Nyɛ̀nɛ̀ŋ 20 - WƆŊ FƐ̀Ì EBÒ SÌÀŊ DAYÀA

Wo Pɔɔ̀ yaà aŋ dàwiuŋ nyàŋ kà ko Mɛ̀sèdonià yèè ko Giliì

¹ Wo Pɔɔ̀ naŋ nyààŋ anyuùŋ hààwe nyàŋ koɓɛ̀ guùŋ nààŋ ke gbòàa naŋ gɔ̀à dìì, wò naŋ nyiŋ kìɛ̀ŋ maŋ mìè jii nyingè. Maŋ ɗɔɔ kpàa naŋ mààŋ yèè wò naŋ nyiŋ diemè. Kpeiŋ wò naŋ kuii yèwè yèè wò naŋ kɔ̀ ko Mɛ̀sèdonià.

² Nààŋ wò yaà wa kɔ̀ɛ̀ sùà maŋ tàta miiŋ, wò naŋ gbòò anyuùŋ hààwe nyàŋ kɔɔ wèè aŋ kɛɛnɛ̀ŋ maŋ jii nyingè e hààwe nyiŋ nɛ̀ sùà. Ko diemeì wò naŋ kɔ̀ ko Giliì,

³ yèè wò nao nɔ̀ŋ wèè maŋ wàà taai. Wo Pɔɔ̀ yaà wa bànèbane sùà wèè wo ka ko Siilià. Kɛɛ wò naŋ wa kòmò kɛ̀ anyùùŋ gbèègbèè aŋ Juùù nyaŋ bà naŋ jɔ̀ ke gbùnu sùà wèè auŋ jàà e keì naanààŋ, yèè wò naŋ ɗewè wèè wo kɛ̀ɛ̀ maŋjɛ̀wɛ, kɛɛ wò naŋ wa kɔ̀ɛ̀ ko Mɛ̀sèdonià.

⁴ Nààŋ wo Pɔɔ̀ yaà wa kɛ̀ɛ̀ sùà maŋjɛ̀wɛ, anyùùŋ bà nauŋ wa dè maŋjɛ̀wɛ tèènè mààŋ wo Sopatɔ̀, wo jɔ̀àfèlàà Palɔ̀ɔ e yìwìà ko Bɛ̀lià, wo Àlètakɔ̀ yèè wo Sekɔuŋɗù e yìwìà ko Tɛsèlonikà. Wo Gayɔ̀ e yìwìà ko Dɛɓì, wo Timetè, yèè aŋ fèlàà tìyèe e yìwìà ko Eesìà, wo Tachikɔ̀ yèè wo Tofimù.

⁵ Anyùùŋ nyɛɛ̀ŋ naŋ wi wa kɔ̀ ko feìŋ yèè àŋ naŋ wi fùlìà ko jawaì àŋ nyaaŋ ko Toà.

⁶ Kɛɛ nààŋ è naiŋ wa kpɛ̀ɛ̀yɛ̀ gè wɔŋ Ɗàà Gè Gbɔ̀u Gò Jòwàa, è naiŋ sɛ̀ɛ̀ wɔŋ meeèɔ sùà e yìwìà ko Fèlepì. Yèè è naiŋ nɔ̀ŋ ke dòmàŋ kàaiŋ wiɛ̀ diɛŋ wèè maŋ ɗɔ̀ɔ̀ nɔɔnɔŋ paŋgàà è naiŋ hàì ko nɛ̀ɛ̀ŋ nyiŋ niìŋ ko Toà, yèè è naiŋ noo wa nɔ̀ŋ wèè maŋ ɗɔ̀ɔ̀ nɔɔnɔŋ le tìyèe.

E jààmè dìàmàŋ Pɔɔ̀ɛ ko Toà

⁷ Ke ɗɔ̀ɔ̀ jiɛ̀jiɛ̀ɛ ke wikìɛ sùà e koya, è naiŋ wa gbonò wèè eiŋ jììyà e nɛ̀ŋje koɓɛ̀ guùŋ. Yèè nààŋ wo Pɔɔ̀ naŋ wa ɗewè wèè wo nyiŋ jòà wo ka wɔŋ niìsìaà bàa, wò naŋ nɔ̀ɔ̀ŋ gbùùyè ko nɛ̀ɛ̀ŋ nyiŋ niìŋ e jèèsùà wɔŋ dùmɔ̀ɔŋ hàì tɛɛ.

⁸ Maŋ laumpò kùwa zimgbe yaà wa ko sààŋ fùùiŋ ko yèi è naiŋ wa deenè lɛ.

