1Time 3 - WƆŊ FƐ̀Ì EBÒ SÌÀŊ DAYÀA

E tòmoɛ̀ aŋ sìèfèìŋ anyuùŋ hààwe nyaŋ kuwa wèè aŋ nyɛ̀nɛ̀ŋ lɛ

¹ E keì woo lɛɛ̀ è yaà tɔ̀ɔ̀nyaàŋ. Sèè wo nyùùŋ gbiŋ naŋ ɗewè wèè wo nɔ̀ŋ wo sìèfeìŋ wèè anyuùŋ hààwe nyaŋ, wo nyùùŋ bi naŋ ɗewè wèè wo nyɛ̀nɛ̀ŋ e tòmo siaŋ.

² Wo sìèfèìŋ anyuùŋ hààwe nyàŋ, kuwa wo nɔ̀ŋ wo nyùnɔ̀ɔ̀ŋ kuwà è tɔ̀mɛ wɔ̀. Wo nɔ̀ŋ nyuùŋ kɛ̀ɛ̀nɛ̀ŋ wo jɔ̀ùŋ guùŋ, ɓɔ̀ wò nɔ̀ŋ wò nyuùŋ tìà mùàŋ, wo yɛmɛ̀ wuŋ bi diɛŋ, yèè wo nɔ̀ŋ ke jii fàa sùà. Wo nɔ̀ŋ nyuùŋ jàà aŋ nyùnèènyɛiŋ kùàŋ dìì ko gboouŋ noo, e kìlà wo nyìmàŋ e ɗèwè kàa.

³ Ɓɔ̀ wò nɔ̀ŋ nyuùŋ tìà mùàŋ ɔ̀ɔ̀ wò nyùùŋ ɗanga. Kɛɛ wo nɔ̀ŋ wo nyuùŋ kɛ̀ɛ̀nɛ̀ŋ tùwo siaŋ, yèè wo kuwiè ke jii siaŋ, ɓɔ̀ wò nɔ̀ŋ wò nyùùŋ wùànàŋ nɛɛnɛŋ.

⁴ Wo sìèfèìŋ anyuùŋ hààwe nyàŋ wo nɔ̀ŋ wo nyùnɔ̀ɔŋ yɛ̀mɛ̀ ke kpòò wuŋ biɛ̀ diɛŋ tɛ̀ɛ̀ kaiŋ wɔ̀, yèè wo nyɛ̀nɛ̀ŋ aŋ jɔ̀àuŋ nyàŋ aŋ jɔɔlɔ̀uŋ dìì e ɓɛ̀ɛ̀jàa sùà.

⁵ Sèè wo nyùùŋ go nyìmàŋ e ɗèwè ke kpòò wuŋ biɛ̀ yɛ̀mɛ̀ diɛŋ, kɛ̀ dièsɔa wò naŋ ɓɛ̀nɛ̀ŋ yɛ̀mɛ̀ ke gbòò anyuùŋ hààwè Dayà nyaŋ diɛŋ?

⁶ Wo sìèfeìŋ wo nɔ̀ŋ wo nyuùŋ kàmaiŋ e hààweɛ̀ sùà, e kìlà ɓɔ̀ wò kɛɛnɛ̀ŋ kè jii gbee, yèè e keì ɓɔ̀ è jeèuŋ è gbài sùà, màànààŋ wo Dɛwìɔ yaà wa lɛ̀.

⁷ Wo nɔ̀ŋ nyùnɔ̀ɔŋ anyùùŋ nyaŋ fè è hààweɛ̀ sùà nyaŋ, àŋ kiɛ̀ŋ e ɓɛ̀ɛ̀jàa, yèè ke mìè seì e nyaàiŋ euŋ dè wɔ, wèè wo go nàŋ sɛ̀ɛ̀ kè gbàù ɓɛ̀ɛ̀pɔ̀ɔ Dɛwìɔ sùà.

Anyùùŋ nyaŋ kpuumàŋ anyuùŋ hààwe nyàŋ wèè e tòmoɛ̀ nyaŋ

⁸ Aŋ ɓɔìjɔ̀à nyaŋ kpùùmàŋ aŋ sìèfèìŋ anyuùŋ hààwe nyaŋ lɛ, aŋ kɛ̀ɛ̀nɛ̀ŋ ke kpèè siàŋ e kìlà aŋ nɔ̀ŋ anyùùŋ tɔ̀ɔ̀nyaàŋ. Ɓɔ̀ àŋ nɔ̀ŋ ànyuùŋ tìà màŋ tala muaŋ zimgbe, e kìlà ɓɔ̀ àŋ nyɛ̀nɛ̀ŋ e wùànàŋ nɛɛnɛŋ.

