Luùm 2 - WƆŊ FƐ̀Ì EBÒ SÌÀŊ DAYÀA

E kìtì Dayàa è yaà tɔ̀ɔ̀nyaàŋ

¹ Nyɛ̀iŋ nààŋ bà nyiŋ nìŋ haà aŋ dàwiiŋ nyàŋ e kiti diɛŋ wèè e keì naanààŋ nyɛ̀nɛŋ. Kɛɛ niŋ kuwà kè kàfaì bà gbiŋ, wo Dayà gò kpɛɛ̀ŋ kɛ̀ ɓòò nàŋ yààùm. Sèè nìŋ gbaì aŋ dàwiiŋ nyàŋ, kɛ̀ nàŋ hàà e kiti nyɛ̀iŋ bi diɛŋ, esaɓù kɛ̀ è yaà e keì jèeiŋ e fèfoo nìŋ nyɛnɛŋ maŋ kèì guùŋ bi.

² Èiŋ nyìmàŋ kɛ̀ wo Dayà nyɛnɛŋ e tɔ̀ɔ̀nyaàŋ sèè wò gbaì anyùùŋ nyaŋ nyɛnɛŋ maŋ keì mààŋ mɛɛ̀ŋ nyaŋ.

³ Weètii, nyɛ̀iŋ nyàŋ nìŋ woà nààŋ wo Dayà nìmìlà anyùùŋ nyaŋ nyɛnɛŋ maŋ keì naanààŋ nyaŋ, nìŋ naŋ kai gongò kɛ̀ nìŋ do nàŋ dùɔ̀ŋ naŋ fòlà e kèì nyìngà Dayàa dìì, nààŋ nyɛ̀iŋ pɛɛ nìŋ nyɛnɛŋ maŋ kèì guùŋ maŋ nìŋ haà anyùùŋ nyɛɛ̀ŋ kiti diɛŋ wèè maŋ keì naanààŋ maŋ àŋ naŋ nyɛ̀nɛ̀ŋ maŋ?

⁴ Tɔɔɓaa ɓɔ̀ nìŋ woò nààŋ wò Dayà yaà nyìnìè e keì sìàŋ gbee weè wi, weètii e kuwàìŋ èsaɓù bà wèè eiŋ fè màŋ tùwo naanààŋ wi màŋ jɛwɛ. Nyìmaìŋ kɛ̀ wo Dayà yààìŋ nyinie tɛ̀ɛ̀ e kìlà wò yààìŋ tɔ̀ɔ̀ sùà e mànaŋ, wèè woiŋ kìɛ̀ŋ jii nyingè naŋ fè maŋ tùwo naanààiŋ màŋ jɛwɛ yèè naŋ kìlà ko nɛ̀ɛ̀uŋ niìŋ.

⁵ Kɛɛ nìŋ naŋ nyìngè maŋ jii e kìlà nìŋ naŋ gè maŋhɛɛ wèè naŋ fè maŋ tùwo naanààiŋ màŋ jɛwɛ naŋ kìlà koɓɛ̀ Dayài. Kòò nìŋ yaà tòòyà sùà e kèì nyìngà nyɛ̀iŋ biɛ̀ wèè ke ɗɔɔ yii wa nàwèè nààŋ wo Dayà do nàŋ tuù e kìlà wo gbàì anyùùŋ nyaŋ gbiŋ e ɗuunyaàŋ e tɔ̀ɔ̀nyaàŋ sùà.

⁶ Wo Dayà do wi nàŋ kìɛ̀ŋ e jìwààjɛ̀wɛ̀ e yèɛ naŋ wi tɛɛwɛ̀ wèè e tòmoɛ̀ yàwi nyɛɛ̀ŋ bà gbiŋ è naiŋ nyɛ̀nɛ̀ŋ lɛ.

