YUDAS 1 - PANO WENE YABUNGGA ERIGIN YIRIGE MENDE

Wene edo kindirik wene

¹ Nogari, kir Ar Allah nen wai yokiralok, kinakba ilikti kunik mondok dogolir, nen Ar Yesus Kristus ake kinaruam mondok werek o. Nen an nebe eti, Ar Yesus ayedoman mende nendaga Yudas ar Yakobus ogarak enogo arar o.

² Nen nakla wadok kertaga eti, Ar Allah nen kininggi werek ekinaka, kinebe kinoba pano ekinaka, no kinoba dek kinadeknggen mende ndinik pinik erogo wokeraga, etegerogon eka dogu wadok kertaga o.

Ir guru-guru agur agar mende hukuman inoba bigin wene

³ Nawor nakbur, kir an niliti kunik mondok o! An nen kir ndilkinaburak wene, nabedak kabedal enogo abok diru kinoba mbalogo lakbi waru wadok nggok mende arar andagi o. Ogwe, yogondak ya, nakla ponggor neya taga kwak eti, Kir kiniliti ebebar andarugup mende, Ar Allah nen we omanggi paga arar wokeragage eti ake paga, diru yi kinaruk warogo bigi o.

⁴ Nir nen ninakla andagikdek ninagik, ap adik mende ninakla yoma unggwi warir tagwi o. Ir ap eti inebe mondok maduk mende, nen wene Allah Ninombae ane pano mende abel dagalir wari tagwi o. Ir inakla aganggen kalok, kumi ugunar erinabir wagu dogolir, erir waritagwi o. Ir nen Yesus Kristus eti nir ninewe obarne ambik o, yiluk yigikdek o. Ir anggin inoba wurabu ake, o paga etoma nen Alkitab mbalek paga yirige mende werek o.

⁵ Wene eta kir obok kinilu o. Eta mende, an nen ambi inom kinilu aruwak nen yiluk, yokerak o. Ar Tuhan nen akburi Israel mende, o Mesir nen ndilogo wogorek wundi wagage mende: Ir amberak ebebar Ar Allah oba um palekdek mende, obogar warinakige o.

⁶ Ambi ir malaikat mende ekugwa kinilu o. Ir nen nir ogona paga nggwe aruwok yiluk eku nanggugwa, ir welagugwama dambe kalok wulkugwa o. Ar Allah nen ir malaikat maduk ekugwa mende etoma, kede besi kede aitok mende paga warogo nen, o mbunla amumo agar apma etoma barigemo werek o. Ir etoma anggin inoba wurabi waganem torogo agarik o.

⁷ Ambi o Sodom o, nen Gomora o, o amberak etanggwe mende inom, akuni o etomala welagugwa mende nen, ir ap malaikat mende eku lagugwa ndak-ndak, eku lagugwa o. Ir nen ugunar wadi ekwi, maduk mban ekwi, erugu nanggugwa indu aitok paga kali werak inaka dogolir, dek erinakige kinilu o. Etoma akuni obogar inilu dogowak nen yiluk ekige o.

⁸ Eta ndak-ndak ir ap madugure mende kinakla unggwi watuk, nakbi yi kigi eli kigi agan warugun o. Nen ir inebe paga nen maduk erir lek tagwi o. Ir nen Ar Allah obarne werek akdikmo tebekdugwi o. Mbogor paga pano agubak kigirik mande ndak dek negen tebelinakwi dagi o.

⁹ Ar Mikael malaikat inewe enogo nen, ar Iblis imbirak Musa agakdo idi, an arik kar arik yugu dogolir, Mikael nen wene maduk onggo yoru dambe karige, nen wene maduk mende Iblis endaga pudu logo bigikdek ar o. Kar Iblis yi, “Ar Tuhan nen mban wenemuk yokirigin o,” yiluk yorige.

¹⁰ Ir ap eti nen, wene inane paga wene ebe dek mende, inonggokdek kigik ar, yegekdek mende elegedek mende, yir nugwi, dik bigikdek dogolir, yangge kwak inakla wadok kalok, ugun ambi kogori lagik erir lektagwi o. Iniliti dek ugun-ugun erir nugwi paga, inebe arar dek erogo baktar tagwi o.

¹¹ Ir inebe nuk arugun o! Ir nen Kain ekige kwak erir lektagwi o. Nen uang kwarir o amumo ininggi nduk, ar Bileam ekige kwak erir lertagwi o. Ir ap Korah wene uwak dagaligi nanggige wakige enogo kwak, watari tagwi o.

