1Jɔ̀ɔŋ 2 - WƆŊ FƐ̀Ì EBÒ SÌÀŊ DAYÀA

Wo Kulaì nàŋ yaà wo nyuùŋ kpùùmaŋ wiɔ̀

¹ Mìŋ yaà tɛɛ̀ sìngà sùà ko nɛ̀ɛ̀ŋ niìŋ, nyɛ̀iŋ nààŋ jɔ̀àim nyàŋ, wèè kɛ̀ ɓɔ̀ nìŋ nyɛ̀nɛ̀ŋ màŋ kèì jùumù, kɛɛ sèè wo nyùnɔ̀ɔŋ gbiŋ naŋ nyɛ̀nɛ̀ŋ maŋ kei jùumù wɔ, è kùwàìŋ wo nyùùŋ wèè wo pɔ̀wɔ̀ wo Dèdaà e wèè wi, wo nyùùŋ bi nàŋ yaà wo Jisɛ̀ Kulaì wo nyùùŋ tɔ̀ɔ̀nyaàaŋ.

² Yèè wo Kulaì wuŋ bi nàŋ yaà è nɛ̀ŋ saàa wèè maŋ jùumù wi màŋ nɔ̀ŋ hakɛ̀ jùùya miŋ, yèè e fè nɔŋ wèè màŋ jùumù wi màŋ miŋ gùuŋ kɛɛ è yaà wèè maŋ jùùmù anyùùŋ nyaŋ gbiŋ e ɗuunyaàŋ.

³ Sèè è naiŋ jɔ̀ɔ̀lɔ̀ maŋ Sàwà Dayà maŋ dìì, è doiŋ nàŋ kùwìè e hààweɛ̀ kɛ̀ eiŋ nyìmàŋ wo Dayà.

⁴ Sèè è naiŋ woò wìàà èiŋ nyìmàŋ wo Dayà, kɛɛ e fèiŋ jɔ̀ɔ̀lɔ̀ màŋ Sàwàuŋ màŋ dìì, kɛ̀ è yààìŋ anyuùŋ tòa e kìlà e fèiŋ anyùùŋ tɔ̀ɔ̀nyaàŋ.

⁵ Kɛɛ sèè tɔɔɓaa è naiŋ jɔ̀ɔ̀lɔ̀ ke mie Dayàa dìì, è doiŋ nàŋ nɔ̀ŋ aŋ yè nyaŋ wo Dayà naŋ tɔ̀ɔ̀ e mànaùŋ nɛ̀ janjai nyàŋ. Yèè tɛɛ̀ naŋ wi kìɛŋ e hààwe kɛ̀ è yààìŋ aŋ bàwibà wo Dayà sùà.

⁶ Wo nyùnɔ̀ɔŋ gbiŋ naŋ woò wààŋ wò naŋ hààwè wo Dayà wɔ, wò kuwa wo dè e tɔ̀ɔ̀màŋsèì ke kpèè Jisɛ̀ Kulaìɛ maŋjɛ̀wɛ.

Ke sàwà jɛiɛ̀

⁷ Dàwi mànaim nyàŋ, ke sàwàa mìŋ yaà sìnga sùà yɛ ke fè kè jɛi nyiŋ, kè yaà ke sàwà gɔu ke yèɛ nìŋ naŋ wa kòmò e yìwìà ko tɔ̀ɔ̀tù e ɗuunyaàŋ lɛ, ke sàwà gɔu bi nàŋ yaà ke mie gbìaàŋ nìŋ naŋ wa kòmò yɛ.

⁸ È gbio sùà, ke sàwàa mìŋ yaà nààŋ sengei yɛ̀ kè yaà ke jɛi nyiŋ, efèfoo è naŋ yɛ̀mɛ̀ e tɔ̀ɔ̀nyaàŋ kɛnɛ nyiŋ nɛ̀ wo Jisɛ̀ Kulaì sùà yèè nyɛ̀iŋ bi. Ke nyìwìɛ kè yaà màaŋ sùà yèè e gbòlòùŋ tɔ̀ɔ̀nyaàaŋ è yaà naàŋ mɛ̀ɛŋ sùà.

