Luùm 4 - WƆŊ FƐ̀Ì EBÒ SÌÀŊ DAYÀA

E tɔ̀ɔ̀màŋseìɛ wo Eɓulɔhɛɛ̀ŋ naŋ wa tɔɔ̀ lɛ

¹ Sèè è nɔ̀ŋ yɛi, kɛ̀ kiìŋ è naiŋ ɓɛ̀nɛ̀ŋ wòo wèè wo nèwàènèwe wiɔ̀ Eɓulɔhɛɛ̀ŋ e nyaàiŋ dè e yèɛ wuŋ bi naŋ wa nyɛ̀nɛ̀ŋ lɛ? Kiìŋ wò naŋ wa nyìmè e jiikɛ̀ɛuŋ nɛ̀ sùà?

² Sèè wo Dayà wa weè jàà wo Eɓulɔhɛɛ̀ŋ kùàŋ dìì wèè wo nɔ̀ŋ wo nyùùŋ tɔ̀ɔ̀nyaàŋ esàɓù e tòmoɛ̀ wò naŋ wa nyɛ̀nɛ̀ŋ lɛ, kɛ̀ wò ɓɛ̀nɛ̀ŋ kɛ̀ɛ̀ maŋ nyòngà anyùùŋ fɛɛ̀feìŋ wèè e tòmoɛ̀ wò naŋ nyɛ̀nɛ̀ŋ lɛ. Kɛɛ wò fè ɓɛ̀nɛ̀ŋ kɛ̀ɛ̀ màŋ nyòngà wò Dayà fɛɛ̀feìŋ.

³ Jàaìŋ jii kɛ̀, wɔŋ fɛ̀ì Dayàa naŋ woò wààŋ, “Wo Eɓulɔhɛɛ̀ŋ naŋ wa hààwè Dayà, yèè wèè esaɓù lii wo Dayà nauŋ wa jàà kùàŋ dìì wèè wo nɔ̀ŋ wo nyùùŋ tɔ̀ɔ̀nyaàŋ.”

⁴ Wo nyùnɔ̀ɔŋ nyɛnɛŋ e tòmo wɔ̀ àŋ paawàuŋ e nɛɛnɛŋ, kɛɛ e nɛɛnɛŋ bi fè è keì sìàŋ àŋ douŋ nyiniàŋ. E nɛɛnɛŋ le wò naŋ yɛmɛ̀ wèè e tòmoɛ̀ wò naŋ nyɛ̀nɛ̀ŋ lɛ.

⁵ Kɛɛ nyìmèè wiìŋ wèè wo nyùnɔ̀ɔŋ kuwa hààwe wo Dayà sùà wɔ eɓìèmàŋjɛ̀wɛ̀ manɛ̀ŋ nyɛ̀nɛuŋ màŋ. Kpeiŋ wo Dayà do nàŋ yɛ̀mɛ̀ e tɔ̀ɔ̀nyaàaŋ e hààweuŋ nɛ̀ sùà, kɛ̀ wò wòò wo nyùùŋ maŋ tùwò naanààŋ wɛɛ̀ wààŋ e keì fòùm. E hààwe lɛɛ̀ tiŋ wo Dayà jaa kùàŋ dìì wèè wo hìàŋ anyùùŋ koɓɛ̀ wuŋ biì.

⁶ Wɔŋ fɛ̀ì Dayàa sùà wo Dèèwe naŋ wòò è kèè e zɔlɔ̀ɛ hnàŋ koɓɛ̀ wo nyùnɔ̀ɔŋ wo Dayà naŋ jàà kùàŋ dìì wèè wo nɔ̀ŋ wo nyùùŋ tɔ̀ɔ̀nyaàŋ wɔ, eɓìèmàŋjɛ̀wɛ̀ e nɛ̀ŋ gbiŋ e yèɛ wo nyùùŋ wii nyɛnɛŋ lɛ̀.

