Nyɛ̀nɛ̀ŋ 26 - WƆŊ FƐ̀Ì EBÒ SÌÀŊ DAYÀA

Wo Pɔɔ̀ gbòà wèè wuŋ bi ko fɛ̀ɛ̀fèìŋ kanaà Àgulepɔ̀

¹ Wo Àgulepɔ̀ naŋ wòò wo pɔɔ̀ wààŋ, “Màŋ naàŋ ɓɛ̀nɛ̀ŋ gbòa wèè muàŋ bi.”

² Wo Pɔɔ̀ naŋ jòòwò wɔŋ kuàuŋ nɔɔ̀ŋ fùùŋ yèè wò naŋ woò wààŋ, “Kanaà Àgulepɔ̀, e zɔlɔ̀ yààìm nàaŋ ke ɗɔɔ yɛɛ̀ wèè e ɗeweɛ̀ nìŋ naim kiɛ̀ŋ wèè ka gbòà wèè miàŋ bi ko fɛɛ̀fenùum e nyaàiŋ dè maŋ keì mɛɛ̀ŋ gbiŋ aŋ Juùù nyuuŋ nyɛɛ̀ŋ naim yaà gbùwò ɗì maŋ,

³ ɓɔɔɓɔɔ ngèè màŋ nyìmàŋ e zimgbe niŋ e nyaàiŋ dè e làngì zòòlo aŋ Juùù nyaŋ yaà maŋ hààwe màŋ naŋ gòònò tɛɛ màŋ. Weètii mìŋ manaŋ maim kumiàŋ tɛ̀ɛ̀ ke jii tɔumtɔ̀ùm sùà.

⁴ “Aŋ Juùù nyaŋ gbiŋ àim nyìmàŋ e yìwìà e teengaà mìŋ yaà wa wo jɔ̀àkàìŋ jɔa lɛ̀. Àŋ nyìmàŋ kɛ̀ diè mìŋ naŋ nyìnìè wɔŋ nyiiŋ gèe miɔ̀ŋ wɔŋ fùɔ̀ŋ miàŋ biɔ̀ sùà yaà ko Jùlusɛ̀làm.

⁵ Àŋ nyìmàŋ wèè e teenga mùnlaŋ bà naàŋ, sèè àŋ nyimààŋ weè wèè aŋ kìɛ̀ŋ ke mìè seì weèim kɛ̀ mìŋ naŋ nyìnìè wɔŋ nyiiŋ gèe miɔ̀ŋ yèè mìŋ naŋ nɔ̀ŋ wo bàimbà wèè ke gbòò aŋ Fɛlosiì nyaŋ naŋ wa kùwò e hààwe wilɛ̀ kpaŋ e nìàŋ ke gbòò bà gbiŋ.

⁶ Mìŋ sia nàaŋ kià wèè aim gbaì esaɓù mìŋ kuwa ke jii tùlia wèè e ɗààhiìɛ wo Dayà naŋ wa jɔ̀ɔ̀ lɛ koɓɛ̀ aŋ nèwàènèwe wi nyàŋ.

⁷ Maŋ zìì ɗì zììyà jɛ̀wɛ̀ tìyèe wi màŋ zoolà maŋ e dùùm yèè maŋ gɔɛɛ ke jii tùlia sùà wèè aŋ yɛmɛ̀ kɛ̀ e ɗààhiìɛ wo Dayà naŋ wa jɔ̀ɔ̀ lɛ e hɛɛnɛ̀ŋ, e kìlà wèè ke jìì tùlìà guùŋ yɛɛ̀, Kanaà Àgulepɔ̀, aŋ Juùù nyaŋ naim gbùwò maŋ keì ɗì.

⁸ Wèè kiìŋ nyɛ̀iŋ nyàŋ yaà kià nyaŋ naŋ ɓɛ̀nɛ̀ŋ gè maŋhɛɛ kɛ̀, wo Dayà fè ɓɛ̀nɛ̀ŋ gè wò nyùùŋ è fàa dìì wɔŋ nyiiŋ gèeo sùà?

