Ɛfesɔ̀ 2 - WƆŊ FƐ̀Ì EBÒ SÌÀŊ DAYÀA

Nìŋ yaà wɔŋ nyiiŋ gèe jɛi sùà

¹ E gɔuɛ̀ sùà, nìŋ naŋ wa fɔ̀ wo jinàiŋ nɔɔ̀ŋ sùà esàɓù maŋ keì naanààŋ, yèè maŋ jùumùiŋ màŋ.

² E teenga lii sùà nìŋ naŋ wa dè maŋ kpèè nàànààŋ ɗuunyaàŋ màŋ maŋjɛ̀wɛ, yèè nìŋ naŋ jɔ̀ɔ̀lɔ̀ wo nyuùŋ gbeeɔ̀ wèè maŋ gààŋ aŋ jìnàŋ nyaŋ ke nyiliɛ̀ sùà wo jinàaŋ sia anyùùŋ nyaŋ gbiŋ feìŋ, aŋ yè nyaŋ fè jɔ̀ɔ̀lɔ̀ Dayà dìì nyaŋ.

³ Tɔɔɓaa tiŋ yàwi nààŋ gbiŋ è yaà wa màànààŋ àŋ yaà wa lɛ̀, yèè è yààìŋ wa maŋ kèì è jìì yàwi bi màŋ maŋjɛ̀wɛ, è yaà ko nyìnìè maŋ keì maŋ gbiŋ maŋ gòngo wi màŋ yaà maŋ kpùnaŋ wi màŋ manaŋ wèè eiŋ nyɛ̀nɛ̀ŋ maŋ. È naiŋ sìè Dayà e wùàŋ, yèè wò yaà weè hinie wèè wo wi ngainɓù mààŋ anyuùŋ gbànaŋ nyàŋ gbiŋ.

⁴ E ɗewe gbio sùà, wo Dayà naŋ banè ke nyowo sùà, yèè e mànaàŋ wò kuwa weè wilɛ̀ è naŋ dɛɛ̀.

⁵ E teengaà è yààìŋ wa aŋ fà wi wo jinàaŋ sùà esàɓù maŋ keì naanààŋ wi màŋ lɛ, wò naŋ wi kɛ̀lɛ̀ɛ̀ wɔŋ nyiiŋ gèeɔ̀ sùà yàwi nààŋ Jisɛ̀ Kulaì. È naiŋ yɛ̀mɛ̀ e jòèye esàɓù e tɛ̀ɛ̀tɛ̀ɛ̀ Dayàa sùà.

⁶ E nɔ̀ŋ wilɛ̀ aŋ bàwibà Jisɛ̀ Kulaìɛ sùà, wo Dayà naŋ gè wo Jisɛ̀ Kulaì e fàa dìì yàwi nààŋ Kulaì wèè eiŋ kìlìà e kana e ɗùùnyàŋ àìjɛnɛ̀ɛŋ diɛŋ.

⁷ Wo Dayà naŋ tɛɛ̀ nyɛ̀nɛ̀ŋ wèè e ɗùùnyàŋ ko dòmàŋfeìŋ nɛ sùà, wo tɔɔ̀ maŋ bàne màŋ yaà e tɛ̀ɛ̀tɛ̀ɛ̀ gò kùwìè kò dìauŋ nɛ̀, yèè ke jii siaàŋ wò kuwa weè wi esàɓù Jisɛ̀ Kulaì sùà lɛ.

^8-9 E yìwìà e tɛ̀ɛ̀tɛ̀ɛ̀ Dayàa sùà wò naiŋ joeyè, esàɓù e hààwe sùà. Niŋ gò nyɛ̀nɛ̀ŋ è nɛ̀ŋ bà gbiŋ weè niŋ, e wèè wo nyùùŋ gbiŋ go nàŋ kɛ̀ɛ̀ màŋ nyòngà, esaɓù kɛ̀ è yaà e nɛ̀ŋ kìɛŋ wo Dayà naiŋ niŋ kiɛ̀ŋ.

