Efesus 1 - ALLAH IAK WENE ʼGET AʼGE WUSOGO WOGENEBEGEI WENE

Hau warenebegei wene

¹ His Allah eiyagai o Efesus odoktugu legep aʼge henede Kristus Yesus ebam heʼberik poluk emin hwedik welegep aʼge, narilak norokhwi. An Paulus, Allah ede epesi ano pam, at Kristus Yesus en yoʼgo noboluk peraknobou waga aʼge ano en wene yu pelal wokho heneʼbek perakpou wegi ai o.

² Nenaik Allah nonue ʼgain Onuk Logo aʼge Yesus Kristus eʼbirek enebabut op ano en, op aʼge wokhontogulat, henede haʼbugaphonobogulat, togu lemak o.

“Nis Kristus emin hwedik oruakma obapnenebasu,” oluk moʼgulentesi wene

³ Nonue ʼgain Onuk Logo aʼge Yesus Kristus aik Allah aiat erliktogu lomok o. Nis Kristus emin hwedik oruakma, at Allah enat op aʼge ʼberlegat nenede paget ʼbogorl pam en woknentesimu welege o.

⁴ At Allah enat nenebe at uʼgwarek paget pagathorloluk, at ilem degelak welemagoluk, ʼbogorl ʼgwiang owan walho erlak welat, pulnenebegei ai ebe at Kristus enat pulnenebegei o.

⁵ At Allah nenebe ede en, uʼgwarek ede enat, “Yesus Kristus en, is wogonobogwiam an neiyagai emak o,” oluk, page enat nenebe poliknonoboluk woknenebegei ai o.

⁶ At ebabut op en omlogo ede hwedik aʼge edeap po erlakma enat, woknentesi ai paget, nis en e, “Eige. Nogorlok o,” oluk, erliktogu lomok o.

^7-8 Asogo woknentesimu, ebe emep enamogo werigisa ai pam, nonoʼgo ʼbalogo delnenebiselat, nis wiak togu lege aʼge erlagap pasulat, tegei ai o. At Allah ede ʼgagalak welat nenebe pobirak nonoboluk e, ebabut modok op ano en, nenebe at ede eʼginsogoat edeapnenebegei ai o.

⁹ At uʼgwarek asogo taknonobo agai en, “Disogo tagenebaik ai ebe at Kristus en tagonobouwak o,” oluk, wene at ogola epesi aʼge hisakho welagarik ʼbaksogo moʼgulnentesi ai o.

¹⁰ Wene at ogola hisakho welaga ai ebe re, pobuk om hegit lai lasuam, at en di aʼge yu aʼge ʼbogorl pam welago aʼge emin, ʼgwiangma welago aʼge emin, ʼberlegat laʼbulogo Kristus ematek eragam onobua aʼge paget obok moʼgulnentesi aiat o.

¹¹ At Allah en e, “Disogo emak, asogo emak o,” oluk ede epasu aʼge hegitsogoat di aʼge yu aʼge ʼberlegat tisoam ago ai en e, “Is enebe an nuʼgwarek neiyagai emak o,” oluk pulogo woknenebegeimu re, eiye ege ai o.

¹² At ebe erliktogwi modok welagai aʼge ano, nis en erliktogu lemagoluk, nenede naduk nadugat Kristus ebam heʼberik pege aʼge pulogo woknenebegei ai o.

¹³ Ai ʼgelaʼge re, his en wene dem wene, obabnenebiso wene ano henesaʼgo hweligeptik e, henede Kristus ebam heʼberik pegeptikmu re, at Allah en e, “Narogun wokhentaik o,” oluk, obok moʼgulnentesi hegitsogoat, “Is an nuʼgwarek neiyagai o,” oluk Arogun wokhentesi ai o.

¹⁴ Allah en e, “An en disogo wokhentaik, oluk obok moʼgulhentegis aʼge ai, pobuk wokhentaigoluk, Narogun naduk wokhentegitik henebe delogo wokhenebigat o,” oluk moʼgulnentesi. Asogo moʼgulnentesi ai en, Allah erliktogwi modok welagai aʼge aiat erliktogu lomok o.

At Paulus en Allah eiyagai o Efesus aʼge enebaget seʼban egei wene

¹⁵ Ai en e, his henede nonue ʼgain Onuk Logo aʼge Yesus ebam heʼberik poluk, Allah eiyagai logon ʼberlegat henedesogo togu legep aʼge ai, aphwami logon en honobok ogukhwe nesaʼgo hwelegis o.

¹⁶ Asogo hwelegeitik e, his henebabut togu legep ai paget, nin hwedik nan hwedigat mo u erlakma en hononuk il il Allah hau weriso modok welago yo.

¹⁷ His henebaget e, nonue ʼgain Onuk Logo aʼge Yesus Kristus aik Allah erliktogwi modok welagai aʼge ano en, henede modok ʼgagalak aʼge wokhentasulat, at ebe dokhumsogo pobi togup en moʼgulhentasulat, taga lemagoluk, Arogun wokhontouwagoluk yoʼgo pasu legi o.

¹⁸ At enat honogola dakharak henebasuam, his en e, “Yoʼgo nenebesi aʼge ano en pobuk obapnonobua o,” oluk, honogola henagaisogo ebam eberak welegep aʼge ano henaluk agalat, di aʼge yu aʼge op aʼge erliktogwi modok welema aʼge at eiyagai woknentaigoluk loksogoat odoksogo nenebesi aʼge ai, henaluk agalat,

^19-20 at anni modok aʼbik aʼge ano en, nis nenede at ebam heʼberik pege aʼge, annisogo loksogoat letnentasu aʼge henaluk agalat, togup en Allah yoʼgo pasu legi o. At anni ai pam e, Kristus ebe waragama elalugap poluk ʼbogorl pam woluk ligagarik, at eragam eʼgik ʼbekhit akhit ʼgain Onuk Logo at welemagoluk edikpesi ʼgelaʼgeat, annisogo letnentasu ai o.

²¹ Asogo edikpesi ai re, is pemerintah ʼgain aʼge logon ʼberlegat emin, ononuk logo aʼge logon ʼberlegat emin, onuelak ʼgain aʼge logon ʼberlegat emin, ʼgain aʼge is logon eneragam tenentarok welagai aʼge ʼberlegat emin, yogodak ya ononuk oruak aʼge emin, pobuk welema aʼge emin, ʼberlek e, ononuk erlak aʼgeat de, at Kristus nak e, logo modok welemagoluk, edikpesi ai o.

²² At ʼgain Allah en di aʼge yu aʼge ʼbogorl pam welago aʼge emin, ʼgwiangma welago aʼge emin, ʼberlegat wokho at ematek eʼgik pam poluk, Allah eiyagai odoktugu lege aʼge di paget yu paget ʼgain e, Kristus at woknentesi ai o.

²³ Nis Allah eiyagai nenebe at Kristus ebeat o. Ai en, di aʼge yu aʼge, ʼbogorl pam welago aʼge emin, ʼgwiangma welago aʼge emin, ʼberlek ogola Kristus ebe ʼbetesogo welat, nis Allah eiyagai at ebe ʼgelaʼge oruakma, nonogola ʼbetesogo welago ai o.