Jìiiŋ 5 - WƆŊ FƐ̀Ì EBÒ SÌÀŊ DAYÀA

Ke mìè gòo koɓɛ̀ anyuùŋ bàne nyàŋ

¹ Kùmiaŋ nìim naàŋ, nyɛ̀iŋ nààŋ nyuùŋ bàne nyàŋ! Gèeìŋ mìò sùà niŋ gòlà wèè e nimìlàa yaà hìnìè ko nɛ̀ɛ̀iŋ niìŋ lɛ!

² Maŋ bàneiŋ màŋ gbiŋ màŋ hèwà yèè aŋ gìli nyàŋ gbìlà maŋ deèiŋ màŋ.

³ E gòoòɛ yaà e kaiŋfuaiŋ nɛ̀ è do nàŋ kùwò maŋ kààlo, yèè maŋ kààlo bi do nàŋ nɔ̀ŋ seì maiŋ jèè e keì yèè maŋ gbìlà maŋ kenìiŋ màŋ mààŋ e hmɔ̀ɔ̀ŋ. Maŋ ɗɔɔ dìàmaŋ mɛɛ̀ŋ sùà nàŋ gbònògbònò maŋ bàne zimgbe nàŋ miŋ bànè ko hàa.

⁴ Yɛ̀mɛìŋ naàŋ anyùùŋ nyaŋ naŋ tomo maŋ ɓùiŋ màŋ sùà yèè niŋ gò nyiŋ paawà nyaŋ, àŋ yaaìŋ gùlìè dèè. Yèè maŋ mìè gòlà anyùùŋ nyaŋ naŋ gbònògbònò manɛ̀iŋ màŋ maŋ ɓùiŋ màŋ sùà nyaŋ è sɛ̀ɛ̀ Dayà maŋ nùŋ, wo Kànà Gaàŋ Gbeeɔ̀.

⁵ E nɔ̀iŋ nɛ̀ e ɗuunyaàŋ diɛŋ nìŋ naŋ jìkà maŋ nɛ̀ŋje siaŋ, e kìlà naŋ gè gbana. Nàŋ nyɛ̀nɛ̀ŋ maŋ jiiiŋ màŋ dɛɛdɛ̀ɛ̀ nàŋ kùwìè maŋ kèìŋ wèè ke ɗɔ̀ɔ̀ jìwaiŋ nɛɛ̀ŋ diɛŋ.

⁶ Nàŋ jèè e keì anyùùŋ, nàŋ jìwà anyuùŋ tɔ̀ɔ̀nyaàŋ, aŋ yè nyaŋ gòiŋ wa gàngà sìwè nyaŋ.

Kiìŋ nàŋ yaà ke jii kùwa yaà e zòòlo

⁷ Kùwaìŋ jii, nyɛ̀iŋ nààŋ wùìyaim nyàŋ, e jèèsùà wo Kanaà Jisɛ̀ Kulaì wo hnàŋ. Yɛ̀mɛìŋ e ɗeweɛ̀ anyuùŋ tòmò ɓù nyaŋ kuwo maŋ jii aŋ fòlà e teengaà wèè maŋ nɛ̀ŋjè jii nyiŋ màŋ kòmàŋ maŋ nɛ̀ŋje kɛnɛ maŋ diì nyiŋ màŋ diɛŋ. Àŋ kuwo maŋ jii nyiŋ màŋ aŋ fòlà maŋ gɔ̀àà e fèèmàŋ koɓɛ̀ doa nàŋ yaà e sɛ̀ɛ̀ɛ dìì maŋ.

⁸ Nyɛ̀iŋ pɛɛ sɔɔ̀ naŋ kùwà maŋ jiiiŋ màŋ. Kùwieìŋ jii tùlia gbee, esaɓù kɛ̀ e hnàŋ Kanaà Jisɛ̀ Kulaìɛ è gbɛ̀ɛ̀.

⁹ Ɓɔ̀ nìŋ tɔɔ̀ zàwè nyɛ̀iŋ wouwòù è fèemàŋ, nyɛ̀iŋ nààŋ wùìyaim nyàŋ, e wèè wo Dayà goiŋ nàŋ gbààì è keì. Wo nyuùŋ hàà kitiɔ̀ wò kià gbɛ̀ɛ̀, wò yaà e bànèbaneuŋ wèè wo hnàŋ.

¹⁰ Wèè e tɔ̀ɔ̀màŋsèì e mɔ̀ɔ̀nɛŋ yèè ke jii kùwa, nyɛ̀iŋ nààŋ wùìyaim nyàŋ, yɛ̀mɛìŋ weè aŋ wɛ̀ijì nyaŋ naŋ wa gbùùyè e dèè Kanaà Dayà diɛ̀ŋ nyàŋ.