⁹ “Miàŋ bi mìŋ naŋ wa gongò kɛ̀ sɔɔ̀ ka wa nyɛ̀nɛ̀ŋ e yèɛ gbiŋ mìŋ kuwa wa ka nyɛ̀nɛ̀ŋ lɛ wèè ka pɔ̀ɔ̀pɔ̀ɔ̀ e dèè sìàŋ Jisɛ̀ɛ e yìwìà ko Naazɔ̀ɛ̀.

¹⁰ Mìŋ naŋ wa tɛɛ̀ nyɛ̀nɛ̀ŋ ko Jùlusɛ̀làm kuŋ jiɛ̀. Aŋ kànà sìèfèìŋ zòòlo nyàŋ naim wa kìɛ̀ŋ e gààaŋ wèè ka gbìàŋ anyùùŋ nɛɛmaŋ nyàŋ zimgbe nyiŋ ko sààŋ nyìwì. E kìlà mìŋ naŋ wa nyɛ̀nɛ̀ŋ aŋ yɛ̀mɛ̀ fàa.

¹¹ Mìŋ he nyiŋ wa kìɛ̀ŋ keì nyìnga e teenga zimgbe maŋ sààŋ zòòlò aŋ Juùù wi nyàŋ dìì, yèè mìŋ kamàŋ wa e ɗewe wèè ka nyiŋ nyɛ̀nɛ̀ŋ aŋ woò maŋ mìè ɓɛ̀ɛ̀pɔ̀ɔ koɓɛ̀ Dayài. Yèè ngèè, mìŋ naŋ nyiŋ wa tùù sìwè zimgbe, e nɔ̀ŋ esaɓù sɔɔ̀ ka wa kà ko kaame nyiŋ maŋ jawa gbeegbèè maŋ fuɔ̀ŋ joo màŋ sùà.”

Wo Pɔɔ̀ naŋ wòò e ɗeweɛ̀ wò naŋ kìlè koɓɛ̀ Dayài lɛ̀

¹² Wo Pɔɔ̀ naŋ ɓɛìŋ woò wààŋ, “E wèè esaɓù lɛɛ̀ mìŋ naŋ wa kɔ̀ ko Dàmakɔ̀ e yìwìà e gààaŋ aŋ kànà sìèfèìŋ zòòlo nyàŋ naim wa kiɛ̀ŋ lɛ.

¹³ È yaà wa ebɛ̀ŋ gɔɛɛ hàì ɗìò tɛɛ, oo Kanaà, yèè mìŋ naŋ yɛ̀mɛ̀ e gbolòùŋ, kɛɛ è mɛɛŋ e nìàŋ e gɔɛɛ̀, e yìwìà ko àìjɛnɛ̀ŋ eim dè e kpùlìà anyùùŋ nyaŋ yààìm wa kààìŋ maŋjɛ̀wɛ nyàŋ.

¹⁴ Yàwi nààŋ gbiŋ naŋ sɔ̀ɔ̀ ko dììnaŋ, yèè mìŋ naŋ kòmò ke mìè nyùùŋ kè naim woò e Hiɓulù mieɛ̀ sùà wààŋ, ‘Sɔɔ̀, Sɔɔ̀, wèè kiìŋ mùŋ yààìm nìmila sùà? È yaà e kèì ɓàaɓàa wèè maim sumiàŋ!’

¹⁵ Yèè mìŋ naŋ Dawè mìàŋ, ‘Ɓòò nàŋ yààùm, Kanaà?’ Yèè wo Kanaà naŋ woò wààŋ, ‘Miàŋ nàŋ yaà wo Jisɛ̀ wo yèɔ mùŋ yaà nìmila sùà wɔ.

¹⁶ Kɛɛ yewà dìì muŋ sie. Mìŋ naum fòlò feìŋ, esaɓù kɛ̀ kàum tàeɗùù wèè maŋ nɔ̀ŋ wo ɓɔìjɔ̀àim. Kɔ̀à muŋ kiɛ̀ŋ anyuùŋ joo ke mìè seì kɛ̀ kiìŋ mùŋ naŋ nyìmè e nyaàiŋ eim dè yèè e yèɛ mìŋ doum nàŋ tɔɔ̀ lɛ.