⁹ Sèè eiŋ woò wìàà è yààìŋ e gbolòuŋ sùà, kɛɛ è naiŋ wùɔ̀ŋ aŋ wùìyà wi nyàŋ, kɛ̀ kòò è yààìŋ nɔŋ kpɛ ke nyìwìɛ sùà sààmɛ pɛɛ.

¹⁰ Sèè èiŋ mànàŋ aŋ wùìyà wi nyàŋ, kɛ̀ è yààìŋ e gbolòùŋ sùà, yèè e nɛ̀ŋ bà gbiŋ fè wì sùà wèè e nyɛ̀nɛ̀ŋ wò nyùùŋ do sɛ̀ɛ̀ màŋ jùumù sùà.

¹¹ Wo nyùnɔ̀ɔŋ gbiŋ naŋ wùɔ̀ŋ wo wùìyauŋ nɔɔ̀ŋ wɔ, wò yaà ke nyìwi sùà e kìlà wò yaà kààìŋ ke nyìwì sùà, yèè wo nyimààŋ kɛ̀ kòò wò yaà kɔɔyɛ, e fèfoo ke nyìwìɛ kè nyɛ̀nɛ̀ŋ wò zììlè le fɛ̀ɛ̀.

¹² Miàim Jɔ̀ɔŋ naŋ sìngè ko nɛ̀ɛ̀iŋ niìŋ, nyɛ̀iŋ nààŋ jɔ̀àim nyàŋ, esàɓù e dèè Jisɛ̀ɛ sùà, wo Dayà naŋ jùùyè maŋ jùumùiŋ màŋ e hakɛ̀.

¹³ Mìŋ naŋ sìngè ko nɛ̀ɛ̀iŋ niìŋ, nyɛ̀iŋ nààŋ nyuùŋ kòmaŋ nyàŋ, e fèfoo nàŋ wa nyìmàŋ kɛ̀ wo Dayà yaà e yìwìà ko tɔ̀ɔ̀tù e ɗuunyaàŋ. Mìŋ naŋ sìngè ko nɛ̀ɛ̀iŋ niìŋ, nyɛ̀iŋ nààŋ nyuùŋ bɔwɔ nyàŋ, e fèfoo nàŋ gbùwò e gààŋ wo Nyuùŋ Kɛ̀ɛ̀nɛ̀ŋ ke Kpèè naanààaŋ diɛŋ.

¹⁴ Mìŋ naŋ sìngè ko nɛ̀ɛ̀iŋ niìŋ, nyɛiŋ nààŋ jɔ̀àim nyàŋ, e fèfoo nàŋ nyìmàŋ wo Dèdaà. Mìŋ naŋ sìngè ko nɛ̀ɛ̀iŋ niìŋ, nyɛ̀iŋ nààŋ nyuùŋ kòmaŋ nyàŋ, e fèfoo nàŋ wa nyìmàŋ wo Dayà e yìwìà ko tɔ̀ɔ̀tù e ɗuunyaàŋ. Mìŋ naŋ sìngè ko nɛ̀ɛ̀iŋ niìŋ, nyɛ̀iŋ nààŋ nyuùŋ bɔwɔ nyàŋ, e fèfoo nìŋ kuwa e gààŋ. E kìlà ke mìè Dayàa yaà maŋ jiiŋ màŋ sùà, yèè nìŋ kuwa e gààŋ wo Nyuùŋ Nyɛ̀nɛ̀ŋ keì naanààaŋ diɛŋ.

¹⁵ Ɓɔ̀ nìŋ mànàŋ e ɗuunyaàŋ ɔ̀ɔ̀ mànɛ̀ŋ kɛ̀ɛ̀nɛ̀ŋ ɗuunyaŋ maŋ. Sèè wo nyùùŋ gbiŋ naŋ kɛ̀ɛ̀nɛ̀ŋ e mànaŋ wèè e ɗuunyaàŋ, wo kuwà è mànaŋ wèè wò Dèdaà.

