2Time 4 - WƆŊ FƐ̀Ì EBÒ SÌÀŊ DAYÀA

¹ Ko fɛ̀ɛ̀fèìŋ Dayài yaà wo Jisɛ̀ Kulaì, wo yèɔ do naŋ gbàì anyùùŋ nyaŋ yaà wɔŋ nyiiŋ gèeɔ̀ sùà yèè aŋ yè nyaŋ naŋ fɔ̀ nyaŋ, yèè nààŋ wò yaà hinie e kanauŋ nɛ̀ sùà mààŋ wo Kana lɛ̀, mìŋ yààùm woo,

² wèè maŋ wòò ke miè gbìaàŋ. Jèèe nyiŋ woo sèè pɛɛ è naŋ nɔ̀ŋ e teenga kɛnɛɛ̀ ɔ̀ɔ̀ è go nɔ̀ŋ è teenga kɛnɛɛ̀ diɛŋ, wèè maŋ de anyùùŋ ke dòmàŋ diɛŋ, maŋ nyiŋ kìɛ̀ŋ mìè gòo, yèè maŋ nyiŋ kìɛ̀ŋ maŋ jii nyingè, nààŋ mùŋ kaà nyiìŋ maŋ jii tɔumtɔ̀ùm sùà lɛ.

³ E teenga do nàŋ hnè, anyùùŋ naàŋ mɔ̀nɔ̀ŋ àŋ do kùmìàŋ è kàà tɔ̀ɔ̀nyaàŋ, kɛɛ àŋ do nàŋ dè e ɗèwè nyiŋ biɛ̀ maŋjɛ̀wɛ, àŋ do nàŋ kàmè aŋ kààmɔɔŋ wèè aŋ nyiŋ wòò e yèɛ do nyiŋ kai nàŋ fɔ̀ɔ̀yɛ̀ jii lɛ̀.

⁴ Àŋ do nàŋ fè e tɔ̀ɔ̀nyaàaŋ jɛwɛ, wèè aŋ kumìàŋ maŋ kàɓànè gò kɛ̀ɛ̀nɛ̀ŋ jiikɛ̀ɛ,

⁵ kɛɛ kuwa ke jii mɔɛ̀ŋ maŋ keì ɗewe gbiŋ sùà, yèè e nɔ̀ŋ e keì jiium wèè muŋ kùwà e keì nyìnga. Tòmò nyìnga, ko wòò Ebò Siaàŋ, yèè muŋ nyɛ̀nɛ̀ŋ e tòmo mɔ̀ɛ̀ tɛ̀ɛ̀ mààŋ wo ɓɔ̀ìjɔ̀à Dayà.

⁶ E weè miàŋ, e teengaà è haì wèè aim gììyà saaà. E teengaà è naàŋ haì wèè ka jòà ɗuunyaŋ.

⁷ Kà nyɛ̀nɛ̀ŋ e yèɛ gbiŋ mìŋ naŋ ɓɛnɛ̀ŋ e dùaŋ lɛɛ̀ sùà lɛ, kà dùàŋ ke dòmaàŋ ke jùà, yèè kà jàà e hààweɛ̀ kùàŋ dìì.

⁸ Eɓìèmàŋjɛ̀wɛ̀ tɛɛ̀ ke ɓɔ̀ɗì kana kòò kè yaà naàŋ bànè hàa nyiŋ e weèim esaɓù kɛ̀ wo Dayà weèim jàà kùàŋ dìì wèè ka nɔ̀ŋ wo nyùùŋ tɔ̀ɔ̀nyaàŋ, ke yèɛ wo Kanaà, wo nyuùŋ gbàì tɔ̀ɔ̀nyaàŋ, wò doim nàŋ kiɛ̀ŋ ke ɗɔɔ yii diɛŋ yɛ̀, yèè e naàŋ nɔŋ nɔ̀ŋ miàŋ guùŋ, kɛɛ è do naŋ nɔ̀ŋ wèè aŋ yè nyaŋ gbiŋ naŋ kùwò maŋ jii e manaŋ sùà wèè e hnàuŋ nɛ̀ lɛ.

Maŋ mìè gbòa titi

⁹ Nyììneè sùà muŋ hnàŋ ko nɛ̀ɛ̀ŋ miìŋ e teenga kpuu sùà.

¹⁰ Wo Dimà naŋ wa sɛ̀ɛ̀ e mànàŋ e ɗuunyaàŋ lɛɛ̀ sùà yèè wò naim gììyè kɛ̀ɛ, wò naŋ kɔ̀ ko Tɛsèlonikà. Wo Kùlìsɛɛ̀ŋ naŋ kɔ̀ ko Gàlatìà, yèè wo Taitɔ̀ naŋ kɔ̀ ko Dàmatià.

