2Pììlɛ 3 - WƆŊ FƐ̀Ì EBÒ SÌÀŊ DAYÀA

Wo Jisɛ̀ do ɓɛìŋ nàŋ hnè

¹ Nyɛ̀iŋ nààŋ dàwi mànaim nyàŋ, wɛɛ̀ŋ nàŋ yaà wɔŋ fɛi dìà tìyèeɔ̀ mìŋ naŋ sìngè ko nɛ̀ɛ̀iŋ niìŋ wɔŋ. Maŋ fɛ̀ì tìyèe mɛɛ̀ŋ sùà mìŋ naŋ fɛ̀ɛ̀ wèè kaiŋ sìà ke di sengèì maŋ gòngoiŋ màŋ sùà wèè naŋ jilɛ̀ŋ esaɓù kɛ̀ mìŋ naiŋ dè maŋ keì mɛɛ̀ŋ jii.

² Mìŋ manaŋ naŋ jàà jii e nyaàiŋ dè maŋ mìè maŋ aŋ wɛ̀ijì nɛɛmaŋ nyàŋ naŋ wa gbòò e gɔuo sùà maŋ yaà maŋ miè gbìaŋ màŋ e yìwìà wo Kanaà yèè wo Nyuùŋ Jòèyeɔ̀ sìwè maŋ yè maŋ aŋ keela tàeɗùùiŋ nyaŋ naiŋ wa fè maŋ.

³ E jiɛ̀jiɛ̀ɛ nàŋ yaà, nìŋ kuwa naŋ nyìmàŋ kɛ̀ maŋ ɗɔɔ dìàmaaŋ màŋ sùà anyùùŋ bà do nàŋ hnè aŋ yè nyaŋ naàŋ gòngò è keì bà gbiŋ sɔɔ̀ e ɗèwe naanààaŋ nyiŋ bi kuwa lɛ̀. Àŋ doiŋ nàŋ hiilè

⁴ yèè aiŋ dawè nyààŋ, “Wò naŋ wa ɓèmè e ɗààhiì wààŋ wò yaà hinie, wo gò yɛi wa woò? Kòò wò yaà? Aŋ nèwàènèwe wi nyàŋ naàŋ kpɛ̀ɛ̀yɛ̀ fàa tɛ. Kɛɛ maŋ keì maŋ gbiŋ kòò màŋ yaà nɔŋ e ɗèwè guùŋ nɛ màànààŋ nɔŋ è yaà wa e yìwìà ko tɔ̀ɔ̀tù bàànè e ɗuunyaàŋ.”

⁵ Àŋ do tɛɛ̀ nàŋ woò e fèfoo àŋ manaŋ aŋ nyɛɛnɛ̀ŋ kɛ̀ e gɔuo sùà wa wo Dayà naŋ wa nɔŋ gbòò yèè ke nyiliɛ̀ yaà e dììɛ naŋ nɔ̀ŋ. E dììɛ naŋ fòlò e wùìyè sùà yèè e wùìyè wò naŋ bàànè e dìì,

⁶ yèè è yaà wa ɓɛìŋ e wùìyè, e wuiyè jòwa gbeeɛ̀ naŋ wa kpɛ̀ɛ̀yɛ̀ e ɗuunyaŋ gɔuɛ̀ lɛ.

⁷ Kɛɛ ke mìè gbòà guùŋ yii wo Dayà naŋ yɛi wa gbòò le, naŋ kìlìè maŋ àìjɛnɛ̀ŋ maŋ yèè e dìì lɛɛ̀ nàaŋ kùàŋ feìŋ wèè e hmɔ̀ɔ̀ŋ go miŋ nàŋ pɔɔpɔ̀ɔ̀, e jèèsùà ke ɗɔ̀ɔ̀ gbài kitiɛ̀ diɛŋ wo Dayà wo gbàì anyuùŋ gò nyìmàŋ Dayà nyaŋ e kìlà wo nyiŋ sìà e hmɔ̀ɔ̀ŋ wa nàwèè.

⁸ Kɛɛ nyɛ̀iŋ nààŋ dàwi mànaim nyàŋ, ɓɔ̀ nìŋ nyɛɛnɛ̀ŋ è kèì guùŋ. Tiŋ nàŋ yaà, e fèemàŋ gòòno gbiŋ fè kò fɛ̀ɛ̀fèìŋ Kanaà wèè è fèèmàŋ kè gɔ̀ɛ̀ guùŋ yèè màŋ doa tààsùùŋ guùŋ. Ko nɛ̀ɛ̀uŋ niìŋ, maŋ kèì ɗì tìyèe miiŋ naŋ seenè kpaŋ.

⁹ Wo Kanaà fè dɔɔnɔ̀ŋ wèè wo nyɛ̀nɛ̀ŋ è nɛ̀ɛŋ wò naŋ ɓèmè ɗààhiì wèè wo nyɛ̀nɛ̀ŋ lɛ, màànààŋ ànyùuŋ bà gongà lɛ. Kɛɛ wò kuwo jii weèiŋ esaɓù kɛ̀ wo manàŋ wèè wò nyùùŋ gbiŋ fà. Kɛɛ wò manaŋ nyùùŋ gbiŋ fè maŋ tùwo naanààuŋ màŋ jɛwɛ.

