1Time 1 - WƆŊ FƐ̀Ì EBÒ SÌÀŊ DAYÀA

¹ E yìwìà miàim Pɔɔ̀ sìwè, mìŋ yaà wo keela tàeɗùù wèè Jisɛ̀ Kulaì e yìwìà e gààŋ Dayàa wo Nyuùŋ Jòèye wiɔ̀ yaà wo Jisɛ̀ Kulaì yèɔ kiɛ̀ŋ wì ke jii tùlia wɔ.

² Mìàŋ nàŋ yaà sìngìè wɔŋ fɛi wɛɛ̀ŋ koɓɛ̀ muàŋ Timetèi, wo jɔ̀àfelaa kɛnɛ miɔ̀ŋ, e hààweɛ̀ sùà. Tɔ̀ wo Dayà wo Dèda wiɔ̀ yaà Kanaà Jisɛ̀ Kulaì wo Kana wiɔ̀, kiɛ̀iŋ e tɛ̀ɛ̀tɛ̀ɛ̀, ke nyowo, yèè ke jii fàa.

E gòo e nyaàiŋ dè e kàà tòa

³ Mìŋ manaŋ wèè maŋ jèè ko Ɛfesɔ̀, màànààŋ nɔŋ mìŋ naum wa dawè e teengaà mìŋ yaà wa kɔ̀ɔ̀yɛ̀ ko Mɛ̀sèdonià lɛ. Anyùùŋ kòò àŋ yaào aŋ fè kàa sùà ànyùùŋ nyaŋ è hààwe kɛnɛ, nàaà nyiŋ wèè aŋ hɔanè niŋ nyɛ̀nɛŋ.

⁴ Wòò nyiŋ aŋ hɔanè pɔ̀ɔ̀ e teenga nyiŋ nɛ̀ maŋ kàɓanè gò kùwìè jiikɛ̀ɛ màŋjɛ̀wɛ, e kìlà aŋ dangè maŋ dèè aŋ nèwàènèwe gò kɛ̀ɛ̀nɛ̀ŋ dìa nyiŋ màŋ sìnga, maŋ yè maŋ hiàŋ e nyaàŋ kpàànè kpaane anyùùŋ e fèemàŋ. Maŋ fè tòòmò è ɗèwè Dayàa, è yèɛ nyaàiŋ naŋ dè è hààwe lɛ̀.

⁵ Esàɓù e keì wòo lɛɛ̀ nàŋ yaà, wèè maŋ kàà anyùùŋ wèè aŋ kɛ̀ɛ̀nɛ̀ŋ e mànaŋ kɛnɛɛ̀, e yèɛ naŋ fòlò ke jìì sengèì, e gòngo siaŋ, yèè e hààwè tɔ̀ɔ̀nyaàŋ sùà lɛ.

⁶ Anyùùŋ nyaŋ bà nyiŋ àŋ fè maŋ keì kɛnɛ mɛ̀ɛ̀ŋ jɛwɛ, yèè aŋ bà nyiŋ àŋ dè e keì kpàna maŋjɛ̀wɛ wèè foo.

⁷ Àŋ manaŋ wèè aŋ nɔ̀ŋ aŋ kààmɔɔŋ wèè ke sàwà Dayàa. Kɛɛ aŋ fè jàà màŋ mìè gbòa nyiiŋ bi màŋ jii, ɔ̀ɔ̀ maŋ keì maŋ àŋ woà maŋ, jòòpɛɛ àŋ gongà kɛ̀ àŋ yaà wòò maŋ keì bi.

⁸ Èiŋ nyìmàŋ kɛ̀ ke Sàwàa kè yaà tɛ̀ɛ̀, sèè è toomàìŋ nyiìŋ e ɗeweɛ̀ kè kuwa ke tomo lɛ̀.

⁹ Nyìmaìŋ tɔɔɓaa kɛ̀, maŋ sàwà gò wa nɔ̀ŋ bàne miŋ wèè ànyùùŋ tɔ̀ɔ̀nyaàŋ nyaŋ, kɛɛ màŋ yaà wa wèè anyuùŋ gò nɔ̀ŋ màŋ sàwà dìì nyaŋ, yèè anyuùŋ nyɛ̀nɛ̀ŋ maŋ kpèè naanààŋ nyaŋ, e kpùlìà anyuùŋ gò nyìmàŋ Dayà nyaŋ, yaà anyùùŋ maŋ jùumù nyaŋ. Màŋ yaà wa wèè anyùùŋ nyaŋ gboo maŋ mìè gbòà ɓɛ̀ɛ̀pɔ̀ɔ nyàŋ, yèè anyuùŋ jìwà nyùùŋ, aŋ yè nyaŋ kàìŋ nyaŋ pɛɛ àŋ jiwe aŋ dèda nyiŋ nyaŋ yaà aŋ yèye nyiŋ nyaŋ lɛ,

¹⁰ e kpùlìà anyùùŋ maŋ kpèè naanààŋ nyaŋ, anyuùŋ nyɛ̀nɛ̀ŋ hmɔ̀ŋtù fɛɛ̀ nìngè nyaŋ, anyuùŋ ɓèmè anyùùŋ e ɗo dìì, aŋ yè nyaŋ tɔɔ e kìlà àŋ fè maŋ mìè seì tòa nyàŋ, ɔ̀ɔ̀ aŋ yè nyaŋ kaà e keì gò kɛ̀ɛ̀nɛ̀ŋ jiikɛ̀ɛ è hààweɛ̀ sùà nyaŋ.

