TITUS 1 - PANO WENE YABUNGGA ERIGIN YIRIGE MENDE

Keyagi warek wene

¹ An nakbur Titus waalak! An Paulus Ar Yesus Kristus ayedoman dogowak nen yiluk, Ar Allah nen menogo baninggigemo dogolir, diru yi mbalogo koba lakbi wagi o. Ir akuni Allah akburi mirinakige mende, ir iniliti kode erinaka dogowak nen yiluk, migogo nen lakbani wagagemo o. Wene ebe nir waganggugu mende emedek, nen agama wene inom, eta nen edo pagago wogorek laga dogowak nen yiluk, yoknirigemo wokerek lektaga o.

² Wene ebe, wene emedek eti. Nir ninebe ninaitok pano dogorak menda, koda lugun yiluk, oba dutek agorik enogo wene arar o. Ar Allah enggal yitagodekma, o yoma awan kenamer bigikdek kigik, Ar ane wokeragin yirigemo o.

³ O oba amor-amor arar ari wagagemo, Ar Allah abok yirige mende ane paga telekma bugarogo yirige, wene yirige eti waganogo an noba birigemo o. Noba birigemo, an nen Allah ndilninakwa endaga paga yorar lektaga o.

⁴ Titus nakbur wae, kar inom, an inom nimbirak Kristus oba ebebar andarugu paga, kebe an akbur arar agandik o. Ar Allah Ninombae nen, Kristus Yesus endaga mbogor Ndilninakwa nen, kinggi werek ekdagaga, kadeknggen ekdagaga, eka dogowak nen yiluk, nakla dutek ar werek o.

Titus nen o Kreta yabu ekige wene

⁵ O Kreta yoma ugun dambuk erek werek kalok, mor-mor erinabinok nen yiluk, o enda bagaluk wagagi o. Nen, akuni inuma dombok, ir jemaat endoma inaruwam dogolir, menogo baga, eka dogonok nen yiluk, bagaluk wagagi o, lak. Wene yegerogo eka dogono o, yiluk yokirigi mende yi, kilu dogolir eka dogono o.

⁶ Ap jemaat inewe inaruwam dogorak mengga dogolir kalok, maduk oba dek mende kalok mengga, agwe ambi ar waganek kalok mende mengga, akburi nggauk mende, wene inaruk kulubuk mende, inil kalok dek kigik ar ogwe, ir iniliti Kristus ebebar o yiluk, wagangguwa mende kau, meninaka dogono o.

⁷ Jemaat inombae dogorak mende eti: Allah eyabu pano erir taga mende kalok, wogokbatar eritagodek kalok, wene oba dek mende kalok, mabuk eritagodek mende kalok, ndugi birtagodek mende kalok, uang mban il wolok netagodek mende kalok mban meninaburak o.

⁸ Nen ambi ir akuni numa warni-warni yoragwa kalok, pano mende mban ekwa kalok, maduk eru ekanem tebelogo boga kalok, mor mban ekwa kalok, pano mban ekwa kalok, dirogo ekwa kalok.

⁹ Ar nen wene ebe wene emedek yi o, yoruga mende paga pago werek kalok mban, meninaburak o. Etegerogon erigin paga, ar eti nen akuni wene emedek mende paga dikbiluk, akuni inaruk waka, nen ir akuni wene onggo yugunem, ar nen ir inomaduk mende kenam erogo yoragin o.

¹⁰ Ir akuni agama Yahudi apma nen wundi wagugwa mende etoma, wene aikware mbanma, ir inane paga akuni nuk puk erinabir tagwi o.

¹¹ Ir akuni inobabur etegerogo mende nen, inawene ebe dek mende emedek paga, akuni keluarga paga pano werekma mende, inebe dadek padek erinabir wagu dogolir, nen ir akuni inebe paga inelabur ake taburogo ner nugwi o.

¹² Ar akuni nabi ambi, ir mende ai o Kreta mende nen, wene yegerogo yirige o: “Ir akuni o Kreta yoma inaitok inenggal nggirik o, binatang inamodo ambik mende talek, ininggi tenakor o,” yiluk yirige.

¹³ Ap nabi wene yirige eti, wene ebe atama, ir wene ebe wene ininggim nggerok togo pago dogowak nen yiluk, kane obarnerogo inaruk waka dogono o.

¹⁴ Ir nen akuni Yahudi mende inaruwano inom, ap wene pano wene ina'ir mende, nen kindirogo birugwa mende pakta lagunem, inaruk waka dogono o.

¹⁵ Akuni iniliti pano mende nen, ye mende nde mende etoma, pano mende adek lakugwi o. Nen ir akuni iniliti maduk mende eti, o apir amum kwak ebebar andagikdek dogolir, ye mende nde mende etoma maduk ar lakugwi o.

¹⁶ Ir nen Ar Allah eti nir ninilu o, yiluk yugwi mende, ir inobabur erir lagwi paga nen, Ar Allah inonggodek o, yiluk kenam arir taga o. Ir inobabur erir lagunem idim wuarek, ir nen yanggorogo ekikdek, nen ir inebe akuni wene pano mende eru inunggukdek arar o.