⁷ Wo Dayà do nàŋ kìɛ̀ŋ wɔŋ nyiiŋ gèe gò jùà koɓɛ̀ anyùùŋ nyaŋ gbiŋ naŋ kùwò maŋ jii wèè e tɛ̀ɛ̀tɛ̀ɛ̀ɛ àŋ naŋ nyɛ̀nɛ̀ŋ lɛ. Àŋ do nàŋ yɛ̀mɛ̀ e jòòwo, e ɓɛ̀ɛ̀jàa, e keì sìàŋ yaà wɔŋ nyiiŋ gèe wèè julɔfɔ.

⁸ Anyùùŋ nyaŋ bà nyiŋ manaŋ nɔŋ nyiŋ bi e kìlà àŋ gè maŋhɛɛ wèè aŋ jàà e tɔ̀ɔ̀nyaàaŋ wo Dayà naŋ woò lɛ kùàŋ dìì. Àŋ nyɛnɛŋ maŋ keì maŋ wo Dayà naŋ woò wààŋ maŋ fè tɛɛ maŋ. Wo Dayà do nyiŋ nàŋ tùù sìwè e kìlà wò do nyiŋ nàŋ dèèyè keì nyìnga diɛŋ.

⁹ Wo Dayà do nàŋ dèèyè e keì nyìnga yaà e nimilà anyuùŋ nyɛ̀nɛ̀ŋ maŋ kpèè naanààŋ nyaŋ gbiŋ diɛŋ maŋ nyiiŋ gèe nyiŋ màŋ sùà. Tɔɔɓaa è do nàŋ kààìŋ koɓɛ̀ aŋ Juùù nyaŋ yaà anyùùŋ nyaŋ fè àŋ Juùù nyaŋ.

¹⁰ Anyùùŋ nyaŋ gbiŋ nyɛnɛŋ maŋ kpèè siaŋ nyàŋ, wo Dayà do nyiŋ nàŋ joowò, wo nyiŋ kìɛ̀ŋ dɛ̀ɛ̀kɛ, yaà ke jii fàa. È do nàŋ kààìŋ koɓɛ̀ aŋ Juùù nyaŋ yaà anyùùŋ nyaŋ fè àŋ Juùù nyaŋ.

¹¹ Wo Dayà do tɛɛ̀ nàŋ nyɛ̀nɛ̀ŋ e tɔ̀ɔ̀nyaàŋ sùà, esaɓù kɛ̀ wo fè nyangè e kìlà wò gbaì anyùùŋ nyaŋ gbiŋ e ɗèwè guùŋ nɛ sùà.

¹² Anyùùŋ nyaŋ fè àŋ Juùù nyaŋ aŋ nyimààŋ màŋ Sàwà Dayà maŋ, kɛɛ àŋ do nàŋ kɔ̀ e keì nyìnga dìì wèè maŋ keì naanààŋ maŋ àŋ naŋ nyɛ̀nɛ̀ŋ maŋ. Aŋ Juùù nyaŋ nàŋ kuwa maŋ Sàwà maŋ, yèè wo Dayà do nàŋ tòòmò maŋ Sàwà maŋ wo nyiŋ hàà kiti diɛŋ wèè maŋ kèì jùumù nyiŋ màŋ àŋ nyɛnɛŋ maŋ.

¹³ Anyùùŋ nyaŋ komo maŋ Sàwà maŋ nyàŋ, nyiŋ nàŋ wo Dayà fè jàà kùàŋ dìì wèè aŋ nɔ̀ŋ ànyùùŋ tɔ̀ɔ̀nyaàŋ, sɔɔ̀ anyùùŋ nyaŋ nyɛnɛŋ e yèɛ Sàwà maŋ naŋ woò lɛ.

¹⁴ Aŋ gò wà kìɛ̀ŋ màŋ Sàwà Dayà maŋ kòɓɛ̀ ànyùùŋ nyaŋ fè àŋ Juùù nyaŋ. Kɛɛ sèè pɛɛ e teenga gbiŋ aŋ jɔ̀ɔ̀lɔ̀ maŋ sàwà miiŋ dìì, è tɔɔ̀ kɛ̀ àŋ kuwa maŋ sàwà maŋ jìì kòmàŋ nyiŋ bi màŋ sùà, jòòpɛɛ aŋ kuwà màŋ Sàwà Dayà maŋ.