¹⁷ Mìŋ doum nàŋ joeyè e yìwìà aŋ Juùù nyaŋ sìwè, anyùùŋ muàŋ bi nyàŋ, yèè e yìwìà anyùùŋ nyaŋ fè àŋ Juùù nyaŋ. Ko nɛ̀ɛ̀ŋ nyiŋ niìŋ mìŋ doiŋ nàŋ tùɔ̀ŋ.

¹⁸ Mìŋ manaŋ maŋ yìlè le fɛɛ̀ nyiŋ nɛ̀, wèè kɛ̀ aŋ yèwà ke nyìwìɛ sùà aŋ ka koɓɛ̀ e gbolòùŋ lɛ, e kìlà maŋ nyiŋ gè e gààŋ Sɛ̀tanàaŋ dìì aŋ kìlà anyùùŋ nɛɛmaŋ koɓɛ̀ Dayài. Kpeiŋ kɛ̀ maŋ jùumù nyiŋ màŋ nɔ̀ŋ hakɛ̀ jùùya miŋ, yèè sèè àŋ kɛɛnɛ̀ìm e hààwe sùà àŋ do nàŋ nɔ̀ŋ aŋ bà nyiŋ bà anyùùŋ nɛ̀ɛ̀màŋ Dayà nyaŋ tɛɛ.’ ”

Wo Pɔɔ̀ naŋ wòò e kèè e tòmouŋ nɛ̀

¹⁹ Wo Pɔɔ̀ naŋ ɓɛìŋ woò wààŋ, “Nààŋ è yaà lɛ, Kanaà Àgulepɔ̀, miŋ gò wa gììyà è gɔ̀à gò jɛ̀ì lɛɛ̀ màŋhɛɛ e yìwìà kò àìjɛnɛ̀ŋ.

²⁰ Mìŋ naŋ gbòò ke mìè Dayàa koɓɛ̀ anyùùŋ nyaŋ ko Dàmakɔ̀ nyiŋ jiɛ̀, yèè mìŋ naŋ kɔ̀ ko Jùlusɛ̀làm yaà wɔŋ fùɔ̀ŋ Jùdiàa gbiŋ sùà. Eɓìèmàŋjɛ̀wɛ̀ tii, mìŋ naŋ kɔ̀ koɓɛ̀ anyùùŋ nyaŋ fè àŋ Juùù nyaŋ e kìlà mìŋ naŋ nyiŋ woò mìàŋ, aŋ fè maŋ tùwo naanààŋ nyiŋ màŋ jɛwɛ aŋ kìlà koɓɛ̀ Dayài! Kpeiŋ kɛ̀ niŋ tɔɔ̀ ke nyɛ̀nɛiŋ nɛɛ̀ŋ janyai e yìwìà e ɗeweɛ̀ nìŋ do naŋ nyɛ̀nɛ̀ŋ maŋ nyiiŋ gèeiŋ màŋ lɛ.

²¹ Tɛɛ̀ nàŋ yaà esaɓùɛ aŋ Juùù nyaŋ naim kùwò ko Saaŋ Zòòlò Dayài, yèè àŋ naŋ kàmè ɗewe wèè aim jìwà.

²² Kɛɛ wo Dayà naim kpuumò e teenga lɛɛ̀ gbiŋ sùà. Kà kìɛ̀ŋ ke mìè seì koɓɛ̀ anyuùŋ pɔ̀ɔ nyàŋ yèè anyuùŋ bàne nyàŋ. Mìŋ naŋ nyiŋ wòò e yèɛ nɔŋ aŋ wɛ̀ijì nyaŋ yèè wo Mòòze naŋ woò kɛ̀ è do nàŋ kaaìŋ lɛ.

²³ Mìŋ naŋ nyiŋ woò mìàŋ wo yèɔ wo Dayà naŋ tàeɗùù wèè wo jòèyè e ɗuunyaàŋ wɔ do naŋ kɔ̀ e mɔ̀ɔ̀nɛŋ dìì, e kìlà wuŋ jiɛ̀ nàŋ do nàŋ yèwè e fàaà dìì, wèè kɛ̀ wo hiàŋ e gbolòùŋ koɓɛ̀ aŋ Juùù nyaŋ yèè koɓɛ̀ anyùùŋ nyaŋ fè àŋ Juùù nyaŋ.”