¹⁰ Kɛɛ ke ɗɔ̀ɔ̀ Kanaà do nàŋ hnè mààŋ e ɗeweɛ̀ wo nyuùŋ wùa hnàŋ lɛ. Ke ɗɔɔ bi diɛŋ maŋ àìjɛnɛ̀ŋ maŋ do nàŋ jɔɔnɔ̀ŋ e giimè gbee sùà kpeiŋ manɛ̀ŋ sìàŋ sìàŋ àìjɛnɛ̀ŋ maŋ do nàŋ hèwè maŋ pɔɔpɔ̀ɔ̀, e kìlà e nɛ̀ŋ gbiŋ naŋ nɔ̀ŋ e dììɛ diɛŋ e jɔɔnɔ̀ŋ.

¹¹ Nààŋ manɛ̀ŋ mɛɛ̀ŋ gbiŋ do nàŋ yɛ̀mɛ̀ e pɔ̀ɔ̀pɔɔ e ɗewe mààŋ tɛɛ̀ sùà lɛ, kiìŋ ànyuùŋ kpùuŋ ziì nìŋ kuwa wèè naŋ nɔ̀ŋ? Maŋ nyiiŋ màŋ nɔ̀ŋ nɛɛmaŋ sùà, yèè niŋ tulìà miŋ wo Dayà.

¹² Nààŋ nìŋ yaà fùlìè ke ɗɔ̀ɔ̀ Dayàa wèè ke haì lɛ, nyɛ̀nɛìŋ e yèɛ gbiŋ nìŋ naŋ ɓɛ̀nɛ̀ŋ nyɛ̀nɛŋ lɛ̀ wèè ke zumò hnàaŋ ke ɗɔɔɛ̀ maŋ àìjɛnɛ̀ŋ maŋ do nàŋ hèwè maŋ pɔɔpɔ̀ɔ̀, yèè e zùzù do nàŋ sàngèè manɛ̀ŋ sìàŋ sìàŋ àìjɛnɛ̀ŋ maŋ.

¹³ Kɛɛ è fòlòìŋ e nɛ̀ɛŋ wo Dayà naŋ wi sɔ̀ dèè lɛ, maŋ àìjɛnɛ̀ŋ jɛ̀ì yèè e diì jɛ̀ì, e yèɛ e tɔ̀ɔ̀nyaàŋ do nàŋ nɔ̀ŋ diɛŋ lɛ̀.

¹⁴ E wèètii nyɛ̀iŋ nààŋ wùìyaim nyàŋ, nààŋ nìŋ yaà fùlìè ke ɗɔɔ bi, nyɛ̀nɛìŋ e yèɛ gbiŋ nìŋ naŋ ɓɛnɛ̀ŋ lɛ wèè niŋ zɛ̀nɛ̀ŋ, yèè e tɔ̀mɛ ɓɔ̀ è nɔ̀iŋ fɛ̀ɛ̀fèìŋ Dayà, e kìlà naŋ nɔ̀ŋ jii fàa sùà koɓɛ̀ Dayài.

¹⁵ Ɓɔ̀ nìŋ nyɛɛnɛ̀ŋ kɛ̀ wo Kanaà yaà kùwa sùà kè jii esaɓù kɛ̀ wò manaŋ wo nyùùŋ gbiŋ yɛ̀mɛ̀ e jòèye, màànààŋ nɔŋ wo wùìya mànaŋ wiɔ̀ Pɔɔ̀ naŋ sìngè ko nɛ̀ɛ̀iŋ niìŋ, wò naŋ tòòmò e jiikɛ̀ɛɛ̀ wo Dayà nauŋ fè lɛ.

¹⁶ Tɛɛ̀ wò naŋ wòò maŋ fɛi sìngauŋ màŋ gbiŋ sùà, sèè wò singe e ɓɛ̀ è ɗì keì. Maŋ keì nyìnga bà yaà maŋ fɛiuŋ màŋ sùà maŋ yè maŋ anyuùŋ gò nyìmàŋ nɛ̀ŋ, yèè aŋ fè jɛ̀ì kòɓɛ̀ guùŋ e kìlà àŋ gè e nɛ̀ŋ wòòuŋ nɛ̀ dao. Màànààŋ nɔŋ àŋ nyɛnɛŋ maŋ mìè gbòa màŋ bà miŋ sùà wɔŋ fɛ̀ì Dayàa sùà lɛ. Weètii àŋ hiàŋ maŋ keì pɔ̀ɔ̀pɔ̀ɔ̀ nyiŋ bi.

¹⁷ Kɛɛ nyɛ̀iŋ nààŋ wùìyaim nyàŋ, nàŋ naàŋ tɛɛ̀ gbiŋ nyìmàŋ, yɛ̀mɛìŋ nyɛ̀iŋ bi diɛŋ. Wèè anyuùŋ gò nɔ̀ŋ màŋ sàwà dìì goiŋ nàŋ gè kè dòmaŋ siaŋ diɛŋ.

¹⁸ Kɛɛ kùnoìŋ nɔŋ dɛ̀ɛ e tɛ̀ɛ̀tɛ̀ɛ̀ sùà yaà e jììkɛ̀ɛ̀ Kanaà, yèè wo Nyuùŋ Jòèyeɔ̀ Jisɛ̀ Kulaì sùà. E jòòwo nɔ̀ŋ ko nɛ̀ɛ̀uŋ niìŋ nàaŋ yèè julɔfɔ. Àmiinàŋ.