MARKUS 5 - PANO WENE YABUNGGA ERIGIN YIRIGE MENDE

Yesus nen ap kugi, iliti mo unggirige werek ma, nggigilogo wulakige wene

¹ Danau aik alibagan nggwe, ir ap o Gerasa mendek dogir tagama unda lagugwa.

² Undagu lagugwarik, to paga nen, auwan wundi lagu nanggugwa, ap ambi kwiyonla akuni warek bartagama kuburan yomanogo nen, Ar Yesus oba arar wagage.

³ Ar ap eti, kugi irimbo tekman mende nen ilitimo unggirigerek ma, kuburan nggwe etoma welagage o. Mbuti kede rantai paga kede makugwarik ar ogwe, ndak dek mban ar agage o.

⁴ Ninige kwak, inggi iyok mbuti kede paga maketek ar ogwe, ar ap enogo kugi akla ma, mbuti kede marek enogo birik berok lagakik mban eka kalok, ir akuni nen ar ebe paktaurak mondok ndak dek welagage o.

⁵ Dinggaga kukbaga kuburan nggwe inom, kur taga inom, ane agan nega dogolir, yigom paga ar oba wakodar nega lagage o.

⁶ Ma ar enogo, ar Yesus waga il loknengga nen lakega lagagerek, mbu agan Yesus abma tebe yi lagage.

⁷ Ar ane nggok paga yega dogolir, “Yesus wae, Kar Ar Allah lektek dombok dogir taga mende akbur arar o! Kar nen, an nenggerogo ekbanigin? Allah endaga paga, ae an noba aik mbaik erogo banugup o,” yiluk nggino yorige.

⁸ (Ar ap eti nen, etegero yirige eti, Ar Yesus nen “Kugi irimbo yi, ap yi akla nen, wundi lan o!”) yiluk yorige paga arar o.

⁹ Etegerogo yoga lagagerek, “Kar kendaga ta?” yiluk Yesus nen kinok yorige. Ar ap enogo nen, onggo yoga dogolir “An nendaga Legiun.” Nenaluk nir ninebe pakalok ma, yiluk, yorige.

¹⁰ Ir kugi irimbo yomanogo nen, inane nggino nggano Ar Yesus yogik mban eku dogolir, o yoma nen, wulbinanugup o, yiluk yorugwa.

¹¹ Nen kur erak lilu etoma, wam pakalok nggonak nunggu lagugwa.

¹² Ir kugi irimbo yomanogo nen, Yesus yogu dogolir, “Ae nir wam inilitimo etoma ungguok nen, lakbinanin o,” yiluk yorugwa.

¹³ Ar Yesus nen, yoraga dogolir, pano o, ap yi akla nen, wam inakla etoma arar unggir lani o, yiluk, yoragage. Yoragagemo ir kugi yomanogo, ap enogo akla nen, wam pakalok nggonak nunggwi yomanogo inakla arar unggirugwa. Nen, i danau aik paga eta nggwila nggadiakma negen ma, ir wam yemenogo nggilu-nggilu arar wuku lagugwarik, i kumuduk nalok kambir lagugwa o. Nen wam kanggugwa mende yomanogo inebe obogar eti dua ribu paga arar o.

¹⁴ Ir ap wam yonggon inaku lagugwa mende yomanogo, etegerogo etagage enogo inil kugu lagugwarik, o kota paga inom, o Desa paga inom, yorar lagugwa. Etegerogo yoragu nanggugwa, akuni pakalok etegerogo etagage mende yomanogo inil kuwok nen, yiluk, wagugwa.

¹⁵ Nen Ar Yesus uwagam wagu lagugwa, ap irimbo ernogo, ir kugi yomanogo obok wulkugwa ma, nen ar iliti obok werek atuk, nen ar iyom obok yikbiluk, korek inom werekma inil karugwa.

¹⁶ Nen ir inobade agu nanggugwa, ir akuni inil paga ap enogo inom nen ye wam nde wam yemenogo inom ekugwa mende, mbililogo yorarugwa.

¹⁷ Yoragu nanggugwa ir ap o kota etoma dogir tagwi mende yomanogo nen, Ar Yesus o etoma damber dalok lowak nen yiluk nggino yorugwa.

¹⁸ Ar Yesus to perahu paga unggik nen yiluk ekinanggige, ar ap irimbo ilitimo nen wuldarige enogo nen, an ninom luwok o, yiluk Ar Yesus nggino yorige.

¹⁹ Yogi nanggige, ar Yesus nen yoga dogolir, “dek o, Kar kuma kogari inoba laga dogoluk, Kombae nen, kar koba pano erogo bagage mende etoma, mbililogo yorar lano o!” yiluk yorige.

²⁰ Yorigemo, ar ap ernogo nen, o kota sepuluh paga etoma, Ar Yesus nen pano ekbirige mende ernogo, mbililogo yorar lagagemo, ir akuni etoma nen, wi au yiluk, bi warkugwa o.

Yesus nen Yairus akbur warek mende iluk ekbega nen kwe ambi mep ekanem amep mbalka ekige wene

²¹ Ar Yesus enogo i aik alibagan nen, to perahu paga iyok taga unda waga lagagerek, i aik paga welaganem, ir akuni pakalok Ar uwagam ninggirtuk komari wagugwa.