⁹ Wo fooninge bà yào wà àŋ nyaaŋ wo Yùtaikɔ̀, kɛɛ wò jaa wa ko jèènaài. Nààŋ wo Pɔɔ̀ yaà wa nɔŋ gbuuye, wo felaaà naŋ sɛ̀ɛ̀ maŋ jàwè ɓùuù. Ko diemeì wò felaaà naŋ fòlò ko sààŋ fùùiŋ ko kɛ̀ìŋ taai wo sɔ̀à ko dììnaŋ. Wèè anyùùŋ nyaŋ kauŋ noò gè dìì, auŋ mɛɛ̀ŋ wò yaà fàuŋ.

¹⁰ Kɛɛ wo Pɔɔ̀ naŋ kɔ̀ yèè wò nauŋ sɔ̀ɔ̀ diɛŋ yèè wò nauŋ kpùùwò ke sɔɔ. Kpeiŋ wò naŋ nyiŋ woò wààŋ, “Ɓɔ̀ nìŋ sɛɛ̀ jii, kòò wò yaà nɔŋ wɔŋ nyiiŋ gèeɔ̀ sùà.”

¹¹ Eɓìèmàŋjɛ̀wɛ̀ tii wo Pɔɔ̀ naŋ ɓɛìŋ kɛ̀ɛ̀ ko sààŋ fùùiŋ, yèè wò naŋ ɓèmè ke gbɔ̀u yèè wò naŋ nyiŋ nyìmè tɛɛ, yèè yàwi nààŋ gbiŋ naŋ nyiŋ gbìlè koɓɛ̀ guùŋ. Wo Pɔɔ̀ naŋ nɔ̀ɔ̀ŋ gbuuye e jèèsùà e nììɛ sìà, yèè wò naŋ wi jòò wo ka.

¹² Kpeiŋ anyuùŋ hààwe nyàŋ naŋ kɔ̀ɔ̀ wo felaajɔaà wɔŋ nyiiŋ gèeo sùà ko gboouŋ noo ke jìì fà zɔlɔ̀ gbee sùà.

Wo Pɔɔ̀ naŋ yèwè ko Toà wo kà ko Miletù

¹³ Wo Pɔɔ̀ naŋ wa ɗewè wèè wo kààìŋ dìì wo kà ko Asò. Yàwi nààŋ nyùùŋ màŋjɛ̀wɛ̀ gbànauŋ nyàŋ naŋ wa sɛ̀ɛ̀ wɔŋ meeèɔ sùà yèè è naiŋ kɔ̀ ko feìŋ ko Asò wèè e ɓeemèiŋ noo wo Pɔɔ̀ wɔŋ meeèɔ sùà e kaiŋ.

¹⁴ Nààŋ wò naŋ wi mɛ̀ɛ̀ŋ ko Asò, wò naŋ sɛ̀ɛ̀ wɔŋ meeèɔ sùà, yèè è naiŋ kɔ̀ ko Mɛ̀tɛ̀linìŋ.

¹⁵ È naiŋ kuii yèwè yèè è naiŋ hàì ko gbɛ̀ɛ̀ ke tììŋ Kayɔ̀ɛ ke ɗɔɔɛ̀ bàa, yèè wɔŋ niìsìaà bàa è naiŋ hàì ke tììŋ Samòɛ sùà. Kpeiŋ wɔŋ niìsìaà bàa è naiŋ kɔ̀ ko Miletù.

¹⁶ Wo Pɔɔ̀ naŋ wa ɗewè wèè eiŋ kɔ̀ɛ̀ ko Ɛfesɔ̀, esaɓù kɛ̀ wo manàŋ wa wèè wò do nɔ̀ŋ wɔ̀ŋ fùɔ̀ŋ Eesìàa wèè e teenga mùnlaŋ. Wò yaà wa nyinie fiòfiò yèè wò manaŋ wa wo hàì ko Jùlusɛ̀làm e teengaà wèè ke ɗɔ̀ɔ̀ zòòlò aŋ Juùù nyaŋ àŋ nyaaŋ Pɛnɛŋkɔ̀ɛ.

Ke mìè dìàmàŋ Pɔɔ̀ɛ koɓɛ̀ aŋ màmànkùmɛ̀ŋ Ɛfesɔ̀ nyaŋ

¹⁷ Nààŋ wo Pɔɔ̀ naŋ hàì ko jawa gbeeì àŋ nyaaŋ Miletù wɔŋ juwoɔ̀ kɔɔ, wò naŋ tùɔ̀ŋ ke miè gbìaŋ koɓɛ̀ aŋ màmàŋkùmɛŋ nyàŋ wèè ke gbòò anyuùŋ hààwe nyàŋ ko Ɛfesɔ̀ wèè aŋ hnàŋ aŋ mɛɛ̀uŋ ko Miletù.