¹⁵ Maŋ kpèè nyiŋ màŋ tɔɔ̀ kɛ̀ e yèɛ maŋ Sàwà Dayà maŋ naŋ woò lɛ è yaà sìnga niŋ maŋ jii nyiŋ màŋ sùà. Maŋ jìì nyiŋ bi màŋ tɔɔ̀ ɓɛìŋ kɛ̀ tɛɛ̀ è yaà tɔɔɓaa, nààŋ e teenga bà sùà màŋ gbùwò nyìŋ maŋ keì, e kìlà e teenga bà sùà maŋ nyiŋ gè e keì ɗì.

¹⁶ Nààŋ e yìwìà Ebò Siaàŋ mìŋ naiŋ woò lɛ, yɛi è do wa nàwèè nàŋ nɔ̀ŋ ke ɗɔɔ yii diɛŋ, wo Dayà do nàŋ tà wo Jisɛ̀ Kulaì ɗùù wèè wo gbàì maŋ gòngò gbùnù anyùùŋ nyaŋ gbiŋ maŋ jii nyiŋ màŋ sùà.

Aŋ Juùù nyaŋ yaà maŋ Sàwà Dayà maŋ

¹⁷ Nyɛ̀iŋ bi zà? Nìŋ nyaaŋ nyɛ̀iŋ bi aŋ Juùù. Nìŋ naŋ tùlìè maŋ Sàwà maŋ jii e kìlà nìŋ kɛɛ maŋ nyòngà wèè Dayà.

¹⁸ Nàŋ kpɛ̀nɛ̀ŋ wɔŋ fɛ̀ì Dayàa, e kìlà nàŋ nyìmàŋ kɛ̀ kiìŋ wo Dayà manaŋ wèè naŋ nyɛ̀nɛ̀ŋ, e kìlà nàŋ nyɛ̀nɛ̀ŋ maŋ nɔnɔŋ tùaŋ maŋ Sàwà Dayà maŋ sùà wèè naŋ nyìmàŋ kɛ̀ kiìŋ nàŋ yaà e tɔ̀ɔ̀nyaàaŋ.

¹⁹ Nìŋ kuwa e hààweɛ̀ tɔɔɓaa kɛ̀ nyɛ̀iŋ nàŋ tɔɔ̀ e tɔ̀ɔ̀nyààŋ Dayàa koɓɛ̀ anyùùŋ nyaŋ fè àŋ Juùù nyaŋ, mààŋ wo nyùnɔ̀ɔŋ àŋ tùlìè jii wèè wo tɔ̀ɔ̀ ke dòmaàŋ koɓɛ̀ anyuùŋ zììlè fɛ̀ɛ̀ nyaŋ wɔ̀.

²⁰ Nyɛ̀iŋ nàŋ dè anyùùŋ ɓàaɓàa nyàŋ ke dòmaŋ siaŋ diɛŋ, yèè nìŋ yaà aŋ kààmɔɔŋ wèè anyuùŋ gò nyìmàŋ nɛ̀ŋ nyaŋ. Nìŋ naŋ haawè kɛ̀ nàŋ nyìmàŋ maŋ Sàwà Dayà maŋ yaà e tɔ̀ɔ̀nyaàaŋ.

²¹ Nìŋ kaà anyuùŋ joo, kɛɛ wèè kiìŋ niŋ fè kàà nyɛ̀iŋ bi? Nìŋ woò nààŋ, “Ɓɔ̀ mùŋ wùà.” Kɛɛ nyɛ̀iŋ bi niŋ fè wùà?