¹⁶ E nɛ̀ɛ̀ŋ gbiŋ è yaà wèè e ɗuunyaàŋ lɛ, maŋ keì naanààŋ maŋ naiŋ fɔ̀ɔ̀yɛ̀ maŋ jii màŋ, maŋ yè maŋ wo nyuùŋ kpùuŋ naŋ yɛmɛ̀ yèè wò naŋ mɔ̀nɔ̀ŋ wɔŋ nyiiŋ gèeuŋ nɔɔ̀ŋ sùa maŋ, yèè e nɛ̀ɛ̀ŋ gbiŋ wo nyuùŋkpùuŋ naŋ dɛ̀ɛ̀kɛ̀ wuŋ bi weè niŋ e ɗuunyaàŋ lɛɛ̀ sùà lɛ, maŋ bà gbiŋ gò e yìwìà wo Dèdaà sìwè, màŋ gbiŋ naŋ fòlò e ɗuunyaàŋ lɛɛ̀ sùà.

¹⁷ E ɗuunyaàŋ yèè e yèɛ gbiŋ yaà niìŋ sùà anyuùŋ kpùuŋ manaŋ lɛ̀ è yaà màaŋ sùà, kɛɛ wo nyùnɔ̀ɔŋ naŋ nyɛ̀nɛ̀ŋ e yèɛ wo Dayà manaŋ lɛ̀ wò do wa nàwèè naŋ nɔ̀ŋ wɔŋ nyiiŋ gèeɔ̀ sùà wèè julɔfɔ.

E gòo wèè e nyaàìŋ dè aŋ jòò Jisɛ̀ Kulaì nyaŋ

¹⁸ Jɔ̀àim nyàŋ, e teenga dìàmaàŋ è gbɛ̀ɛ̀! Àŋ naiŋ wa woò kɛ̀ aŋ jòò Jisɛ̀ Kulaì nyaŋ yaà hinie. Aŋ jòò Jisɛ̀ Kulaì nyaŋ zimgbe nyiŋ ngèè àŋ naàŋ hnàŋ tɛ, weètii èiŋ naàŋ nyìmàŋ kɛ̀ e teenga dìàmaàŋ è gbɛ̀ɛ̀.

¹⁹ Anyùùŋ nyɛɛ̀ŋ naŋ fòlò ke gbòò Dayà zòòlo wiɛ̀ sùà, kɛɛ tɔɔɓaa aŋ fè wa àŋ bàwibà. Yèè esaɓùɛ lii àŋ naŋ wi wa kɛ̀ɛ̀ maŋjɛ̀wɛ. Kɛɛ sèè aŋ wa weè nɔ̀ŋ aŋ bàwibà ke gbòò zòòloɛ̀ sùà, àŋ he wi wa weè nàŋ jèè maŋjɛ̀wɛ. Kɛɛ àŋ naŋ wi wa dangè, tii naŋ wa tɔɔ̀ janjai kɛ̀ aŋ fè àŋ bàwibà.

²⁰ Kɛɛ wèè nyɛ̀iŋ wo Jisɛ̀ Kulaì naiŋ sìè wo Jìnàŋ Nɛɛmaàŋ sùà, yèè nyɛ̀iŋ gbiŋ nàŋ nyìmàŋ e tɔ̀ɔ̀nyaàaŋ.

²¹ E fè mààŋ niŋ nyimààŋ è tɔ̀ɔ̀nyaàaŋ, wèè kaìŋ sìngà wɔ̀ŋ fɛi wɛɛ̀ŋ, kɛɛ nààŋ nìŋ naŋ niŋ nyìmè lɛ, nàŋ nyìmàŋ kɛ̀ e tòa bà gbiŋ e fè è tɔ̀ɔ̀nyaàŋ bi sùà.