¹¹ Wo Luù wuŋ guùŋ nɔŋ naŋ wa jèè ko nɛ̀ɛ̀ŋ miìŋ. Kàmè wo Mài muŋ hiàuŋ esaɓù kɛ̀ wòim ɓɛ̀nɛ̀ŋ kpùùmaŋ e tòmoɛ̀ sùà.

¹² Mìŋ naŋ tùɔ̀ŋ wo Tachikɔ̀ ko Ɛfesɔ̀.

¹³ Sèè mùŋ nɔ̀ŋ hinie, hìaàŋ wɔŋ kùmà miɔ̀ŋ mìŋ naŋ jùùyè wo Kulepɔ̀ ko Toà wɔŋ. Hìaàŋ maŋ fɛ̀ì Dayà maŋ miiŋ pɛɛ, ɓɔɔɓɔɔ ngèè maŋ fɛi bàànè fɛ̀ì yilì maŋ.

¹⁴ Wo zòòbuuɔ̀ Àlèzanàŋ naim wa jàà keì nyìnga, wo Kanaà douŋ nàŋ kìɛ̀ŋ e jìwààjɛ̀wɛ̀ɛ wèè e yèɛ wò naŋ nyɛ̀nɛ̀ŋ lɛ.

¹⁵ Yɛ̀mɛ̀ muàŋ bi diɛŋ e weèuŋ, e fèfoo wò naŋ gììyè ke mìè gbìaàŋ maŋhɛɛ e waasu sùà.

¹⁶ Wo nyùùŋ gbiŋ gòim wa kpuumàŋ e teenga jiɛ̀jiɛ̀ɛ mìŋ naŋ kɔ̀ è gbàì dìì lɛ, àŋ gbiŋ naim wa gììyè kɛ̀ɛ. Wo Dayà ɓɔ̀ wò kuwià nyiŋ niŋ faàŋ!

¹⁷ Kɛɛ wo Kanaà naim wa nɔ̀ŋ maŋjɛ̀wɛ yèè wò naim kìɛ̀ŋ e gààŋ, weètii mìŋ naŋ wa ɓɛnɛ̀ŋ wèè ka wòò ke miè gbìaàŋ gbiŋ koɓɛ̀ anyùùŋ nyaŋ gbiŋ fè àŋ Juùù nyaŋ wèè aŋ nyiŋ kòmàŋ, yèè mìŋ naŋ wa yɛ̀mɛ̀ e jòèye, aŋ gòim wa gè nyààŋ diɛŋ wèè àŋ nyàa nyaŋ aim jìwà.

¹⁸ Wo Kanaà doim nàŋ joeyè woim gè maŋ keì naanààŋ sùà, e kìlà woim kɔ̀à e Kànà àìjɛnɛ̀uŋ nɛ̀ sùà. Tɔ̀ e jòòwo nɔ̀ŋ e weèuŋ wèè julɔfɔ yèè jùlɔ̀fɔ̀! Àmiinàŋ.

Maŋ zùùmo dìàmaŋ màŋ

¹⁹ Mìŋ naŋ tùɔ̀ŋ maŋ zùùmo koɓɛ̀ wo Pikà yaà wo Àkuilà yèè koɓɛ̀ ke kpòò Ɔ̀nesifelɔ̀ɛ.

²⁰ Wo Ɛ̀lesitɔ̀ naŋ jòò ko Kɔliìŋ, yèè mìŋ naŋ jòò wo Tofimù ko Miletù, esaɓù kɛ̀ wo yaà wa siinyɛŋ.

²¹ Nyɛnɛ̀ŋ e tɛ̀ɛ̀tɛ̀ɛ̀ɛ gbiŋ mùŋ naŋ ɓɛ̀nɛ̀ŋ nyɛ̀nɛŋ lɛ, wèè muŋ hnàŋ pangàà ke vuùɛ. Wo Ɛɓulù, wo Pudɛ̀ìŋ, wo Linù, yèè wo Keladià naŋ tùɔ̀ŋ maŋ zùùmo nyiŋ màŋ, e kpùlìà aŋ wùìya nyaŋ gbiŋ.

²² Wo Kanaà Jisɛ̀ yɛmɛ̀um diɛŋ. Tɔ̀ e tɛ̀ɛ̀tɛ̀ɛ̀ Dayàa nɔ̀ŋ nyɛ̀ìŋ gbiŋ maŋjɛ̀wɛ.