²² Nìŋ naŋ woò nààŋ, “Nyɛ̀iŋ jɔùŋ joo ɓɔ̀ nìŋ nyɛ̀nɛ̀ŋ hmɔŋtu.” Kɛɛ nyɛ̀iŋ, niŋ fè nyɛ̀nɛ̀ŋ hmɔŋtu? Nààŋ aŋ dayà joo zòòlo e siàŋ. Kɛɛ niŋ fè gè mànɛ̀ŋ màŋ sààŋ zòòlò àŋ dayà joo nyiŋ màŋ dìì e kàaɓì sùà?

²³ Nìŋ kɛɛ maŋ nyòngà nààŋ nyɛ̀iŋ nàŋ kuwa maŋ Sàwà Dayà maŋ, kɛɛ niŋ fè hìàŋ sàngè kòɓɛ̀ Dayài sèè nìŋ pɔɔ̀ maŋ sàwàuŋ màŋ?

²⁴ Wɔŋ fɛ̀ì Dayàa naŋ woò wààŋ, “Esàɓù nyɛ̀iŋ nààŋ Juùù nyaŋ sùà, anyùùŋ nyaŋ fè àŋ Juùù nyaŋ gboo maŋ mìè ɓɛ̀ɛ̀pɔ̀ɔ koɓɛ̀ Dayài.”

²⁵ Sèè nìŋ jɔɔlɔ̀ maŋ Sàwà Dayà maŋ dìì, kɛ̀ e ɗeweɛ̀ àŋ naiŋ jàà kpùa lɛ̀ kùwìè sɛmɛ. Kɛɛ sèè nìŋ go jɔ̀ɔ̀lɔ̀ maŋ Sàwà maŋ dìì, kɛ̀ è naŋ wa weè tɛɛwɛ̀ ɓɔ̀ nìŋ nɔ̀ŋ kpùa jàaiŋ.

²⁶ Sèè wo nyùnɔ̀ɔŋ wo yèɔ fè wò Juùù e kìlà wo fè kpùà jàauŋ wɔ̀ wo jɔ̀ɔ̀lɔ̀ maŋ Sàwà Dayà maŋ dìì, wo Dayà douŋ nàŋ ɓemè wèè nɔ̀ŋ mààŋ wò nyùùŋ àŋ naŋ jàà kpùa.

²⁷ Weètii nyɛ̀iŋ nààŋ Juùù nyaŋ, anyùùŋ nyaŋ fè àŋ Juùù nyaŋ, doiŋ nàŋ kìlìè e kiti diɛŋ, esaɓù kɛ̀ nìŋ naŋ pɔ̀ɔ̀ ke Sàwàa, jòòpɛɛ nìŋ kùwa mìŋ wɔŋ fɛi sìnga diɛŋ e kìlà àŋ naiŋ jàà kpùa. Kɛɛ nyiŋ àŋ naŋ jɔ̀ɔ̀lɔ̀ maŋ sàwà maŋ dìì, jòòpɛɛ kòò àŋ nɔ̀ŋ wa kpùa jàa nyiŋ.

²⁸ Eɓìèmàŋjɛ̀wɛ̀ tii, ɓòò nàŋ yaà wo Juùù kɛnɛ, wo yèɔ àŋ naŋ jàà kpùa wɔ̀? E fè wò nyùnɔ̀ɔŋ yaà wò Juùù wɔ kè fòolàa, wo yèɔ àŋ naŋ jàà kpùa wɔ̀.

²⁹ Wo nyùnɔ̀ɔŋ yaà wo Juùù kɛnɛ wɔ̀, nàŋ yaà wo yèɔ naŋ kìlè ke jiiuŋ nɛɛ̀ŋ e tɔ̀ɔ̀nyaàŋ sùà wɔ. Wo Jìnàŋ Dayàa zà naŋ nyɛ̀nɛ̀ŋ e tòmo lɛɛ̀, e fè màŋ sàwà maŋ yaà sìnga miŋ màŋ. Wo Dayà nàŋ tɛnɛ̀ŋ wo nyùùŋ mààŋ wii, kɛɛ è fè ànyuùŋ kpùuŋ.