⁷ “E zɔlɔ̀ yaà anyùùŋ nyaŋ wo Dayà naŋ jùùyè hakɛ̀ wèè maŋ kpèè naanààŋ nyiŋ màŋ, yèè aŋ yè nyaŋ wò naŋ jùùyè hakɛ̀ wèè maŋ jùumù nyiŋ màŋ nyaŋ!

⁸ E zɔlɔ̀ yaà wo nyùnɔ̀ɔŋ wò yèɔ wo Dayà naàŋ jàà màŋ jùumùuŋ màŋ jii gbiŋ wɔ̀!”

⁹ E zɔlɔ̀ lɛɛ̀ wo Dèèwe naŋ yaà wòò kii niŋ lɛ̀, è yaà nɔŋ wèè anyùùŋ nyaŋ àŋ naŋ jàà kpùa nyàŋ? Kpele! E fè yɛi. È yaà wèè anyùùŋ nyaŋ pɛɛ aŋ gò jàà kpùa nyàŋ. Esaɓù kɛ̀ wɔŋ fɛ̀ì Dayàa naŋ woò wààŋ, “Wo Eɓulɔhɛɛ̀ŋ naŋ wa hààwè Dayà, yèè wèè esaɓù lii wo Dayà nauŋ wa jàà kùàŋ dìì wèè wo nɔ̀ŋ wo nyùùŋ tɔ̀ɔ̀nyaàŋ.”

¹⁰ Kiìŋ è teenga tɛɛ̀ naŋ wa kaaìŋ? È naŋ wa kaaìŋ paŋgàà àŋ naŋ wa jàà wo Eɓulɔhɛɛ̀ŋ kpùa? Ɔ̀ɔ̀ e yìwìà e teengaà àŋ nauŋ wa naàŋ jàà kpùa tɛ lɛ̀? Tɛɛ̀ naŋ wa kaaìŋ e yìwìà e teengaà kòò àŋ jàà wa wò Eɓulɔhɛɛ̀ŋ kpùa lɛ̀.

¹¹ Wo Dayà naŋ wa jàà wo Eɓulɔhɛɛ̀ŋ kùàŋ dìì paŋgàà wò naŋ wa nɔ̀ŋ kpùà jààuŋ. Ke kpùà jààuŋ nɛɛ̀ŋ naŋ wa tɔ̀ɔ̀ e tɔ̀ɔ̀màŋsèì keì ɔ̀ɔ̀ e fee kɛ̀ wo Dayà nauŋ wa jàà kùàŋ dìì wèè wo nɔ̀ŋ wo nyùùŋ tɔ̀ɔ̀nyaàŋ esàɓù hààweɛ̀ wò kuwa wo Dayà sùà lɛ. Tɛɛ̀ naŋ nyɛ̀nɛ̀ŋ wo Eɓulɔhɛɛ̀ŋ naŋ nɔ̀ŋ wo dèdaà wèè anyùùŋ nyaŋ naŋ hààwè Dayà nyaŋ, e kìlà wo Dayà naŋ nyiŋ jàà kùàŋ dìì wèè aŋ nɔ̀ŋ anyùùŋ tɔ̀ɔ̀nyaàŋ, jòòpɛɛ aŋ fè kpùà jàa nyiŋ.

¹² Tɛɛ̀ naŋ ɓɛìŋ nyɛ̀nɛ̀ŋ wo Eɓulɔhɛɛ̀ŋ naŋ nɔ̀ŋ wo dèdà aŋ yè nyaŋ kinɛiŋ àŋ naŋ jàà kpùa nyàŋ, yèè aŋ naŋ hààwè Dayà, màànààŋ wo Eɓulɔhɛɛ̀ŋ naŋ wa nyɛ̀nɛ̀ŋ paŋgàà wò naŋ wa nɔ̀ŋ kpùà jààuŋ lɛ̀.

