YAKOBUS 1 - PANO WENE YABUNGGA ERIGIN YIRIGE MENDE

Keyagi warinakige wene

¹ Nogari kir Ar Allah akburi, o ye ai nde ai mbugul kugup mende yomanogo, Ar Allah o, nen Ar Yesus Kristus o, Ir inayedoman an Yakobus nen keyagi warkinaki o! Wanelak.

Ebebar andalok kinakla nggagalek dogoni yoragage wene

² Nogari o! Kir kinauk mbalka kalok, eti pano nauk mbalke o, yiluk andagu dogoni o.

³ Nenaluk kir kinauk mbalka kigik, Tuhan oba kiniliti ebebar andarugup mende eti, oba eberek mondok dogirtagwi eti paga: kir kinebe tebe yiluk dogorak eti, ekinaka kinilu arigin o.

⁴ Kir kiniliti tebe yiluk dogorak mende eti, mondok kode arir laga dogolir, kinobabur pano aga, yi wene ndik wene ake paga, kir nen eru waganu ndak dek mende eti dek arar ekinaka kugun o.

⁵ Nen ar ap ambi iliti kode agikdek kalok, ar eti nen, Ar Allah nggino yorurak o. Nen ar iliti kodeak mende eti wogorigin o. Nenaluk Ar Allah eti, iliti ninakba ninggirik mende arar ma, Ar nen onggo dek wedek arar wogorigin o.

⁶ Ogwe, ir akuni nen nggino yugu dogolir kalok, iliti ebebar andalok nggino yurak o. Ar iliti nen woknirigin a, dek a, yiluk andega dogolir yurak dek o. Nenaluk iniliti nen ebebar andagwi dek eti, ir iniliti i laut wiya waka dogolir tarin waritaga kwak, abodok werek o.

⁷ Ir akuni etegerogon mende eti, Ar Tuhan nen nena kwak ambi woknirumo kodagin o, yiluk andau mondok ndak dek o.

⁸ Nenaluk ir akuni iniliti alokbak mbere mende kalok, inoba lakburogo dogirtagodek o.

Ir akuni ininggi dek inom ininggi werek inom eku dogorak mende wene

⁹ Akuni Kristen ininggi dek mende, Ar Allah nen yade daga kalok, ir inakla adeknggen arar kugu dogowak o.

¹⁰ Ir akuni Kristen ininggi werek mende, Ar Allah nen tebek baga kalok, ir iniliti adeknggen ar dogowak o. Nenaluk, ir akuni ininggi werek mende eti, ongga erogi ndak-ndak nggililogo wuragun o.

¹¹ Molinggi dagi waga dogolir, pia aik nen ongga ebe taber lalok, erogi yugu mende nggililogo wuka lagatek, elokte pano enogo arar dek arir taga o. Eti kwak, ir ap ininggi werek mende ineyabu etagwi mende etoma, inom arar nggililogo wuragun o.

Iniliti nengga paga iniliti nggagalka wene

¹² Ap ambi nen, auk mbalka kigik, iliti kumbuk diluk dogogin mende eti, ar adeknggen arar o. Nenaluk, ar iliti nggagalka kigik kumbulik dogogin eti paga, ir akuni Ar Allah iniliti kunik dogogun mende inom, Ar Allah nen Ane amburu iniluk dogu yirige eti, ir arar wogoragin o.

¹³ Ap ambi nen auk mbalik yiluk eka kalok, ar nen, “Yi Ar Allah nen nauk mbalke yurak dek o,” Nenaluk, Ar Allah eti, maduk mende nen Ar auk mbalir tagodek o. Ar Allah nen akuni maduk eruwak nen yiluk inauk mbalir tagodek ar o.

¹⁴ Ogwe akuni iniliti nggagalir taga etoma, ir iniliti maduk eru wadok andagwi eti nen likda taga o.

¹⁵ Iniliti paga maduk mende eberkwi eti, maduk ebe ekwi eti arar o. Maduk enogo arar kode aga lagartek, ebe arar endaktarirtaga o. Nen maduk arar kode aga kalok, maduk eti onggo, ar ebe arar kambigin o!

¹⁶ Nawor nakbur kir niliti kunik o! Kinebe nugur kinakanem tuwam pik pak waku dogoni o!

¹⁷ Ye mende nde mende pano mende etoma inom, ninamende kado milogo woknerau pulogo birige mende etoma, Ninombae Ar akbinak mbogor paga walkarige werek nen, wur nera wari taga o. Ar Allah eti adik ari tagodek o, nen o amum erogo biktagodek ar o.

¹⁸ Ar adik nen iliti mikige paga, Ar Ane yugu ebebar mende eti, nir Ar Akburi erninakige o. Eta nir nen, o ar werek ma panoma agubak kigirogo birigemo odo etoma, nir ari ungguwak nen yiluk, ninake ekigemo o.

Inaruk koldiluk erir lagu dogorak wene

¹⁹ Nawor nakbur kinebe niliti kunik o. Ma wene yi panorogo dikbini o! Ir akuni inadik nen inaruk kulkwi kalok, ibar-ibar kulku dogorak o, ogwe inaruk kuldiluk nen, wene onggo ibar-ibar yurak maga, nen onggo wenemuk ibar yurak maga ar o.

²⁰ Nenaluk ir akuni wenemuk yogwa nen, pano ambi erugun mondok dek arar o. Nen ir Ar Allah iliti adeknggen erugun ogwe mondok dek ar o.

²¹ Etama, kir kinobabur nggodo mende, maduk mende, mbo dambe kalok, nen kinobabur kiniliti yanggolek mende, wene ebebar mende yurak mban, Ar Allah nen kinilitimo ai yakige mende eti kodagu dogoni o. Wene eti obarne werek, kir ndil kinaburak mende ebe eti arar o.

²² Ar Allah ane yirige mende eti mban mutok eku dogoni o. Kir nen kinaruk mban kul diluk, nen ebe ekik dek dambe kugwi kalok, eti ekwi paga nen kir kinenggal arar yirkoda tagwi o.

²³ Nen ap ambi, Ar Allah wene aruk kolal diluk, nen wene ebe ekik dek kalok, ar ebe eloktenggen wukagi akla ebebar il kalok ogwe, ibar akla mi arir taga eti ndak-ndak arar o.

²⁴ Ar eloktenggen il pik pak kalok nen, we ya meda yega kigik, elokte kegetek mende eti, akla arar mi arir taga mende o.

²⁵ Ogwe ar ta nen hukum edo wene dikbega kalok, wene eti nen ar, ar ebe kode piktogo erogo bigin o. Nen ar ta nen aruk kolal diluk, oba mi erogo dambe kigikdek, ogwe awene yirige etoma dik duk erir laga kalok, ar nen ye mende nde mende erigin mende etoma paga, ar ebe adeknggen erogo bega dogogin o.

²⁶ Ap ambi nen, an agama wene denggalek paga, kebaktian erir taga mende an arar o, yiluk yega ogwe, akda aruwam wakikdek kalok, ar enggal arar yirkoda taga o.

²⁷ Etiar ma, ir akuni Ar Allah Ninombae ilka paga, kebaktian mondok pikpak erirtaga mende nen kalok: ir elege wenabeda mende yamak dagwi, kumi toge dida yugunem yamak dagwi, nen ir inebe agar paga mende nen maduk erogo baga kau, tuam pik pak wartagwi, eku dogorak o.