Taitɔ̀ 2 - WƆŊ FƐ̀Ì EBÒ SÌÀŊ DAYÀA

Maŋ kàà kii màŋ koɓɛ̀ maŋ gbòò anyuùŋ hààwe nyàŋ

¹ E wèè muàŋ Taitɔ̀, kàà e keì kɛnɛɛ̀ yaà e hààweɛ̀ sùà lɛ.

² Wòò anyuùŋ gɔu nyàŋ aŋ nyìmàŋ e ɗèwè nyiŋ bi yɛ̀mɛ̀ diɛŋ, aŋ kuwiè jiikɛ̀ɛ yèè aŋ sìà ke di. E hààwe nyiŋ nɛ̀, e mànaŋ nyiŋ nɛ̀, yèè ke jii kùwa nyiŋ nɛɛ̀ŋ ɓɔ̀ è kɛɛ̀ màŋjɛ̀wɛ.

³ Wòò aŋ jɔùŋ nyuùŋ kàìŋ nyaŋ nyiiŋ pɛɛ, aŋ nɔ̀ŋ mààŋ anyùùŋ nyaŋ manaŋ Kanaà àŋ nɔ̀ŋ lɛ, yèè ɓɔ̀ àŋ fiefìè ànyùùŋ. Ɓɔ̀ àŋ nɔ̀ŋ àŋ ɗo kòɓɛ̀ màŋ tala muaŋ, yèè aŋ kaà e yèɛ yaà tɛ̀ɛ̀ lɛ,

⁴ e wèè aŋ kaà aŋ jɔùŋ nyuùŋ bɔwɔ nyàŋ aŋ kuwiè e mànaŋ wèè aŋ faiŋ nyiŋ nyàŋ yaà aŋ jɔ̀à nyiŋ nyàŋ,

⁵ e kìlà aŋ nyìmàŋ e ɗèwè nyiŋ bi yɛ̀mɛ̀ diɛŋ yèè aŋ zɛ̀nɛ̀ŋ. Aŋ nɔ̀ŋ aŋ jɔ̀ùŋ maŋ kpèè siaŋ maŋ gboo nyiŋ màŋ sùà aŋ yè nyaŋ jɔɔlɔ̀ aŋ faiŋ nyiŋ nyàŋ dìì wèè wo nyùùŋ gbiŋ go nàŋ wòò keì naanààŋ è nyaàiŋ dè kè miè gbìaàŋ yewe Dayà sìwè yɛ.

⁶ Sià aŋ felaa nyuùŋ bɔwɔ nyàŋ nyiŋ pɛɛ ke di, aŋ nyìmàŋ e ɗèwè nyiŋ bi yɛ̀mɛ̀ diɛŋ.

⁷ E gbio sùà, muàŋ bi nɔ̀ŋ e tɔ̀ɔ̀màŋsèì maŋ kpèè siaŋ. Mùŋ kuwa maŋ jilɛ̀ŋ, e kìlà maŋ sìà ke di e kàa mɔ̀ɛ̀ sùà.

⁸ Tòòmoò maŋ mìè gbòa sengèì maŋ yè maŋ wo nyùùŋ gbiŋ fè ɓɛ̀nɛ̀ŋ gè màŋ pɛɗì lɛ, wèè e sàngè kùwà aŋ jooum nyàŋ, esaɓù kɛ̀ aŋ kuwà è keì bà gbiŋ wèè aŋ woò fàà è naanààŋ sùà è weè wi.

⁹ Wòò aŋ ɗo nyàŋ aŋ jɔɔlɔ̀ aŋ kɛ̀ɛ̀nɛŋ nyiŋ nyàŋ dìì e teenga gbiŋ sùà, e kìlà aŋ nyɛ̀nɛ̀ŋ maŋ jii nyiŋ màŋ fà e keì gbiŋ sùà. Ɓɔ̀ àŋ kɛlɛ̀ɛ̀ nyiŋ màŋ mìè gbòa naanààŋ,

¹⁰ ɔ̀ɔ̀ ɓɔ̀ àŋ wùà àŋ kɛ̀ɛ̀nɛŋ nyiŋ nyàŋ sìwè. Kɛɛ aŋ tɔɔ̀ kɛ̀ e teenga gbiŋ àŋ yaà tɛ̀ɛ̀ yèè aŋ nɔ̀ŋ anyuùŋ tùlìà jii, kpeiŋ kɛ̀ tɛɛ̀ do nàŋ tɔ̀ɔ̀ e ɓɛ̀ɛ̀jàa gbee koɓɛ̀ e kàaà e nyaàiŋ dè wo Dayà wo Nyuùŋ Jòèye wiɔ̀ maŋ keì nyɛ̀nɛŋ nyiŋ màŋ gbiŋ sùà.

¹¹ Wo Dayà dàànè ebò tɛ̀ɛ̀tɛ̀ɛ̀uŋ nɛ̀ wèè wo jòèyè nyuùŋkpùuŋ gbiŋ.

¹² Esàɓù e tɛ̀ɛ̀tɛ̀ɛ̀ Dayàa sùà, wò naŋ wi kaà wèè eiŋ gè kùàŋ maŋ keì naanààŋ sùà e kpùlìà maŋ ɗèwè ɗuunyaŋ naanààŋ maŋ, yèè eiŋ nyìmàŋ e ɗèwè yàwi bi yɛ̀mɛ̀ diɛŋ, eiŋ nɔ̀ŋ tɔ̀ɔ̀nyaàŋ, yèè eiŋ nɔ̀ŋ wɔŋ nyiiŋ gèe e jɔ̀ɔ̀lɔ sùà e ɗuunyaŋ lɛɛ̀,

¹³ nààŋ è yààìŋ fùlìè ke ɗɔ̀ɔ̀ e keì sìàaŋ è naiŋ tùlìè jii lɛ̀, ke ɗɔɔɛ̀ e jòòwò Dayà gbee wiɔ̀ yèè wo Nyuùŋ Jòèye wiɔ̀ Jisɛ̀ Kulaì kè hnàŋ lɛ.

¹⁴ Wò naŋ fè wuŋ bi wèè yàwi, yèè wo naŋ wi bilɛ̀ŋ e yìwìà maŋ keì naanààŋ gbiŋ sùà, e kìlà wò naŋ wi nyɛ̀nɛ̀ŋ eiŋ nɔ̀ŋ anyuùŋ zɛ̀nɛŋ, aŋ yè nyaŋ wuŋ guùŋ kpò kanaŋ yèè àŋ naŋ haamìŋ wèè e keì sìàŋ nyɛ̀nɛŋ nyàŋ.

¹⁵ Kàà nyiŋ maŋ keì mɛɛ̀ŋ e gaàŋ mɔ̀ɛ̀ sùà, màànààŋ nɔŋ mùŋ fè anyùùŋ nyaŋ kumìàùm nyaŋ maŋ jii nyingè, e kìlà mùŋ dè nyiìŋ dòmaŋ diɛŋ lɛ̀. Ɓɔ̀ mùŋ dangè wò bà gbiŋ doum nììngè fɛ̀ɛ̀.