¹⁰ Wo Dayà manaŋ wèè eiŋ nyɛ̀nɛ̀ŋ maŋ keì sìàŋ, yèè eiŋ nɔ̀ŋ maŋ nyiiŋ gèe wi màŋ sùà e ɗewe kiiɛ̀ wò manaŋ lɛ̀ e teenga gbiŋ. Esaɓùɛ lɛɛ̀ wò naŋ tùɔ̀ŋ wo Jisɛ̀ Kulaì wèè wo wi nyɛ̀nɛ̀ŋ màànààŋ è yààìŋ aŋ bàwibà Jisɛ̀ Kulaì sùà lɛ, wò naŋ wi banè wèè eiŋ kùwìè wɔŋ nyììŋ gèe maŋ kpèè siaŋ, maŋ yè maŋ wò naŋ naàŋ banè tɛ wèè eiŋ miŋ nyɛ̀nɛ̀ŋ maŋ.

È yààìŋ anyùùŋ guùŋ wo Jisɛ̀ Kulaì sùà

¹¹ Nyɛ̀iŋ nààŋ nyùùŋ nyaŋ fè àŋ Juùù nyaŋ, aŋ Juùù nyaŋ heiŋ wa nyààŋ anyuùŋ gò “jàà kpùa”. Kɛɛ àŋ hewa nyààŋ nyiiŋ bi anyuùŋ jàà kpùa. Tɛɛ̀ naŋ tɔ̀ɔ̀ e nɛ̀ɛŋ aŋ felaa nyàŋ nyɛnɛŋ maŋ kpùnaŋ nyiŋ màŋ lɛ. Jàaìŋ jii kɛ̀ ɓòò nìŋ yaà wa e gɔuo sùà.

¹² E teenga lii sùà niŋ nyimààŋ wa è kèè Jisɛ̀ Kulaìɛ. Nìŋ yaà wa anyùùŋ fuɔŋ joo koɓɛ̀ anyùùŋ Ezɔ̀ɛ̀ nyaŋ wo Dayà naŋ tàeɗùù nyaŋ, yèè niŋ fè wa àŋ bàiŋbà kòɓɛ̀ è mìèsùàguùŋ nɛ è yèɛ wò Dayà naŋ wa ɓèmè è ɗààhiì kòɓɛ̀ ànyunùuŋ nyàŋ lɛ. Nìŋ yaà wa e ɗuunyaŋ lɛɛ̀, kɛɛ niŋ kuwà wa kò tùlìè jii bà gbiŋ, yèè niŋ gò wa gbɛ̀ɛ̀ Dayà kɔɔ tòloò pɛɛ.

¹³ Kɛɛ e nɔ̀iŋ nɛ̀ naàŋ aŋ bàiŋbà Jisɛ̀ Kulaì sùà, nyɛ̀iŋ nyàŋ niŋ gò wa gbɛ̀ɛ̀ Dayà kɔɔ tòloò pɛɛ nyàŋ, maŋ sɛ̀ìŋ Jisɛ̀ Kulaì maŋ màiŋ naàŋ bɔ̀ɔ̀mɔ̀ŋ wo Dayà e kɔɔ.

¹⁴ Wo Jisɛ̀ Kulaì wuŋ bi naŋ wi hìɛ̀ŋ ke jii fàa, esaɓù kɛ̀ wò nyɛ̀nɛ̀ŋ aŋ Juùù nyaŋ yaà anyùùŋ nyaŋ fè àŋ Juùù nyaŋ aŋ nɔ̀ŋ anyùùŋ guùŋ. Wò naŋ tòòmò ke kpùnauŋ nɛɛ̀ŋ wèè wo gɔ̀ɛ̀gɔ̀ɛ̀ wɔŋ gboloɔ̀ naŋ wa gòònò anyùùŋ nyɛɛ̀ŋ e tɛɛ, yèè àŋ naŋ wa wùònò e fèemàŋ wɔŋ.

