Nyɛ̀nɛ̀ŋ 17 - WƆŊ FƐ̀Ì EBÒ SÌÀŊ DAYÀA

Wo Pɔɔ̀ yèè wo Silà hàì ko Tɛsèlonikà

¹ Wo Pɔɔ̀ yèè wo Silà naŋ kɔ̀ɛ̀ ko Aŋfepolì yèè ko Àpolonìà yèè àŋ naŋ hàì ko Tɛsèlonikà. Ke Sààŋ Zòòlò aŋ Juùù yaà wa ko jawa gbee bì.

² Yèè wo Pɔɔ̀, màànààŋ nɔŋ wò nyɛnɛŋ lɛ̀, wò naŋ kɔ̀ ko sààŋ zòòlò aŋ Juùù nyaŋ wèè wo zoolò. E ɗɔ̀ɔ̀ taai maŋ Ɗɔ̀ɔ̀ Zòòlò aŋ Juùù nyaŋ diɛŋ wò naŋ gbòò koɓɛ̀ anyùùŋ nyaŋ e yìwìà e mìè nyààŋ wɔŋ fɛ̀ì Dayàa sùà,

³ wèè wo nyiŋ tɔɔ̀ kɛ̀ wo Kulaìɔ wo Dayà naŋ wa tàeɗùù wèè wo jòèyè e ɗuunyaàŋ wɔ kuwa wa wo kà e nimilà dìì yèè wo fà, e kìlà wo yèwà e fàa dìì wɔŋ nyiiŋ gèeo sùà. Wo Pɔɔ̀ naŋ nyiŋ woò wààŋ, “Wo Jisɛ̀ wɛɛ̀ mìŋ yààìŋ yaà wòò e kiiuŋ wɔ̀ nàŋ yaà wo Kulaìɔ wo Dayà naŋ tàeɗùù wèè wo joeyè anyùùŋ nyaŋ e ɗuunyaàŋ.”

⁴ Aŋ Juùù nyaŋ bà nyiŋ naŋ wa haawè yèè àŋ naŋ mààŋ wɔŋ fàà Pɔɔ̀ɔ yèè wo Silà. Eɓìèmàŋjɛ̀wɛ̀ nyiiŋ, anyuùŋ zimgbe aŋ Guliì nyuuŋ nyàŋ sùà yèè aŋ jɔùŋ ɓììɓìì nyaŋ zoolà Dayà nyaŋ naŋ mààŋ wɔŋ faà nyiŋ nɔɔ̀ŋ nyiŋ pɛɛ.

⁵ Kɛɛ aŋ Juùù nyaŋ bà nyiŋ yaà wa gììyè le koo wèè e keì lɛɛ̀, yèè àŋ naŋ gbònò anyùùŋ maŋ tùwo naanààŋ e yìwìà maŋ dòmaŋ màŋ diɛŋ wèè aŋ dàà e gbɔ̀ɔɔ yèè ke gbòà ko jawa gbeeì. Anyùùŋ nyɛɛ̀ŋ manaŋ wa aŋ hìàŋ wo Pɔɔ̀ yèè wo Silà koɓɛ̀ e faaàŋ, yèè àŋ naŋ dùɔ̀ŋ aŋ kà ko gbòò wo felaa bà àŋ nyaaŋ Jasììŋ ko kààmè wo Pɔɔ̀ yèè wo Silà, wèè aŋ fulià nyiŋ koɓɛ̀ e faaàŋ.

⁶ Kɛɛ nààŋ aŋ gò nyiŋ noo wa mɛɛ̀ŋ, àŋ naŋ kùwò wo Jasììŋ yèè anyuùŋ hààwe nyàŋ bà yèè àŋ naŋ nyiŋ kɔ̀ɔ̀ koɓɛ̀ anyùùŋ gbèègbèè ko Luùm nyaŋ ko jawa gbeeì yèè àŋ naŋ kpààŋ sɛiŋ nyààŋ, “Aŋ felaa nyɛɛ̀ŋ sèèlè anyùùŋ fuɔŋ nyàŋ gbiŋ fùùŋ e ɗuunyaàŋ. Tiŋ tɛɛ̀ àŋ hnàŋ ko jawa wiì,

⁷ yèè wo Jasììŋ wò nyiŋ jàà kùàŋ dìì ko gboouŋ noo. Yèè aŋ gbiŋ kòò àŋ yaà pɔ̀ɔ̀ sùà maŋ sàwà Siisɔ̀ maŋ, wo Kànà Gbèè wɔŋ fùɔ̀ŋ anyùùŋ Luùm nyaŋ, àŋ yaà woo nyààŋ wo kana bà kòò wò yào ɓɛìŋ àŋ nyaaŋ wo Jisɛ̀.”