²² Ɓòò, kai, nàŋ yaà aŋ nyuùŋ tòa nyàŋ? Aŋ yè nyaŋ naŋ woò nyààŋ wo Jisɛ̀ nààŋ wo fè Kulaìɔ wɔ̀. Anyùùŋ mààŋ nyɛɛ̀ŋ nàŋ yaà aŋ jòò Kulaì nyaŋ, yèè àŋ naŋ gììyè wo Dèdaà yèè wo Jɔ̀àfelaaà maŋhɛɛ.

²³ Aŋ yè nyaŋ gò jàà wò Jɔ̀àfelaaà kùàŋ dìì nyaŋ, aŋ gò jàà wò Dèdaà kùàŋ dìì. Aŋ yè nyaŋ gbiŋ naŋ jàà wo Jɔ̀àfelaaà kùàŋ dìì nyaŋ, àŋ naŋ jàà wo Dèdaà kùàŋ dìì.

²⁴ Ke miè gbìaàŋ nìŋ naŋ wa kòmò e yìwìà e teengaà nìŋ naŋ wa nɔ̀ŋ anyuùŋ hààwe ko tɔ̀ɔ̀tù e ɗuunyaàŋ lɛ, jàaiŋ ke miè gbìaàŋ bi jii. Sèè nìŋ naŋ jàà ke mìè gbiàŋ bi jii, nìŋ do nàŋ nɔ̀ŋ aŋ bàwibà wo Jɔ̀àfelaaà yaà wo Dèdaà sùà.

²⁵ Yèè tɛɛ̀ wo Jisɛ̀ naŋ wa ɓèèmè e ɗààhiì diɛŋ kɛ̀, wò do wi nàŋ kìɛ̀ŋ wɔŋ nyiiŋ gèe gò jùà.

²⁶ Mìŋ yaà sìnga sùà tɛɛ̀ ko nɛ̀ɛ̀ŋ niìŋ wèè e nyaàiŋ dè aŋ yè nyaŋ yaà kààmè ɗewe wèè aiŋ zuwò nyaŋ.

²⁷ Kɛɛ nyɛ̀iŋ nyɛɛ̀ŋ, wo Jisɛ̀ naiŋ wa gbìɛ̀ŋ wo Jinàuŋ nɔɔ̀ŋ maŋ jiio sùà. Yèè e teengaà wo Jinààŋ yààìŋ maŋ jiio sùà lɛ, niŋ naàŋ ɓɛìŋ mɔ̀nɔ̀ŋ wèè wò nyùùŋ ba doiŋ kaà. Efèfoo wo Jinàaŋ wòiŋ kàà e nɛ̀ɛŋ gbiŋ, yèè e yèɛ gbiŋ wò naìŋ kaà lɛ, è yaà tɔɔɓaaà, e fè tòa. Jɔ̀ɔ̀lɔìŋ e kàà wo Jinàaŋ dìì, yèè niŋ jeeè aŋ bàiŋbà nɔ̀ɔŋ wo Jisɛ̀ Kulaìɛ sùà.

²⁸ Nyɛ̀iŋ nààŋ jɔ̀àim nyàŋ, jèeìŋ aŋ bàiŋbà wo Jisɛ̀ Kulaì sùà, e wèè sèè wo hnàŋ wa nàwèè eiŋ kɛ̀ɛ̀nɛ̀ŋ ke jii tùlia yèè e naìŋ nyɛ̀ɛ̀nɛ̀ŋ è sàngè sùà kè ɗɔ̀ɔ̀ hnàauŋ nɛɛ̀ŋ diɛŋ.

²⁹ Nàŋ nyìmàŋ kɛ̀ wo Jisɛ̀ Kulaì yaà wo nyùùŋ tɔ̀ɔ̀nyaàŋ. Kpeiŋ nìŋ kuwa naŋ nyìmàŋ kɛ̀, wo nyùnɔ̀ɔ̀ŋ gbiŋ naŋ nyɛ̀nɛ̀ŋ e yèɛ yaà e tɔ̀ɔ̀nyaàŋ lɛ wò yaà jɔ̀à Dayà.