Jìiiŋ 2 - WƆŊ FƐ̀Ì EBÒ SÌÀŊ DAYÀA

Ke mìè gòo e nyaàiŋ dè anyuùŋ nyànge e fèemàŋ

¹ Nyɛ̀iŋ nààŋ wùìyaim nyàŋ, nìŋ kuwa e hààweɛ̀ wo Kànà ɓɛ̀ɛ̀jàa wiɔ̀ Jisɛ̀ Kulaì sùà, ɓɔ̀ nìŋ kùwà ànyùùŋ nyaŋ bà nyiŋ tɛ̀ɛ̀ naŋ nyìnìàŋ àŋ bà nyiŋ fɛɛ̀ nìngè wèè è nɔ̀ŋ kii nyiŋ nɛ̀.

² Sèè wo nyuùŋ bàne hnàŋ ko sààŋ zòòloiŋ niìŋ wò naŋ gɔ̀à maŋ deè sìàŋ yèè wò naŋ sìè ke gòoò ɗiìŋ kùàŋ, kpeiŋ wo nyuùŋ pɔ̀ɔ wuŋ pɛɛ wo hnàŋ wò yaà maŋ deè kɔ̀li sùà.

³ Sèè maŋ tɔ̀ɔ̀ e ɓɛ̀ɛ̀jàa zimgbe koɓɛ̀ wo nyuùŋ gɔ̀à maŋ deè sìàaŋ mauŋ woò mààŋ, “Dàa hnaàŋ muŋ jɛ̀ì kià ke kpùà ɓɛ̀ɛ̀jàa yɛɛ̀ diɛŋ.” E kìlà maŋ wòò nyuùŋ pɔ̀ɔɔ̀ mààŋ, “Sìè kià, ɔ̀ɔ̀, hnaàŋ muŋ jɛi ko dììnaŋ ko dè maŋ golòim màŋ.”

⁴ Kɛ̀ nàŋ nyɛ̀nɛ̀ŋ naanààŋ, nàŋ hìàŋ e tɛɛ gòòno nyɛ̀iŋ bi e fèemàŋ e kìlà nàŋ nɔ̀ŋ mààŋ anyuùŋ hàà kiti naanààŋ.

⁵ Nyɛ̀iŋ nààŋ wùìyaim nyàŋ, jàaìŋ maŋ nùŋ dìì! Anyuùŋ pɔ̀ɔ nyàŋ e ɗuunyaŋ lɛɛ̀ nyiŋ wo Dayà naŋ tàeɗùù wèè aŋ nɔ̀ŋ aŋ nyuùŋ bàne nyàŋ e hààweɛ̀ sùà. Yèè àŋ do nàŋ kɛ̀ɛ̀nɛ̀ŋ e kànà Dayàa e yèɛ wò naŋ wa ɓèmè ɗààhiì wèè wo fè aŋ nyùùŋ nyaŋ mànaùŋ nyaŋ.

⁶ Kɛɛ màŋ pɔ̀ɔ̀ wo nyuùŋ kòmàŋ ke nuùɔŋ ɓɛ̀ɛ! Anyuùŋ bàne nyàŋ kùwòìŋ naanààŋ àŋ gɔ̀ɛ̀ìŋ dìì maŋ zɛ̀mɛ̀ɛ̀ŋ keì wòo dìì.

⁷ Nyiŋ nàŋ yaà nyuùŋ wòò maŋ keì naanààŋ nyaŋ e nyaàiŋ dè e dèè sìàŋ Jisɛ̀ɛ wo nyùnɔ̀ɔŋ kànàìŋ wɔ.

⁸ Sèè tɔɔɓaa tiŋ naŋ jɔ̀ɔ̀lɔ̀ ke sàwà e Kànà Dayàa dìì màànààŋ wɔŋ fɛ̀ì Dayàa yaà woo lɛ̀, “Manàŋ wo nyuùŋkpùuŋ dàwi mɔɔ̀ŋ mààŋ muàŋ bi lɛ̀,” kɛ̀ màŋ nyɛ̀nɛ̀ŋ tɛ̀ɛ̀.