¹¹ Anyùùŋ nyaŋ naŋ kɔ̀ e mɔ̀ɔ̀nɛŋ dìì nyaŋ è nyààìŋ nyiìŋ anyuùŋ kɛ̀ɛ̀nɛ̀ŋ zɔlɔ̀. Nàŋ kòmàŋ ebò e ɗeweɛ̀ wo Jòo naŋ wa kùwò jii lɛ̀, yèè nàŋ nyìmàŋ e ɗeweɛ̀ wo Dayà nauŋ wa kiɛ̀ŋ ko diemeì lɛ. Wo Dayà naŋ dìè ke nyowo yèè e hakɛ̀ jùùya.

¹² Tii gbiŋ sùà, nyɛ̀iŋ nààŋ wùìyaim nyàŋ, sèè nìŋ ɓemàŋ e ɗààhiì wèè naŋ nyɛ̀nɛ̀ŋ e nɛ̀ŋ bà wèè nyùùŋ. Ɓɔ̀ nìŋ gboonò è dèè àìjɛnɛ̀ɛŋ diɛŋ ɔ̀ɔ̀ è dèè ɗuunyaàŋ diɛŋ ɔ̀ɔ̀ è dèè nɛ̀ŋ bà gbiŋ diɛŋ. Sèè nìŋ, nyimààŋ nààŋ “èèè” e nɔ̀ŋ èèè, sèè nìŋ woà nààŋ “Kpele” e nɔ̀ŋ kpele, kɛ̀ wo Dayà naìŋ gbààè è keì.

¹³ Wo nyùùŋ bà yààìŋ tɛɛ wò yaà e keì nyìnga sùà? Wo zoolò Dayà. Wo nyùùŋ gbiŋ yààìŋ tɛɛ wò yaà e zɔlɔ̀ sùà? Ke di nɔ̀uŋ wo dàà maŋ nùŋ Dayà tɛ̀nɛŋ.

¹⁴ Sèè wo nyuùŋ sàaŋ nɔ̀ìŋ tɛɛ, aŋ nyààŋ aŋ sìèfeìŋ nyaŋ ke gbòò anyuùŋ hààwe nyàŋ sùà ko sààŋ zòòloì, auŋ zòòlò diɛŋ e kìlà aŋ kpalèèuŋ e bù ɔlè kɔɔ e dèè Kanaà Jisɛ̀ɛ Kulaìɛ sùà.

¹⁵ Yèè e zòòlo kùwìè e hààwe lii do nàŋ jòèyè wo nyuùŋ sàaàŋ, wo Dayà douŋ nàŋ gè dìì, yèè sèè wo weè pɛɛ nyɛ̀nɛ̀ŋ maŋ kèì jùumù wo Kanaà Dayà juuyà maŋ jùumùuŋ màŋ hakɛ̀.

¹⁶ Weètii, wòoìŋ maŋ jùumùiŋ màŋ nyɛ̀iŋ bi e fèemàŋ e kìlà niŋ zoolò wèè aŋ dàwiiŋ nyàŋ, wèè niŋ jòèyà. E zòòloɛ̀ nyùùŋ tɔ̀ɔ̀nyaàaŋ kuwa lɛ̀, e gaàŋ gbee yààìŋ sùà yèè è tomàŋ.

¹⁷ Wo Ìlaajà yaà wa wo nyuùŋkpùuŋ mààŋ yàwi bi. Wò naŋ zoolò e jɔ̀ɔ̀lɔ sùà wèè maŋ gɔ̀àà ɓɔ̀ màŋ sɔ̀àà, yèè wèè maŋ dòà taai gbànaŋ maŋ gɔ̀àà gbiŋ gò sɔ̀àà è dììɛ diɛŋ.

¹⁸ Yèè wò naŋ ɓɛìŋ zoolò, maŋ gɔ̀àà naŋ sɔ̀ɔ̀ e yìwìà ke nyiliɛ̀ yèè manɛ̀ŋ wuiye màŋ naŋ wùìyè e dììɛ diɛŋ.

¹⁹ Nyɛ̀iŋ nààŋ wùìyaim nyàŋ, sèè wo nyùùŋ gbiŋ naiŋ nɔ̀ŋ e tɛɛ wò naŋ kɛ̀ɛ̀ e tɔ̀ɔ̀nyaàaŋ maŋjɛ̀wɛ yèè wo nyùùŋ bà wouŋ niŋ ɓɛìŋ kɛ̀lɛ̀ɛ̀ sùà,

²⁰ jàaìŋ tɛɛ jii, wo nyùnɔ̀ɔŋ gbiŋ naŋ kɛ̀lɛ̀ɛ̀ ke jìì wo nyùùŋ maŋ jùumùɔ e yìwìà ke dòmaŋ ɓàuŋ nɛɛ̀ŋ diɛŋ wɔ̀, wò do nàŋ jòèyè wo jìnàŋ nyùùŋ maŋ jùumù wii e yìwìà e fàa dìì. Yèè tii è hiàŋ maŋ jùumù zimgbe jùùyà hakɛ̀.