⁸ Nààŋ anyùùŋ nyaŋ yèè anyuùŋ gbeegbèè nyaŋ ko jawa gbeeì naŋ tɛɛ̀ kòmò, àŋ naŋ wa tuù e mààŋ nyààŋ.

⁹ Aŋ kana nyàŋ naŋ wa kùwò wo Jasììŋ yaà aŋ dàwiuŋ nyàŋ yèè aŋ naŋ nyiŋ nyɛ̀nɛ̀ŋ aŋ pààwà e nɛɛnɛɛ̀ŋ àŋ naŋ nyiŋ tɔɔ̀ lɛ, yèè àŋ naŋ nyiŋ dangè àŋ naŋ kɔ̀.

Anyuùŋ hààwe nyàŋ nàŋ tùàŋ wo Pɔɔ̀ yèè Silà ko Bɛ̀lià

¹⁰ Wɔŋ dùùm guùŋ wiiŋ anyuùŋ hààwe nyàŋ naŋ tùɔ̀ŋ wo Pɔɔ̀ yaà wo Silà ko Bɛ̀lià. Yèè nààŋ àŋ nao haì, àŋ naŋ kɔ̀ ko sààŋ zòòlò aŋ Juùù nyaŋ.

¹¹ Anyùùŋ nyaŋ ko Bɛ̀lià naŋ wa jàà ke miè gbìaàŋ kùàŋ dìì e nìàŋ anyùùŋ nyaŋ ko Tɛsèlonikà. Wɔŋ niìsìa gbiŋ àŋ hewa gbèè wɔŋ fɛ̀ì Dayàa wèè aŋ nyɛ̀nɛ̀ŋ maŋ nɔnɔŋ tùaŋ sèè mààŋ e yèɛ wo Pɔɔ̀ naŋ woò lɛ è yaà tɔɔɓaa.

¹² Aŋ zimgbe nyiŋ naŋ wa sìè e hààwe nyiŋ nɛ̀ wo Kanaà sùà, e hààwè aŋ Guliì nyuuŋ ɓììɓìì nyaŋ bà, aŋ jɔùŋ yèè felaa.

¹³ Kɛɛ nààŋ aŋ Juùù nyaŋ ko Tɛsèlonikà naŋ wa kòmò kɛ̀ wo Pɔɔ̀ naŋ wa gbòò ke mìè Dayàa ko Bɛ̀lià kuŋ pɛɛ, àŋ nao wa hnè wèè aŋ tooyà e nimilàa wo Pɔɔ̀ yèè wo Silà yaà wa kɔ̀ɔ̀yɛ̀ dìì tɛ lɛ̀.

¹⁴ Ko fɛɛ̀feìŋ anyuùŋ hààwe nyàŋ naŋ tùɔ̀ŋ wo Pɔɔ̀ wɔŋ juwoɔ̀ kɔɔ, kɛɛ wo Silà yaà wo Timetè naŋ wa jòò ko Bɛ̀lià.

¹⁵ Anyùùŋ nyaŋ naŋ wa dè wo Pɔɔ̀ maŋjɛ̀wɛ nyàŋ nauŋ wa kɔɔ̀ auŋ hàlèè ko Atɛ̀ìŋ. Anyùùŋ nyɛɛ̀ŋ naŋ wa kɛ̀lɛ̀ɛ̀ ke miè gbìaŋ e yìwìà wo Pɔɔ̀ sìwè wèè koɓɛ̀ wo Timetèi yèè wo Silà, wààŋ aŋ ka koɓɛ̀i wò yaà lɛ.

Wo Pɔɔ̀ naŋ gbòò koɓɛ̀ anyùùŋ nyaŋ ko Atɛ̀ìŋ

¹⁶ E teengaà wo Pɔɔ̀ yaà wa fùlìè wo Silà yèè wo Timetè ko Atɛ̀ìŋ lɛ, wɔŋ nyììŋ jinàuŋ nɔɔ̀ŋ naŋ wa mɔɔnɛ̀ŋ nààŋ wò naŋ yɛ̀mɛ̀ e ɗeweɛ̀ aŋ dayà joo nyàŋ naŋ wa dìè ko jawa gbeeì lɛ.

¹⁷ Wò naŋ wa kɔ̀ ko sààŋ zòòlò aŋ Juùù nyaŋ wèè wo gbòà ke mìè Dayàa koɓɛ̀ wo nyùùŋ nyaŋ nààŋ fè àŋ Juùù nyaŋ yèè aŋ Juùù nyaŋ yè nyaŋ yaà nyiŋ zoolà koɓɛ̀ guùŋ nyaŋ. Ke ɗɔɔ gbiŋ wò hewa gbòà koɓɛ̀ anyuùŋ mààŋ dòmaŋ nyàŋ kɔɔ aŋ yè nyaŋ wò mɛɛ̀ŋ wa e bòliɛ̀ sùà nyaŋ.

