FILEMON 1 - PANO WENE YABUNGGA ERIGIN YIRIGE MENDE

Keyagi warek wene

¹ Kar Filemon, kebe ninawor ogwe nen ninogar ar o. Ma, an ai wa yiluk, keyagi wakaki o! An Paulus nen Yesus Kristus endaga paga kede warek ninogar Timotius nimbirak dogolir,

² ir jemaat kuma kinom komarir tagan mende inom, kodak niniru Apfia inom, ap ninogar Arkhipus wene edoma ndak-ndak waganggugu mende enogo inom, yabu ambi paga eritagwi ar ma, an nen surat endi kinoba lakbi wagi o.

³ Nir Ninombae Allah inom nen, Ar Tuhan Yesus Kristus nen, inamende nggok kado milogo wokeragwi, kinoba adeknggen nggok erogo binagagwi, ekwi dogowak o.

Ar Filemon iliti ebebar andalok akuni inakba eka lagage wene

⁴ An tamban eka dogolir kalok, kar kendaga kunogo yiluk nen, Ar Allah wa, yiluk yori taga o.

⁵ Nenaluk kar nen Ar Tuhan Yesus oba kiliti ebabar panggol diluk, akuni Ar Allah akburi obogar inakba ekwa mende, kabok naruk kolal diluk, wa yiluk keyagi wakabir taga o.

⁶ An nen tamban eka dogolir, nir Kristus ninom ambi ar kunagagu paga, nir ninoba adeknggen mende kodarugu etima, nir ninebe ambi ar etagwi mende eti, nggok ar wigalir laga dogowak nen yiluk, eka agarik o.

⁷ Filemon nogar wa, kar akuni Ar Allah akburi mende obogar inakba eka paga, an niliti adeknggen nggok ernaka, nen ambi inom ar erir lowak nen yiluk, ponggor neya tagan o. Nen kar paga, ir Allah akburi yoma obogar kadeknggen o, yiluk yugwi agarik o.

Ar Paulus nen Onesimus ake Filemon nggino yorige wene

⁸ Wene ebe eta paga, ninebe niniliti ambi paga kunik ma, wene kar nen mondok eka dogu mende paga yokirigin o.

⁹ Nen, kar kebe niliti mondok kunikma, we nggino yokigi o. An nebe yi ap nanggok mende arar ma, Ar Yesus Kristus endaga ake paga kede warogo ngganggokla maldanggama agarik o.

¹⁰ Yogondak an Paulus nen, Ar Onesimus eti, Ar Kristus ake paga an nakbur arar ma, ar ake paga nggino ambi yokirigin o. Nenaluk an kede warek ngganggokla yoma dogolir, ar ebe agurengge ake paga, an ar ombae arar etagi o.

¹¹ Alep kwak eti, kar kake ar nen ambi eru mende dek arar welaga o, ogwe yogondak, kar nen waganumo pano o. Eta kar kake mban dek mende, an nake paga inom ar o.

¹² Yogondak ar akuni ebe an niliti kunik eti, ar ebe iyok paga koba lakbi wagi endi o.

¹³ An wene Pano Wene Ar Allah nen yirige mende yi, akuni yorar nega neyalok, kede warogo ngganggokla yoma maldani wagugwa yi, ar kar kakdikmo pano yamar neyaganem ma, koba lakbi waru na'ir ogwe, koba lakbi wagi endi o.

¹⁴ Kar nen, kar yegen eti pano o, lakbi eme o yiluk yigikdek kigik, an nen perok togo lakbi warigin dek o. An nen waganin-waganin yokirigin dek ar o. Kar kiliti paga mirogo nen waganumo pano o.

¹⁵ Onesimus kimbirak dek, kir kinadik ndak kinagik, we elalma welagop mende, yogondak kimbirak mondok-mondok dogu paga koba warigin o.

¹⁶ Yogondak ar ebe kayedoman mban dek o. Ar ebe yogondak Kristen mende arar agama o. Ar ebe an inom, kar inom, nir ninake odo agama o! Ar ebe kayedoman dogu inom, Ar Tuhan akbur mende inom, odo kirogo agama o!

¹⁷ Eta ararma, kar nen an nogar nimbirak Kristen mende arar yiluk andartagan kalok, an woknabu kwak nake paga, ar Onesimus eti arar waganin o.

¹⁸ Ar nen maduk ekakige mende inom, kanomar oba werek mende inom, obogar an nen onggo bigin o.

¹⁹ Yogo arar, an kolan yi paga ninggi amburu bigin o. An Paulus nen onggo obogar ar bigin o. (An wene yokiru mo, kebe Kristen ngger mende agagen eti nanomar koba o, yiluk yokirigin dek o.)

²⁰ Etiar ma, yogondak Ar Tuhan endaga paga yamar neyan o. Ninebe Ar Kristus paga nogar kogar kunik ma, yamar neyan o.

²¹ An wene surat paga bigi yi, niliti paga nen kar erigin arar o, yiluk andalok eki o. Kar nen eka dogolir, wene yokirukdek mende inom ar nggok togo erigin yiluk nakla andagi o.

²² Torek dogolir, kar kuma kamar ambi an nake pugurogo bino o. Nen Ir akuni obogar nen tamban an nake ekwi mende eti, Ar Allah nen onggo wogoragin o, yiluk nakla duktek mondok werek o. Ma, an niyok paga wornarek kinoba bani warigin o.

Irep paga keyagi warek wene

²³ Ar Epafras an nimbirak Ar Kristus Yesus awene paga, kede warek ngganggokla nimbirak dogolir, keyagi wakinake o.

²⁴ Nen, ir an nogari Markus inom, Aristarkhus inom, Demas inom, Lukas inom, ir nen keyagi warkaka ar o.

²⁵ Ar Tuhan Yesus Kristus nen, amende kado milogo wokeraga dogowak o. An Paulus nen, Keyagi wakinaki o waanelak.