¹⁸ Nààŋ àŋ naŋ hàì ko nɛ̀ɛ̀uŋ niìŋ, wò naŋ nyiŋ woò wààŋ, “Nyɛ̀iŋ bi nàŋ nyìmàŋ e nɛ̀ɛŋ gbiŋ mìŋ naŋ nyɛ̀nɛ̀ŋ lɛ e teengaà yàwi nààŋ gbiŋ yààìŋ wa koɓɛ̀ guùŋ lɛ e hnaàŋ jiɛ̀jiɛ̀ mɛ̀ sùà ko Eesìà.

¹⁹ Aŋ Juùù nyaŋ zimgbe nyiŋ naŋ wa jɔ̀ maŋ gbùnu naanààŋ sùà weèim yèè àŋ naim nyɛ̀nɛ̀ŋ ka gòlà e kìlà aim jàà e keì nyìnga. Kɛɛ mìŋ naŋ tomo wèè wo Kanaà yèè mìŋ nauŋ jɔ̀ɔ̀lɔ̀ dìì.

²⁰ Miŋ gò wa gè màŋhɛɛ wèè kaiŋ woò ɔ̀ɔ̀ kaiŋ kaà màŋ gbooiŋ màŋ sùà, wèè è nɛ̀ɛŋ gbiŋ naŋ ɓɛ̀nɛ̀ŋ nɔ̀ŋ è kpùùmaŋ kò nɛ̀ɛ̀iŋ niìŋ lɛ.

²¹ Mìŋ naŋ wòò aŋ Juùù yèè anyùùŋ nyaŋ fè àŋ Juùù nyaŋ kɛ̀ aŋ fè maŋ tùwo naanààŋ nyiŋ màŋ jɛwɛ wèè aŋ kìlà koɓɛ̀ Dayài yèè aŋ kɛɛnɛ̀ŋ hààwe wo Kana wiɔ̀ Jisɛ̀ sùà.

²² Yèè mìŋ yaà naàŋ kɔ̀ɔ̀yɛ̀ ko Jùlusɛ̀làm, yèè miŋ nyimààŋ kɛ̀ kiìŋ nàŋ doim nàŋ kaaìŋ, kɛɛ mìŋ kuwa ka jɔ̀ɔ̀lɔ̀ wo Jìnàŋ wo Kanaà Dayà dìì yèè kao ka.

²³ Ko jawa gbee gbiŋ mìŋ kɔ̀à, wo Jìnàŋ Nɛɛmaàŋ kiɛ̀ìm e gòo kɛ̀ àŋ doim nàŋ gbìɛ̀ŋ ko sààŋ nyiwì yèè mìŋ do nàŋ nɔ̀ŋ e keì nyìnga dìì ko Jùlusɛ̀làm.

²⁴ Kɛɛ miŋ gò kpɛɛ̀ŋ kɛ̀ kiìŋ nàŋ do nàŋ kaaìŋ wɔ̀ŋ nyiiŋ miɔ̀ŋ, sèè nɔŋ mìŋ kpɛɛyɛ̀ e tòmoɛ̀ wo Kanaà Jisɛ̀ naim kiɛ̀ŋ wèè ka nyɛ̀nɛ̀ŋ lɛ. Yèè e tòmo lɛɛ̀ nàŋ yaà wèè ka wòò Ebò Siaàŋ e nyaàiŋ dè e tɛ̀ɛ̀tɛ̀ɛ̀ Dayàa.

²⁵ “Kà mààmè maŋ tàtaiŋ màŋ sùà, mìŋ yààìŋ wòò ebò siaàŋ nyaàiŋ dè e Kànà Dayàa, kɛɛ kà naàŋ nyìmàŋ kɛ̀ nyɛ̀iŋ nààŋ bà gbiŋ niŋ naàim wa nàwèè ɓɛìŋ yɛmɛ̀.

²⁶ Weètii mìŋ yààìŋ nàaŋ wòo sùà ke ɗɔɔ yɛɛ̀ kɛ̀ sèè nyɛ̀iŋ nààŋ nyùùŋ maŋ sɛ̀ìŋ miàŋ bi nyɛɛ̀ŋ bà gbiŋ naŋ go naŋ fòlà ke dòmàŋ Dayàa diɛŋ, e naàŋ ɓɛìŋ nɔ̀ŋ è kpàŋ è kɔɔim.

²⁷ Kàiŋ wòò e yèɛ gbiŋ wo Dayà manaŋ wèè naŋ nyìmàŋ lɛ.

²⁸ Weètii yɛ̀mɛìŋ nyɛ̀iŋ bi diɛŋ e kpùlìà anyùùŋ nyaŋ kinɛiŋ wo Jìnàŋ Nɛɛmaàŋ naŋ gbìɛ̀ŋ e gaàiŋ nɛ̀ dìì nyaŋ. Nɔ̀iŋ mààŋ anyuùŋ tùnìàŋ aŋ ɓaawaa wèè ke gbòò anyuùŋ hààwè Dayà nyaŋ. Nyiŋ nàŋ yaà aŋ yè nyaŋ wò naŋ jàà e ɓula wèè wuŋ bi e yìwìà maŋ sɛ̀ìŋ wo Jɔ̀àfèlàà wuŋ biɔ̀ sùà.