E ɗààhìì Dayàa è yaà wèè anyùùŋ nyaŋ gbiŋ kuwa hààwe nyàŋ

¹³ Wo Dayà naŋ wa jɔ̀ɔ̀ e ɗààhiì koɓɛ̀ Eɓulɔhɛɛ̀iŋ yaà aŋ jɔ̀ɛ̀ɛ̀jɔ̀ɛɛuŋ nyàŋ kɛ̀ wò do nyiŋ wa nàŋ kìɛ̀ŋ e ɗuunyaàŋ wèè e nɔ̀ŋ e nɛ̀ŋ èdàà nyiŋ. Wo Dayà gò wa jɔ̀àà è ɗààhiì lɛɛ̀ esaɓù kɛ̀ wò Eɓulɔhɛɛ̀ŋ naŋ wa jɔ̀ɔ̀lɔ̀ màŋ Sàwà Dayà maŋ dìì, kɛɛ esàɓù e hààweuŋ nɛ̀ wo Dayà nauŋ wa jàà kùàŋ dìì wèè wo nɔ̀ŋ wo nyùùŋ tɔ̀ɔ̀nyaàŋ.

¹⁴ Sèè e yèɛ wo Dayà naŋ weè jɔ̀ɔ̀ e ɗààhiì wèè wo kiɛ̀ŋ lɛ e weè nɔ̀ŋ kìɛŋ niŋ koɓɛ̀ anyùùŋ nyaŋ nɔŋ jɔɔlɔ̀ maŋ Sàwà Dayà maŋ dìì nyaŋ, kɛ̀ e hààwe yaà wèè foo, yèè e ɗààhìì Dayàa naàŋ weè kɛ̀ɛ̀nɛ̀ŋ gààŋ.

¹⁵ Wo Dayà tuù sèè wo nyùùŋ pɔɔ̀ ke Sàwàuŋ nɛɛ̀ŋ. Kɛɛ koɓɛ̀i ke sàwà ke fè lɛ, wo nyùùŋ fè nyiŋ ɓɛ̀nɛ̀ŋ pɔ̀ɔ.

¹⁶ Weètii esàɓù e hààweɛ̀ è kùwàìŋ wo Dayà sùà lɛ, è doiŋ nàŋ yɛ̀mɛ̀ e nɛ̀ɛŋ wò naŋ jɔ̀ɔ̀ ɗààhiì wèè wo wi kiɛ̀ŋ lɛ. Wèè esaɓù lɛɛ̀, wo naŋ jɔ̀ɔ̀ ɗààhiì wèè wo niŋ kìɛ̀ŋ ke kpòò Eɓulɔhɛɛ̀ŋ gbiŋ wèè foo, e ɗààhiì lɛɛ̀ fè nɔŋ wèè ànyùùŋ nyaŋ jɔɔlɔ̀ màŋ Sàwà Dayà maŋ dìì nyaŋ, kɛɛ è yaà wèè anyùùŋ nyaŋ pɛɛ kuwa hààwe màànààŋ wo Eɓulɔhɛɛ̀ŋ kuwa wa lɛ̀. Wo Eɓulɔhɛɛ̀ŋ naŋ yaà wo dèdà anyùùŋ nyaŋ gbiŋ.

¹⁷ Wɔŋ fɛ̀ì Dayàa naŋ woò wààŋ, wo Dayà naŋ nyɛ̀nɛ̀ŋ wo Eɓulɔhɛɛ̀ŋ wo nèwàènèwe wèè anyuùŋ zimgbe maŋ fuɔŋ màŋ sùà. Wo Dayà naŋ wa jɔ̀ɔ̀ e ɗààhiì lɛɛ̀ koɓɛ̀ Eɓulɔhɛɛ̀iŋ esàɓù e hààweɛ̀ wò kuwa wo Dayà sùà lɛ, wo yèɔ naŋ gè anyuùŋ fàa nyàŋ dìì wo nyiŋ kìɛ̀ŋ wɔŋ nyiiŋ gèe, yèè wò naŋ bànè manɛ̀ŋ maŋ yè maŋ fè wa màŋ.