¹² Kir dago dak biluk nunggunem, ap eti mende inobabur etoma, inanikbu mondok arar o. Nuwok nen yiluk inande enggadi mondok dek, ir inake mban kwarir nugwi, ir inebe amerakor mudi miyo wurabi wagikdek wiya nen wolok-wolok erir taga kwak o. Nen etegerogon ar, ir inebe o enggen yiruam ogwe yikikdek dogi taga kwak, nen o omanggen mbalekma mbuk ari taga kwak, ir inebe etegerogo arar dek arir tagwi o.

¹³ Ir inebe i tarin maduk eka dogolir wuri dagap ambik erir taga kwak, ir nen inobabur enggadi werek mende wulabi tagwi o. Ir inebe ambi dadi ya agik mende, nen dek ari taga kwak, ir dogumo amum o idim wuarekma doguwak nen yiluk, barigemo etoma mondok dogogun mende o.

¹⁴ Ar ap Henok, ar Adam paga wigalek ketujuh mende nen, ir inake arar yegerogo yirige o: “Lakani o, Ar Tuhan ir akuni yoma inuwak denik nen yiluk, ir malaikat pakalok mondok arar inom, warigin o.

¹⁵ Ir akuni yoma maduk eku lagugwa mende ndak-ndak, Ar Tuhan nen inuwak dologo balok, onggo anggin mende inoba bigin o. Ir maduk eku lagugwa mende inom, inane paga yegedek mende elegedek mende yugu lagugwa mende inom, anggin mende inoba wurabigin o.”

¹⁶ Ir ap madugure yi nen, inane eiya ouwa agan nugu dogolir, akuni maduk erinabir tagwi o. Eti ir iniliti maduk mende nen yoraga kalok, erir lek tagwi o. Ir wogok daktar nugu dogolir, akuni inamep ner lek tagwi o. Eti paga, ir ininggi werek agwi, erir lertagwi o.

Tuwam dogorak ake inaruk wakige wene

¹⁷ Nogari kinebe niliti kunik ma, wene alebar ninewe Yesus Kristus aworomi nen yirugwa mende yi, kinilu dogowak nen yiluk, yokerak o.

¹⁸ Ir nen wene ebe auwan ertagakdek kigik, o irip paga arar ari waga kalok, akuni inobabur maduk mende, ndak dek erkinaburak mende, iniliti nen nengga kalok erir lektaga mende, ir menarugun yiluk yokeragugwa kinilu o.

¹⁹ Ap inebe yi nen agorik agorek ekwi, nen Ar Roh Allah inilitimo mondok dekma, inobabur agar paga mende wadok nen wogorek likdalok lektaga o.

²⁰ Eta mende nawor nakbur, kir nen kinebe pano dogowak nen yiluk, Yesus Kristus oba eberogo waganggugup mende eti, agabak kigitagu dogoni o. Oba ebebar eberogo waganggugup eti mondok pano mende ebe eti arar o. Eta eku dogolir, Ar Roh Allah obarne paga tamban eku dogoni o.

²¹ Kir nen Allah kinakba karigemo apma dogolir, nir mende Tuhan Yesus Kristus nen pano ekdinagu torogo welagwi, kiniluk kinaitok mondok dogu wokerau aruwam welagwi, eku dogoni o.

²² Ir akuni iniliti kondalek dek mende, kir nen iniliti ago arogo bagwi dogoni o.

²³ Akuni ndilinabuak nen yiluk, indumo nen kilogo wulinabi wagwi eku dogoni o. Nen, ir amberak etoma kiniliti anggin kigik, kinakba o, yoragwi eku dogoni o. Nen, ir iniliti wadok paga erir lagwi mende, ir inobabur kwak madukma, ir inagode yugu dogoni o.

Tamban paga keyagi wakwi wene

²⁴ Kir nggar wukunem Allah nen pik pak ndegelogo pakerek dogogin o. kir ar uma, adeknggen mban dogir tagama, maduk dekma panoma dogowak nen yiluk, Ar nen wokerek binagi ligin o.

²⁵ Ar ebe Allah ambi adigar, Tuhan Yesus Kristus paga ndil ninakige werek ar adik ar. Ar ebe Allah maga mende, endaga mbogor, obarne werek, oba um palek, o pagane nen yogondak kudi nen yabongga inom, aitok mondok arar dogogin o! Amin.