2 Kɔliìŋ 1 - WƆŊ FƐ̀Ì EBÒ SÌÀŊ DAYÀA

¹ E yìwìà miàim Pɔɔ̀ sìwè, wo yèɔ yaà wo keela tàeɗùù wèè Kulaì Jisɛ̀ esàɓù e kèè jìì Dayàa sùà wɔ, yèè e yìwìà wo wùìya wiɔ̀ Timetè sìwè, nàŋ yaà sìngìè koɓɛ̀ ke gbòò anyuùŋ hààwe nyàŋ kè yaà ko Kɔliìŋ yɛ, yèè koɓɛ̀ anyùùŋ nɛɛmaŋ nyàŋ gbiŋ ko Àkaayà.

² Tɔ̀ wo Dayà wo Dèda wiɔ̀ yaà wo Kanaà Jisɛ̀ Kulaì kiɛ̀iŋ e tɛ̀ɛ̀tɛ̀ɛ̀ yèè ke jii fàa.

Wo Pɔɔ̀ naŋ gè wo Dayà ke sɛ̀

³ Tɛ̀nɛ̀ŋ wiìŋ wo Dayà wo Dèdà Kana wiɔ̀ Jisɛ̀ Kulaìɔ wo Dèdà ke nyowoɔ̀, wo Dayàa e kpùùmaŋ gbiŋ folo sìwè wɔ!

⁴ Wò naŋ wi kpuumò maŋ keì nyìnga wi màŋ gbiŋ sùà, wèè kɛ̀ yàwi pɛɛ eiŋ kpùùmàŋ anyùùŋ nyaŋ nyiŋ pɛɛ àŋ yaà maŋ keì nyìnga gɛ̀wɛɛ̀ gbiŋ sùà nyaŋ. È yààìŋ tòòmò e kpùùmàŋ guùŋ nɛ yàwi bi è naŋ yɛmɛ̀ e yìwìà Dayà sìwè lɛ.

⁵ Màànààŋ nɔŋ è yààìŋ aŋ bàiŋbà wèè maŋ keì nyìngà zimgbe màŋ wo Jisɛ̀ Kulaì naŋ kɔ̀ɛ̀ sùà maŋ, esàɓù Jisɛ̀ Kulaì sùà yàwi pɛɛ è yaà aŋ bàiŋbà wèè eiŋ kìɛ̀ŋ anyùùŋ e kpùùmaŋ e yìwìà e kpùùmàŋ gbèè Dayàa sùà.

⁶ Sèè è mɔɔnɛ̀ìŋ, è yaà wèè e kpùùmaiŋ nɛ̀, yèè e jòèyeiŋ nɛ̀, sèè eiŋ yɛmɛ̀ìŋ e kpùùmaŋ, kɛ̀ nyɛ̀iŋ pɛɛ nàŋ yɛ̀mɛ̀ kpùùmaŋ, yèè e gààŋ wèè naŋ kɔ̀ɛ̀ maŋ kèì nyìngà guùŋ maŋ ke jii nyingè diɛŋ màànààŋ è naŋ miŋ kɔ̀ dìì yàwi pɛɛ lɛ̀.

⁷ Wèètii ke jii tùlia wiɛ̀ wèè nyɛ̀iŋ ke fè mɛɛmɛ̀ɛ̀ŋ gbiŋ, èiŋ nyìmàŋ kɛ̀ nààŋ nɔŋ nìŋ naŋ nɔ̀ŋ bàiŋbà wèè maŋ keì nyìnga wi màŋ è naiŋ kɔ̀ɛ̀ sùà maŋ, nìŋ yaà aŋ bàiŋbà wèè ke jii tùliaà è yɛmɛ̀ìŋ nɛ.