²² Komari wagu lagugwarik welagunem, ap ambi endaga Yairus wagage. Ap Yairus eti, ir Yahudi mende tamban erir taga ma aruwam dogitaga mende ma, waga lagagerek, Ar Yesus eloktekma tebe yiluk wandu yirige.

²³ Ar ap enogo akba werek yega dogolir, “Yesus wae, an nakbur u warek korok kamburak negen eka ma, kangga kau kinggi paktanok nen, eme o!” yiluk yoga mban ar ekige.

²⁴ Yoga mban eki nanggige, Ar Yesus imbirak arar lagage. Imbirak laga agagemo, ir akuni ambik amborna ninggituk lagugwa.

²⁵ Ninggirtuk lagwi inakla, kwe ambi amep eka kigik inggi dua belas tahun ekigerek ma, kwe enogo inom arar lagugwa.

²⁶ Nen ar kwe enogo oba u pano erugun talek, amindik amendek ap dokter inoba takbik takbok ekigerek ogwe, ar ambi nen kwak ogwe u palukdek ar o. Nen u enogo ibiluk nggokma nggwe ker arar aik agage o.

²⁷ Ar kwe ernogo, Yesus nen wene pano ekbar laga abok enogo obok aruk kolalkigerek ma, akuni ambik inanggedokla nen, Ar Yesus Amborna korok arar panggo yi lagage.

²⁸ Nenaluk ar akla eberkige eti, “We Iyom ugu paktagin kalok, noba u yi arar dek arigin o,” yiluk andarige.

²⁹ Andega lagagerek, ar kwe enogo nen, Ar Yesus Iyom jubah eti paktega lagage, amep eka lagage enogo arar dek aga yenggak karige o.

³⁰ Ar Yesus enogo obarne nggigilogo wulka yenggak kega lagagerek, akuni ninggituk wagwi nogo il dagalogo bikdaga dogolir, “An Niyom kar ta nen partegen? yiluk yoragage.

³¹ Yoragi nanggige Ar Awurumi nen, akuni ambik ninggirtuk wagwi Kar kil daga ar dogolir, tanen niyom paknaken yiluk yegen a?” yiluk yorugwa.

³² Yorugwarik kigik ar ogwe, Ar Yesus il ndek-ndek bigirek dogolir, ta nen An Niyom paktege yiluk kwaka puk mban arar ekige o.

³³ Etegerogon Ar nen yoragi nanggige, ar kwe enogo nen, an arar pano ernake o yiluk, akla obade andega dogolir, aganak ndik ker arar, Ar Yesus apma tebe yi lagagerek, ekige mende bugalogo obogar yorige.

³⁴ Bagalogo yogi nanggige, ar Yesus nen, “Nakbur a, kar kiliti noba panggo biluk ebebar andagen paga, kar koba pano agan o. Ma koba muk pano agarikma, kiliti ugun kadeknggen paga kuma lan o,” yiluk yorige.

³⁵ Awan yoganem ar, ir akuni yedoman mende ar Yairus uma nen wagu lagugwarik, ar ap Yairus enogo yogu dogolir, kakburak muk kanggerekma, “Ninombae Guru oba tar dida erogo birtagan?”

³⁶ Yorugwa enogo, Ar Yesus aruk kolalkigerek ar ogwe, inane tagirago ar Yairus yoga dogolir, “Kiliti noba panggol biluk, ebebar andega dogon o,” yiluk yorige.

³⁷ Yugwi kigik ar, Ar Yesus lagik mban arar eka dogolir, ir obogar yemenogo muknarek warugup o yiluk yoralok, ar Petrus o, Yakobus o nen ogar Yohanes imbirak inadik inom arar lagugwa.

³⁸ Ap Yairus uma wagu lagugwa, ir akuni nane kane yugu dogolir, de wene yugwi, nen yiyi yugwi inaruk kolkugwa.

³⁹ Nen ar Yesus uma unggi lagagerek yoraga dogolir, “kodak yi kanggikdek iluk dogolir nogo yega agarik o!” yiluk yorarige.

⁴⁰ Yoragi nanggige, ir akuni yemenogo nen ar agarndok kanggugwa. Kanggu nanggugwa, ar Yesus nen kir obogar wundi lani o, yoragage. Yoralok kodak enogo agwiya ombae inom, nen Ar Aworomi tiga enogo inom, akman nggwe kodak enogo ekamar nggwe unggi lagugwa.

⁴¹ Unggi lagu lagugwarik, Yesus nen kodak nogo inggi pagago wene yoga dogolir, “Talita kum,” yiluk yorige. Eti, “kodak e, ibar kiluk arin, an nen yokirir taga o,” yiluk.

⁴² Kodak enogo mendok togon menatuk tuan lagage. Nenaluk kodak enogo ar mende umur dua belas tahun paga arar ekugwa o. Eterogon eka kalok, ye akuni nde akuni welagugwa yemenogo nen, wee au, yiluk bi wakugwa.

⁴³ Ar Yesus nen ane obarne togon ar akuni yemenogo yoraga dogolir, Ar kodak iluk bigi yi abok, akuni yoraurak mondok maga arar o, yiluk yoragige.