²⁴ Wèè paŋ wo Pɔɔ̀ kpɛɛyɛ̀ wa gbòa wèè wuŋ bi, wò Fɛtɔ̀ nauŋ kpiinyɛ̀ŋ wààŋ, “Pɔɔ̀, mùŋ naŋ sààŋ ke gbòà! E nɛ̀ŋ nyìmaŋ zimgbe è nyɛ̀nɛ̀ŋ ke jii komaŋ mɔɛ̀ŋ kè gbaaì.”

²⁵ Kɛɛ wo Pɔɔ̀ naŋ fasàì wààŋ, “Kanaà Fɛtɔ̀, miŋ gò sààŋ kè gbòà. E yèɛ mìŋ yaà woo lɛ̀ è yaà e tɔ̀ɔ̀nyaàŋ, yèè e jiikɛ̀ɛ yà nìŋ ko sùà.

²⁶ Maŋ keì mɛɛ̀ŋ bà gbiŋ gò kààìŋ kò zɔ̀nù kòɓɛ̀ bà. Mìŋ naŋ haawè kɛ̀ wo Kanaà Àgulepɔ̀ nyìmàŋ e yèɛ mìŋ yaà woo lɛ̀. Wèè esaɓù lɛɛ̀ mìŋ gboo ko nɛ̀ɛ̀ŋ muìŋ janyai.

²⁷ Kanaà Àgulepɔ̀, màŋ hààwè e yèɛ aŋ wɛ̀ijì nyaŋ naŋ wa woò lɛ? Kà nyìmàŋ kɛ̀ mùŋ naŋ niŋ haawè.”

²⁸ Wo kanaà Àgulepɔ̀ naŋ dàwè wo Pɔɔ̀ wààŋ, “E teenga kpuu lɛɛ̀ sùà mùŋ naŋ gongò kɛ̀ e gbòa mɔ̀ɛ̀ ko nɛ̀ɛ̀ŋ miìŋ èim ɓɛ̀nɛ̀ŋ nyɛ̀nɛŋ wèè ka nyimèè ka nɔ̀ŋ wo nyuùŋ hààwe wo Jisɛ̀ sùà?”

²⁹ Wo Pɔɔ̀ naŋ fasàì wààŋ, “Sèè pɛɛ e ɓèmè e teenga kpuu ɔ̀ɔ̀ e teenga mùŋlaŋ, mìŋ yaà zòòlò wo Dayà wèè nyɛ̀iŋ nyàŋ gbiŋ naim nàaŋ kumiè nyaŋ niŋ nɔ̀ŋ anyuùŋ hààwe mààŋ miàŋ bì. E kìlà ɓɔ̀ nìŋ nɔ̀ŋ àŋ pèesìnàŋ wèè aiŋ sìà màŋ jɔ̀ɔɔ mɛɛ̀ŋ, màànààŋ àŋ naim miŋ sìè lɛ.”

³⁰ Kpeiŋ wo Kanaà Àgulepɔ̀, yèè wo kanaà Fɛtɔ̀ yaà wo Bɛ̀niìŋ e kpùlìà anyùùŋ nyaŋ gbiŋ jaao wa nyàŋ naŋ yèwè dìì.

³¹ Nààŋ àŋ naŋ fòlò ko zɛ̀mɛ̀ɛ̀ŋ dèèneì wèè anyùùŋ nyaŋ gbiŋ aŋ ka wa, àŋ naŋ wòò aŋ dàwi fèemàŋ nyààŋ, “Wo felaa wɛɛ̀ gò nyɛ̀nɛ̀ŋ è keì gbiŋ wèè euŋ jeè wèè e nɔ̀ŋ èsaɓù wèè auŋ jìwà ɔ̀ɔ̀ auŋ gbìàŋ kò sààŋ nyìwì.”

³² Wo kanaà Àgulepɔ̀ naŋ wòò wo Fɛtɔ̀ wààŋ, “Èiŋ weè ɓɛ̀nɛ̀ŋ dàngè wo felaa wɛɛ̀ wo ka foo sèè wo gò weè dawè wèè wo kanaà Siisɔ̀, wo Kànà anyùùŋ fùɔ̀ŋ Luùm nyaŋ wo hàà è kìtì è keìuŋ nɛ̀.”