʼbek perakpou weik aʼge ai, an nebe pobuk heʼbek weikmu woknobu ʼgelaʼge, at ebe asogoat togolik womup o.

¹⁸ At en wiak mesik takhebesimu, nomat ebam pegenma ʼbelak holuk e, nomat ano ʼberlegat an nebam pomup o.

¹⁹ An Paulus asogo nomat nebam welegi, oluk ʼberlek ai oʼgo ʼbalik aʼge nuʼgwarek neʼgik en pelal wegi ai o. An en, hat op wene moʼgulhegismu huʼgwarek hebe paget op aʼge eiye egentik welegen ai, nomat hebam pegimu ʼbelak hebam oruak oluk moʼgulhom aʼgeat de, an asogo u re, erlak o. Huʼgwarek halugat o.

²⁰ Ai holuk nare o. Nonue ʼgain Onuk Logo aʼge emin hwedik welat an nogola nagai houwagoluk, hat en an letnio ʼgelaʼge, at ebe ai opsogo womup o.

²¹ Wene an en moʼgulhegis aʼge ai hat en hesaʼgo hologo togunat hegi, oluk, nede epegirik en, wene yu pelal wokho heʼbek perakpou wegi ai o. An e, “Ebe womup o,” oluk, moʼgulhegis aʼge ai, hat en asogo tagalat op aʼge logon emin togunat hegi, oluk, an nalugat o.

²² His ʼberlegat en an nebaget seʼban Allah yoʼgo pogu legep ai en, at en pobuk neʼgik herle hebilogo lebiknoboluk, heneʼbek woknoboluk wema epasu legi o. Holuk e, an pobuk heneʼbek weiktik nogo u aʼge paget, hat howi pam eba o ogorlirak mesik degelogo nebasu lomup o.

Wene ologun ʼbalogo pobuk hau warenebegei wene

²³ At Epafras emin Kristus Yesus paget togu lege ai en, neneʼgik herle wusogo nenebegesema welege aʼge ano en hau wathebegei o.

²⁴ Ye, an narilak Kristus ebaget togu lege aʼge, Markus emin, Aristarkhus emin, Demas emin, Lukas emin, enebe ʼberlek en hau wathebigisayat o.

²⁵ Nonue ʼgain Onuk Logo aʼge Yesus Kristus ebabut op ano en ebe his henedemu welat tenhentarok welemak o.