¹⁸ Wo Eɓulɔhɛɛ̀ŋ kuwa e hààwe yèè ke jii tùlia, sèè pɛɛ wò go wa kɛ̀ɛ̀nɛ̀ŋ esaɓù bà wèè wo niŋ tùlìà jii, wo Eɓulɔhɛɛ̀ŋ kuwa wa nɔŋ e hààwe wo Dayà sùà yèè wò naŋ nɔ̀ŋ wo nèwàènèwè anyùùŋ maŋ fuɔŋ zimgbe. Wɔŋ fɛ̀ì Dayàa naŋ woò wààŋ, “Ke kpoo mɔɛ̀ŋ do nàŋ gàŋ mààŋ maŋ ɗu màŋ.”

¹⁹ Wo Eɓulɔɛɛ̀ŋ yaà wa naàŋ ebɛ̀ŋ maŋ doa hɔ̀nɔ̀ɔ̀ guùŋ. Kɛɛ e zɔ̀kpɔ̀ gòuŋ wa nyɛ̀nɛ̀ŋ wèè è hààweuŋ nɛ̀, jòòpɛɛ wò naŋ wa gongò koɓɛ̀ wuŋ biì kɛ̀ ke kpùnauŋ nɛɛ̀ŋ yaà wa naàŋ ebɛ̀ŋ fàa nyiŋ yèè wo jawèuŋ nɔɔ̀ŋ Sèèla fè wa wò jɔùŋ kòmaŋ.

²⁰ Wo Eɓulɔhɛɛ̀ŋ gò wa fè è hààweiŋ nɛ̀ jɛwɛ, yèè wo gò wa sikà wèè wo hààwè è yèɛ wo Dayà naŋ wa jɔ̀ɔ̀ ɗààhiì kɛ̀ wò do nàŋ nyɛ̀nɛ̀ŋ lɛ. E hààweuŋ nɛ̀ nauŋ wa kìɛ̀ŋ gààŋ, yèè wò naŋ tɛ̀nɛ̀ŋ wo Dayà e jòòwo gbee sùà.

²¹ Wo Eɓulɔhɛɛ̀ŋ kuwa wa e hààwe sɛmɛ kɛ̀ wo Dayà do nàŋ nyɛ̀nɛ̀ŋ e yèɛ wò naŋ jɔ̀ɔ̀ ɗààhiì wèè wo nyɛ̀nɛ̀ŋ lɛ.

²² Esaɓùɛ lii wo Dayà naŋ wa jàà wo Eɓulɔhɛɛ̀ŋ kùàŋ dìì wèè wo nɔ̀ŋ wo nyùùŋ tɔ̀ɔ̀nyaàŋ e yìwìà e hààweuŋ nɛ̀ sùà koɓɛ̀ Dayài.

²³ Maŋ mìè gbòa màŋ wɔŋ fɛ̀ì Dayàa sùà naŋ woò wààŋ, “Wo Dayà naŋ wa jàà wo Eɓulɔhɛɛ̀ŋ kùàŋ dìì wèè wo nɔ̀ŋ wo nyùùŋ tɔ̀ɔ̀nyaàŋ,” maŋ gò wa nɔ̀ŋ sìnga miŋ wèè wò Eɓulɔhɛɛ̀ŋ wuŋ guùŋ kpò nɔŋ.

²⁴ Maŋ keì mɛɛ̀ŋ naŋ wa nɔ̀ŋ sìnga miŋ wèè yàwi, nààŋ wo Dayà do nàŋ jàà kùàŋ dìì wèè eiŋ nɔ̀ŋ anyùùŋ tɔ̀ɔ̀nyaàŋ, aŋ yè nyaŋ naŋ haawè kɛ̀ wuŋ naŋ gè wo Kana wiɔ̀ Jisɛ̀ e fàaà dìì.

²⁵ Wèè esàɓù maŋ jùumù wi màŋ, wo Dayà naŋ wa kìɛ̀ŋ wo Jisɛ̀ koɓɛ̀ anyuùŋ naanààŋ wèè auŋ jìwà, yèè wò nauŋ gè e fàaà dìì wɔŋ nyiiŋ gèeo sùà, wèè e nyɛ̀nɛ̀ŋ wo Dayà wo wi jàà kùàŋ dìì wèè eiŋ nɔ̀ŋ anyùùŋ tɔ̀ɔ̀nyaàŋ.