²⁹ Kà nyìmàŋ kɛ̀ sèè mìŋ kɔ̀à, anyuùŋ joo bà àŋ yaà mààŋ aŋ pɔ̀ɔ̀wɛ̀i do nàŋ hnè wèè aŋ gbùwà nyùùŋ nyaŋ yaà mààŋ aŋ ɓaawaa nyàŋ ke gùuŋ.

³⁰ Anyùùŋ nyɛ̀iŋ bi nyàŋ bà do nàŋ hnè aŋ wòò e tòa wèè kàìsa aŋ gè anyùùŋ màŋjɛ̀wɛ̀ Kanaà maŋ jiio sùà wèè aŋ kìlà wɔŋ faà nyiŋ nɔɔ̀ŋ.

³¹ Yɛ̀mɛìŋ nyɛ̀iŋ bi diɛŋ! Jàaìŋ jii kɛ̀ mìŋ naiŋ wa gbòò kɔɔ maŋ gɔɛɛ yèè e dùùm, mìŋ naŋ kɔ̀ e keì nyìnga dìì, yèè mìŋ naiŋ kaà wèè maŋ dòà taai.

³² “Mìŋ yààìŋ naàŋ gbìàŋ sùà e gààŋ Dayàa dìì wèè woiŋ yɛ̀mɛ̀ diɛŋ. Jàaìŋ jii, ke mìè gbìàŋ Dayàa e nyaàiŋ dè ke kpèè siauŋ nɛɛ̀ŋ ko nɛ̀ɛ̀iŋ niìŋ. Nààŋ nìŋ yaà anyùùŋ Dayà lɛ, ke miè gbìaŋ yɛɛ̀ doiŋ nàŋ kpuumò keiŋ kìɛ̀ŋ e keì sìàaŋ e yèɛ wo Dayà kuwa weèiŋ lɛ̀, e kìɛ̀ŋ guùŋ nɛ nɔŋ wò kuwa wèè anyunùuŋ nyàŋ gbiŋ lɛ̀.

³³ Ke ɗɔ̀ɔ̀ guùŋ miŋ gò nyɛ̀nɛ̀ŋ wànàŋ è kaiŋ fua, è gòoò ɔ̀ɔ̀ màŋ dèè e yìwìà wò nyùùŋ gbiŋ sìwè.

³⁴ Nyɛ̀iŋ bi nàŋ nyìmàŋ kɛ̀ mìŋ naŋ tomo nyìnga wèè ka nyɛ̀nɛ̀ŋ wɔŋ nyiiŋ gèe miɔ̀ŋ yàwi nààŋ dàwim nyàŋ.

³⁵ Kàiŋ tɔ̀ɔ̀ maŋ keì nyɛ̀nɛŋ màŋ gbiŋ sùà kɛ̀ sèè nìŋ tomàŋ nyìnga e ɗewe lɛɛ̀ sùà, nìŋ do nàŋ kpùùmò wo yèɔ yaà e zɔ̀kpɔ̀ sùà wɔ. Jàaìŋ jii, maŋ mìè maŋ wo Kanaà Jisɛ̀ wuŋ bi naŋ wa woò maŋ wààŋ, ‘E zɔlɔ̀ zimgbe doum nàŋ nɔ̀ŋ sèè mùŋ kiɛ̀ŋ wo nyùùŋ, e nìàŋ sèè wo nyùùŋ woum kiɛ̀ŋ.’ ”

³⁶ Nààŋ wo Pɔɔ̀ naŋ wa kpɛ̀ɛ̀yɛ̀ gbòa, wò naŋ dè maŋ gɛ̀ɛ̀ŋ dìì, yèè yaà nyiŋ naŋ zoolò.

³⁷ Aŋ gbiŋ naŋ wa gòlò ke nyowo sùà wèè wo Pɔɔ̀ nààŋ wò yaà nyiìŋ wa naàŋ jòà sùà wèè wo ka, yèè àŋ nauŋ kpuuwò yèè àŋ nauŋ diemè.

³⁸ Ke nyowoɛ̀ naŋ wa nyɛ̀nɛ̀ŋ aŋ gbiŋ esaɓù kɛ̀ wo Pɔɔ̀ naŋ nyiŋ wa woò wààŋ, “Niŋ naàim wa nàwèè ɓɛìŋ yɛmɛ̀.” Yèè aŋ gbiŋ nauŋ kɔ̀ɔ̀ koɓɛ̀ wɔŋ meeèɔ.