Fèle 1 - WƆŊ FƐ̀Ì EBÒ SÌÀŊ DAYÀA

¹ E yìwìà miàim Pɔɔ̀ yaà wo Timetè sìwè, aŋ ɓɔ̀ìjɔ̀à Jisɛ̀ Kulaì nyaŋ, nàŋ yaà sìngìè wɔŋ fɛi wɛɛ̀ŋ koɓɛ̀ anyùùŋ nɛɛmaŋ nyàŋ gbiŋ ko Fèlepì, aŋ yè nyaŋ yaà aŋ bà nyiŋ bà wo Jisɛ̀ Kulaì sùà nyaŋ, e kpùlìà aŋ sìèfèìŋ anyuùŋ hààwe nyàŋ yaà anyuùŋ tòmo dàwi nyiŋ nyàŋ.

² Tɔ̀ wo Dayà wo Dèda wiɔ̀ yaà wo Jisɛ̀ Kulaì kiɛ̀iŋ e tɛ̀ɛ̀tɛ̀ɛ̀ yèè ke jii fàa.

E zòòlò Pɔɔ̀ɛ wèè anyuùŋ hààwe yaà anyuùŋ kpɛ̀nɛ̀ŋ fɛi wɛɛ̀ŋ

³ Mìŋ gè wo Dayà miɔ̀ŋ ke sɛ̀ e teenga gbiŋ mìŋ gongà e kiiŋ,

⁴ e kìlà e teenga gbiŋ mìŋ zoolà e weèiŋ, mìŋ zoolà e zɔlɔ̀ sùà,

⁵ wèè esàɓù e ɗeweɛ̀ è naiŋ tòòmò koɓɛ̀ guùŋ, wèè eiŋ ɓààyè Ebò Siaàŋ e yìwìà ke ɗɔɔ jiɛ̀jiɛ̀ɛ nìŋ naŋ niŋ wa kòmò lɛ, e hàì e teenga lɛɛ̀ nàaŋ.

⁶ Weètii mìŋ naŋ haawè kɛ̀ wo Dayà wo yèɔ naiŋ tɔ̀ɔ̀tù nyìnìàŋ e tòmo siaŋ sìàŋ lɛɛ̀ sùà wɔ, do niŋ nàŋ kɔ̀ɔ̀ feìŋ e jèèsùà e jùà ke ɗɔɔɛ̀ wo Jisɛ̀ Kulaì do nàŋ hnè lɛ diɛŋ.

⁷ E kiiŋ nɛ̀ è yaà ke jii miɛ̀ŋ diɛŋ e teenga gbiŋ. Weètii è yaà nɔŋ tɛ̀ɛ̀ wèè ka gòngò e kiiŋ e ɗewe lɛɛ̀ sùà. Nyɛ̀iŋ nààŋ gbiŋ nàŋ nɔ̀ŋ aŋ bàiŋbà wèè e keì sìàŋ lɛɛ̀ e yèɛ wo Dayà naim kiɛ̀ŋ lɛ, e teengaà mìŋ yaà ko sààŋ nyìwìi yèè e teengaà miŋ fè wa è keì dìì wèè ka dè ebò siaàŋ gòlò jɛwɛ e kìlà ka wòò e kii niŋ e tɔ̀ɔ̀nyaàŋ sùà lɛ.

⁸ Wo Dayà nàŋ yaà wo seì miɔ̀ŋ nààŋ mìŋ woà e tɔ̀ɔ̀nyaàaŋ kɛ̀, e mànaàŋ mìŋ kuwa ke jii miɛ̀ŋ sùà weèiŋ lɛ̀, è yewe kè jìì Jisɛ̀ Kulaìɛ sùà wuŋ bi.

⁹ Mìŋ zoolà wèè e mànaiŋ nɛ̀ e dɛɛ̀ sùà zimgbe, e nyɛ̀nɛ̀ŋ niŋ kɛɛnɛ̀ŋ jiikɛ̀ɛ e kìlà niŋ nyìmàŋ e keì fèemàŋ,

¹⁰ wèè kɛ̀ nìŋ naŋ ɓɛ̀nɛ̀ŋ tùàŋ maŋ nɔnɔŋ wèè naŋ nyimèè kɛ̀ kiìŋ nàŋ yaà e nɛ̀ŋ kɛnɛ. Tɛɛ̀ do nàŋ nyɛ̀nɛ̀ŋ naŋ nɔ̀ŋ sengei e kìlà e keì gbiŋ e naàìŋ nɔ̀ŋ ke ɗɔɔɛ̀ wo Jisɛ̀ Kulaì do nàŋ hnè lɛ.

¹¹ Maŋ nyiiŋ gèeiŋ màŋ do nàŋ dìè maŋ kèì tɔ̀ɔ̀nyaàŋ kɛnɛ, maŋ yè maŋ wo Jisɛ̀ Kulaì doiŋ nàŋ kpuumò wèè naŋ nyɛ̀nɛ̀ŋ, wèè e jòòwò yèè e tɛ̀nɛŋ koɓɛ̀ Dayài.