¹⁸ Maŋ gbòò anyuùŋ tɔ̀ɔ̀ fɛi bà aŋ nyaaŋ Ɛpekuliɛ̀ŋ yèè Sutɔ̀ naŋ hnè yèè yaà nyiŋ naŋ tɔ̀ɔ̀tù kpàànè kpaane. Anyùùŋ bà yaà wa daawe nyààŋ, “Ɓòò nàŋ yaà wo nyuùŋ gò nyìmàŋ keì fèemàŋ wɛɛ̀, yèè kiìŋ wò manaŋ wo wòò?” Aŋ bà nyiŋ naŋ woò nyààŋ, “È yaà mààŋ wo Pɔɔ̀ wò yaà wòò e kèè aŋ dàyà fuɔŋ joo bà, Tii naŋ tɔɔ̀ kɛ̀ wò yaà wa wòò e kèè wo Jisɛ̀ yèè anyùùŋ nyaŋ do nàŋ yèwè e fàaà dìì nyaŋ.”

¹⁹ Kpeiŋ àŋ naŋ kùwò wo Pɔɔ̀ yèè àŋ nauŋ hìɛ̀ŋ koɓɛ̀ ke gbòò aŋ màmàŋkùmɛŋ nyàŋ àŋ nyaaŋ Aliopagɔ̀. Àŋ nauŋ woò nyààŋ, “Wòò wi kɛ̀ kiìŋ e kàa jɛium lɛɛ̀ naŋ fasàì.

²⁰ Èiŋ kòmàŋ màŋ wòò maŋ keì bà maŋ yè maŋ kòò è kòmòìŋ wa màŋ, yèè è manaŋ eiŋ nyìmàŋ e fàsai miŋ nɛ̀.”

²¹ Eɓìèmàŋjɛ̀wɛ̀ e keì ɗewe gbiŋ, aŋ jɔ̀à kùmìàŋ ko Atɛ̀ìŋ nyaŋ yèè aŋ nyùùnèènyɛiŋ nyàŋ joào nyàŋ manaŋ e keì jɛ̀ì kòmaŋ yèè aŋ wòò kii niŋ.

²² Wo Pɔɔ̀ naŋ sìè aŋ màmànkùmɛ̀ŋ Aliopagɔ̀ nyaŋ feìŋ yèè wò naŋ wòò anyùùŋ nyaŋ wààŋ, “Nyùùŋ nyaŋ ko Atɛ̀ìŋ, mìŋ naŋ yɛmɛ̀ kɛ̀ nìŋ kuwa maŋ ɗèwè kìì zòòlo zimgbe.

²³ Yèè nààŋ mìŋ yaà weè kààìŋ ko jawa gbeeiŋ niìŋ yèè mìŋ yaà yɛ̀ɛ̀mɛ̀ manɛ̀ŋ maŋ nìŋ zoolà maŋ, mìŋ naŋ mɛ̀ɛ̀ŋ wɔŋ gbɛ̀gbɛ̀ zòòlo maŋ mìè mɛɛ̀ŋ sìngìà wuùŋ wààŋ, ‘Koɓɛ̀ wo Dayàa e nyimàiŋ wɔ.’ Nìŋ zoolà wo Dayà wɛɛ̀, kɛɛ niŋ nyimààŋ wuùŋ ngèè gbiŋ. Weètii mìŋ manaŋ kaiŋ wòò e kiiuŋ nɛ̀.

²⁴ Wo Dayàa naŋ bànè e ɗuunyaàŋ yèè manɛ̀ŋ maŋ gbiŋ yàà niìŋ sùà lɛ, wo yèɔ yaà wo Kana wèè ko àìjɛnɛ̀ŋ yèè e ɗuunyaàŋ wɔ, wo fè jòò màŋ saaŋ zòòlò Dayà maŋ dìì maŋ yè maŋ kùàŋ nyuùŋkpùuŋ naŋ nyɛ̀lɛ̀ maŋ.

²⁵ Wo kuwà è wànàŋ nɛ̀ŋ gbiŋ e yìwìà wò nyùùŋ gbiŋ sìwè. Wò nyɛnɛŋ anyùùŋ nyaŋ gbiŋ aŋ nɔ̀ŋ wɔŋ nyiiŋ gèeo sùà yèè aŋ gè nyiiŋ, wò kiɛ̀ŋ nyiìŋ manɛ̀ŋ maŋ gbiŋ àŋ manaŋ màŋ.

