1Pììlɛ 2 - WƆŊ FƐ̀Ì EBÒ SÌÀŊ DAYÀA

Ke dùòɛ yaà wɔŋ nyiiŋ gèeɔ̀ sùà yɛ yèè wɔŋ fùɔ̀ŋ nɛɛmaàŋ

¹ Wèètii gèeìŋ maŋ kùàŋ maŋ keì naanààŋ maŋ gbiŋ sùà. E tòa ɓɔ̀ è nɔ̀ŋ ɓɛìŋ ɔ̀ɔ̀ ɓɔ̀ nìŋ nɔ̀ŋ ɓɛìŋ anyuùŋ jàà fɛ̀ɛ̀ keì sùà ɔ̀ɔ̀ lè koo gèe ɔ̀ɔ̀ maŋ gòlà mìè dìène wèè maiŋ fòlà kò nyààŋ.

² Nɔ̀iŋ mààŋ aŋ jɔaa kòmàŋ jɛ̀ì, e teenga gbiŋ sùà e wùànàŋ maŋ yaà màì gò kɛ̀ɛ̀nɛ̀ŋ tɔ̀mɛ màŋ e gààŋ Jìnàŋ Dayàa sùà e nyɛ̀nɛ̀iŋ, wèè kɛ̀ sèè nìŋ yàà miìŋ naŋ dɛɛ̀ e kìlà wo Dayà woiŋ joeyè.

³ Màànààŋ wɔŋ fɛ̀ì Dayàa naŋ woò lɛ, “Nyɛ̀iŋ ɓi nàŋ naàŋ yɛ̀mɛ̀ e ɗeweɛ̀ wo Kanaà yaà tɛ̀ɛ̀ lɛ.”

⁴ Hnaìŋ koɓɛ̀ wo Kanaà, ke dùò nyiiŋ gèe gò jùàa anyùùŋ nyaŋ naŋ wa gè kùàŋ dìì yɛ, esaɓù kɛ̀ aŋ gòuŋ wa nyààŋ è nɛ̀ŋ bà gbiŋ, kɛɛ wo Dayà nauŋ tàeɗùù wèè wo kuwiè e sɛmɛmaŋ.

⁵ Hnaìŋ mààŋ maŋ duò gè nyiiŋ wo Dayà nyilìàiŋ ke saaŋ zòòlò Dayà wo jinàaŋ sùà, ko yèi nìŋ do nàŋ nɔ̀ŋ aŋ sìèfèìŋ e zòòlò nɛɛmaŋ wèè e tòmò Dayàa wèè maŋ saàà gèe wo Jìnàŋ Dayàa sùà maŋ yè maŋ wo Dayà jaa kùàŋ dìì esàɓù Jisɛ̀ Kulaì sùà maŋ.

⁶ Wɔŋ Fɛ̀ì Dayàa naŋ woò wààŋ, “Ke dùòɛ wo Dayà naŋ tàeɗùù yɛ, kè yaà ke kpɛnɛ kùwìè sɛmɛmaŋ ke yèɛ mìŋ, yaà hàa sùà mààŋ ke kpɛ̀nɛ̀ saaŋ ko Zanyɔ̀ùŋ yɛ, yèè wo nyùnɔ̀ɔŋ gbiŋ haawàuŋ sùà wɔ, wo naàuŋ sìè sàngè julɔfɔ.”

⁷ E sɛmɛmaàŋ yaà ke dùò bi sùà lɛ è naŋ dɛɛ̀ wèè nyɛ̀iŋ nyàŋ nìŋ nauŋ hààwè sùà nyaŋ, kɛɛ wèè anyùùŋ nyaŋ aŋ yè nyaŋ kuwà hààwe nyàŋ, “Ke dùòɛ aŋ nyùuŋ nyɛ̀lɛ nyàŋ aŋ gò wa jàà kùàŋ dìì yɛ kiiŋ naŋ wa nɔ̀ŋ ke duò kpɛnɛ tùlìà jii gbeeɛ̀ e nyɛ̀lɛɛ̀ gbiŋ sùà.”

⁸ Yèè wɔŋ fɛ̀ì Dayàa koɓɛ̀ bà naŋ ɓɛìŋ woò wààŋ, “Kɛɛ̀ nàŋ yaà ke dùòɛ do nàŋ nyɛ̀nɛ̀ŋ anyùùŋ aŋ duonò, ke dùòɛ do nyiŋ nàŋ nyɛ̀nɛ̀ŋ aŋ sɔ̀à lɛ.” Àŋ do nàŋ duonò esaɓù kɛ̀ aŋ gò hààwe kè mìèɛ, kiŋ zà nàŋ yaà wa e kèè jìì Dayàa e weè nyiŋ.

