EFESUS 1 - PANO WENE YABUNGGA ERIGIN YIRIGE MENDE

Keyagi warek wene

¹ Ar Allah akburi o Efesus mende, Kristus Yesus oba kunik werek mende, Ai waa.

² An Paulus Rasul Kristus Yesus, Ar Allah iliti andarige paga, Ar Ninombae Allah o, Ar Tuhan Yesus Kristus o, nen kir kinamende nggok erogo, adeknggen nggok erogo wokeraga dogowak o.

Ar Kristus paga nen niniliti ake adeknggen worneragin wene

³ Ar Allah nen, Ar Tuhan Yesus Kristus oba, endaga mondok wogok duok o! Nir Kristus ninom kunik dogomo, Ar nen ninamende mbogor paga mende ambigar worneragin o.

⁴ O yoma auwan kenam ekikdek kigik, Ar Kristus paga nggweru, Ar Allah nen ninakba karige o. Nenagaluk eti, Ar apma akburi denek, Ar adik ake pulik maduk inoba dek dogowak nen yiluk mirninakige o.

⁵ Ma o pagane ar, Ar Yesus Kristus paga kologo bega dogolir, nir Ar akburi dogowak nen yiluk erogo binanggige o. Nen wene ebe eti Ar nen wadok karigemo o.

⁶ Ar akbur iliti kunik mende paga, nir ninakba nggok ar karige o. Etiar ma, Ar Allah endaga mbogor endaga lektek ar dogowak o.

⁷ Ar Kristus kanggige paga, Ar Allah nen, nir kede warek mende pigalogo binanggige o. Nen wene ebe enggen eti, nir maduk ekugu mende, Ar Allah nen akla mi erarogo binaninggige o.

⁸ Ar nen ninakba nggogar andarige paga, Ar nen etegerogon ekige o. Ma, ar iliti kunik ninarige eti, akla kwalek paga inom nen iliti eberek paga inom, nir ninakba nen worninakige o.

⁹ Ar Allah nen wadok andarige paga, Ar awene ilitimo kimago mende bugak togon, nir yorneragagemo o. Ar nen Ar Kristus ebe paga nen, erinabik yiluk migogo birigemo.

¹⁰ Akla ebekige eti, ye mende nde mende mbogor taga inom, agar taga werek mende inom, obogar Kristus Kepala Gereja endaga paga dambulogo bagin o, yiluk yirigemo. O eruam arar panggo yi waga kalok, Ar Allah nen erigin o.

¹¹ Ar Allah nen ye nde erigin yiluk andalok kolkige paga erir taga o. O pagane ar, Ar Kristus inom kunugun paga, nir Ar Akburi eruak nen yiluk kologo birigemo o.

¹² Nir alep Kristus oba panggolek mende nen, Ar Allah endaga mbogor ma, wogokdugwi dogowak o.

¹³ Nir nen kwak dek o, Ar Allah ane kinaruk kulkugup paga, ar akburi agagup o. Eti wene Pano Wene ndilogo binagurak mende waganggugupmo. Kir Ar Kristus Yesus oba panggolkugup mo, Ar Allah nen yoma An namende o, yiluk ndimbar yikbinagarige. Eti ebe Roh Allah wokeragin o, yiluk yirige eti arar o.

¹⁴ Roh Allah wokneragage eti paga, Ar Allah akburi wogorak nen iluk yirige mende eti ebebar wokneragin ma, niniliti Ar Allah nen akburi inai werek dogowak nen yiluk wogoragin o. Ma nir Ar, Allah endaga mban pogoraku dogowok o.

Ar Paulus nen tamban ekige wene

¹⁵ Kir nen Ar Tuhan Yesus oba panggolkwi, Ar Allah akburi obogar kiniliti kunik erninakwi, yiluk naruk kuldiluk,

¹⁶ dindaga kukbaga kinake, an nen Ar Allah wa yiluk yoga, kir kinendaga dombok mbalogo tamban eriktaga o.

¹⁷ An nen tamban eka paga, Ar Allah Ninombae endaga mbogor nen Tuhan Yesus Kristus paga, Roh Kudus wokerawak yiluk, ayonggo bir taga o. Roh Allah wokeramo, kiniliti kode ekinaka, Ar Allah ebe yi o yiluk, tiktik yokiramo, kir nen Ar Allah ebe kinilu aga erubagik nen yiluk, yokerar taga o.

¹⁸ Nggino yoga dogolir, Ar Allah nen kinilimo o liya ekdinagamo, kir Ar Allah nen ekdinagu andarige mende kinilu aga, Ar Allah nen akburi inake ye mende nde mende kado milogo wogorak nen yiluk, pulogo birige mende kinilu aga, eruwak nen yiluk, nggino yorir taga o.

¹⁹ We, Ar Allah obarne ambik paga, nir ar akburi oba panggolek mende ninakla nen eritagwi eti, Ar Allah obarne elalin erir taga mende ma erir taga o.

²⁰ Ar Kristus arar kanggigemo, nen iluk erogo biluk, Ar ebe wolok, Ar Allah inggi ebema nggwe mbogor taga kokdirige kudi nen erir taga o.

²¹ Ar Kristus wene onde menogo birigemo etoma, ap wene onde mende, agar taga yoma onde mende, obarne onde mende, inewe ai onde mende, inombaelak onde mende, ap amberak nen pudulogo onde dogowak yiluk barugwa mende, yogondak ya nen yabungga dogogun kudi, obogar wukdagwik menogo birigemo werek o.

²² Ar Allah nen inobarne pago mende obogar waganogo Kristus iyok apma tebelogo balok, Ar Kristus ebe waganogo, jemaat inebe inendaga ye mende nde mende obok onde yiluk ekige o.

²³ Ir Jemaat etoma, Ar Kristus inggi iyok oba kunik mende etoma pano erinaka, nen ye mende nde mende pano erinaka erigin o.