Wo Jisɛ̀ Kulaì nàŋ yaà wɔŋ nyiiŋ gèeɔ̀

¹² Nɛ̀iŋ nààŋ wùìyaim nyàŋ, mìŋ manaŋ naŋ nyìmàŋ kɛ̀ e nɛ̀ɛŋ naim kaaìŋ lɛ, naŋ kìɛ̀ŋ e kpùùmaŋ wèè Ebò Siaàŋ e ɓaayè,

¹³ esàɓù tɛɛ̀, anyuùŋ tùnìàŋ ke sààŋ gbèè kanaà yaà anyuùŋ gbànaŋ nyàŋ gbiŋ, naŋ nyìmè kɛ̀ mìŋ yaà kià ko sààŋ nyìwì, esaɓù kɛ̀ mìŋ yaà wo ɓɔìjɔ̀à wèè wo Jisɛ̀ Kulaì.

¹⁴ E nɔ̀ɔŋ mɛ̀ ko sààŋ nyìwìi, naŋ nyɛ̀nɛ̀ŋ anyuùŋ hààwe nyàŋ zimgbe nyiŋ naŋ kɛ̀ɛ̀nɛ̀ŋ jii tùlia wo Kanaà sùà, yèè e jùù naŋ nyiŋ ɓàà kɔɔ wèè aŋ gbòà ke mìè Dayàa janjai e teenga gbiŋ koɓɛ̀ gbiŋ.

¹⁵ Anyùùŋ nyaŋ bà nyiŋ yaà gbùùyè ke mìè Dayàa e nyaàiŋ dè wo Jisɛ̀ Kulaì, esaɓù kɛ̀ àŋ giiyà wì koo yèè àŋ nyinìàŋ wì nyaàtàaŋ. Aŋ bà nyiŋ gboo ke mìè Dayàa esaɓù kɛ̀ àŋ manaŋ aŋ kìɛ̀ŋ kpùùmaŋ.

¹⁶ Anyùùŋ nyɛɛ̀ŋ nyɛnɛŋ tɛɛ̀ e yìwìà e mànaŋ sùà, esaɓù àŋ nyìmàŋ kɛ̀ wo Dayà naim kìɛ̀ŋ e tòmoɛ̀ wèè ka wòò e tɔ̀ɔ̀nyaàaŋ e nyaàiŋ dè Ebò Siaàŋ.

¹⁷ Kɛɛ aŋ gbànaŋ nyàŋ giiyà wì le koo nyàŋ, gboo kè mìè Dayàa è nyaàiŋ dè wò Jisɛ̀ Kulaì, kɛɛ e fè yìwìà màŋ jii nyiŋ màŋ diɛŋ, kɛɛ àŋ nyɛ̀nɛ̀ŋ niìŋ esaɓù kɛ̀ àŋ manaŋ e bàne wèè nyiŋ bi. Àŋ gongà kɛ̀ sèè àŋ nyɛnɛŋ tɛɛ̀, àŋ doim nàŋ hìɛ̀ŋ e keì nyìnga diɛŋ e teengaà mìŋ yaà ko sààŋ nyìwì lɛ.

¹⁸ Tɛɛ̀ fè è keì gbiŋ. E zɔlɔ̀ yààìm weè niŋ, nààŋ àŋ yaà wòò e kèè wo Jisɛ̀ Kulaì, sèè pɛɛ aŋ niŋ nyìnìàŋ tɔ̀ɔ̀nyaàŋ ɔ̀ɔ̀ àŋ go niŋ nyìnìàŋ tɔ̀ɔ̀nyaàŋ diɛŋ. Mìŋ do nàŋ nɔ̀ŋ e zɔlɔ̀ sùà e teenga gbiŋ,

¹⁹ esaɓù kà nyìmàŋ kɛ̀ e zòòloiŋ nɛ̀ yèè e kpùùmaàŋ yewe wo Jìnàŋ Jisɛ̀ Kulaìɔ sùà lɛ, mìŋ do nàŋ nɔ̀ŋ e bìlɛim.

²⁰ E yèɛ mìŋ yaà yɛ̀ɛ̀mɛ̀ dòmaŋ, yèè ke jii tùliaà mìŋ kuwa lɛ̀ nàŋ yaà kɛ̀ miŋ naàŋ wa nàwèè nyɛ̀nɛ̀ŋ è keì gbiŋ wèè eim nyìnìàŋ sàngè. Kɛɛ wèè e teenga gbiŋ, yèè sààmɛ pɛɛ, mìŋ do nàŋ kɛ̀ɛ̀nɛ̀ŋ ke jii nyingè, wèè ke kpùnaŋ miɛ̀ŋ gbiŋ ke hìàŋ e ɓɛ̀ɛ̀jàa koɓɛ̀ Jisɛ̀ Kulaìi, sèè pɛɛ ka nɔ̀ŋ wɔŋ nyiiŋ gèe sùà ɔ̀ɔ̀ ka fà.

