Felemɔ̀ŋ - PHM 1 - WƆŊ FƐ̀Ì EBÒ SÌÀŊ DAYÀA

¹ E yìwìà miàim Pɔɔ̀ sìwè, wo yèɔ yaà wa ko sààŋ nyìwì esàɓù e hààwe mɛ̀ wo Jisɛ̀ Kulaì sùà wɔ, yàwi Timetè wo nyuùŋ tòmo dàwi miɔ̀ŋ e hààweɛ̀ sùà nàŋ yaà sìngìè wɔŋ fɛi wɛɛ̀ŋ. Felemɔ̀ŋ, wùìya wiɔ̀ yèè wo nyuùŋ tòmo dàwi wiɔ̀, e yaà sìngìè wɔŋ fɛi wɛɛ̀ŋ ko nɛ̀ɛ̀ŋ muìŋ,

² yèè koɓɛ̀ ke gbòò anyuùŋ hààwe nyàŋ deenàŋ ko gboo moo nyàŋ, e kpùlìà wo Afià wo jaa wiɔ̀ Jisɛ̀ Kulaì sùà, yaà wo Àchipɔ̀ wo yèɔ tòmàŋ wèè wo Kanaà, màànààŋ yàwi pɛɛ è nyɛnɛŋ lɛ̀.

³ Tɔ̀ Dayà wo Dèda wiɔ̀ yaà wo Kanaà Jisɛ̀ Kulaì kiɛ̀iŋ e keì sìàŋ yèè ke jii fàa.

E mànaàŋ yaà hààweɛ̀ wo Felemɔ̀ŋ kuwa lɛ̀

⁴ Felemɔ̀ŋ, sèè mìŋ nɔ̀ŋ zoolo e teenga gbiŋ sùà, mìŋ nyaaŋ e dee mɔ̀ɛ̀, e kìlà mìŋ gè wo Dayà miɔ̀ŋ ke sɛ̀ e weèum.

⁵ Mìŋ naŋ kòmò e kèè e hààweɛ̀ mùŋ kuwa wo Kana wiɔ̀ wo Jisɛ̀ Kulaì sùà lɛ, yaà e mànaŋ mɔ̀ɛ̀ koɓɛ̀ anyùùŋ nɛɛmaŋ nyàŋ gbiŋ wèè wo Dayà.

⁶ Nààŋ nyɛ̀iŋ nààŋ anyuùŋ joo nìŋ zoolà koɓɛ̀ guùŋ ke gbòò anyuùŋ hààwe nyàŋ sùà lɛ, mìŋ zoolà wèè aŋ hnàŋ aŋ nyìmàŋ e tɛ̀ɛ̀tɛ̀ɛ̀ɛ gbiŋ wo Jisɛ̀ Kulaì naŋ wi kiɛ̀ŋ lɛ.

⁷ Wùìya miɔ̀ŋ, esàɓù e mànaŋ mɔ̀ɛ̀, mìŋ kuwa e zɔlɔ̀ gbee, yèè è naim kìɛ̀ŋ ke jii nyingè. È naŋ ɓɛìŋ dììyè e zɔlɔ̀ maŋ jìì anyùùŋ nyaŋ kuwa e mànaŋ wèè anyùùŋ nɛɛmaŋ nyàŋ koɓɛ̀ Dayài.

Wo Pɔɔ̀ naŋ gbòò koɓɛ̀ Felemɔ̀iŋ e nyaàìŋ dè Onisimɔ̀ŋ

⁸ Wo Jisɛ̀ Kulaì naim kìɛ̀ŋ ke jii nyingè, wèè kaìŋ woò kɛ̀ kiìŋ nìŋ nyɛnɛŋ.

⁹ Kɛɛ mìŋ yààùm dàwe sùà wèè maŋ niŋ nyɛ̀nɛ̀ŋ esàɓù e mànaŋ. Hɛ̀ɛɛ̀ŋ, jòòpɛɛ miàŋ nàŋ yaà Pɔɔ̀ wo nyuùŋ kɔ̀à ke miè gbìàaŋ e kìlà mìŋ yaà wo nyùùŋ màŋ keì wèè wo Jisɛ̀ Kulaì.

¹⁰ Mìŋ yààùm dàwe sùà wèè maŋ kpùùmàŋ wo Onisimɔ̀ŋ. Wò yaà mààŋ wo jɔ̀àfelaa ko nɛ̀ɛ̀ŋ miìŋ wo Jisɛ̀ Kulaì sùà, esaɓù kɛ̀ mìŋ naùŋ wa dè ke dòmàŋ Jisɛ̀ Kulaìɛ diɛŋ e teengaà yàwiuŋ yaà wa ko sààŋ nyìwìi lɛ̀.

¹¹ Wèè paŋ tɛ̀ɛ̀ kaaìŋ, wò yaà wa wo nyuùŋ foo kpàna ko nɛ̀ɛ̀ŋ muìŋ, kɛɛ sààmɛ lɛɛ̀ sùà naàŋ, wò yaà tɛ̀ɛ̀ ko nɛ̀ɛ̀ŋ muìŋ, yèè ko nɛ̀ɛ̀ŋ miìŋ.

¹² Jòòpɛɛ mìŋ yaà tùàŋ sùà wo Onisimɔ̀ŋ ko nɛ̀ɛ̀ŋ muìŋ, kɛɛ ke jìì mànaŋ miɛ̀ŋ yàaùŋ maŋjɛ̀wɛ.

