Jìiiŋ 4 - WƆŊ FƐ̀Ì EBÒ SÌÀŊ DAYÀA

E mɔ̀ɔ̀nɔ̀ŋ ɗuunyaàŋ

¹ Kiìŋ nàŋ hiàŋ maŋ nyaàŋ tàaŋ màŋ, kiìŋ nàŋ daa maŋ gùuŋ màŋ nyɛ̀iŋ wouwòù e fèemàŋ? Màŋ yewe e wùànàŋ gbanaɛ̀ nìŋ kuwa maŋ jiiiŋ màŋ sùà lɛ, e yèɛ yààìŋ sùmiaŋ sùà e teenga gbiŋ wèè tiŋ e kuwiè e gààŋ diɛiŋ nɛ̀.

² E wùànàŋ manɛ̀ŋ bà nyɛ̀nɛ̀ìŋ, kɛɛ niŋ fè miŋ yɛmɛ̀, wèètii nìŋ jiwe nyùùŋ. Nìŋ nyɛnɛŋ e wùànàŋ manɛ̀ŋ keekèè, kɛɛ niŋ fè miŋ yɛmɛ̀, weètii nìŋ taaŋ nyààŋ yèè naŋ sòmàŋ. Niŋ fè yɛ̀mɛ̀ mànɛ̀ŋ maŋ nìŋ manaŋ màŋ, esaɓù kɛ̀ niŋ fè dàwè wò Dayà weè miŋ.

³ Nìŋ dawà wo Dayà, kɛɛ wo fèiŋ miŋ kiɛ̀ŋ, esaɓù kɛ̀ nìŋ kuwìà maŋ ɗèwe naanààŋ. Nìŋ dawà wèè manɛ̀ŋ wèè naŋ miŋ gbìàŋ e gbànà nyɛ̀iŋ biɛ̀ sùà.

⁴ Nyɛ̀iŋ nààŋ nyuùŋ gò jilɛ̀ŋ nyɛɛ̀ŋ, niŋ nyimààŋ kɛ̀ sèè nìŋ nɔ̀ŋ ànyuùŋ mɔ̀ɔ̀nɔŋ koɓɛ̀ è ɗuunyaàŋ è naŋ tɔɔ̀ kɛ̀ nìŋ yaà àŋ joo koɓɛ̀ Dayài? Wèètii wo nyùnɔ̀ɔŋ gbiŋ naŋ nyɛ̀nɛ̀ŋ e wùànàŋ wèè wo nɔ̀ŋ wo dàwi koɓɛ̀ e ɗuunyaàŋ wɔ, wò mììnè wuŋ bi wo jòò Dayà.

⁵ Ɓɔ̀ nìŋ gongò kɛ̀ è nɛ̀ɛŋ wɔŋ fɛ̀ì Dayàa naŋ woò lɛ è tɔ̀ɔ̀nyaàŋ fè niìŋ sùà kɛ̀, “Wo Jinàaŋ wo Dayà naŋ wi gbìɛ̀ŋ sùà wɔ e wùànàŋ nauŋ diè wèè e wùàŋ.”

⁶ Kɛɛ e mànaàŋ wo Dayà kiɛ̀ŋ lɛ è naŋ nyìngè sùà. Màànààŋ wɔŋ fɛ̀ì Dayàa naŋ woò lɛ kɛ̀, “Wo Dayà giiyà wo nyùnɔ̀ɔŋ ɓemàŋ wuŋ bi gbee wɔ̀ maŋhɛɛ, kɛɛ wo kìɛ̀ŋ wo nyùnɔ̀ɔŋ deeyà wuŋ bi wɔ̀ e keì sìàŋ.”

⁷ Wèètii, feìŋ nyɛ̀iŋ bi wo Dayà. Gàngaìŋ wo Sɛ̀tanàaŋ sìwè kɛ̀ wò doiŋ nàŋ dùɔ̀ŋ e kɔɔ.

⁸ Gbɛ̀ɛìŋ Dayà kɔɔ, kɛ̀ wò doiŋ nàŋ gbɛ̀ɛ̀ e kɔɔ. Gùoìŋ le sìwè e yìwìà maŋ jùumùiŋ màŋ sùà, nyɛ̀iŋ nààŋ nyùùŋ màŋ jùumù nyaŋ. Yèè niŋ nyɛ̀nɛ̀ŋ maŋ jiiiŋ màŋ zɛ̀nɛ̀ŋ, nyɛ̀iŋ nààŋ nyuùŋ gò kùwìè jìì guùŋ nyaŋ!