²¹ Kiìŋ nàŋ yaà wɔŋ nyiiŋ gèe? Sèè è nɔ̀ŋ wèè miàŋ, wo Jisɛ̀ Kulaì nàŋ yaà wɔŋ nyiiŋ gèeɔ̀. Yèè sèè ka fà, mìŋ do ngèè nàŋ yɛ̀mɛ̀ e tɛ̀ɛ̀tɛ̀ɛ̀ zimgbe.

²² Kɛɛ sèè ka weè nɔŋ nɔ̀ŋ wɔŋ nyiiŋ gèe ke kpùnaŋ miɛ̀ŋ sùà, kà weè ɓɛ̀nɛ̀ŋ nɔ̀ŋ nyìnìè maŋ keì tɛ̀ɛ̀wɛ̀ tɛɛwɛ, kɛɛ miŋ naàŋ nyìmè è nɛ̀ɛŋ mìŋ naŋ ɓɛ̀nɛ̀ŋ tàeɗùù wèè e nɔ̀ŋ è kɛnɛ niŋ nɛ̀.

²³ Mìŋ sia maŋ dòmàŋ gbààmàŋ tìyèe. Mìŋ manaŋ wèè ka jòà e ɗuunyaŋ lɛɛ̀ wèè ka nɔ̀ŋ koɓɛ̀ Jisɛ̀ Kulaìi, e yèɛ do nàŋ nɔ̀ŋ tɛ̀ɛ̀ e nìàŋ wèè ka nɔ̀ŋ wɔŋ nyiiŋ gèeɔ̀ sùà.

²⁴ Kɛɛ wèè esaɓùiŋ nɛ̀ sùà, è yaà e keì kɛnɛ wèè ke kpùnàŋ miɛ̀ŋ keiŋ nɔ̀ŋ e tɛɛ.

²⁵ Esaɓùɛ lɛɛ̀ mìŋ kuwa ke jii tùlia, kɛ̀ mìŋ do nàŋ nɔ̀ŋ wɔŋ nyiiŋ gèeɔ̀ sùà wèè kaiŋ kpuumàŋ nàŋ kɛ̀ɛ̀nɛ̀ŋ zɔlɔ̀ e kìlà e hààweiŋ nɛ̀ e dɛ̀kɛ̀ sùà,

²⁶ weètii sèè mìŋ jaamàìŋ ɓɛìŋ, nìŋ do nàŋ kɛ̀ɛ̀nɛ̀ŋ esaɓù sìàŋ wèè naŋ kɛ̀ɛ̀nɛ̀ŋ e dɛ̀ɛ̀kɛ gbee wèè wo Jisɛ̀ Kulaì esaɓù mɛ̀ sùà.

²⁷ Eɓìèmàŋjɛ̀wɛ̀ tii gbiŋ, tɔ̀ ke nyɛ̀nɛiŋ nɛɛ̀ŋ wɔŋ nyiiŋ gèeiŋ nɔɔ̀ŋ sùà nɔ̀ŋ e ɗewe kiiɛ̀ dò naŋ hìɛ̀ŋ e ɓɛ̀ɛ̀jàa koɓɛ̀ Ebò Siaàŋ, e nyaàiŋ dè wo Jisɛ̀ Kulaì. Kpeiŋ sèè kaiŋ pɛɛ jaamè ɔ̀ɔ̀ mìŋ goiŋ pɛɛ jaamè, mìŋ do nàŋ kòmò kɛ̀ nyɛ̀iŋ gbiŋ kòò nìŋ yaà toomo ke jìì guùŋ sùà, nìŋ sia koɓɛ̀ guùŋ tiiŋ, wèè naŋ nyɛ̀nɛ̀ŋ anyuùŋ joo aŋ hààwè Ebò Siaàŋ.

²⁸ Kɛ̀ɛ̀nɛiŋ maŋ jii nyingè sèè nyɛ̀iŋ yèè aŋ jooiŋ nyàŋ nìŋ deenàŋ koɓɛ̀ guùŋ. Ke jii tùliaiŋ nɛɛ̀ŋ do nyiŋ nàŋ tɔɔ̀ kɛ̀ wo Dayà do nyiŋ nàŋ pɔɔpɔ̀ɔ̀, yèè kè doiŋ nàŋ tɔɔ̀ kɛ̀ wo Dayà doiŋ nàŋ joeyè. Wo Dayà do nàŋ nyɛ̀nɛ̀ŋ tɛɛ̀ gbiŋ e kaaìŋ.

²⁹ Wo Dayà naiŋ kìɛ̀ŋ e ɗeweɛ̀ wèè naŋ tomo wèè wo Jisɛ̀ Kulaì, e fè nɔŋ wèè nauŋ kùwìè è hààwe tiŋ guùŋ sùà, kɛɛ sɔɔ̀ naŋ kà e keì nyìnga dìì e weèuŋ.

³⁰ Nìŋ naim yɛmɛ̀ mìŋ naŋ kɔ̀ e mɔ̀ɔ̀nɛŋ dìì, yèè kòò nìŋ yaà nɔŋ kùmìè e kèè e keì nyìnga mɛ̀. Nyɛ̀iŋ pɛɛ nìŋ kuwa naŋ kà maŋ keì nyìnga dìì e ɗèwè guùŋ nɛ sùà.