2Pììlɛ 1 - WƆŊ FƐ̀Ì EBÒ SÌÀŊ DAYÀA

¹ E yìwìà miàim Saamɔ̀ŋ Pììlɛ sìwè, nàŋ yaà sìngìè wɔŋ fɛi wɛɛ̀ŋ. Mìŋ yaà wo ɓɔìjɔ̀à yèè wo yèɔ yaà keela tàeɗùù wèè Jisɛ̀ Kulaì. Mìŋ yaà sìngìè koɓɛ̀ anyùùŋ nyaŋ aŋ yè nyaŋ esàɓù e tɔ̀ɔ̀nyààŋ Dayàa sùà yaà wo Nyuùŋ Jòèyeɔ̀ Jisɛ̀ Kulaì, àŋ naŋ nyiŋ fè e hààwè jii nyiŋ nɛ̀ mààŋ e je wilɛ̀ nyaŋ.

² Tɔ̀ wo Dayà yèè wo Jisɛ̀ Kulaì kiɛ̀iŋ e tɛ̀ɛ̀tɛ̀ɛ̀ yèè ke jii fàa dìà sùà esaɓù kɛ̀ nàŋ nyìmàŋ wo Dayà yèè Jisɛ̀ Kulaì wo Kana wiɔ̀.

E nyàànè Dayàa yèè e kèì jiiuŋ nɛ̀

³ E nɛ̀ɛ̀màŋ Dayàa, e gaàiŋ nɛ̀ è wi kìɛ̀ŋ e nɛ̀ɛŋ gbiŋ è mànàìŋ wèè eiŋ nɔ̀ŋ wɔŋ nyiiŋ gèeɔ̀ fɔɔyɛ̀ Dayà jii wɔ̀ŋ sùà, esaɓù kɛ̀ eiŋ nyìmàŋ wo yèɔ naŋ wi nyààŋ wèè wo wi gòònò e jòòwouŋ nɛ̀ yèè e tɛ̀ɛ̀tɛ̀ɛ̀uŋ nɛ̀ e fèemàŋ wɔ.

⁴ E ɗèwè guùŋ nɛɛ̀ sùà wò wi kìɛ̀ŋ e kìɛ̀ŋ è jii gbeeuŋ nɛ̀ wò naŋ wi sɔ̀ dèè lɛ, e wèè kɛ̀ esàɓù maŋ kìɛŋ mɛɛ̀ŋ sùà, naŋ fòlà maŋ gòngò wùànàŋ keì pɔ̀ɔ̀pɔ̀ɔ̀ sùà maŋ yaà e ɗuunyaàŋ maŋ, yèè naŋ hnàŋ e nɔ̀ŋ kìì Dayàa sùà naŋ nɔ̀ŋ bàiŋbà.

⁵ Wèè esàɓù guùŋ nɛɛ̀ sùà, fɛ̀ɛìŋ niŋ tooyà e hààweiŋ nɛ̀ e tɛ̀ɛ̀tɛ̀ɛ̀, yèè tòòyaìŋ e tɛ̀ɛ̀tɛ̀ɛ̀iŋ nɛ̀ e jiikɛ̀ɛ,

⁶ yèè e jiikɛ̀ɛ̀iŋ nɛ̀ tòòyaìŋ niŋ nyɛ̀iŋ bi yɛ̀mɛ̀ diɛŋ, e diɛŋ yɛ̀mɛiŋ nɛ̀ tòòyaìŋ niŋ ke jii kùwa, yèè ke jii kùwaiŋ nɛɛ̀ŋ tòòyaìŋ nyiŋ maŋ nyiiiŋ màŋ kìla koɓɛ̀ Dayà,

⁷ yèè maŋ nyiiiŋ màŋ kìla koɓɛ̀ Dayà tòòyaìŋ niŋ e kpɛ̀ɛŋ wèè anyuùŋ hààwe dàwiiŋ nyàŋ, yèè e kpɛ̀ɛiŋ nɛ̀ wèè anyuùŋ hààwe dàwiiŋ nyàŋ tòòyaìŋ niŋ e mànaŋ.

⁸ Maŋ keì mààŋ mɛɛ̀ŋ nìŋ kuwa naŋ nyɛ̀nɛ̀ŋ, sèè nìŋ nyɛ̀nɛ̀ŋ miìŋ yèè nìŋ nyɛ̀nɛ̀ŋ miìŋ zimgbe zimgbe, è do nàŋ nyɛ̀nɛ̀ŋ naŋ nɔ̀ŋ kpala kpala, niŋ naàŋ nɔ̀ŋ ànyuùŋ jɛ̀kɛ e nyaàiŋ dè e jiikɛ̀ɛɛ̀ nìŋ kuwa wèè wo Kana wiɔ̀ Jisɛ̀ Kulaì lɛ.

⁹ Kɛɛ sèè niŋ gò miŋ kɛɛnɛ̀ŋ, nìŋ yaà mààŋ wo nyuùŋ gò yɛ̀mɛ̀ è dìì kòɓɛ̀ dii, nìŋ naŋ zììlè fɛ̀ɛ̀. Yèè nàŋ nyɛɛnɛ̀ŋ kɛ̀ wo Dayà wòiŋ joeyè e yìwìà maŋ jùumù gɔu gɔ̀ùiŋ màŋ sùà.