⁹ Kɛɛ sèè naŋ tɔ̀ɔ̀ e nyànge e fèemàŋ kɛ̀ nàŋ nyɛ̀nɛ̀ŋ keì naanààŋ, yèè ke Sàwà Dayàa naŋ kaà kɛ̀ nàŋ ɓèmè e jùumù.

¹⁰ Wo nyùnɔ̀ɔŋ pɛɛ kùwà maŋ sàwà maŋ gbiŋ kɛɛ wo sòò kè guùŋ wò ɓà maŋ gbiŋ.

¹¹ Wo Dàyà gunɔ̀ɔŋ naŋ woò wààŋ, “Ɓɔ̀ nìŋ nyɛ̀nɛ̀ŋ è hmɔŋtu wɔ̀,” wuŋ nɔŋ naŋ ɓɛìŋ woò wààŋ, “Ɓɔ̀ nìŋ jìwà nyùùŋ.” Sèè muŋ gò pɛɛ nyɛ̀nɛ̀ŋ hmɔŋtu, màŋ pɔ̀ɔ̀ ke sàwà Dayà sèè mùŋ jiwe wo nyùùŋ.

¹² Weètii wòò, yèè muŋ nyɛ̀nɛ̀ŋ maŋ keì mààŋ anyùùŋ nyaŋ naŋ nyìmè kɛ̀ wo Dayà do nyiŋ nàŋ gbààì ke sàwàa do nyiŋ nàŋ gè keì sùà lɛ.

¹³ E kèì gbài Dayàa sùà wa nàwèè wo naàŋ kùwìè kè nyowo wèè wò nyùnɔ̀ɔŋ gò wa kùwìè kè nyowo wɔ̀, kɛɛ e keì gbàiɛ̀ sùà pɛɛ wo Dayà kuwa ke nyowo.

Kiìŋ nàŋ yaà e hààwe yèè maŋ nyɛ̀nɛŋ

¹⁴ Nyɛ̀iŋ nààŋ wùìyaim nyàŋ, kiìŋ nàŋ yaà e jìwààjɛ̀wɛ̀ siaàŋ wèè wo nyùùŋ woò kɛ̀ wò kuwa e hààwe kɛɛ maŋ nyɛ̀nɛuŋ màŋ fè niŋ tɔɔ̀? Sèè wo nyùùŋ kùwìè e hààwe mààŋ tii èuŋ ɓɛ̀nɛ̀ŋ joeyè?

¹⁵ Sèè aŋ wùìya ɔ̀ɔ̀ aŋ jaa kùwìè e hààwe wo Kulaì sùà aŋ yè nyaŋ manaŋ maŋ dèè yèè aŋ kuwà è nɛ̀ŋje gbiŋ wèè aŋ jè nyaŋ,

¹⁶ kiìŋ nàŋ yaà e jìwààjɛ̀wɛ̀ siaàŋ sèè nyɛ̀iŋ nyɛɛ̀ŋ bà guùŋ wo nyiŋ woò wààŋ, “Kɔ̀aìŋ ke jii fàa sùà! Ke fòì ɓɔ̀ nyɛ̀nɛ̀iŋ yèè niŋ jè niŋ dià,” e yèɛ muŋ gò nyiŋ fè è nɛ̀ŋ bà gbiŋ è yèɛ naŋ nyiŋ ɓɛ̀nɛ̀ŋ kpùùmaŋ wèè màŋ kpùnaŋ nyiŋ màŋ lɛ?

¹⁷ Yɛi e hààweɛ̀ yaà, sèè e hààweɛ̀ e nɔ̀ŋ tiŋ guùŋ ke kpèè siaŋ bà gbiŋ gò niŋ nɔ̀ŋ màŋjɛ̀wɛ è yaà e hààwe fàa.

¹⁸ Kɛɛ wo nyùùŋ bà do nàŋ woò wààŋ, “Mùŋ kuwa e hààwe, yèè miàŋ mìŋ kuwa maŋ kpèè siaŋ.” Tɔ̀ɔ̀im e hààwe gò kɛ̀ɛ̀nɛ̀ŋ màŋ kpèè siaum màŋ, kɛ̀ miàŋ esàɓù maŋ kpèèim màŋ sùà mìŋ doum nàŋ tɔ̀ɔ̀ e hààwe mɛ̀.