⁹ Kɛɛ nyɛ̀iŋ nàŋ yaà anyuùŋ tàeɗùù Dayà nyaŋ, aŋ sìèfèìŋ e zòòlò Kanaà, wɔŋ fùɔ̀ŋ nɛɛmaàŋ, anyùùŋ Dayà nyaŋ wuŋ bi naŋ tàeɗùù, wèè aŋ daanè ebò maŋ kpèè sìàŋ Dayà maŋ wò nyɛnɛŋ màŋ, wo yèɔ naiŋ nyààŋ wò naiŋ gè ke nyìwì sùà, yèè wò naiŋ hnìɛ̀ŋ e gbòlòùŋ gbèè wuŋ bi sùà lɛ.

¹⁰ E teenga bà sùà niŋ fè wa ànyùùŋ Dayà, kɛɛ e teenga lɛɛ̀ sùà nàŋ naàŋ nɔ̀ŋ anyunùuŋ. E teenga bà sùà, niŋ nyimààŋ wa kè nyòwoɛ̀ Dayà kuwa lɛ̀, kɛɛ e teenga lɛɛ̀ sùà wòiŋ tɔ̀ɔ̀ ke nyowouŋ nɛɛ̀ŋ.

Aŋ ɗò Dayà nyaŋ

¹¹ Nyɛ̀iŋ nààŋ dàwiim nyàŋ, nààŋ nìŋ yaà anyùùŋ fuɔŋ joo yèè aŋ nyùnèènyɛiŋ e ɗuunyaŋ lɛɛ̀ sùà lɛ, mìŋ yààìŋ pɔ̀wɔ sùà, ɓɔ̀ nìŋ gbɛ̀ɛ̀ mànɛ̀ŋ mànàŋ màŋ kèìŋ maŋ yè maŋ kuwìà wɔŋ nyììŋ jinàiŋ nɔɔ̀ŋ kè gùuŋ e teenga gbiŋ sùà lɛ.

¹² Maŋ keì kààŋ kiiŋ màŋ anyuùŋ gò hààwè Dayà nyaŋ e fèemàŋ, maŋ nɔ̀ŋ tɛ̀ɛ̀ kaiŋ. Wèè sèè pɛɛ aŋ woò nyààŋ nìŋ yaà anyuùŋ nyɛ̀nɛ̀ŋ maŋ keì naanààŋ, aŋ yɛmɛ̀ maŋ kpèè siaŋ sìàiŋ màŋ aŋ tɛnɛ̀ŋ Dayà ke ɗɔɔɛ̀ wò hiàŋ e jààme ko nɛ̀ɛ̀ŋ wiì lɛ̀.

¹³ Esàɓù Kànà è gunɔ̀ɔŋ sùà, jɔ̀ɔ̀lɔìŋ e kànà kɛ̀ɛ̀ nyuùŋkpùuŋ gbiŋ dìì. Wo kanaà kuwa e gaàŋ gbeeɛ̀ wɔ,

¹⁴ yèè wo kana gbɛ̀ɛ̀ kana kɔɔ̀, wo yèɔ wo kanaà naŋ tàeɗùù wèè wo gbaì anyuùŋ nyɛ̀nɛ̀ŋ maŋ keì naanààŋ nyaŋ, e kìlà wo tɛnɛ̀ŋ anyuùŋ nyɛ̀nɛ̀ŋ keì sìàŋ nyaŋ wɔ̀.

¹⁵ Wo Dayà manaŋ wèè maŋ kpèè siaŋ sìàiŋ màŋ nɔ̀ŋ esaɓù wèè anyùùŋ ɓàaɓàa gò nyìmàŋ keì fèemàŋ nyɛɛ̀ŋ aŋ hɔ̀ànè gbòa.

¹⁶ Niŋ fè è ɗo dìì, kɛɛ e ɗewe gbiŋ sùà, ɓɔ̀ nìŋ ɓemè naàŋ è ɗo gò nɔ̀ŋ dìì bi wèè naŋ niŋ toomò naŋ ɓùwà màŋ keì naanààŋ, kɛɛ nɔ̀iŋ mààŋ aŋ ɗò Dayà.

¹⁷ Kùwiè e ɓɛ̀ɛ̀jàa wèè nyùùŋ gbiŋ, mànaìŋ ke gbòò aŋ wùìya nyàŋ, niŋ dùàŋ Dayà yèè niŋ kiɛ̀ŋ wo Kànà Gbèè fuɔɔ̀ŋ e ɓɛ̀ɛ̀jàa.

