1Tɛsè 3 - WƆŊ FƐ̀Ì EBÒ SÌÀŊ DAYÀA

¹ E ɗewe gbiŋ sùà, e gòiŋ niŋ ɓɛ̀nɛ̀ŋ dìì. Wèètii è naiŋ ɗewè wèè eiŋ nɔ̀ŋ wɔŋ kùàŋ e wùmaŋ wi ko Atɛ̀ìŋ

² yèè è naiŋ tùɔ̀ŋ wo Timetè wùìya wiɔ̀, è yààìŋ tòòmò koɓɛ̀ guùŋ wèè Dayà, nààŋ è woàìŋ Ebò Siaàŋ nyaàiŋ dè wo Jisɛ̀ Kulaì lɛ. È nauŋ tùɔ̀ŋ nɛ̀ɛ̀iŋ niìŋ wèè woiŋ nyììnè maŋ jii, yèè wo kpùùmàŋ e hààweiŋ nɛ̀,

³ e wèè kɛ̀ nyɛ̀iŋ nɛɛ̀ŋ bà gbiŋ go nàŋ kɛ̀ɛ̀ màŋjɛ̀wɛ èsàɓù màŋ mɔ̀ɔ̀nɛŋ mɛɛ̀ŋ sùà. Nyɛ̀iŋ bì nàŋ nyìmàŋ kɛ̀ maŋ mɔ̀ɔ̀nɛŋ mààŋ mɛɛ̀ŋ màŋ yaà maŋ kèè jìì Dayà maŋ bà weè wi.

⁴ E teengaà è yààìŋ ko nɛ̀ɛ̀iŋ niìŋ lɛ èiŋ niŋ wa wòo gɔu kɛ̀ àŋ do wi nàŋ mɔɔnɛ̀ŋ, yèè nààŋ nìŋ naŋ nyìmè lɛ tiiŋ nɔŋ naŋ kaaìŋ.

⁵ Miŋ gò niŋ ɓɛ̀nɛ̀ŋ dìì, wèètii mìŋ naŋ tùɔ̀ŋ wo Timetè. Mìŋ nauŋ tùɔ̀ŋ wèè wo nyɛ̀nɛ̀ŋ maŋ nɔnɔŋ tùaŋ e nyaàiŋ dè e hààweiŋ nɛ̀. Tɔɔɓaa tiŋ e fè ɓɛ̀nɛ̀ŋ nɔ̀ŋ kɛ̀ wo Dɛwìɔ wòiŋ gɛ̀ɛ̀ jɛ̀wɛ̀ e tòmo wilɛ̀ gbiŋ nɔ̀ŋ wèè foo.

⁶ Wo Timetè kɛ̀ɛ̀ maŋjɛ̀wɛ wò hnàŋ wò dàà mìè ebò siaàŋ nyaàiŋ dè e hààweiŋ nɛ̀, yèè e mànaàŋ nìŋ kuwa lɛ̀. Wò naŋ wi woò kɛ̀ e teenga gbiŋ sùà nìŋ jàà wì jii yèè e wùànàŋ yɛ̀mɛ wi nyɛ̀nɛ̀ìŋ, nààŋ nɔŋ yàwi pɛɛ e wùànàŋ yɛ̀mɛiŋ nyɛ̀nɛ̀ŋ wì lɛ.

⁷ Wèè esaɓù tɛɛ̀ sùà nyɛ̀iŋ nààŋ wùìya wi nyàŋ, e kpùlìà maŋ mɔ̀ɔ̀nɛŋ wi màŋ yaà maŋ keì nyìnga màŋ gbiŋ è naiŋ kɔ̀ dìì maŋ, ke di yaà maŋ jii wì sùà e weèiŋ, e hààweiŋ nɛ̀ zà naŋ wi fè ke di bi,

⁸ esaɓù tɛɛ̀ èiŋ naàŋ ɓɛ̀nɛ̀ŋ nɔ̀ŋ nyiiŋ gèeɔ̀ sùà sèè nìŋ nɔ̀ŋ aŋ bàiŋbà maŋ nyɛ̀nɛ̀ŋ Kanaà Jisɛ̀ maŋ sùà.

⁹ Èiŋ naàŋ ngàà ɓɛ̀nɛ̀ŋ gè wo Dayà ke sɛ̀ e weèiŋ. È gèìŋ wo Dayà ke sɛ̀ wèè e zɔlɔ̀ɛ è kuwa ko fɛɛ̀ fenìuŋ esaɓùiŋ nɛ̀ sùà lɛ.

¹⁰ E dùùm yaà maŋ gɔɛ è dawàìŋ Dayà maŋ jii wi màŋ gbiŋ wèè wo haà ke dòmaŋ e seenèiŋ, yèè wo fèiŋ e yèɛ gbiŋ nìŋ naŋ mɔ̀nɔ̀ŋ e hààweiŋ nɛ̀ sùà lɛ.

¹¹ Tɔ̀ wo Dayà wiɔ̀ wo Dèdaà wuŋ bi yèè wo Kana wiɔ̀ Jisɛ̀ banè ke dòmaàŋ wèè eiŋ hnàŋ ko nɛ̀ɛ̀iŋ niìŋ.

¹² Tɔ̀ wo Kanaà nyɛ̀nɛ̀ŋ e mànaàŋ e fèemàiŋ nɛ̀ yèè e wèè anyùùŋ nyaŋ gbiŋ e dɛɛ̀ sùà, e nɔ̀ŋ màànààŋ e mànaàŋ maŋ jii wi màŋ sùà weèiŋ è naŋ dɛɛ̀ lɛ.

¹³ E ɗewe mààŋ tɛɛ̀ sùà, tɔɔɓaa wò do nàŋ sìè maŋ jiiiŋ màŋ gààŋ, e tɔ̀mɛ naìŋ nɔ̀ŋ yèè nìŋ do nàŋ nɔ̀ŋ anyuùŋ nɛɛmaŋ ko fɛ̀ɛ̀fèìŋ Dayà wiɔ̀ wo Dèdaà e teengaà wo Kana wiɔ̀ Jisɛ̀ yaà anyùùŋ nɛɛmaŋ nyàn gbiŋ wò kanaŋ nyàŋ àŋ hnàŋ.