KOLOSE 1 - PANO WENE YABUNGGA ERIGIN YIRIGE MENDE

Keyagi warek wene

¹ Nogari kir o Kolose mende, kir Ar Allah akburi, kiniliti Ar Kristus oba mondok kunik paga, dambulik pano agoktip o!

² An eti Ar Yesus Kristus mende rasul, nendaga Paulus, Ar Allah nen menogo baninggige o. Nen elege ninawor ar Timotius nimbirak nen, kir Ar Allah Ninombae nen amende kado milogo wokeraga, kiniliti adeknggen ekinaka, eka dogowak o, yiluk Ar Allah oba ninakla duktek agorik o.

Tamban wa ake nen ekige wene

³ Kir Ar Yesus Kristus oba kiniliti ebabar panggolkwi, akuni Ar Allah akburi uma mende, kiniliti kunik erinakwi kinabok ninaruk kulir tagwi o.

⁴ Eta kinabok kuliluk nen, kinake tamban eku dogolir, Ninombae Ar Allah o, nen Ar Tuhan Yesus Kristus o, wa yiluk yorar tagwi o.

⁵ Kir ebebar oba panggolkwi, inakba ekwi, kiniliti nen Ar Allah nen ninake erogo birige mende koda lugun o yiluk, kiniliti dutek welagwi agokip o. Wene eti, wene Pano Wene yokeragunem kinaruk welagwi agoktip o.

⁶ Ar Allah awene mende eti, o yoma obogar wigak yirige paga, o yoma pano erninabir taga o. Kir Ar Allah nen pano eru mende ane waganggunem, wokeraga karugup o. Kir nen wene eti kinebe paga erir lektagwi o.

⁷ Wene eti ap ninawor Epafras, ar yabu oba yanggolek ekwa niniliti kunik mende enogo nen yokeragemo o. Ar nen Ar Kristus eyabu yanggorogo kir kinake ekigemo o.

⁸ Kir Roh Allah obarne paga, niliti kiliti eritagwi o yiluk, yornera waga o.

⁹ Kir ekwi kinabok ninaruk kolal diluk, kinake tamban kup keyam erir tagwi o. Kinake Ar Allah yogu dogolir, Roh Allah nen kiniliti kode mende wokeraga, edo kinilu aru mende wokeraga, erumo kir nen Ar Allah iliti mirik mende dirogo kinilu aru wadok nen, kinake tamban eritagwi o.

¹⁰ Eta paga, kir nen Ar Allah iliti mirik paga pano nugu dogogun o. Nen, kir ekwi paga, Ar Allah iliti adeknggen eka eku dogogun o. Kir nen ye ekik nde ekik ekwi paga, pano mende mban aga dogogin o. Ar Allah ebe obabur mende nggok togo kinilu aga dogogin o.

¹¹ Yogo, Ar Allah obarne nggok nen, kir kiniliti kode ekinabumo, kir anggin panggin kinoba wukanem, ndak arar yanggo yiluk, kiniliti adeknggen arar dogono o.

¹² Ar Ninombae Allah oba, wa pik pak ar yogu dogono o. Ar ninombae eti nen ar, ye mende nde mende akburi inake, ar uma akbinakma etoma ndugurogo birigemo werek o.

¹³ Ar nen nir o amumo kede warekma pigalogo nen, woknerek Ar akbur iliti kunik awene wulabir tagama binani lagagemo agorik.

¹⁴ Ar Akbur paga, nir kede pigalninakige eti, nir ninomaduk obogar korogo binaninggige o.

Ar Kristus eyabu denek wene

¹⁵ Ar Kristus eti, Ar Allah ebe eloktenggen walkigik agurengge erek arar o. Ar Kristus eti Akbur manggwiya, ye mende nde mende agabak kigirik yoma lemerogo lakigik, nen Ar ebe kwak eti mondok odo unggune mende arar o.