¹⁵ Wò naŋ jàà maŋ Sàwà aŋ Juùù nyaŋ e ɓula yaà maŋ langi miŋ màŋ gbiŋ, wèè wo miinè anyùùŋ tìyèe nyɛɛ̀ŋ wo nyùùŋ guùŋ ke gboòuŋ nɛɛ̀ŋ sùà, wèè wo hiàŋ ke jii fàa.

¹⁶ E fà Jisɛ̀ Kulaìɛ wɔŋ vànèkpaàa diɛŋ naŋ kpɛ̀ɛ̀yɛ̀ e wùònoɛ̀ e fèèmàŋ maŋ zìì tìyèe màŋ, yèè esàɓù e fàauŋ nɛ̀ wɔŋ vànèkpaàa diɛŋ, wò naŋ hìnyɛ̀ŋ maŋ kpùnàŋ tìyèe màŋ koɓɛ̀ guùŋ sùà, yèè wò naŋ nyiŋ kɛ̀lɛ̀ɛ̀ maŋjɛ̀wɛ koɓɛ̀ Dayài.

¹⁷ Wo Jisɛ̀ Kulaì naŋ wa hnè, yèè wò naŋ fè ke mìè gbìàŋ Ebò Siaàŋ e nyaàiŋ dè ke jii fàa koɓɛ̀ nyɛ̀iŋ nyàŋ niŋ fè àŋ Juùù nyaŋ, yèè niŋ gò wa gbɛ̀ɛ̀ Dayà kɔɔ nyàŋ wò naiŋ niŋ woò, yèè wò naŋ niŋ wòò aŋ Juùù nyaŋ naŋ gbɛ̀ɛ̀ Dayà nyàŋ.

¹⁸ Esàɓù Jisɛ̀ Kulaì sùà, aŋ Juùù nyaŋ yèè anyùùŋ nyaŋ fè àŋ Juùù nyaŋ, yàwi nààŋ gbiŋ è naiŋ ɓɛnɛ̀ŋ wèè eiŋ hnàŋ wo Jìnàŋ gunɔ̀ɔŋ sùà ko fɛ̀ɛ̀fèìŋ Dèdaì.

¹⁹ E wèètii, nyɛ̀iŋ nyàŋ niŋ fè àŋ Juùù nyaŋ, niŋ fè ɓɛìŋ ànyùùŋ fuɔŋ joo ɔ̀ɔ̀ ànyùùŋ nèè nyɛiŋ, nìŋ yaà naàŋ aŋ kɛ̀ɛ̀nɛ̀ŋ fuɔŋ nyɛ̀iŋ nààŋ nyùùŋ nɛɛmaŋ nyàŋ gbiŋ koɓɛ̀ guùŋ, yèè aŋ bàiŋbà ke kpòò Dayàa sùà.

²⁰ Nyɛ̀iŋ pɛɛ, nìŋ yaà aŋ bàiŋbà wèè ke saaàŋ, aŋ keela tàeɗùù nyaŋ yaà aŋ wɛ̀ijì nyaŋ naŋ wa tɔ̀ɔ̀tù nyɛ̀lɛ yɛ̀, yèè ke kpɛnɛɛ̀ wèè ke saaàŋ nàŋ yaà wo Jisɛ̀ Kulaì wuŋ bibì.

²¹ Wuŋ nàŋ yaà wo nyùnɔ̀ɔŋ wò kuwa ke saaàŋ gbiŋ dìì, yèè wo nyiŋ nyɛ̀nɛ̀ŋ ke mììnè ke sààŋ zòòlò nɛɛmaŋ wèè Kanaà Dayà.

²² Ke saaàŋ wo Jisɛ̀ Kulaì naŋ nyɛ̀lɛ̀ wèè Dayà nɔ̀ŋ dìì wo Jinàaŋ sùà yɛ, nìŋ yaà aŋ bà nyiŋ bà.