⁸ Nyɛ̀iŋ nààŋ wùìya wi nyàŋ, è manaŋ wèè e dè maŋ jiiiŋ màŋ, koɓɛ̀ e keì nyìngaà è naŋ kùwò maŋ kpàlàùŋ kpàlàùŋ Eesìà maŋ sùà lɛ. E keì nyìngaà naŋ wi hnè diɛŋ lɛ̀, è naŋ dɛɛ̀ yèè è naŋ wi mùŋgò diɛŋ e jèèsùà e bɔ̀mɔ̀ŋ nyiiŋ gèe e wi wùìyà.

⁹ È naŋ wa naàŋ nɔŋ gongò kɛ̀ àŋ wi naàŋ kpɛ̀ɛ̀yɛ̀ gè nyààŋ diɛŋ wèè e fà. Kɛɛ tɛɛ̀ naŋ kaaìŋ wèè e go nàŋ tùlìè yàwi bi jii, sɔɔ̀ Dayà wo yèɔ gè e fàaà dìì wɔ.

¹⁰ E yìwìà e kèì nyìngà fàa lɛɛ̀ sùà. Wò naŋ wi joeyè, yèè wò do wi nàŋ joeyè, e kìlà euŋ sìà jii tùlia sùà, kɛ̀ wò do wi ɓɛìŋ nàŋ joeyè.

¹¹ Nyɛ̀iŋ pɛɛ kpùùmaìŋ niŋ zoolò weè wi, wèè anyuùŋ zimgbe aŋ gè Dayà ɓaikà wèè wi, wèè e kìɛɛ̀ŋ wò naŋ wi fè e yìwìà maŋ zòòlo zimgbe màŋ wò naŋ jàà kùàŋ dìì maŋ.

Wo Pɔɔ̀ naŋ vɔ̀ɔ̀nɔ̀ŋ e ɗèweuŋ nɛ̀

¹² E zɔlɔ̀ naŋ wi dìè jii, esaɓù kɛ̀ e gòngo wilɛ̀ è wi nyɛ̀nɛ̀ŋ è nyìmàŋ kɛ̀ maŋ kpèè wi màŋ e nyaàiŋ de manɛ̀ŋ maŋ wɔŋ nyiiŋ gèe wiɔ̀ sùà e ɗuunyaŋ lɛɛ̀, kaikai ngèè e mɔ̀ɔ̀nɔɛ̀ŋ yèè e jìlɛɛ̀ŋ yaà wì e fèemàŋ yàwiiŋ nɛ̀, è yaà e gààŋ nɛ̀ɛ̀màŋ Dayàa dìì. E gò e yìwìà è jììkɛ̀ɛ̀ nyuùŋkpùuŋ sùà.

^13-14 Wɔŋ fɛiɔ̀ nìŋ kpɛnɛŋ naŋ wuŋ jàà jii wɔ̀ŋ, wuŋ nɔŋ è singe ko nɛ̀ɛ̀iŋ niìŋ. Jòòpɛɛ nàŋ wi naàŋ jàà jii tòloò, mìŋ kuwa jii tùlia kɛ̀ nìŋ do wi nàŋ jàà jii e jùà jɛ̀wɛ̀ kpɛlɛmɛɛŋ, wèè kɛ̀ ke ɗɔɔɛ̀ wo Kanaà Jisɛ̀ Kulaì hnàŋ lɛ, nàŋ ɓɛ̀nɛ̀ŋ gè zɔlɔ̀ weè wi nààŋ yàwi pɛɛ è do nàŋ gè zɔlɔ̀ weèiŋ nɛ̀.

¹⁵ Tɛɛ̀ mìŋ naŋ tùlìè jii kpeiŋ yèè e ɗèwe jiɛ̀jiɛ̀ mɛ̀ naŋ nɔ̀ŋ wèè kaiŋ hìàŋ a jààme, wèè niŋ yɛmɛ̀ e kèì sìàŋ sùà tìyèe.

¹⁶ Mìŋ naŋ ɗewè wèè kaiŋ hìàŋ e jààme sèè mìŋ nɔ̀ŋ kɔ̀ɔ̀yɛ̀ ko Mɛ̀sèdonià, yèè sèè mìŋ nɔ̀ŋ ɓɛìŋ kɛ̀ɛ sùà, e wèè naim fè kpùùmaŋ wèè e kààiŋ mɛ̀ ko Jùdià.

