Taitɔ̀ 1 - WƆŊ FƐ̀Ì EBÒ SÌÀŊ DAYÀA

¹ E yìwìà miàim Pɔɔ̀ sìwè, wo ɓɔ̀ìjɔ̀à Dayàa, yèè wo keela tàeɗùù wèè Jisɛ̀ Kulaì nàŋ yaà sìngìè wɔŋ fɛi wɛɛ̀ŋ. Wo Dayà naim tàeɗùù yèè wò naim tùɔ̀ŋ e wèè ka kpùùmàŋ e hààwè anyùùŋ Dayà nyaŋ wò naŋ tàeɗùù nyaŋ, e kìlà ka nyiŋ kɔ̀à koɓɛ̀ e gòngò tɔ̀ɔ̀nyaàaŋ e Dayà hùmaŋ kii wilɛ̀ sùà,

² e yèɛ nyaàiŋ naŋ dè ke jii tùlia wèè nyiiŋ gèe gò jùà. Wo Dayà, wo yèɔ fè tòà wɔ, naŋ wa ɓèmè e ɗààhiì pangàà ko tɔ̀ɔ̀tù e ɗuunyaàŋ,

³ kpeiŋ wo Dayà, Nyuùŋ Jòèye wiɔ̀ naŋ fè ke miè gbìaŋ yɛɛ̀ e teenga nyiŋ nɛ̀ diɛŋ, wò naim haawè yèè wò naim woò wèè miŋ daanè ebò e nɛ̀ɛŋ wò naŋ woò lɛ.

⁴ Mìŋ yaà sìngìè ko nɛ̀ɛ̀ŋ muìŋ, Taitɔ̀, wo jɔ̀à tɔ̀ɔ̀nyaàŋ miɔ̀ŋ è kuwa e hààwè guùŋ wɔ̀. Tɔ̀ wo Dayà yaà wo Jisɛ̀ Kulaì wo Nyuùŋ Jòèye wiɔ̀ kiɛ̀iŋ ke jii fàa yaà e tɛ̀ɛ̀tɛ̀ɛ̀.

E tòmò Taitɔ̀ɛ ko Kuliì

⁵ Mìŋ naum jòò ko Kiliì, e wèè muŋ kpɛɛyɛ̀ e tòmo gbànaàŋ naŋ joo e gò yɛ̀mɛ̀ nyɛ̀nɛŋ lɛ̀, e kìlà wèè maŋ tɔ̀ɔ̀ aŋ màmàŋkùmɛŋ nyàŋ anyuùŋ hààwe nyàŋ tɛɛ ko jawa gbiŋ. Jaà manɛ̀ŋ nyɛ̀nɛŋ màŋ mìŋ naum tɔɔ̀ maŋ jii.

⁶ Wo màmàŋkùmɛŋ ɓɔ̀ wò kuwìè è tɔ̀mɛ, wo nɔ̀ŋ wo fèlàà jɔ̀ùŋ guùŋ kpò, yèè aŋ jɔ̀àuŋ nyàŋ aŋ nɔ̀ŋ anyuùŋ kùwìè hààwe, ɓɔ̀ àŋ nɔ̀ŋ ànyuùŋ kuwìè ebò waasu ɔ̀ɔ̀ ànyuùŋ gò jɔɔlɔ̀.

⁷ Nààŋ wo sìèfèìŋ anyuùŋ hààwe nyàŋ nàŋ yaà wo ɓɔìjɔ̀à yɛ̀mɛ̀ e kèè e tòmò Dayàa dììo sùà lɛ, ɓɔ̀ wò kuwìè è tɔ̀mɛ. Ɓɔ̀ wò nɔ̀ŋ wò nyuùŋ mànàŋ tɛɛ, ɔ̀ɔ̀ wò nyuùŋ bìà jii, ɔ̀ɔ̀ wò nyuùŋ tìà màŋ mùàŋ tiwìtiwì ɔ̀ɔ̀ wò nyuùŋ dàà gbɔ̀ɔ ɔ̀ɔ̀ wò nyùùŋ wùànàŋ nɛɛnɛŋ keekèè.

⁸ Kɛɛ wo mànàŋ aŋ nyùnèènyɛiŋ, yèè wo nɔ̀ŋ nyuùŋ nyɛ̀nɛ̀ŋ keì sìàŋ. Wo kuwìè jiikɛ̀ɛ, wo nɔ̀ŋ tɔ̀ɔ̀nyaàŋ, wo nɔ̀ŋ nyùùŋ nɛɛmaŋ, yèè wo nɔ̀ŋ wo nyùnɔ̀ɔŋ naŋ ɓɛ̀nɛ̀ŋ yɛ̀mɛ̀ wuŋ bi diɛŋ wɔ̀.