¹³ Mìŋ do weè nàŋ mɔ̀nɔ̀ŋ wo kià nɔ̀ŋ ko nɛ̀ɛ̀ŋ miìŋ, wèè wo dè e ɓɛ̀iŋ e nyaàiŋ dè e kpùùmaàŋ nìŋ he weè nàŋ nyɛ̀nɛ̀ŋ e weèim e teengaà mìŋ yaà kià ko sààŋ nyìwìi wèè Ebò Siaàŋ dààne lɛ.

¹⁴ Kɛɛ miŋ naàŋ nyɛ̀nɛ̀ŋ è keì gbiŋ e jèèsùà maŋ nyimèè. Mìŋ manaŋ wèè ke kpèè tùwo siaŋ mɔɛ̀ŋ ke e yìwìà ke jii mɔɛ̀ŋ sùà, kɛɛ ɓɔ̀ è nɔ̀ŋ è kèkèteè wèè maŋ niŋ nyɛ̀nɛ̀ŋ.

¹⁵ È wa wɛ̀i ɓɛ̀nɛ̀ŋ nɔ̀ɔŋ kɛ̀, àŋ naum wa gè Onisimɔ̀ŋ kɔɔ wèè e teenga kpuu, e wèè wo ɓɛìŋ kɛ̀ɛ̀ maŋjɛ̀wɛ ko nɛ̀ɛ̀ŋ muìŋ wèè julɔfɔ,

¹⁶ kɛɛ wo fè hinie mààŋ wò ɗo. Wo Onisimɔ̀ŋ yaà wo wùìya kɛnɛ e nìàŋ wo ɗo. Wò yaà wo wùìya mɔ̀ɔ̀nɔŋ kɛnɛ ko nɛ̀ɛ̀ŋ miìŋ yèè kai kai ngèè ko nɛ̀ɛ̀ŋ muìŋ, nààŋ wo yaà nyuùŋkpùuŋ wɔŋ kɔɔ sùà yèè wo nyùùŋ màŋjɛ̀wɛ Kanaà Jisɛ̀ Kulaì.

¹⁷ Sèè nìŋ naim jàà kùàŋ dìì wèè ka nɔ̀ŋ wo wùìyaiŋ esàɓù Jisɛ̀ Kulaìɛ sùà, kɛ̀ jàaìŋ wo Onisimɔ̀ŋ kùàŋ dìì wo nɔ̀ŋ dàwiiŋ màànààŋ nìŋ doim weè nàŋ jàà kùàŋ dìì lɛ.

¹⁸ Sèè wò naiŋ wa kaaɓì ɔ̀ɔ̀ wò kùwàìŋ e nɛ̀ŋ bà kpàŋ, wòo nìim kɛ̀ kiìŋ wò kùwàìŋ e kpàŋ.

¹⁹ E yìwìà wɔŋ kùàŋ miàŋ biɔ̀ mìŋ yaà tɛɛ̀ singie ko nɛ̀ɛ̀iŋ niìŋ kɛ̀, miàim Pɔɔ̀, mìŋ do niŋ nàŋ paawà ko nɛ̀ɛ̀ŋ muìŋ. Kɛɛ mùŋ kùwàìm e kpàŋ wɔŋ nyiiŋ gèe jɛi mɔɔ̀ŋ esàɓù wo Jisɛ̀ Kulaì sùà.

²⁰ Weètii wùìya miɔ̀ŋ, kɔ̀nɛɛ̀ŋ nyɛnɛ̀ŋ e kpùùmaŋ lɛɛ̀ e weèim esàɓù wo Kanaà sùà. Nààŋ mùŋ yaà wo wùìya nyuùŋ wo Jisɛ̀ Kulaì sùà lɛ, nyɛnɛŋ e mànaŋ mɔ̀ɛ̀ e sìàìm e zɔlɔ̀ ke jii miɛ̀ŋ sùà.

²¹ Mìŋ kuwa ke jii tùliaà kɛ̀, mùŋ do naŋ nyɛ̀nɛ̀ŋ e yèɛ gbiŋ mìŋ naŋ dawè wèè maŋ nyɛ̀nɛ̀ŋ lɛ, yèè mùŋ do naŋ nyɛ̀nɛ̀ŋ e zimgbe niŋ.

²² Kɔ̀nɛɛ̀ŋ bànè ko sààŋ nyùùnèènyɛiŋ e weèim. Mìŋ kuwa ke jii tùliaà kɛ̀ wo Dayà doum naŋ kpuumò wo jàà e zòòloìŋ nɛ̀ kùàŋ dìì, yèè mìŋ doum nàŋ jààmè.

Maŋ mìè zùùmo dìàmaŋ màŋ

²³ Wo Ɛpafilè wuŋ pɛɛ, kòò wò yaà kià ko sààŋ nyìwì, esaɓù kɛ̀ wò yaà wo nyùùŋ maŋjɛ̀wɛ̀ Jisɛ̀ Kulaìɔ bà, e kìlà wò naiŋ tùɔ̀ŋ e zùùmo.

²⁴ Yèè anyuùŋ gbànaŋ nyɛɛ̀ŋ tèènè mààŋ wo Mài, wo Àlètakɔ̀, wo Dimà, yèè wo Luù, anyuùŋ tòmo dàwiim nyàŋ, naiŋ tùɔ̀ŋ e zùùmo nyiìŋ pɛɛ.

²⁵ Mìŋ zoolà wèè e tɛ̀ɛ̀tɛ̀ɛ̀ wo Kana wiɔ̀ Jisɛ̀ Kulaì eiŋ nɔ̀ŋ maŋjɛ̀wɛ.