⁹ Ke nyowo nyɛ̀nɛ̀iŋ wèè maŋ jùumùiŋ màŋ. Gèeìŋ mìò sùà niŋ gòlà, yèè niŋ vɔɔnɔ̀ŋ e hìleiŋ nɛ̀ e nɔ̀ŋ e gòla, e zɔlɔ̀iŋ nɛ̀ nɔ̀ŋ ke jii mɔ̀ɔ̀nɛŋ!

¹⁰ Dèèyeìŋ nyɛ̀iŋ bi wo Kanaà Dayà fɛɛ̀feìŋ, kɛ̀ wò doiŋ nàŋ kìɛ̀ŋ e ɓɛ̀ɛ̀jàa.

Ke mìè gòo nyaàiŋ dè aŋ dàwiiŋ nyàŋ gbàài

¹¹ Ɓɔ̀ nìŋ woò màŋ keì naanààŋ àŋ dàwiiŋ nyàŋ dèè, nyɛ̀iŋ nààŋ wùìyaim nyàŋ. Wo nyùnɔ̀ɔŋ gbiŋ naŋ wòò e keì naanààŋ wo wùìyauŋ nɔɔ̀ŋ dèè ɔ̀ɔ̀ wouŋ gbààì e keì wɔ, wò nììngè ke sàwàa fɛ̀ɛ̀, e kìlà wò gbààè ke sàwàa e keì. Kɛɛ sèè mùŋ gbaaì ke sàwàa e keì, kɛ̀ muŋ fè ɓɛìŋ wò nyuùŋ jɔ̀ɔ̀lɔ̀ kè sàwàa dìì, mùŋ yaà naàŋ wo nyuùŋ gbààì ke sàwàa e keì.

¹² Wo Dayà guùŋ nɔ̀ŋ nàŋ kiɛ̀ŋ ke sàwàa yèè wuŋ nàŋ gbaì wo nyùùŋ. Wuŋ naŋ ɓɛ̀nɛ̀ŋ wo nyuùŋ jòèye e kìlà wo jìwà nyùùŋ. Kɛɛ ɓòò nàŋ yaà muàŋ wèè maŋ gbàì wo dàwi mɔɔ̀ŋ e keì?

Ke mìè gòo nyaàiŋ dè maŋ nyoungà kɛ̀ɛ

¹³ Kùmiaŋ nìim naàŋ, nyɛ̀iŋ nyàŋ nìŋ woà nààŋ, “Nàaŋ ɔ̀ɔ̀ nàwèè è doiŋ nàŋ kɔ̀ ko jawa yaà ɔ̀ɔ̀ ko jawa wii eiŋ noo nyɛ̀nɛ̀ŋ wɔŋ doa ko nyìnìè ebòli eiŋ nyɛ̀nɛ̀ŋ e nɛɛnɛŋ zimgbe.”

¹⁴ E yèɛ niŋ nyimààŋ kɛ̀ diè màŋ nyiiŋ màŋ do nàŋ nɔ̀ŋ nàwèè lɛ! Nìŋ yaà mààŋ ke komò kpù, kè folo nɔŋ tùtù wèè e teenga kpuu kè ɓaa.

¹⁵ E nɛ̀ɛŋ nìŋ henàŋ woò lɛ nàŋ yaà, “Sèè wo Kanaà Dayà nyimààŋ, è doiŋ nàŋ nɔ̀ŋ nyiiŋ gèeɔ̀ sùà eiŋ tɛɛ̀ nyɛ̀nɛ̀ŋ eiŋ tii nyɛ̀nɛ̀ŋ.”

¹⁶ Kɛɛ nìŋ ɓemàŋ nyɛ̀iŋ bi gbee, naŋ kɛ̀ɛ̀ maŋ nyòùngà. Maŋ nyoungà kɛ̀ɛ mààŋ miiŋ maŋ fè tɛ̀ɛ̀.

¹⁷ Wèètii wo nyùnɔ̀ɔŋ gbiŋ naŋ nyìmè e keì sìàaŋ wò nyɛnɛŋ lɛ̀ yèè wo gò niŋ nyɛ̀nɛ̀ŋ wɔ è yaà e jùumù ko nɛ̀ɛ̀uŋ niìŋ.