²⁶ E yìwìà wo nyùùŋ guùŋ sùà wo Dayà naŋ bànè anyùùŋ kpùuŋ nyàŋ e ɗuunyaàŋ, yèè wò naŋ wa ɗewè kɛ̀ kiìŋ è teenga yèè kòò anyuùŋ kpùuŋ gbiŋ do nàŋ nɔ̀ŋ.

²⁷ Wo Dayà naŋ wi wa banè wèè kɛ̀, e dè ke dòmauŋ nɛɛ̀ŋ diɛŋ yèè e mɛɛ̀uŋ maŋ nyiiŋ gèe wi màŋ sùà. Kòò wò yàà wi kɔɔ fɔ̀ɔ̀,

²⁸ yèè nààŋ wo nyùùŋ bà naŋ woò lɛ, ‘Wò naŋ wi kìɛ̀ŋ gààŋ wèè eiŋ nɔ̀ŋ wɔŋ nyiiŋ gèeɔ̀ sùà, wèè eiŋ kaàiŋ, yèè eiŋ nɔ̀ŋ anyùùŋ nyaŋ è yààìŋ nyaŋ.’ Màànààŋ nɔŋ anyuùŋ nyìmàŋ fɛi nyiŋ nyàŋ bà naŋ woò lɛ, ‘Yàwi nàŋ yaà aŋ jɔ̀àuŋ nyàŋ.’

²⁹ Nààŋ è yààìŋ aŋ jɔ̀à Dayà lɛ, ɓɔ̀ è gongòiŋ kɛ̀ è nɔ̀ŋ kiiuŋ nɛ̀ è yaà e nɛ̀ŋ gbiŋ mààŋ wo dayà jooɔ̀ wo yèɔ àŋ naŋ bàànè è gòoò, ɔ̀ɔ̀ è kaiŋfua ɔ̀ɔ̀ kè dùò wɔ. Wo fè mààŋ è nɛ̀ŋ gbiŋ è yèɛ wò nyuùŋkpùuŋ naŋ gongò kɛ̀ è kuwa e nɔ̀ŋ yèè wò naŋ banè lɛ.

³⁰ E teenga gɔuɛ̀ sùà, wo Dayà naŋ wa jùùyè anyùùŋ nyaŋ gbiŋ hakɛ̀ wèè tɛɛ̀, esaɓù kɛ̀ aŋ nyimààŋ wa kɛ̀ kiìŋ àŋ yaà wa nyinie. Kɛɛ wò naŋ naàŋ woò sààmɛ kɛ̀ wo nyùùŋ gbiŋ yèè koɓɛ̀ gbiŋ aŋ dangè maŋ tùwo naanààŋ nyiŋ màŋ yèè aŋ kìlà ko nɛ̀ɛ̀uŋ niìŋ.

³¹ Wò jàà ke ɗɔɔ e ɓula wèè wo gbàì anyùùŋ nyaŋ gbiŋ e ɗuunyaàŋ e tɔ̀ɔ̀nyaàŋ sùà. Yèè wò naŋ tà wo Jisɛ̀ ke ɗùù wèè wo gbaì anyùùŋ nyaŋ weèuŋ. Wo Dayà wò wi kìɛ̀ŋ e tɔ̀ɔ̀nyààŋ e keì lɛɛ̀ yàwi nààŋ gbiŋ nààŋ wò naŋ gè wo Jisɛ̀ e fàa dìì.”

³² Anyùùŋ nyaŋ bà nyiŋ naŋ tɔ̀ɔ̀tù hìle nààŋ àŋ naŋ kòmò wo Pɔɔ̀ naŋ woò wààŋ wo Dayà naŋ gè wo nyùùŋ e fàa dìì. Kɛɛ aŋ bà nyiŋ naŋ woò nyààŋ, “È manaŋ maŋ wi ɓɛìŋ wòò e keì lɛɛ̀ e teenga joo bà sùà.”

³³ Nààŋ wo Pɔɔ̀ naŋ fòlò e dèènè aŋ màmàŋkùmɛŋ nyàŋ sùà,

³⁴ anyùùŋ nyaŋ bà nyiŋ naŋ wa hààwè wo Kanaà yèè aŋ naŋ dè wo Pɔɔ̀ maŋjɛ̀wɛ. Wo bà guùŋ nàŋ yaà wa wo felaaà àŋ nyaaŋ wo Dieninsɔ̀, wo màmàŋkùmɛɔ̀ŋ bà guùŋ, yèè wo nìe bà àŋ nyaaŋ wo Dàmalì yèè aŋ zimgbe nyiŋ naŋ wa kìlè koɓɛ̀ wo Kanaà e hààwe sùà.