¹⁹ Mùŋ naŋ haawè kɛ̀ wo Dayà yaà nɔŋ wò guùŋ? Keì sìàŋ le! Aŋ jinàŋ naanààŋ nyaŋ nyiŋ pɛɛ àŋ naŋ niŋ haawè e jèèsùà àŋ jele kɔɔ kpàkpà wèè e jùù.

²⁰ Muŋ nyuùŋ zùwoum, mùŋ manaŋ wèè maŋ tɔɔ̀ kɛ̀ e hààwe fɔɔnyɔ̀ɔ̀ŋ gò kùwìè kè nyɛ̀nɛŋ siaŋ è yaà wèè foo?

²¹ Dièsɔa wo nèwàènèwe wiɔ̀ Eɓulɔhɛɛ̀ŋ naŋ wa nyɛ̀nɛ̀ŋ wo Dayà nauŋ wa jàà kùàŋ dìì? È yaà wa esàɓù ke kpèè siauŋ nɛɛ̀ŋ sùà nààŋ wò naŋ wa kìɛ̀ŋ wo jɔ̀àfelaauŋ nɔɔ̀ŋ Ààze wèè wouŋ gììyà saaà wɔŋ gbɛ̀gbɛ̀ zòòloɔ̀ diɛŋ.

²² Muŋ fè yɛmɛ̀ kɛ̀, e hààweuŋ nɛ̀ yaà ke kpèè siauŋ nɛɛ̀ŋ toomàŋ wa koɓɛ̀ guùŋ? Esàɓù e tòmo lii sùà tiŋ naŋ nyɛ̀nɛ̀ŋ e hààweuŋ nɛ̀ naŋ wa jùò jɛ̀wɛ̀ gbɛlɛiŋ.

²³ Yèè e mìè nyààŋ wɔŋ fɛ̀ì Dayàa naŋ nɔ̀ŋ tɔ̀ɔ̀nyaàŋ nààŋ wɔ̀ŋ naŋ woò wààŋ, “Wo Eɓulɔhɛɛ̀ŋ naŋ wa hààwè Dayà, yèè esàɓù hààweuŋ nɛ̀ sùà wo Dayà nauŋ wa jàà kùàŋ dìì wèè wo nɔ̀ŋ nyùùŋ tɔ̀ɔ̀nyaàŋ.” Yèè wo Dayà naŋ wa nyààŋ Eɓulɔhɛɛ̀ŋ wo dàwiuŋ.

²⁴ Nàŋ yɛmɛ̀ kɛ̀, wo Dayà jaa nyùùŋ kùàŋ dìì wèè wo nɔ̀ŋ wo nyùùŋ tɔ̀ɔ̀nyaàŋ esàɓù maŋ kpèè siauŋ màŋ sùà, e fè nɔŋ wèè è hààweɛ̀ tiŋ guùŋ kpò.

²⁵ E kèì guùŋ nii bà naŋ kaaìŋ wèè wo Làhaà wo jɔùŋ nyɛ̀nɛ̀ŋ ke yɛɛ̀ gò kɛ̀ɛ̀nɛ̀ŋ ɓɛ̀ɛ̀jàa. Wo Dayà nauŋ wa jàà kùàŋ dìì wèè ke kpèè siauŋ nɛɛ̀ŋ, nààŋ wò naŋ wa jàà anyùùŋ ko Ezɔ̀ɛ̀ nyaŋ kùàŋ dìì aŋ yè nyaŋ naŋ wa hnè ke gbùnu sùà ko tùùnyɛ̀ŋ maŋ mɔnɔŋ e dììɛ diɛŋ nyàŋ, yèè wò naŋ nyiŋ kpuumò wo nyiŋ tɔ̀ɔ̀ ke dòmaŋ joo bà wèè aŋ ka.

²⁶ Weètii, nààŋ nɔŋ wo jinàaŋ folo wo nyuùŋ kpùnɔɔ̀ŋ sùà kɛ̀ wò fà lɛ, yɛi nɔŋ è yaà sèè ke kpèè ke gò nɔ̀ŋ è hààwe màŋjɛ̀wɛ è yaà e hààwe fàa.