E tɔ̀ɔ̀màŋsèì e mɔ̀ɔ̀nɛ̀ŋ Jisɛ̀ Kulaìɛ

¹⁸ Nyɛ̀iŋ nààŋ ɓɔìjɔ̀à nyaŋ jɔ̀ɔ̀lɔìŋ aŋ kɛ̀ɛ̀nɛiŋ nyàŋ dìì, e kìlà niŋ kiɛ̀ŋ nyiŋ e ɓɛ̀ɛ̀jàa kɛɛ e fè nɔŋ àŋ sìàŋ sìàŋ tùwo nyàŋ àŋ kuwa kè nyowo nyàŋ, e kèì guùŋ bi e ka koɓɛ̀ aŋ nyìngà tùwo nyàŋ nyiŋ pɛɛ.

¹⁹ Wo Dayà doiŋ nàŋ gbìɛ̀ŋ e keì sìàŋ maŋjɛ̀wɛ wèè tɛɛ̀, sèè naŋ kɔ̀ɛ̀ e jèlà keì nyìngà kàaɓì dìì, esaɓù kɛ̀ e gòngoiŋ nɛ̀ è yaà koɓɛ̀ Dayài.

²⁰ Kiìŋ nàŋ yaà ke sɛ̀ gèeɛ̀, sèè nìŋ kuwo e ɓùla wèè maŋ kèì jùumù maŋ nìŋ naŋ nyɛ̀nɛ̀ŋ maŋ? Kɛɛ sèè naŋ tuwò tɛ̀ɛ̀, naŋ kùwà e keì nyìnga wèè e tɛ̀ɛ̀tɛ̀ɛ̀ɛ nìŋ naŋ nyɛ̀nɛ̀ŋ lɛ, wo Dayà doiŋ nàŋ fè keì sìàŋ weè niŋ.

²¹ Wèè tɛɛ̀ wo Dayà naiŋ nyààŋ, wo Jisɛ̀ Kulaì wuŋ bi naŋ mɔɔnɛ̀ŋ weèiŋ yèè wò naŋ jòò e tɔ̀ɔ̀màŋseì, e wèè naŋ dè e gòlò feeuŋ nɛ̀ maŋjɛ̀wɛ.

²² Wo gò nyɛ̀nɛ̀ŋ è kèì jùumù, yèè wo nyùùŋ gbiŋ gò kòmàŋ wèè è tòa euŋ fùlìà kò nyààŋ.

²³ E teengaà àŋ yàaùŋ wa pɔ̀ɔ sùà ɓɛ̀ɛ lɛ̀, wo gò kɛ̀lɛ̀ɛ̀ è ɓɛ̀ɛ̀pɔ̀ɔ koɓɛ̀ nyùùŋ, e teengaà wò yaà kɔ̀ɔ̀yɛ̀ keì nyìnga dìì lɛ, wo gò sìà nyùùŋ gbiŋ è jùù, kɛɛ wò kùwìè ke jii tùlia wo Dayà sùà, wo Dayàa gbaì e tɔ̀ɔ̀nyaàaŋ wɔ̀.

²⁴ Wo Jisɛ̀ Kulaì wuŋ bi naŋ kɔ̀ɔ̀ maŋ jùumù wi màŋ ke kpùnauŋ nɛɛ̀ŋ sùà wɔŋ vànèkpaaà diɛŋ. Wèè kɛ̀ e nɔ̀iŋ anyuùŋ fàa koɓɛ̀ jùumù, yèè e nɔ̀iŋ wɔŋ nyiiŋ gèe sùà koɓɛ̀ e tɔ̀ɔ̀nyaàaŋ. Esaɓù manɛ̀ŋ jèlauŋ màŋ sùà nìŋ naŋ jòèyè.

²⁵ Nìŋ yaà wa mààŋ aŋ ɓaawaa ɓà ke dòmaŋ aŋ yè nyaŋ naŋ go nyàŋ, kɛɛ wo Dayà wòiŋ ɓɛìŋ kɛlɛ̀ɛ̀ wèè naŋ nɔ̀ŋ wo nyuùŋ yɛ̀mɛ̀ aŋ ɓaawaa diɛɔ̀ŋ maŋjɛ̀wɛ yèè wo nyuùŋ yɛ̀mɛ̀ maŋ nyiiŋ diɛiŋ nɔɔ̀ŋ.