⁹ Wo kùwà ke mìè gbìàŋ tɔ̀ɔ̀nyaàŋ wò naŋ gbeè yɛ kpaŋ, ke yèɛ ke jii tùlia yaà sùà lɛ. Wèè e kàà kii siaŋ sìàuŋ nɛ̀ e fè anyùùŋ jii nyingè, e kìlà e dè anyùùŋ nyaŋ gbiŋ giiyà ke mìè gbìaàŋ maŋhɛɛ nyàŋ ke dòmaŋ diɛŋ.

¹⁰ Anyuùŋ gò jɔɔlɔ̀ zimgbe àŋ yaào aŋ kuwà è ɓɛ̀ɛ̀jàà wèè àŋ sìèfeìŋ, yèè àŋ zuwà anyùùŋ nyaŋ bà nyiŋ maŋ mìè gbòa foofòò sùà. Tɛɛ̀ yaà e tɔɔɓaa yèè è kaaìŋ, kai kai ngèè aŋ Juùù nyaŋ yè nyaŋ kaà kɛ̀, sɔɔ̀ anyùùŋ nyaŋ fè àŋ Juùù nyaŋ aŋ nɔ̀ŋ kpùà jàa nyiŋ pangàà àŋ nɔ̀ŋ anyuùŋ hààwe.

¹¹ Kɛɛ hàà nyiŋ nàà sìwè kɛ̀ ɓɔ̀ àŋ nyɛ̀nɛ̀ŋ niŋ. E nɛɛnɛŋ àŋ yaà maŋjɛ̀wɛ, e nɛ̀ɛŋ àŋ yaà kàa sùà lɛ, e fè tɔ̀ɔ̀nyaàŋ wèè aŋ niŋ kaà. Yèè esàɓù e kàa bi sùà àŋ yaà kìla sùà maŋ jìì maŋ kpoo zimgbe.

¹² Wo wɛ̀ijì gbee nyiŋ nɔɔ̀ŋ bà guùŋ ko Kiliì, naŋ gbàì e tɔ̀ɔ̀nyaàaŋ nààŋ wò naŋ woò wààŋ, “Anyùùŋ nòò Kiliì nyaŋ àŋ yaà anyuùŋ tòa, aŋ yìlì wùàŋ kùùno naanààŋ, yèè àŋ yaà anyùùŋ e kèè nɛ̀ŋje fà le kɔɔ.”

¹³ Ke mìè seì yɛɛ̀ kè yaà e tɔɔɓaa, sɔɔ̀ naŋ gbùùyà aŋ kààmɔ̀ɔ̀ŋ kàaɓì nyaŋ nyìnga, wèè naŋ nyiŋ kpuumàŋ aŋ nyìngà e hààweɛ̀ sùà,

¹⁴ yèè ɓɔ̀ nìŋ jàà màŋ kàɓànè fòò àŋ Juùù nyaŋ yaà màŋ sàwà nyuùŋkpùuŋ kùàŋ dìì. Maŋ keì bi yewe anyùùŋ nyaŋ naŋ gè e tɔ̀ɔ̀nyaàaŋ kùàŋ dìì nyaŋ sìwè.

¹⁵ Wo nyùnɔ̀ɔŋ gbiŋ zɛnɛŋ wɔ̀, manɛ̀ŋ maŋ gbiŋ zɛnɛŋ weèuŋ. Kɛɛ wo nyùnɔ̀ɔŋ fè zɛ̀nɛ̀ŋ yèè wo kuwà è hààwe wɔ, e nɛ̀uŋ gbiŋ fè zɛ̀nɛ̀ŋ ke jiiuŋ nɛɛ̀ŋ kànɛ̀ɛŋ yèè e gòngouŋ nɛ̀ gbiŋ è naŋ pɔɔpɔ̀ɔ̀.

¹⁶ Àŋ ɓulo ke sɔɔ kɛ̀ àŋ nyìmàŋ Dayà, kɛɛ maŋ kpèè nyiŋ màŋ giiyà niìŋ maŋhɛɛ. Àŋ kuwa maŋ jìì wùòno, yèè aŋ fè jɔ̀ɔ̀lɔ̀ Dayà dìì, aŋ fè tɛ̀ɛ̀ wèè aŋ nyɛ̀nɛ̀ŋ è keì sìàŋ bà gbiŋ.