¹⁷ Nìŋ naŋ gongò kɛ̀ miŋ fè dai ɓɛ̀nɛ̀ŋ bànè kè jii miɛ̀ŋ wèè è nɛ̀ɛŋ mìŋ manaŋ ka nyɛ̀nɛ̀ŋ lɛ? Ɓàà zà mìŋ yaà mààŋ wo nyuùŋ kpùnuɔ̀ŋ woà wààŋ, “Hɛ̀ɛɛ̀ŋ,” ɔ̀ɔ̀ “Kpele, kpele” wèè wo nyɛ̀nɛ̀ŋ nyùuŋ bà jiiuŋ nɛɛ̀ŋ fà?

¹⁸ Màànààŋ nɔŋ wo Dayà gbaì tɔ̀ɔ̀nyaàŋ lɛ, e ɗààhiì mɛ̀ ko nɛ̀ɛ̀iŋ niìŋ fè wa kè “Hɛ̀ɛɛ̀ŋ” yèè kè “Kpele.”

¹⁹ E wèè Jisɛ̀ Kulaì, wo jɔ̀àfèlàà Dayàa, wo yèɔ wo Sìvanɔ̀ŋ wo Timetè, yèè miàŋ bi, è naiŋ wòò e kiiuŋ e tɛɛiŋ wɔ̀, wo fè wò nyuùŋ wòo wààŋ, “Hɛ̀ɛɛ̀ŋ” yèè “Kpele.” Yèè wɔŋ fàa bàa, wuŋ nàŋ yaà ke “Hɛ̀ɛɛ̀ŋ” Dayàa;

²⁰ Wuŋ nàŋ yaà ke “Hɛ̀ɛɛ̀ɛŋ” koɓɛ̀ maŋ ɗààhìì Dayà maŋ gbiŋ. E wèètii esàɓù Jisɛ̀ Kulaì sùà è woàìŋ wìàà, “Àmiinàŋ” wèè e jòòwo koɓɛ̀ Dayài.

²¹ Wo Dayà wuŋ bi naŋ wi banè, e kpùlìà nyɛ̀iŋ bi, wò kuwa jii tùlia wèè wɔŋ nyiiŋ gèe wiɔ̀ nààŋ è yààìŋ aŋ bàwibà Jisɛ̀ Kulaì sùà lɛ. Wo Dayà wuŋ bi naŋ wi tàeɗùù,

²² wo yèɔ naŋ wi sìè le fee kɛ̀ wuŋ nàŋ kànàŋ wì wɔ, yèè wo yèɔ naŋ wi fè wo Jìnàŋ Dayàa maŋ jii wi màŋ sùà wɔ. Wuŋ naŋ nɔ̀ŋ ke jii nyììneɛ̀ wèè e nɛ̀ɛŋ gbiŋ wo Dayà kuwa ko bàànè hàa weè wilɛ̀.

²³ Wo Dayà nàŋ yaà seì miɔ̀ŋ, wò nyìmàŋ ke jii miɛ̀ŋ! Mìŋ naŋ ɗewè wèè ɓɔ̀ mìŋ ka kò Kɔliìŋ esaɓù kɛ̀ mìŋ manaŋ wèè kaiŋ gè fɛ̀ɛ̀ diɛŋ.

²⁴ E fè fɛ̀ɛ sùà wèè eiŋ tɔ̀ɔ̀ è nɛ̀ɛŋ nìŋ haawà lɛ, è nyìmàŋ kɛ̀ nìŋ sia gbàùŋ gbàùŋ e hààweɛ̀ sùà. Kɛɛ e gbio sùà, è yààìŋ tòòmò koɓɛ̀ guùŋ wèè e zɔ̀lɔ̀ nyɛ̀iŋ biɛ̀.