IBRANI 1 - PANO WENE YABUNGGA ERIGIN YIRIGE MENDE

Akuni Ibrani mende inoba surat mbalogo lakbirige wene

¹ O pagane etoma Ar Allah nen Ane ninumbui yorak nen yiluk, ir ap nabi-nabi inoba nggweru yoraga, nen tuan yi paga eli paga, wene yoraga lagage o.

² Ogwe nir yogondak yoma, Ar Akbur obaru wene yonera taga o. Ar Akbur ebe yi paga nen, Ar Allah o yoma agubak kigirkigemo o. Ar Allah nen Ar Akbur yi ar, ye mende nde mende yoma obogar onde aruak nen yiluk oba birigemo o.

³ Ar nenar Ar Allah endaga mbogor akbinak eti ndedalek wedalek erogo bega; nen Ar ebe eti Ar Allah elokte agurengge arar telekma birige mende o. Ar Ane obarne paga, o yoma abodok dek pano pago agarik. Ar nen akuni inomaduk dek erogo balok, Ar ebe, Ar Allah imbirak takhta paga wene onde edo pago lektek arar werek o.

Ar Allah Akbur endaga mbogor awene

⁴ Akbur eti malaikat mende obok wukdagik, Ar ebe ogona lektek eta ar, nen Ar endaga, Ar Allah nen wogorige eti, ir malaikat inendaga tebe dagik, Ar endaga mbogor lektek ogona eta ar birige o.

⁵ Ar Allah nen ir malaikat mende, wene ambi, ya yegerogo yoralok dek o, “Kar eti An Nakbur arar o; O hari yogondak yi paga, An Kar Kombae arar etagi o.” Ar Allah ir malaikat mende inake, wene ambi yegerogon yirige dek arar o, “An Ar Ombaye etarigin o, nen Ar An Nakbur arar etarigin o.”

⁶ Ogwe Ar Allah akbur manggwiya mende eti, o agar taga yoma lakbi waga dogolir, Ar Allah nen yegerogon yirige, “Ir malaikat obogar nen, Ar Elege eti mban, ar wogokdugu dogowak o,” yiluk yorige o.

⁷ Ir malaikat inake, Ar Allah yegerogo yirige, “Ar Allah nen, ir malaikat mende eti, inebe wiya etarugun, nen ir ayedoman mende, indu akda erogo baga, erigin o,” yiluk yirige.

⁸ Nen, Ar Elege eti ake paga, Ar Allah nen yegerogo yirige o, “Allah wae, Kar Kakdimo o takhta eti, aitok mondok ar dogogin o! Kawene mbalega paga, mondok mor-mor arar dogogin o.

⁹ Kar nen wene ugun-ugun maduk ekwi eti, Kar ka'ir, nen Kar wadok eti wene mor-mor mende mban arar o. Ar Allah nen wene eta kalok, Ar Allah Kar mende eti nen Kar mirkaka, nen Kadeknggen woguk dagagu dogowak nen yiluk, kogariyak tebelogo bagarige o.”

¹⁰ Ar Allah nen ambi yegerogo yirige, “Kar Tuhan, o pagane nen agar yoma, agubak kigirkigena o. Tuhan wae, Kar nen ibibir mondok, mbogor agar kenamer birigena o.

¹¹ Etoma obogar dek aga, nen pakaian talek amu aga etarigin ogwe, Kar Kebe eti, kaitok mondogar dogogin o.

¹² Mbogor agar yoma, Kar nen pakaian talek yunggulka, nen Kar nen akdikmo ambi ngger mende erogo bega erigin o. Ogwe, Kar Kebe nin agik dek, nen Kar kiluk mende takbo yigikdek, kaitok mondogar dogogin o.”

¹³ Ar Allah nen, ir malaikat mende wene ambi yegerogo yoralokdek, Kar Kawim mende etoma, Kapma tebelogo ba warik nen, “Kar kebe Ninggi ebema nggwe yoma korektarin o,” yiluk yorige.

¹⁴ Eti kalok, ir malaikat mende etoma, nena kwak dagop? Ir inebe eti, ir roh mende arar ma, ir nen Ar Allah eyabu ekwi, nen akuni inagap endarik nen yiluk, yamakdar lani o, yiluk lakbar taga mende arar o.