¹¹ Ebò Siaàŋ àŋ naim wa kaà yèè àŋ naim sìè ke jii tùlia yèè e zɔlɔ̀ sùà wèè ka woò lɛ, Ebò Siaŋ bi naŋ yèwè e jòòwo yèè e tɛ̀ɛ̀tɛ̀ɛ̀ wo Dàyà gaàŋ gbeeɔ̀ sìwè.

Ke sɛ̀ gèe koɓɛ̀ Dayài wèè ke nyowoɛ̀ wò kuwa e weè wilɛ̀

¹² Mìŋ naŋ gèe wo Kana wiɔ̀ Jisɛ̀ Kulaì ke sɛ̀, wo yèɔ naim kìɛ̀ŋ e gààŋ wèè ka nyɛ̀nɛ̀ŋ e tòmo mɛ̀ wɔ. Mìŋ nauŋ gè ke sɛ̀ wèè wò naìm jàà kùàŋ dìì wèè ka nɔ̀ŋ wo nyuùŋ hààwe, yèè wò naìm tàeɗùù wèè ka tomo e weèuŋ,

¹³ jòòpɛɛ mìŋ naŋ wa gbòò naanààŋ e nyaàìŋ euŋ dè, yèè mìŋ nauŋ ngainɓù e kìlà kauŋ wòò maŋ mìè ɓɛ̀ɛ̀pɔ̀ɔ. Kɛɛ wo Dayà naŋ wa tɔ̀ɔ̀ ke nyowo esaɓù è hààwe gò kɛɛnɛ̀ŋ mɛ̀, yèè miŋ nyimààŋ wa kɛ̀ kiìŋ mìŋ yaà nyinie.

¹⁴ E kìlà wo Kanaà Jisɛ̀ naim gɔ̀àà e tɛ̀ɛ̀tɛ̀ɛ̀ gò kɛ̀ɛ̀nɛ̀ŋ dià zimgbeuŋ nɛ̀, yèè wò naim kìɛ̀ŋ e hààweɛ̀ yaà e mànaàŋ è yaà wo Jisɛ̀ Kulaì sùà lɛ.

¹⁵ E keì wòo lɛɛ̀ yaà e tɔ̀ɔ̀nyaàŋ, wèè maŋ niŋ jàà kùàŋ dìì yèè maŋ niŋ haawè tɛ̀ɛ̀. Wò Jisɛ̀ Kulaì naŋ wa hnè e ɗuunyaàŋ wèè wo jòèyè anyùùŋ maŋ jùumù. Maŋ jùumùim maŋ naŋ nìè maŋ jè anyuùŋ gbànaŋ nyàŋ gbiŋ,

¹⁶ kɛɛ wo Dayà naim wa tɔ̀ɔ̀ ke nyowo, e wèè wo Jisɛ̀ Kulaì tɔɔ̀ ke jii tɔumtɔ̀ùm nɛɛ̀ŋ, nààŋ maŋ jùumùim maŋ naŋ nìè maŋ jè anyuùŋ gbànaŋ nyàŋ gbiŋ lɛ̀, wèè ka nɔ̀ŋ e tɔ̀ɔ̀màŋseì koɓɛ̀ anyùùŋ nyaŋ douŋ nàŋ sìè e hààwe sùà nyaŋ yèè aŋ kɛɛnɛ̀ŋ wɔŋ nyiiŋ gèe gò jùà.

¹⁷ Koɓɛ̀ wo Kànà wɔŋ nyiiŋ gèe gò jùàa, wo Dayà gunɔ̀ɔŋ, e jòòwo yèè e dɛ̀ɛ̀kɛ nɔ̀ŋ ko nɛ̀ɛ̀uŋ niìŋ wèè julɔfɔ yèè julɔfɔ! Àmiinàŋ.

¹⁸ Jɔ̀à miɔ̀ŋ Timetè, mìŋ yààùm tùlia sùà ke jii wèè e gààŋ lɛɛ̀, e nyaàiŋ dè maŋ mìè gbòa màŋ wo wɛ̀ijìɔ naŋ wa gbòò e teengà gɔu sùà e nyaàiŋ eum dè lɛ. Tòòmo maŋ mìè gbòa mɛɛ̀ŋ mààŋ manɛ̀ŋ sùmìàŋ e ɗùà wèè muŋ sòmàŋ tɛ̀ɛ̀,

¹⁹ yèè jèèe e hààwe mɔ̀ɛ̀ sùà e kìlà muŋ kɛɛnɛ̀ŋ e gòngò siaŋ. Ànyùùŋ nyaŋ bà nyiŋ kòò àŋ kùmìè e gòngo siaŋ nyiŋ nɛ̀ yèè àŋ nyɛ̀nɛ̀ŋ maŋ hààwe nyiŋ màŋ pɔɔpɔ̀ɔ̀.

²⁰ Anyùùŋ nyɛɛ̀ŋ bà nyiŋ nàŋ yaà wa wo Hèmɛnàè yaà wo Àlèzanàŋ, aŋ yè nyaŋ mìŋ naŋ wa nimilà yèè mìŋ naŋ nyiŋ kìɛ̀ŋ koɓɛ̀ e gààŋ Sɛ̀tanàaŋ nyàŋ, tɛɛ̀ do nyiŋ nàŋ kaà aŋ dàngè maŋ mìè ɓɛ̀ɛ̀pɔ̀ɔ nyiŋ màŋ.