¹⁶ Ar Ebe paga, Ar Allah ye mende nde mende yoma, mbogor taga mende inom, agar taga mende inom, obogar kenam ekdirige. O yoma obok Ar Kristus paga nen, Ar ake nen mban kenam ekdirige o.

¹⁷ O yoma kenam erdigikdek kigik, Ar Kristus eti, o pagane kawak etoma nen ar welagage mo o. Ar paga nen, ye mende nde mende yoma akdikmo dombok erogo birigemo agarik o.

¹⁸ Ar ebe eti jemaat mende akepala arar o. Nen Ar ebe paga jemaat iniluk dogu edo arar agarik o. Ar ebe Akbur Manggwiya warekma, nen alep iluk erogo wuldirigemo, ye mende nde mende edo mende lakigik, Ar adigar edo unggune mende agagemo o.

¹⁹ Ar Allah ebe nen, Ar oba werek mende obogar, Ar akbur oba doguwak yiluk birigemo o.

²⁰ Ar akbur paga nen, ye akuni nde akuni obogar, Ar Allah inom pano dambulugun o. Amberak mbogor taga werek mende inom, agar taga werek mende inom, pano dambulugun o. Eta Ar Akbur o paga menogo warogo bugu nggodek arar ekigemo o.

²¹ O pagane etoma, Ar Allah kinom walek ar welagagupmo o. Kiniliti kinobabur maduk ekwi paga, kinom wim biluk welagagup mo o.

²² Nen, yogondak Ar akbur kanggige paga, Ar Allah nen, nir Ar ninom pano agagumo o. Eta Ar Allah nen, kinoba maduk korogo, nen maduk kinoba dek erdinagu yiluk, wokenarek Ar uwagam dogowak yiluk, binagi wagagemo.

²³ Eta ma, kir nen oba panggolek mondok dogolir, kiniliti abodok dek, Ar oba panggol kugup eti paga mondok dogoni o. Wene Pano Wene yokeragunem, oba eberogo waganggugup mende yomanogo dambe kagup o. Wene eti akuni o yoma werek mende obogar yorarugwama o. Eti ake, an Paulus eyabu mende etagagimo.

Ar Paulus nen jemaat inake eka lagage wene

²⁴ Kir kinake paga o yogondak ya, an anggin panggin noba aru wadok ar kertaga o. An nebe nagakdo paga nen anggin panggin waganumo, an nen Ar Kristus nen akburi inake ekige mende, ebe agakdo paga anggin panggin waganggigimo, an noba wuka kertagwi o.

²⁵ Ar Allah nen kar jemaat inayedoman dogono o yiluk yornirigemo, kir kinake erir taga o. An nen Ar Allah awene ambi tebelogo bigikdek, obogar buga logo yokirak taga o.

²⁶ Wene ebe o pagane nen, Ar Allah akuni o yoma werek mende ambi yoragikdek, kimago biluk welagage mende, yogondak Ar akburi uma mende telekma yora taga o.

²⁷ Ar Allah akburi inoba wene kirago mende eti pano mende, wene nggok mende, akuni yoma obogar inake welagagemo ma, arar yorar taga o. Kimago wene eti, Kristus ebe kinilitimo agarik eti arar ma, kir dogogunem etoma, Ar Allah nggok mende eti, kir kinom dogolir, Ar eka kugu dogogun o.

²⁸ Nir nen Kristus eti awene ar akuni yoma inadik ndak yorar lektagwi o. Nir nen niniliti kode paga iniluk agwi, emerinakwi eritagwi o. Ar Kristus paga, ir obogar iniliti kode aga, Kristus inom kunggwi eruak nen yiluk, obogar Ar Allah oba lektagwi o.

²⁹ Eta etari lau paga, an yabu tar didarek erir taga o. Nen an Ar Kristus obarne woknirige paga, nobarne atuk yabu nggok togo erir lek taga o.