⁹ Aŋ kuwiè e yèɛ wo Dayà naŋ nyiŋ wa tɔɔ̀ lɛ e tɔ̀ɔ̀nyaàŋ e nyaàiŋ dè hààweɛ̀ e gòngo zɛ̀nɛŋ sùà.

¹⁰ Aŋ kɔà nyiŋ e wɔ̀à dìì jiɛ̀, yèè kɛ̀, sèè aŋ maaŋ e wɔ̀à lɛɛ̀ dìì e yèɛ e keì gò nyiŋ jèè lɛ, kɛ̀ àŋ ɓɛ̀nɛ̀ŋ nyɛ̀nɛ̀ŋ e tòmoɛ̀.

¹¹ Aŋ jawe nyiŋ nyàŋ nyiiŋ pɛɛ, aŋ nɔ̀ŋ anyuùŋ kɛ̀ɛ̀nɛ̀ŋ maŋ kpèè siaŋ, yèè ɓɔ̀ àŋ fiefìè ànyùùŋ, ɓɔ̀ àŋ nɔ̀ŋ è dìè mùàŋ, aŋ nɔ̀ŋ e tɔ̀ɔ̀nyaàŋ e keì kɛnɛ gbiŋ sùà.

¹² Wo ɓɔ̀ìjɔ̀à aŋ sìèfèìŋ anyuùŋ hààwe nyàŋ, nɔ̀ŋ wo nyuùŋ kɛ̀ɛ̀nɛ̀ŋ jɔ̀ùŋ guùŋ kpò, wo nɔ̀ŋ nyùnɔ̀ɔŋ yɛmɛ̀ aŋ jɔ̀àuŋ nyàŋ yaà ke kpoouŋ nɛɛ̀ŋ diɛŋ tɛ̀ɛ̀ wɔ.

¹³ Aŋ ɓɔìjɔ̀à kpùùmàŋ aŋ sìèfèìŋ anyuùŋ hààwe nyàŋ nyɛnɛŋ e tòmo nyiŋ nɛ̀ tɛ̀ɛ̀ nyaŋ, àŋ kɛɛnɛ̀ŋ ko sìè siaŋ wèè nyiiŋ bi, yèè aŋ fè gbùùyà è jùù wèè è hààwe nyiŋ nɛ̀ wò Jisɛ̀ Kulaì sùà.

Ke gbùnu gbeeɛ̀

¹⁴ Nààŋ mìŋ yaà sìngìè wɔŋ fɛi wɛɛ̀ŋ ko nɛ̀iŋ niìŋ lɛ, mìŋ kuwa ke jii tùlia wèè ka hnàŋ ko nɛ̀iŋ niìŋ e teenga kpuu sùà.

¹⁵ Kɛɛ sèè mìŋ go zùmò hnàaŋ, wɔŋ fɛi wɛɛ̀ŋ doiŋ nàŋ nyɛ̀nɛ̀ŋ naŋ nyìmàŋ e ɗeweɛ̀ nìŋ naŋ ɓɛ̀nɛ̀ŋ tòòmò koɓɛ̀ guùŋ ke gbòò Dayàa sùà lɛ. Ke gbòò Dayàa zà nàŋ yaà anyuùŋ hààwe nyaŋ wèè wo Dayà nyiiŋ gèeɔ̀, kiiŋ nàŋ yaà e kpɛnɛɛ̀, yèè e kpùùmaàŋ wèè e tɔ̀ɔ̀nyaàaŋ.

¹⁶ Wo nyùùŋ gbiŋ fè ɓɛ̀nɛ̀ŋ gììyà kè gbùnu gbeeɛ̀ kè yaà e hààwe wilɛ̀ sùà yɛ màŋhɛɛ. Wo Jisɛ̀ Kulaì naŋ wa hnè mààŋ wo nyuùŋkpùuŋ, wo Jìnàŋ Nɛɛmaàŋ nauŋ wa tɔɔ̀ wèè wo nɔ̀ŋ nyuùŋ tɔ̀ɔ̀nyaàaŋ, yèè aŋ màìkà nauŋ wa yɛmɛ̀. Àŋ naŋ dàànè Ebò Siauŋ nɛ̀ maŋ fuɔŋ màŋ gbiŋ sùà, e ɗuunyaàŋ gbiŋ nauŋ sìè e hààwe sùà, yèè wò naŋ nɔ̀ŋ jòòwòuŋ ko àìjɛnɛ̀ŋ.