¹⁰ E wèètii nyɛ̀iŋ nààŋ wùìyaim nyàŋ, fɛ̀ɛìŋ niŋ ɓemè e nyàànè Dayàa wò naiŋ nyààŋ yèè wò naiŋ tàeɗùù wèè naŋ nɔ̀ŋ e kèì jiiuŋ nɛ̀, e keì e yèɛ fèiŋ yèwà jii lɛ̀. Sèè nìŋ nɔ̀ŋ yɛi nyinie, niŋ naàŋ duonò wèè naŋ gììyà è hààweiŋ nɛ̀ kɛ̀ɛ.

¹¹ E ɗèwè guùŋ nɛɛ̀ sùà wo Dayà doiŋ nàŋ gè nyààŋ diɛŋ wèè naŋ nɔ̀ŋ e Kànàŋ nyiiŋ gèe gò jùà Kana wiɔ̀, wo Nyuùŋ Jòèyeɔ̀ Jisɛ̀ Kulaìɛ sùà.

¹² Mìŋ doiŋ nàŋ nɔ̀ŋ dììka sùà maŋ keì mɛɛ̀ŋ jii, jòòpɛɛ nàŋ nyìmàŋ maŋ gbiŋ tɛ, yèè nìŋ sia naàŋ gbàùŋ gbàùŋ e tɔ̀ɔ̀nyaàŋ nìŋ naŋ yɛmɛ̀ lɛ sùà.

¹³ Kà gongò kɛ̀ è yaà nɔŋ e tɔ̀ɔ̀nyaàŋ wèè ka nɔ̀ŋ dììka sùà maŋ keì mɛɛ̀ŋ maŋ jiiiŋ màŋ diɛŋ e teengaà mìŋ yaà nɔŋ ke kpùnaàŋ sùà lɛ.

¹⁴ Kà nyìmàŋ kɛ̀ mìŋ yaà hninie ka jòà ke kpùnaàŋ sààmɛ màànààŋ wo Kana wiɔ̀ Jisɛ̀ Kulaì naim woò janjai lɛ̀.

¹⁵ Mìŋ do nàŋ nyɛ̀nɛ̀ŋ e yèɛ mìŋ naŋ ɓɛnɛ̀ŋ lɛ, wèè ka nyɛ̀nɛ̀ŋ e ɗewe wèè naŋ jàà maŋ keì mɛɛ̀ŋ jii e teenga gbiŋ sèè mìŋ fà.

Aŋ sèì nyaŋ yaà fɛɛ̀feìŋ àŋ naŋ yɛ̀mɛ̀ e jòòwò Jisɛ̀ Kulaìɛ nyàŋ

¹⁶ Nààŋ è naiŋ wòò e kèì wo Kana wiɔ̀ Jisɛ̀ Kulaì, e nyaàiŋ dè e gaàuŋ nɛ̀ yèè nààŋ wò kɛɛ̀ ɓɛìŋ lɛ, maŋ dɔùŋ kɛ̀ɛ̀jii nààŋ wo nyùuŋ bà gò ɓùlà, kɛɛ e fɛ̀ɛ̀ yàwi bi lɛ̀ naŋ yɛ̀mɛ̀ e gààŋ tɔ̀ɔ̀nyaàuŋ nɛ̀.

¹⁷ È yaà wa fɛɛ̀feìŋ wɔŋ tòò nɛɛmaàŋ diɛŋ e teengaà wo Dayà, wo dèdaà nauŋ fè e ɓɛ̀ɛ̀jàa yèè e jòòwo. Ke mìè naŋ hnè ko nɛ̀ɛ̀uŋ niìŋ e yìwìà koɓɛ̀ Dayà kùwìè e ɓɛ̀ɛ̀jàa gbeeɔ̀, kè naŋ woò wààŋ, “Wo jɔ̀àfelaa miɔ̀ŋ wɛɛ̀, wo yèɔ mìŋ manaŋ wɔ̀.”

¹⁸ Yàwi bi naŋ kòmò ke mìè yɛɛ̀ e yìwìà ko àìjɛnɛ̀ŋ, e teengaà è yààìŋ ko nɛ̀ɛ̀uŋ niìŋ wɔŋ tòò nɛɛmaàŋ diɛŋ lɛ̀.

¹⁹ Ke mìè gbòà aŋ wɛ̀ijì nyaŋ naŋ ngèè ɓɛìŋ tòòyè jii nyingè wi màŋ. Nìŋ do nàŋ nyɛ̀nɛ̀ŋ tɛ̀ɛ̀ wèè naŋ yɛ̀mɛ̀ e kèì ke mìè gbìaŋ bi dììo sùà, esaɓù kɛ̀ kè yaà mààŋ e laumpò mɛ̀ɛŋ ke nyìwì sùà e jèèsùà e nììɛ sìà, yèè e gbòlòùŋ wɔŋ ɗù màŋ nyiìŋ tɛ̀tɛ̀ɔ e mɛ̀ɛ̀ŋ maŋ jiiiŋ màŋ sùà.

²⁰ Tɛɛ̀ gbiŋ sùà, jàaìŋ jii kɛ̀ yàwi nyɛɛ̀ŋ bà gbiŋ e fèiŋ ɓɛ̀nɛ̀ŋ fàsàì è mìè nyààŋ àŋ wɛ̀ijì nyaŋ wɔ̀ŋ fɛ̀ì Dayàa sùà è gààŋ yàwi bi lɛ̀ sùà.

²¹ E mìè nyààŋ wɛ̀ijì gbiŋ gò wa nɔŋ e yìwìà è gòngò nyiiŋ bi sùà, kɛɛ wo Jìnàŋ Dayàa nàŋ yaà wa tòòmò anyùùŋ nààŋ àŋ yaà wa fèe sùà ke miè gbìaàŋ e yìwìà Dayà.